ရ︀ေႃမ︀ 9 - Khamti Shan

ၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃက︀ူꩫ︀်းမ︀ꩫ︀်းꩡ︀ဝ်ႛၵ︀ဝ်

^1-2 က︀ဝ်ႈပ︀ီꩫ︀်ႈတ︀ပ︀ေးꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ၵ︀ၢမ︀်းဢ︀ꩫ︀်ႈꩬ︀ိုဝ်ႈꩡ︀ႂ်ႈꩫ︀ႆ︀ၢႈꩫ︀မ︀် က︀ဝ်ႈဝႃႈꩫ︀ႆ︀ႇ။ က︀ဝ်ႈꩵ︀ႈၸ︀ႅတ︀်ႉ။ ၵ︀ၢမ︀်းက︀ဝ်ႈꩬ︀ိုဝ်ႈꩡ︀ႂ်ႈဢ︀ူꩫ︀ꩫ︀ႆ︀ႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛ ဢ︀ုပ︀်ႉပ︀ိုင︀်ꩫ︀ႆ︀ႇက︀ေႃႇ ꩡ︀ႂ်ႈၵ︀ွꩫ︀်က︀ဝ်ႈမ︀ႆ︀ႛ ဢ︀ဝ်ႈတ︀မ︀်းꩡ︀ႂ်ႈꩭႂ်ႛဢ︀ူ။ က︀ဝ်ႈၵ︀ႂ်ႈဝႃႈꩫ︀ႆ︀ႇယ︀ႃႇ ꩡ︀ႃႇꩭၢင︀်းꩡ︀ိူဝ်ႇၸ︀ꩫ︀်းက︀ျူးက︀ဝ်ႈၵ︀ဝ် က︀ဝ်ႈ ၵ︀ီၵ︀ီၵ︀ုမ︀်ꩰꩬ︀ီ မ︀ႆ︀ႛꩡ︀ႂ်ႈဢ︀ူမ︀ဝ်ꩬ︀ဝ်းꩫ︀မ︀်။

³ ꩭႂ်ႛပ︀ူဝ်းၵ︀ဝ် လ︀ုက︀်ႉဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛပ︀ူင︀်ႈတ︀ၢမ︀်မ︀ႆ︀ႛ ꩫ︀ႆ︀ႛလ︀ွတ︀်ႉꩫ︀ႆ︀ႇ ပ︀ီꩫ︀်ႈꩫ︀ႆ︀ႛက︀ီး က︀ဝ်ႈၸ︀ူႛꩡ︀ဝ်ႛꩬ︀ိုင︀် တ︀ၢမ︀်ဢ︀ပ︀ႅတ︀်ႉၵ︀ဝ်မ︀ႆ︀ႛ တ︀ုင︀်းဢ︀ဝ်ႈꩬ︀ီ လ︀ုက︀်ႉꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛတ︀မ︀ိူင︀်း ၵ︀ၢမ︀်ၵ︀ႂ်ႈၸ︀ၢက︀်ႉက︀ႃဢ︀ဝ်ႈꩫ︀မ︀်။

⁴ ၵ︀ဝ်ယ︀ႃႇ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉꩬ︀ီ ဢ︀ဝ်ႈပ︀ီꩫ︀်ႈ လ︀ုက︀်ႉမ︀ꩫ︀်းꩡ︀ဝ်ႛဝႆ︀ႇꩫ︀ႆ︀ႇၵ︀ဝ်ꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛ မ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛ ပ︀ျႃးꩭႂ်ႛမ︀ႃးယ︀ဝ်ႇ။ ၵ︀ၢမ︀်းၵ︀တ︀်ႉꩫ︀ႆ︀ႇၵ︀ဝ်က︀ေႃႇ တ︀င︀်းၵ︀ဝ်ၵ︀တ︀်ႉဝႆ︀ႇꩬ︀ီ က︀ျမ︀်းꩬ︀ိꩫ︀်မ︀ꩫ︀်းꩡ︀ဝ်ႛက︀ေႃႇ ၵ︀ဝ်မ︀ႆ︀ႛꩭႂ်ႛမ︀ႃးယ︀ဝ်ႇ။ မ︀ꩫ︀်းꩡ︀ဝ်ႛမ︀ႆ︀ႛ ꩭလ︀ိုဝ်ဝႃႈပ︀ႆ︀ၢႛဝႆ︀ႈꩫ︀ꩫ︀ႆ︀ႇ ၵ︀ဝ်မ︀ႆ︀ႛပ︀ျႃးꩭႂ်ႛꩬ︀ီ က︀တ︀ိꩫ︀ႆ︀ႇၵ︀ဝ်က︀ေႃႇ ၵ︀ဝ်မ︀ႆ︀ႛꩭႂ်ႛမ︀ႃးယ︀ဝ်ႇ။

⁵ ၵ︀ဝ်ယ︀ႃႇ ꩡ︀ိူဝ်ႇၵ︀ိူဝ်း ဢ︀ꩫ︀်ႈလ︀ုက︀်ႉပ︀ူလ︀ီꩫ︀်ꩭေပ︀ရ︀ူး ဢ︀ꩫ︀်ႈꩡ︀ိုဝ်ႈယ︀ႂ်ꩫ︀ႆ︀ႇၵ︀ဝ်မ︀ႆ︀ႛ ၵ︀ိူဝ်းမ︀ႃးꩫ︀မ︀်။ ꩡ︀ွမ︀်းꩬ︀ႆ︀ၢက︀ူꩫ︀်းက︀ီး ꩡ︀ဝ်ႛယ︀ေꩬ︀ုၵ︀ရ︀ီတ︀်တ︀မ︀ိူင︀်းက︀ေႃႇ ၸ︀ꩫ︀်းၵ︀ဝ်ꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈဢ︀ုပ︀်ႉပ︀ိုင︀်တ︀င︀်းမ︀ိူင︀်းမ︀ႆ︀ႛ က︀ူꩫ︀်းတ︀င︀်းမ︀ိူင︀်း မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩭႂ်ႛယ︀ူဝ်းယ︀ွင︀်ႛက︀ꩫ︀်ႈက︀တ︀ႃႉ။ ꩬ︀ႃႈထု။

⁶ လ︀ွင︀်ႈꩫ︀ႆ︀ႇမ︀ႆ︀ႛ ꩫ︀င︀်က︀တ︀ိၸ︀ြႃးပ︀ီꩫ︀်ႈꩡ︀ဝ်ႛꩫ︀က︀ꩫ︀်ႈ ꩵ︀ႈပ︀ီꩫ︀်ႈမ︀ႃးꩫ︀ꩬ︀ီ က︀ဝ်ႈꩵ︀ႈဝႃႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ဢ︀ီတ︀်ꩬ︀ြေးတ︀င︀်းမ︀ိူင︀်း မ︀ဝ်လ︀ွေႛꩬ︀ီꩫ︀မ︀်။

⁷ ၵ︀ိုꩫ︀်းꩫ︀က︀ဝ် ဢ︀ꩫ︀်ႈလ︀ုက︀်ႉဢ︀ႃပ︀ြႃꩭၢမ︀်မ︀ႆ︀ႛ ၵ︀ိူဝ်းမ︀ႃးꩫ︀ႆ︀ႇၵ︀ဝ်တ︀င︀်းလ︀ုင︀်က︀ေႃႇ ၵ︀ိူဝ်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ လ︀ိူက︀်ႉဝႆ︀ႇတ︀ေႇတ︀ေႇꩵ︀ႈꩡ︀ႂ်ႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ႃပ︀ြႃꩭၢမ︀်မ︀ႆ︀ႛ “ဢ︀ꩫ︀်ႈလ︀ုက︀်ႉဢ︀ေꩬ︀က︀်မ︀ႆ︀ႛၵ︀ိူဝ်းမ︀ႃးꩫ︀ႆ︀ႇၵ︀ဝ်မ︀ႆ︀ႛꩫ︀မ︀် က︀ဝ်ႈတ︀ီမ︀တ︀်ႉၵ︀ိူဝ်းမ︀ႂ်းတ︀ေႇတ︀ေႇꩫ︀ႆ︀ႇ” ꩫ︀ꩫ︀မ︀်ဝႃႈဝႆ︀ႇꩫ︀ႆ︀ႇ။

⁸ င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ꩫ︀်ႈလ︀ဝ်ႈတ︀ူဝ်ႈလ︀ုက︀်ႉဢ︀ႃပ︀ြႃꩭၢမ︀်မ︀ႆ︀ႛ ယ︀င︀်းမ︀ႃးꩫ︀ႆ︀ႇၵ︀ဝ်တ︀င︀်းလ︀ုင︀်မ︀ႆ︀ႛ က︀ူꩫ︀်းမ︀ꩫ︀်းꩡ︀ဝ်ႛꩫ︀ꩬ︀ီꩵ︀ႈမ︀တ︀်ႉ။ ဢ︀ꩫ︀်ႈꩫ︀င︀်မ︀ꩫ︀်းꩡ︀ဝ်ႛ ဢ︀ႃပ︀ြႃꩭၢမ︀်မ︀ႆ︀ႛက︀တ︀ိꩭႂ်ႛဝႆ︀ႇꩫ︀က︀ꩫ︀်ႈ ယ︀င︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် မ︀တ︀်ႉက︀ူꩫ︀်းမ︀ꩫ︀်းꩡ︀ဝ်ႛတ︀ေႇတ︀ေႇꩫ︀မ︀်။

⁹ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ိူဝ်ႈဢ︀ႃပ︀ြႃꩭၢမ︀်မ︀ႆ︀ႛက︀တ︀ိꩭႂ်ႛꩫ︀ႆ︀ႇ “မ︀ိူဝ်ႈယ︀ၢမ︀်းထိုင︀်ꩫ︀ႆ︀ႇ က︀ဝ်ႈတ︀ီမ︀ႃးပ︀ွက︀်ႉꩫ︀မ︀်။ မ︀ိူဝ်ႈဢ︀မ︀ႂ်း ꩬ︀ႃရ︀ႃ လ︀ုက︀်ႉꩡ︀ႆ︀ၢးက︀ူဝ်ႇလ︀ိူင︀်ႈတ︀ီယ︀င︀်းꩫ︀မ︀်” ꩫ︀ꩬ︀ီဝႃႈမ︀ႃးဢ︀ူ။

¹⁰ လ︀ုက︀်ႉꩡ︀ၢႆ︀းဢ︀မ︀ႂ်းယ︀ႃႇ ပ︀ူလ︀ီꩫ︀်ꩭဝ်း ဢ︀ေꩬ︀က︀်ꩫ︀မ︀်။ ဢ︀ေꩬ︀က︀်ယ︀ႃႇ တ︀င︀်းရ︀ေပ︀ႅက︀်ၵ︀ဢ︀ဝ်ႈက︀ꩫ︀်ႈꩬ︀ီ ꩬ︀ွင︀်ၵ︀ႃမ︀ႆ︀ႛ လ︀ုက︀်ႉꩡ︀ႆ︀ၢးꩬ︀ွင︀်က︀ူဝ်ႇဢ︀ꩫ︀်ႈၸ︀ႃက︀ꩫ︀်ႈ ယ︀င︀်းမ︀ႃးဢ︀ူ။

^11-12 ꩫ︀ႆ︀ႇꩫ︀က︀ေႃႇ မ︀ိူဝ်ႈလ︀ၵ︀ႃဢ︀မ︀ႂ်းꩫ︀ၵ︀ႃ ယ︀င︀်းꩫ︀ၢႆ︀ႈက︀ေႃႇမ︀ဝ်ပ︀ႆ︀ယ︀င︀်း၊ လ︀ွင︀်ႈꩫ︀ီႈလ︀ွင︀်ႈꩡ︀ႃႇက︀ꩬ︀င︀်က︀ေႃႇ မ︀ဝ်ပ︀ႆ︀ꩭီတ︀်ပ︀ုꩫ︀်ႛ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ရ︀ေပ︀ႅက︀်ၵ︀မ︀ႆ︀ႛဝႃႈꩫ︀ႆ︀ႇ “လ︀ုက︀်ႉꩡ︀ႆ︀ၢးမ︀ႂ်းꩫ︀ၵ︀ႃမ︀ႆ︀ႛ ၸ︀ူႛပ︀ီႈယ︀ႃႇ တ︀ီပ︀ီꩫ︀်ႈၵ︀ႃႛၸ︀ူႛꩫ︀ွင︀်ႇꩫ︀မ︀်” ꩫ︀ဝꩫ︀်ႇ။ ၸ︀ြႃးပ︀ီꩫ︀်ႈꩡ︀ဝ်ႛဝႃႈင︀ႆ︀းꩫ︀ႆ︀ႇယ︀ႃႇ လ︀ႆ︀ၢးပ︀ိူဝ်ႈတ︀ၢင︀်းက︀ႅင︀်းၵ︀ဝ်ꩬ︀ီ လ︀ိူက︀်ႉဢ︀ဝ်ႈꩵ︀ႈꩡ︀ႂ်ႈ။ ဢ︀ꩫ︀်ႈမ︀ꩫ︀်းၸ︀ူႛꩡ︀ဝ်ႛꩬ︀င︀် င︀ႆ︀းꩬ︀ီ ꩭွင︀်ႇဢ︀ဝ်ႈꩫ︀မ︀်ꩫ︀ꩫ︀ႆ︀ႇ ပ︀ျႃးက︀ွတ︀်ꩫ︀ꩫ︀မ︀်။

¹³ င︀ႆ︀းꩫ︀ႆ︀ႇꩬ︀ီ “ယ︀ႃက︀ုမ︀ႆ︀ႛ က︀ဝ်ႈꩭၢက︀်ႉမ︀ႃးဢ︀ူ။ ဢ︀ေꩬ︀ေႃမ︀ႆ︀ႛယ︀ႃႇ ꩡ︀င︀်းမ︀ႃးဢ︀ူ” ꩫ︀ꩬ︀ီက︀ျမ︀်းလ︀ိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀မ︀်။

¹⁴ လ︀ႆ︀ၢးပ︀ိူဝ်ႈဝႃႈင︀ႆ︀းꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛ ꩵ︀ႈတ︀ြႃးꩫ︀က︀ျႃးတ︀ီဝႃႈ။ င︀ႆ︀းꩵ︀ႈꩫ︀ႆ︀ႛဝႃႈပ︀ိူင︀်ႈလ︀ူင︀်။

¹⁵ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ေႃꩬ︀ေမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇယ︀ႃႇ “က︀ူဝ်ႇဢ︀ꩫ︀်ႈက︀ဝ်ႈၵ︀ႂ်ႈꩫ︀ီႈမ︀ႆ︀ႛ က︀ဝ်ႈꩭီတ︀်လ︀ွင︀်ႈꩫ︀ီႈꩫ︀မ︀်။ က︀ူဝ်ႇဢ︀ꩫ︀်ႈက︀ဝ်ႈၵ︀ႂ်ႈဢ︀ီꩫ︀ူႈမ︀ႆ︀ႛ ဢ︀ီꩫ︀ူႈꩫ︀မ︀်။

¹⁶ င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းꩭဝ်းမ︀ႆ︀ႛဢ︀ီꩫ︀ူႈꩫ︀ႆ︀ႇယ︀ႃႇ ဢ︀ူတ︀ီႈမ︀ꩫ︀်းꩡ︀ဝ်ႛꩫ︀မ︀်။ ဢ︀ူတ︀ီႈက︀ူꩫ︀်းꩭဝ်းꩵ︀ႈꩡ︀ႂ်ႈ၊ က︀ူꩫ︀်းꩭဝ်းꩭီတ︀်က︀ေႃႇꩵ︀ႈꩫ︀ႆ︀ႛ။

¹⁷ က︀ျမ︀်းလ︀ိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ုꩫ︀်ꩭူဝ်ၵ︀မ︀်းဢ︀ီက︀ျီပ︀်မ︀ႆ︀ႛ ဝႃႈဝႆ︀ႇꩫ︀ႆ︀ႇ “မ︀ႂ်းမ︀ႆ︀ႛက︀ဝ်ႈလ︀ိူက︀်ႉတ︀ၢင︀်ꩡ︀ဝ်ႛꩭူဝ်ၵ︀မ︀်းꩫ︀ႆ︀ႇယ︀ႃႇ ꩭႂ်ႛပ︀ူဝ်းက︀ဝ်ႈမ︀ႆ︀ႛ တ︀င︀်းက︀မ︀်ၸ︀ႃတ︀ွင︀်းမ︀ႃးꩫ︀ႆ︀ႇ မ︀ႂ်းမ︀ႆ︀ႛတ︀ိုဝ်းꩬ︀ီ တ︀ꩫ︀်းၵ︀ူဝ်းက︀ဝ်ႈပ︀ျႃးက︀ွတ︀်ꩫ︀ꩫ︀မ︀်” ꩫ︀ꩫ︀မ︀်။

¹⁸ င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူဝ်ႇဢ︀ꩫ︀်ႈမ︀ꩫ︀်းꩡ︀ဝ်ႛ ၵ︀ႂ်ႈဢ︀ီꩫ︀ူႈမ︀ႆ︀ႛဢ︀ီꩫ︀ူႈꩬ︀ီ ဢ︀ꩫ︀်ႈမ︀ꩫ︀်းꩡ︀ဝ်ႛၵ︀ႂ်ႈꩭႂ်ႛတ︀ၢꩫ︀်ႛယ︀ပ︀်မ︀ႆ︀ႛ ဢ︀ဝ်ႈတ︀ၢꩫ︀်ႛယ︀ပ︀်ꩭႂ်ႛဢ︀ူ။

ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛတ︀ေႃးꩬ︀ႃးꩫ︀ၵ︀ႃဢ︀ီꩫ︀ူႈ

¹⁹ က︀ူꩫ︀်းက︀မ︀်ႈၸ︀ွင︀်းယ︀ႃႇ “ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛ ၵ︀ႂ်ႈꩭႂ်ႛပ︀ီꩫ︀်ႈꩫ︀က︀ꩫ︀်ႈ က︀ူꩫ︀်းꩭဝ်းမ︀ႆ︀ႛ ဢ︀ဝ်ႈပ︀ီꩫ︀်ႈꩬ︀ီဢ︀ူက︀ီး မ︀ိူဝ်ႈက︀ူꩫ︀်းꩭဝ်း ၵ︀ၢမ︀်းမ︀ꩫ︀်းꩡ︀ဝ်ႛမ︀ဝ်ထွမ︀်ꩫ︀ႆ︀ႇ ꩭီတ︀်က︀ꩬ︀င︀်ꩫ︀ႆ︀ မ︀ꩫ︀်းꩡ︀ဝ်ႛတ︀ၢင︀်ဢ︀ပ︀ႅတ︀်ႉꩫ︀ႆ︀ႇ” ꩫ︀ꩬ︀ီꩡ︀ၢင︀်ႈၵ︀ႂ်ႈထၢမ︀်ဢ︀ူ။ ဢ︀လ︀ၢင︀်းမ︀ꩫ︀်းꩡ︀ဝ်ႛမ︀ႆ︀ႛ ၸ︀ႂ်က︀ေႃႇတ︀ႃႛꩵ︀ႈꩫ︀ႆ︀ႛ။

²⁰ ꩫ︀ႆ︀ႇယ︀ႃႇထၢမ︀်ꩵ︀ႈꩫ︀ႆ︀ႛ။ က︀ူꩫ︀်းꩭဝ်းယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭလ︀ိုဝ်က︀ေႃႇ ထၢမ︀်င︀ႆ︀းꩵ︀ႈထုက︀်။ ဢ︀ꩫ︀်ႈၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇယ︀ႃႇ ꩡ︀ဝ်ႛၸ︀ၢꩫ︀်ꩬ︀ၢင︀်းမ︀ႆ︀ႛ “မ︀ႂ်းꩡ︀ဝ်ႛ ꩭီတ︀်က︀ꩬ︀င︀်ꩫ︀ႆ︀ က︀ဝ်ႈမ︀ႆ︀ႛၸ︀ၢꩫ︀်ꩬ︀ၢင︀်းင︀ႆ︀းဝႆ︀ႇꩫ︀ႆ︀ႇ” ꩫ︀ꩬ︀ီထၢမ︀်မ︀ဝ်ꩫ︀ႆ︀ႛꩫ︀က︀ꩫ︀်ႈꩫ︀မ︀်။

²¹ ၸ︀ူႛꩭီတ︀်မ︀ူဝ်ႛယ︀ႃႇ ꩫ︀ိꩫ︀်ႈꩫ︀ိဝ်မ︀ႆ︀ႛ က︀ႃႈꩫ︀င︀်မ︀ꩫ︀်းထုက︀်ꩡ︀ႂ်ႈꩫ︀ႆ︀ႇ ꩭီတ︀်ꩫ︀ႆ︀ႛမ︀ဝ်ꩡ︀ႂ်ႈ။ လ︀ုက︀်ႉꩫ︀ိꩫ︀်ႈꩫ︀ိဝ်က︀ွင︀်ႈလ︀ိူင︀်ႈမ︀ႆ︀ႛ မ︀ူဝ်ႛဢ︀ꩫ︀်ႈꩡ︀ႅင︀်းတ︀မ︀ိူင︀်း ဢ︀ꩫ︀်ႈမ︀ဝ်ꩡ︀ႅင︀်းတ︀မ︀ိူင︀်း ꩭီတ︀်ꩫ︀ႆ︀ႛမ︀ဝ်ꩡ︀ႂ်ႈ။

²² ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ င︀ႆ︀းꩫ︀မ︀်ꩭီတ︀်ꩫ︀ႆ︀ႇ။ မ︀ꩫ︀်းꩡ︀ဝ်ႛ က︀ူꩫ︀်းꩭဝ်းမ︀ႆ︀ႛ တ︀ေႃးꩬ︀ႃးမ︀ꩫ︀်းꩡ︀ဝ်ႛꩫ︀ၵ︀ႃ တ︀ꩫ︀်းၵ︀ူဝ်းမ︀ꩫ︀်းꩡ︀ဝ်ႛ ၵ︀ႂ်ႈပ︀ျႃးꩡ︀ုꩫ︀်ႈꩰဢ︀ူ။ ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈလ︀ူႇပ︀ႅက︀်ႉထႅက︀်ႉꩬ︀ီ မ︀ꩫ︀်းꩡ︀ဝ်ႛတ︀ီပ︀ႅတ︀်ႉတ︀ြႃးꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛꩬ︀ေးၵ︀ၢမ︀်လ︀ူင︀်ꩫ︀မ︀်။

²³ ꩫ︀ႆ︀ႇꩬ︀ေႇမ︀ဝ်က︀ႃး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛဢ︀ꩫ︀်ႈယ︀ႂ်မ︀ႅတ︀်ႉလ︀ူင︀်ꩫ︀ႆ︀ႇက︀ေႃႇ ꩭဝ်းက︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛ ဢ︀ီꩫ︀ူႈꩫ︀ႆ︀ႇၵ︀ဝ်မ︀ႆ︀ႛ ၵ︀ႂ်ႈပ︀ျႃးꩭႂ်ႛလ︀ူင︀်ꩫ︀မ︀်။ င︀ႆ︀းꩬ︀ီ ꩫ︀င︀်မ︀ꩫ︀်းꩡ︀ဝ်ႛ ꩡ︀ႃႇꩭဝ်းမ︀ေးꩭႅမ︀်းဝႆ︀ႇမ︀ႃးꩫ︀က︀ꩫ︀်ႈ မ︀ူꩫ︀်ႈၸ︀ုင︀်းဢ︀ꩫ︀်ႈတ︀ီမ︀်ႈက︀ုမ︀်လ︀ူင︀်ꩫ︀ႆ︀ႇ ꩭဝ်းမ︀ႆ︀ႛꩭႂ်ႛမ︀ႃးယ︀ဝ်ႇ။

²⁴ ꩭဝ်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭွင︀်ႇဝႆ︀ႇꩫ︀ႆ︀ႇၵ︀ဝ်ꩫ︀မ︀်။ ဢ︀ꩫ︀်ႈမ︀ꩫ︀်းꩡ︀ဝ်ႛꩭွင︀်ႇဝႆ︀ႇꩫ︀ႆ︀ႇၵ︀ဝ်မ︀ႆ︀ႛ က︀ျူးတ︀မ︀ိူင︀်း ဢ︀ꩫ︀်ႈက︀ျူးမ︀ဝ်ꩡ︀ႂ်ႈတ︀မ︀ိူင︀်းလ︀ွေႛဢ︀ူ။

²⁵ က︀ျမ︀်းꩭေꩬ︀ႃယ︀မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇ “ဢ︀ꩫ︀်ႈက︀ူꩫ︀်းက︀ဝ်ႈမ︀ဝ်ꩡ︀ႂ်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛ က︀ူꩫ︀်းက︀ဝ်ႈꩫ︀ꩬ︀ီ က︀ဝ်ႈတ︀ီꩭွင︀်ႇꩫ︀မ︀်။ က︀ူꩫ︀်းဢ︀ꩫ︀်ႈက︀ဝ်ႈမ︀ဝ်ꩭၢက︀်ႉမ︀ႃးမ︀ႆ︀ႛ ꩭွႆ︀ႛꩭၢက︀်ႉꩫ︀ꩬ︀ီ က︀ဝ်ႈတ︀ီꩭွင︀်ႇꩫ︀မ︀်။

²⁶ ꩬ︀င︀်ဝႃႈ မ︀ၢꩫ︀်ႛလ︀ိူင︀်ႈ၊ ဝီင︀်းလ︀ိူင︀်ႈမ︀ႆ︀ႛ ꩬ︀ူယ︀ႃႇက︀ူꩫ︀်းက︀ဝ်ႈꩵ︀ႈꩡ︀ႂ်ႈꩫ︀ꩬ︀ီ က︀ဝ်ႈဝႃႈမ︀ႃးက︀ီး မ︀ၢꩫ︀်ႛ၊ ဝီင︀်းဢ︀မ︀ႂ်းမ︀ႆ︀ႛတ︀ေႇတ︀ေႇ ꩬ︀ူယ︀ႃႇ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်ꩫ︀မ︀်ꩫ︀ꩬ︀ီ က︀ဝ်ႈတ︀ီဝႃႈꩫ︀မ︀်” ꩫ︀ဝꩫ︀်ႇ။

²⁷ ꩡ︀ႃႇလ︀ိူင︀်ႈ လ︀ွင︀်ႈဢ︀ီတ︀်ꩬ︀ြေးꩫ︀ႆ︀ႇၵ︀ဝ် ꩭေꩬ︀ႃယ︀တ︀ႅဝ်ဝႆ︀ႇꩫ︀ႆ︀ႇယ︀ႃႇ “ဢ︀ီတ︀်ꩬ︀ြေးꩫ︀ႆ︀ႇၵ︀ဝ် ꩫ︀င︀်မ︀ိတ︀်ႉꩬ︀ႆ︀ၢးꩫ︀မ︀်ႇပ︀ၢင︀်လ︀ႆ︀ၢꩫ︀က︀ꩫ︀်ႈꩫ︀မ︀်ꩫ︀က︀ေႃႇ ၵ︀ဝ်ꩡ︀ွꩫ︀်လ︀ိူင︀်ႈမ︀ႆ︀ႛꩫ︀ႆ︀ၢႈꩫ︀မ︀် ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ေꩬ︀ေꩭႂ်ႛꩫ︀ႆ︀ႇ။

²⁸ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းတ︀င︀်းက︀မ︀်ၸ︀ႃမ︀ႆ︀ႛꩭီတ︀်ꩡ︀ိဝ်းꩰ တ︀ီပ︀ႅတ︀်ႉတ︀ြႃးꩬ︀ီꩫ︀မ︀်” ꩫ︀ဝꩫ︀်ႇ။

²⁹ တ︀ၢင︀်တ︀ီႈမ︀ႆ︀ႛက︀ေႃႇ ꩭေꩬ︀ႃယ︀ဝႃႈဝႆ︀ႇꩫ︀ႆ︀ႇ “ꩬ︀င︀်ဝႃႈ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛတ︀ꩫ︀်းၵ︀ူဝ်းဢ︀ꩫ︀ꩫ︀်တ︀ꩬ︀လ︀ႂ်ႈ လ︀ုက︀်ႉလ︀ၢꩫ︀်ꩭဝ်းက︀မ︀်ႈၸ︀ွင︀်းမ︀ႆ︀ႛ မ︀ဝ်ဢ︀ဝ်ႈက︀ိူတ︀်ꩭႂ်ႛက︀ီး ၸ︀ꩫ︀်းꩭဝ်းယ︀ႃႇ ꩫ︀င︀်ဝီင︀်းꩬ︀ေႃတ︀ုင︀်ꩫ︀ၵ︀ႃက︀ေႃမ︀ေႃရ︀ꩫ︀က︀ꩫ︀်ႈ လ︀ူႇꩭႆ︀ၢက︀ႃဢ︀ူ” ꩫ︀ဝꩫ︀်ႇ။

ၸ︀ꩫ︀်းဢ︀ီတ︀်ꩬ︀ြေးၵ︀ဝ်ꩫ︀ၵ︀ႃၵ︀ၢဝ်ႈၵ︀ၢမ︀်းꩫ︀ီႈ

³⁰ ဢ︀ꩫ︀်ႈꩭဝ်းၵ︀ႂ်ႈဝႃႈꩫ︀ႆ︀ႇယ︀ႃႇ င︀ႆ︀းꩫ︀မ︀်။ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ယ︀ႃႇ ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇ ꩵ︀ႈꩬ︀ေႈꩡ︀ႃႉမ︀ႃး။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ၵ︀ဝ်ယ︀ုမ︀်ယ︀မ︀်ႈꩬ︀ီ ၵ︀ဝ်မ︀ႆ︀ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်မ︀ႃးယ︀ဝ်ႇ။

³¹ ꩫ︀ႆ︀ႇꩫ︀က︀ေႃႇ ၸ︀ꩫ︀်းဢ︀ီတ︀်ꩬ︀ြေးၵ︀ဝ် ꩭႂ်ႛပ︀ူဝ်းꩬ︀ိုဝ်ႈတ︀ူဝ်ꩫ︀ႆ︀ႇ ꩭီတ︀်ဢ︀ၵ︀ႅက︀်ႉꩬ︀ီ က︀မ︀်ႈꩬ︀ိꩫ︀်ဢ︀ူꩫ︀က︀ေႃႇ ၵ︀ဝ်ꩵ︀ႈꩬ︀ိုဝ်ႈတ︀ူဝ်မ︀ႃး။

³² ပ︀ီꩫ︀်ႈင︀ႆ︀းꩫ︀ႆ︀ႇ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ဝ်ယ︀ႃႇ တ︀ၢင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈမ︀ႆ︀ႛယ︀ႃႇ မ︀ဝ်ပ︀ိုင︀်ႈဢ︀ိင︀်ႈꩬ︀ီ ဢ︀ꩫ︀်ႈၵ︀ဝ်က︀မ︀်ႈက︀ႅင︀်းမ︀ႆ︀ႛꩬ︀ိုင︀် က︀ႃပ︀ိုင︀်ႈဢ︀ိင︀်ႈꩬ︀ီꩫ︀မ︀်။ င︀ႆ︀းꩫ︀ႆ︀ႇꩬ︀ီ ၵ︀ဝ်ယ︀ႃႇꩭိꩫ︀်ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛတ︀မ︀်းဝႆ︀ႇမ︀ႆ︀ႛ က︀ႃတ︀ွင︀်ႛလ︀ူမ︀်ႇက︀ꩫ︀်ႈက︀ႃꩫ︀မ︀်။

³³ ဢ︀မ︀ႂ်းယ︀ႃႇ ꩫ︀င︀်ဢ︀ꩫ︀်ႈက︀ျမ︀်းလ︀ိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀က︀ꩫ︀်ႈပ︀ီꩫ︀်ႈမ︀ႃးꩫ︀မ︀်။ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ “က︀ꩫ︀်ႛꩫ︀ိူဝ်ꩫ︀ွႆ︀ႈꩡ︀ီဢ︀ုꩫ︀်မ︀ႆ︀ႛ ꩭိꩫ︀်ဢ︀ꩫ︀်ႈပ︀ိူꩫ︀်ႈတ︀ီတ︀ွင︀်ႛꩫ︀ႆ︀ႇ က︀ဝ်ႈတ︀မ︀်းဝႆ︀ႇဢ︀ူ။ ꩭိꩫ︀်ဢ︀မ︀ႂ်းမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ်တ︀ီတ︀ွင︀်ႛလ︀ူမ︀်ႇက︀ꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇယ︀ႃႇ မ︀ိူဝ်ႈလ︀ႂ်ႈက︀ေႃႇ ꩵ︀ႈꩫ︀ႆ︀ႛဢ︀ႆ︀ၢႈ” ꩫ︀ဝꩫ︀်ႇ။