တ︀ိတ︀ု 2 - Khamti Shan

တ︀ြႃးဢ︀ꩫ︀်ႈꩬ︀ိုဝ်ႈꩫ︀ꩫ︀်ႈ

¹ တ︀ိတ︀ုꩴ︀း မ︀ႂ်းယ︀ႃႇ ꩬ︀မ︀်မ︀ႃတ︀ြႃးမ︀ႆ︀ႛ ဢ︀ဝ်ႈꩥ︀ႃးထက︀်ꩰꩬ︀ီꩬ︀ွꩫ︀်ꩭႂ်ႛတ︀ႃႉ။

² ၸ︀ူႛꩡ︀ႆ︀ၢးဢ︀ꩫ︀်ႈမ︀ႂ်းမ︀ႆ︀ႛ က︀ေꩬ︀ႃꩫ︀ႆ︀ႇၵ︀ဝ်မ︀ႆ︀ႛ က︀ူႈလ︀ွင︀်ႈမ︀ႆ︀ႛꩭႂ်ႛပ︀ူဝ်းၸ︀ိင︀်ႛပ︀ႅင︀်ႈယ︀င︀်းက︀ꩫ︀်ႈ၊ ꩡ︀ႂ်ႈဢ︀ိမ︀်ꩡ︀ႂ်ႈတ︀ီမ︀်ႈက︀ꩫ︀်ႈ၊ ဢ︀ိင︀်တ︀ြေယ︀င︀်းက︀ꩫ︀်ႈꩫ︀ႆ︀ႇꩬ︀ွꩫ︀်ꩭႂ်ႛတ︀ႃႉ။ ၵ︀ဝ်ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈၵ︀ိူင︀်ꩰꩬ︀ီ ပ︀ိူꩫ︀်ႈမ︀ႆ︀ႛက︀ေႃႇ ဝႃႈꩭၢက︀်ႉတ︀ေႇတ︀ေႇက︀ꩫ︀်ႈꩫ︀မ︀်။ မ︀ိူဝ်ႈယ︀ပ︀်ယ︀ၢက︀်ႉမ︀ႃးꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဝႃႈပ︀ꩫ︀်ႛၵ︀ိူင︀်ꩰက︀ꩫ︀်ႈꩫ︀မ︀်။

^3-4 ၸ︀ူႛယ︀ိင︀်းဢ︀ꩫ︀်ႈမ︀ႂ်းမ︀ႆ︀ႛ က︀ေꩬ︀ႃꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩫ︀င︀်ၸ︀ူႛမ︀ူတ︀်ꩡ︀ၢင︀်ꩫ︀ႆ︀ႇၵ︀ဝ်ထုက︀်ꩫ︀ီႈဢ︀ူꩫ︀က︀ꩫ︀်ႈ ꩭႂ်ႛပ︀ူဝ်းဢ︀ူက︀ꩫ︀်ႈꩫ︀ႆ︀ႇꩬ︀ွꩫ︀်ꩭႂ်ႛတ︀ႃႉ။ ဢ︀ꩫ︀်ႈၵ︀ႃႇပ︀ိူꩫ︀်ႈလ︀ေ၊ ဢ︀ꩫ︀်ႈက︀ိꩫ︀်ႈလ︀ဝ်ႛမ︀ဝ်ႇက︀မ︀်ႈꩫ︀ႆ︀ႇၵ︀ဝ် ပ︀ီꩭႂ်ႛꩭီတ︀်။ ၵ︀ဝ်ယ︀ႃႇပ︀ိူꩫ︀်ႈမ︀ႆ︀ႛ လ︀ွင︀်ႈꩫ︀ီႈဝႃႈꩬ︀ွꩫ︀်ꩡ︀ၢင︀်ႈ၊ ၸ︀ူႛယ︀ိင︀်းဢ︀ꩫ︀်ႈꩫ︀ုမ︀်ꩫ︀ႆ︀ႇၵ︀ဝ်မ︀ႆ︀ႛ ဝႃႈꩬ︀ွꩫ︀်ꩭႂ်ႛၸ︀ိူက︀်ꩭႂ်ႛꩫ︀မ︀်။ င︀ႆ︀းက︀ီး ၵ︀ဝ်က︀ေႃႇ ၸ︀ူႛၸ︀ူဝ်ၸ︀ူႛꩡ︀ဝ်ႛ၊ လ︀ုက︀်ႉၸ︀ူႛꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ꩭၢက︀်ႉꩡ︀ၢင︀်ႈမ︀ႃးဢ︀ူ။

⁵ ၸ︀ူႛယ︀ိင︀်းဢ︀ꩫ︀်ႈꩫ︀ုမ︀်ꩫ︀ႆ︀ႇၵ︀ဝ်က︀ူႈက︀ူဝ်ႇ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ထိꩫ︀်ဝႃႈပ︀ေႇꩫ︀မ︀်။ ၸ︀ူႛၸ︀ူဝ်ၸ︀ူႛꩡ︀ဝ်ႛမ︀ႆ︀ႛ ꩬ︀ႅတ︀်ႉꩡ︀ႃယ︀င︀်းꩬ︀ီ ဢ︀ꩫ︀်ႈၸ︀ူႛၸ︀ူဝ်ဢ︀ွꩫ︀်ႈမ︀ႆ︀ႛ ဝႃႈꩡ︀ွမ︀်းꩫ︀မ︀်။ ပ︀ိူꩫ︀်ႈမ︀ႆ︀ႛက︀ေႃႇဢ︀ီꩫ︀ူႈꩬ︀ီ ꩭိူꩫ︀်းၸ︀ူႛꩡ︀ဝ်ႛမ︀ႆ︀ႛက︀ေႃႇမ︀ိုင︀်ႇဝႃႈပ︀ေႇꩫ︀မ︀်။ င︀ႆ︀းက︀ီး ၸ︀ႂ်က︀ေႃႇ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩵ︀ႈက︀ေးလ︀ေးယ︀ဝ်ႇ။

⁶ ၸ︀ူႛꩡ︀ႆ︀ၢးဢ︀ꩫ︀်ႈꩫ︀ုမ︀်ꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩭႂ်ႛပ︀ူဝ်းထိꩫ︀်တ︀ူဝ်ႈၵ︀ိင︀်းၸ︀ူႛꩡ︀ဝ်ႛပ︀ီꩫ︀်ႈꩫ︀ႆ︀ႇ ꩬ︀ွꩫ︀်ꩭႂ်ႛတ︀ႃႉ။

⁷ မ︀ႂ်းၸ︀ူႛꩡ︀ဝ်ႛက︀ေႃႇ က︀ူႈꩡ︀ွင︀်ႈမ︀ႆ︀ႛꩭႂ်ႛပ︀ူဝ်းပ︀ိူꩫ︀်ႈယ︀ီင︀်ႈꩡ︀ွမ︀်းꩫ︀ႆ︀ႇ ꩭီတ︀်ပ︀ျႃး ဢ︀ူပ︀ျႃးတ︀ႃႉ။ မ︀ိူဝ်ႈမ︀ႂ်းꩬ︀ွꩫ︀်ꩫ︀ႆ︀ႇ ꩬ︀ိုဝ်ႈꩰတ︀ူဝ်ꩰ၊ လ︀ိူက︀်ႉꩰလ︀မ︀်ꩰꩬ︀ွꩫ︀်ꩭႂ်ႛတ︀ႃႉ။

⁸ ဢ︀ꩫ︀်ႈၸ︀ိတ︀်မ︀ဝ်ꩭႂ်ႛလ︀ွေႛꩬ︀ီ ꩬ︀ွꩫ︀်ထက︀်ꩰꩭႂ်ႛတ︀ႃႉ။ င︀ႆ︀းက︀ီး ꩬ︀ြႃဢ︀ꩫ︀်ႈမ︀ႂ်းမ︀ႆ︀ႛၸ︀ုꩫ︀်ႇပ︀ိꩫ︀်ႛꩫ︀ႆ︀ႇၵ︀ဝ် ꩭဝ်းမ︀ႆ︀ႛၵ︀ႃဢ︀ပ︀ႅတ︀်ႉမ︀ဝ်ꩫ︀ႆ︀ႛꩬ︀ီ ဢ︀ႆ︀ၢႈက︀ႃဢ︀ူ။

⁹ ၸ︀ူႛၵ︀ႃႛꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩭႂ်ႛပ︀ူဝ်းၵ︀ၢမ︀်းꩡ︀ဝ်ႛၵ︀ဝ်ထွမ︀်ꩫ︀ႆ︀ႇ ꩬ︀ွꩫ︀်ꩭႂ်ႛတ︀ႃႉ။ ၵ︀ဝ်ယ︀ႃႇ က︀ူႈꩡ︀ွင︀်ႈမ︀ႆ︀ႛ ꩭႂ်ႛပ︀ူဝ်းꩡ︀ဝ်ႛၵ︀ဝ်ပ︀ေꩡ︀ႂ်ႈꩫ︀ႆ︀ႇ ဝႃႈꩭီတ︀်ꩭႂ်ႛꩫ︀မ︀်။ ꩡ︀ဝ်ႛၵ︀ဝ်မ︀ႆ︀ႛ ꩵ︀ႈꩫ︀ႆ︀ႛꩡ︀ႃႉၵ︀ၢမ︀်း။

¹⁰ လ︀ၢက︀်ႉက︀ေႃႇꩵ︀ႈꩫ︀ႆ︀ႛလ︀ၢက︀်ႉ။ ꩡ︀ဝ်ႛၵ︀ဝ်မ︀ႆ︀ႛ ဝႃႈꩭီတ︀်ꩫ︀ီႈꩫ︀ီႈ ꩬ︀ႅတ︀်ႉꩡ︀ႃဝႃႈယ︀င︀်းꩫ︀မ︀်။ င︀ႆ︀းက︀ီး ꩭီတ︀်က︀ꩬ︀င︀်ꩫ︀က︀ေႃႇ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩡ︀ဝ်ႛၵ︀ေꩬ︀ေꩭဝ်းမ︀ႆ︀ႛ ပ︀ိူꩫ︀်ႈꩫ︀ၢပ︀်ႉယ︀မ︀်ႈမ︀ႃးဢ︀ူ။

လ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ီꩫ︀ူႈမ︀ႅတ︀်ႉတ︀ႃꩫ︀ၵ︀ႃ လ︀ွင︀်ႈꩡ︀ူဝ်ႈတ︀ႃႈဢ︀ꩬ︀ၢက︀်ႉမ︀ႂ်

¹¹ ၸ︀ြႃးပ︀ီꩫ︀်ႈꩡ︀ဝ်ႛက︀ူꩫ︀်းတ︀င︀်းမ︀ိူင︀်းမ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛၵ︀ေꩬ︀ေꩭႂ်ႛꩫ︀ႆ︀ႇ က︀ျေးꩡ︀ူးမ︀ꩫ︀်းꩡ︀ဝ်ႛ ပ︀ျႃးꩭႂ်ႛမ︀ႃးယ︀ဝ်ႇ။

^12-13 တ︀ၢင︀်းက︀ႅင︀်းဢ︀ꩫ︀်ႈမ︀ဝ်က︀ူဝ်ႈယ︀မ︀်ႈၸ︀ြႃးပ︀ီꩫ︀်ႈꩡ︀ဝ်ႛ၊ ဢ︀ꩫ︀်ႈꩭွႆ︀ႛꩡ︀ႂ်ႈမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩭႂ်ႛပ︀ူဝ်းꩭဝ်းၵ︀ွတ︀်ꩫ︀ႆ︀ႇ မ︀ꩫ︀်းꩡ︀ဝ်ႛပ︀ျႃးတ︀ၢင︀်းꩭႂ်ႛမ︀ႃးယ︀ဝ်ႇ။ မ︀ိူဝ်ႈꩭဝ်းဢ︀ူမ︀ိူင︀်းက︀ၢင︀်ႈꩫ︀ႆ︀ႇ ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ဝ်ႛၵ︀ေꩬ︀ေꩭဝ်းဢ︀ꩫ︀်ႈယ︀ႂ်မ︀ႅတ︀်ႉꩫ︀ႆ︀ႇ မ︀ူꩫ︀်ႈၸ︀ုင︀်းꩭိူဝ်ႈပ︀လ︀ွင︀်ပ︀လ︀ွင︀်ꩬ︀ီ တ︀ီပ︀ွက︀်ႉမ︀ႃးꩫ︀ႆ︀ႇမ︀ႆ︀ႛ ꩡ︀ူမ︀်းꩰꩭုမ︀်ꩰꩬ︀ီ ဝႃႈတ︀ႂ်းထႃႛꩬ︀ီဢ︀ူꩫ︀မ︀်။ ꩭဝ်းၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛက︀ေႃႇထိꩫ︀်ꩬ︀ီ ꩭူဝ်ꩡ︀ႂ်ႈꩬ︀ိုဝ်ႈꩰꩫ︀ꩫ︀်ႈꩰင︀ႆ︀း ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛထုက︀်ꩡ︀ႂ်ႈꩫ︀က︀ꩫ︀်ႈဝႃႈဢ︀ူက︀ꩫ︀်ႈꩫ︀မ︀်။

¹⁴ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ ꩭဝ်းမ︀ႆ︀ႛ လ︀ုက︀်ႉဢ︀ꩫ︀်ႈမ︀ဝ်ꩫ︀ီႈတ︀င︀်းလ︀ုင︀်မ︀ႆ︀ႛ ꩭႂ်ႛပ︀ူဝ်းဢ︀ဝ်ႈမ︀ူတ︀်ꩡ︀ၢင︀်ꩭႂ်ႛꩫ︀ႆ︀ႇလ︀ိူင︀်ႈ၊ ꩭႂ်ႛပ︀ူဝ်းꩭဝ်း ပ︀ီꩫ︀်ႈက︀ူꩫ︀်းမ︀ꩫ︀်းꩡ︀ဝ်ႛꩬ︀ီ ꩭီတ︀်လ︀ွင︀်ႈꩫ︀ီႈꩫ︀ႆ︀ႇလ︀ိူင︀်ႈ ဢ︀ꩬ︀ၢက︀်ႉမ︀ꩫ︀်းꩡ︀ဝ်ႛꩭႂ်ႛꩬ︀ီ ၵ︀ေꩬ︀ေမ︀ႃးယ︀ဝ်ႇ။

¹⁵ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ လ︀ွင︀်ႈꩫ︀ႆ︀ႇဢ︀ဝ်ႈဢ︀ႃꩫ︀ႃꩬ︀ွꩫ︀်ꩭႂ်ႛꩬ︀ီ ꩬ︀ႂ်ꩭႅင︀်းꩭႂ်ႛ ꩬ︀ုင︀်းမ︀ႃးꩭႂ်ႛတ︀ႃႉ။ မ︀ႂ်းမ︀ႆ︀ႛ ꩭႂ်ႛပ︀ူဝ်းပ︀ိူꩫ︀်ႈꩫ︀ၢပ︀်ႉယ︀မ︀်ႈꩫ︀ႆ︀ႇက︀ေႃႇ ꩬ︀တ︀ိတ︀ႃႉ။