ရ︀ေႃမ︀ 6 - Khamti Shanလ︀ွင︀်ႈဢ︀ပ︀ႅတ︀်ႉမ︀ႆ︀ႛတ︀ႆ︀ၢႈꩬ︀ီ တ︀င︀်းꩡ︀ဝ်ႛယ︀ေꩬ︀ုꩫ︀ိပ︀်ပ︀ွက︀်ႉ 1 ꩫ︀ႆ︀ႇက︀ီးꩭဝ်းဝႃႈꩭီတ︀်ꩭလ︀ိုဝ်ꩫ︀ႆ︀။ ꩭႂ်ႛပ︀ူဝ်းꩭဝ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဢ︀ေႈၵ︀ႅꩫ︀်းဢ︀ီꩫ︀ူႈꩭၢက︀်ႉꩭွမ︀်ꩫ︀ႆ︀ႇ ဝႃႈꩭီတ︀်ဢ︀ပ︀ႅတ︀်ႉ တ︀ိက︀်ꩰက︀ျႃး။ 2 ꩵ︀ႈဝႃႈꩭီတ︀်ပ︀ိူင︀်ႈလ︀ူင︀်။ ပ︀ႃႛဢ︀ꩫ︀်ႈတ︀ီꩭီတ︀်ဢ︀ပ︀ႅတ︀်ႉမ︀ႆ︀ႛꩫ︀က︀ီးယ︀ႃႇ ꩭဝ်းယ︀ႃႇ ၸ︀ူႛတ︀ႆ︀ၢႈꩫ︀က︀ꩫ︀်ႈပ︀ီꩫ︀်ႈက︀ႃယ︀ဝ်ႇ။ တ︀င︀်းဢ︀ပ︀ႅတ︀်ႉက︀ႃဢ︀ူပ︀ွက︀်ႉꩵ︀ႈꩫ︀ႆ︀ႛယ︀ဝ်ႇ။ 3 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ိူဝ်ႈꩭဝ်းꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩫ︀ႆ︀ႇ တ︀င︀်းꩡ︀ဝ်ႛယ︀ေꩬ︀ုၵ︀ရ︀ီတ︀် လ︀ွမ︀်ႈလ︀မ︀်းက︀ꩫ︀်ႈက︀ႃꩫ︀ႆ︀ႇꩬ︀ီ ဢ︀ꩫ︀်ႈမ︀ꩫ︀်းꩡ︀ဝ်ႛတ︀ႆ︀ၢႈမ︀ႆ︀ႛက︀ေႃႇ ꩭဝ်းတ︀ႆ︀ၢႈလ︀ွေႛယ︀ဝ်ႇꩫ︀ꩫ︀ႆ︀ႇ ꩬ︀ူတ︀ွင︀်းဢ︀ူ။ 4 ဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛၸ︀င︀်မ︀ႆ︀ႛက︀ေႃႇ ꩭဝ်းမ︀ႆ︀ႛၸ︀င︀်လ︀ွေႛယ︀ဝ်ႇ။ င︀ႆ︀းꩬ︀ီ ꩭဝ်းတ︀င︀်းꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ႆ︀ၢႈꩫ︀ႆ︀ႇယ︀ႃႇ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈတ︀ꩫ︀်းၵ︀ူဝ်း ဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩫ︀က︀ꩫ︀်ႈ ꩭႂ်ႛပ︀ူဝ်းꩭဝ်းမ︀ႆ︀ႛက︀ေႃႇ ဢ︀ဝ်ႈပ︀ီꩫ︀်ႈက︀ူꩫ︀်းမ︀ႂ်မ︀ႃးꩫ︀ႆ︀ႇꩫ︀မ︀်။ 5 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈမ︀ꩫ︀်းꩡ︀ဝ်ႛတ︀ႆ︀ၢႈမ︀ႆ︀ႛ ꩫ︀င︀်မ︀ꩫ︀်းꩡ︀ဝ်ႛတ︀ႆ︀ၢႈꩫ︀က︀ꩫ︀်ႈ ꩭဝ်းတ︀ႆ︀ၢႈလ︀ွေႛက︀ီး ဢ︀ꩫ︀်ႈမ︀ꩫ︀်းꩡ︀ဝ်ႛꩫ︀ိပ︀်ပ︀ွက︀်ႉမ︀ႃးမ︀ႆ︀ႛက︀ေႃႇ ꩫ︀င︀်မ︀ꩫ︀်းꩡ︀ဝ်ႛꩫ︀ိပ︀်ꩫ︀က︀ꩫ︀်ႈ ꩭဝ်းတ︀ီꩫ︀ိပ︀်လ︀ွေႛꩫ︀မ︀်။ 6 ꩭဝ်း လ︀ုက︀်ႉဢ︀ꩫ︀်ႈပ︀ီꩫ︀်ႈၵ︀ႃႛဢ︀ပ︀ႅတ︀်ႉမ︀ႆ︀ႛလ︀ွတ︀်ႉꩬ︀ီ ꩭႂ်ႛပ︀ူဝ်းဢ︀ပ︀ႅတ︀်ႉမ︀ဝ်က︀ၢပ︀်ꩭီတ︀်ꩫ︀ႆ︀ႇ မ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛဢ︀ဝ်ႈတ︀ႆ︀ၢႈꩫ︀ႆ︀ႇ က︀ူꩫ︀်းက︀ဝ်ꩭဝ်းမ︀ႆ︀ႛက︀ေႃႇ ꩬ︀ဝ်ဝႃးမ︀ိုဝ်းမ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ တ︀ွက︀်တ︀ႆ︀ၢႈလ︀ွေႛမ︀ႃးယ︀ဝ်ႇꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ 7 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းꩭဝ်းတ︀ႆ︀ၢႈက︀ႃက︀ီး လ︀ုက︀်ႉဢ︀ပ︀ႅတ︀်ႉမ︀ႆ︀ႛလ︀ွတ︀်ႉက︀ႃယ︀ဝ်ႇ။ 8 ꩡ︀ႃႇလ︀ိူင︀်ႈ ꩭဝ်းတ︀င︀်းꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ႆ︀ၢႈက︀ႃꩫ︀ႆ︀ႇꩬ︀ီ တ︀င︀်းမ︀ꩫ︀်းꩡ︀ဝ်ႛတ︀ီဢ︀ူꩫ︀မ︀်ꩫ︀ꩫ︀ႆ︀ႇက︀ေႃႇ ꩭဝ်းယ︀ုမ︀်ဢ︀ူ။ 9 ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ တ︀ၢင︀်းတ︀ႆ︀ၢႈမ︀ႆ︀ႛပ︀ေႇဢ︀ွင︀်ယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩬ︀ီ မ︀ိူဝ်ႈလ︀ႂ်ႈက︀ေႃႇ ꩵ︀ႈတ︀ႆ︀ၢႈꩡ︀ၢင︀်ႈယ︀ဝ်ႇꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ 10 ဢ︀ꩫ︀်ႈမ︀ꩫ︀်းꩡ︀ဝ်ႛတ︀ႆ︀ၢႈက︀ႃꩫ︀ႆ︀ႇယ︀ႃႇ ပ︀ႃႛဢ︀ပ︀ႅတ︀်ႉမ︀ႆ︀ႛ ꩡ︀ႃႇထႃဝရ︀ တ︀ႆ︀ၢႈက︀ႃꩫ︀မ︀်။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛ ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇယ︀ႃ ꩡ︀ႃႇꩭၢင︀်းဢ︀ူပ︀ႃႛၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ 11 ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩬ︀ူက︀ေႃႇ ပ︀ႃႛဢ︀ပ︀ႅတ︀်ႉမ︀ႆ︀ႛꩫ︀က︀ီး ꩫ︀င︀်ဢ︀ꩫ︀်ႈတ︀ႆ︀ၢႈက︀ႃꩫ︀က︀ꩫ︀်ႈ ဝႃႈပ︀ီꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ ပ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ႃႇ ꩫ︀င︀်က︀ူꩫ︀်းဢ︀ꩫ︀်ႈꩫ︀ိပ︀်ꩫ︀က︀ꩫ︀်ႈ ဝႃႈဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛꩫ︀မ︀်။ 12 င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းတ︀ူဝ်ႈꩬ︀ူ မ︀ဝ်ꩡ︀ွမ︀်းꩡ︀ႂ်ႈဢ︀ပ︀ႅတ︀်ႉꩫ︀ႆ︀ႇ ꩫ︀ႂ်းꩡ︀ႂ်ႈꩬ︀ူမ︀ႆ︀ႛ ဢ︀ပ︀ႅတ︀်ႉပ︀ီꩭႂ်ႛꩡ︀ေယ︀ၢင︀်ယ︀ဝ်ႇ။ 13 တ︀ူဝ်ႈꩬ︀ူꩬ︀ိက︀်ႉꩡ︀ွꩫ︀်လ︀ိူင︀်ႈꩫ︀ႆ︀ၢႈက︀ေႃႇ ပ︀ီꩭႂ်ႛပ︀ီꩫ︀်ႈၵ︀ိူင︀်ႈꩡ︀ႃႇꩭီတ︀်ဢ︀ပ︀ႅတ︀်ႉယ︀ဝ်ႇ။ ꩫ︀င︀်က︀ူꩫ︀်းဢ︀ꩫ︀်ႈꩫ︀ိပ︀်ပ︀ွက︀်ႉမ︀ႃးꩫ︀က︀ꩫ︀်ႈ ꩭႂ်ႛပ︀ူဝ်းတ︀ူဝ်ႈꩬ︀ူ ပ︀ီꩫ︀်ႈၵ︀ိူင︀်ႈꩡ︀ႃႇꩭီတ︀်လ︀ွင︀်ႈꩫ︀ီႈꩫ︀ႆ︀ႇꩬ︀င︀် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ၢပ︀်ႉက︀ꩫ︀်ႈတ︀ႃႉ။ 14 တ︀ူဝ်ႈꩬ︀ူမ︀ႆ︀ႛ ဢ︀ပ︀ႅတ︀်ႉꩵ︀ႈဝႃႈꩭႂ်ႛꩡ︀ေယ︀ၢင︀်ယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ူယ︀ႃႇ ဢ︀ူက︀ꩫ︀်ႛတ︀ႂ်ႛက︀ျမ︀်းꩬ︀ိꩫ︀်ꩵ︀ႈꩡ︀ႂ်ႈ။ ဢ︀ူက︀ꩫ︀်ႛတ︀ႂ်ႛက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩫ︀မ︀်။ လ︀ွင︀်ႈၵ︀ႃႛဢ︀ꩫ︀်ႈꩡ︀ွမ︀်းဢ︀လ︀ၢင︀်းၸ︀ြႃးပ︀ီꩫ︀်ႈꩡ︀ဝ်ႛ 15 ꩫ︀ႆ︀ႇက︀ီး ꩭဝ်းဢ︀ူက︀ꩫ︀်ႛတ︀ႂ်ႛက︀ျမ︀်းꩬ︀ိꩫ︀်မ︀ဝ်ꩡ︀ႂ်ႈ၊ ဢ︀ူက︀ꩫ︀်ႛတ︀ႂ်ႛက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ ဝႃႈꩭီတ︀်ဢ︀ပ︀ႅတ︀်ႉက︀ျႃး။ ꩵ︀ဝႃႈꩭီတ︀်ပ︀ိူင︀်ႈလ︀ူင︀်ယ︀ဝ်ႇ။ 16 ꩬ︀ူထွမ︀်ၵ︀ၢမ︀်းၸ︀ႂ်ꩫ︀က︀ေႃႇ ပ︀ီꩫ︀်ႈၵ︀ႃႛက︀ူဝ်ႇဢ︀မ︀ႂ်းꩫ︀မ︀်ꩫ︀ꩫ︀ႆ︀ႇ ꩬ︀ူတ︀ွင︀်းꩫ︀ီႈꩫ︀ီႈဢ︀ူ။ ꩬ︀ူꩭီတ︀်ၵ︀ႃႛဢ︀ပ︀ႅတ︀်ႉက︀ီး တ︀ီꩫ︀ႆ︀ႛတ︀ႆ︀ၢႈꩫ︀မ︀်။ ꩭီတ︀်ၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛက︀ီး မ︀ꩫ︀်းꩡ︀ဝ်ႛꩬ︀ူမ︀ႆ︀ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ဢ︀ူ။ 17 မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛယ︀ႃႇ ꩬ︀ူꩫ︀င︀်ၸ︀ူႛၵ︀ႃႛꩫ︀က︀ꩫ︀်ႈ ꩡ︀ႂ်ႈဢ︀ꩫ︀်ႈꩭီတ︀်ဢ︀ပ︀ႅတ︀်ႉမ︀ႆ︀ႛ ꩡ︀ွမ︀်းယ︀ုင︀်ꩰမ︀ႃးယ︀ဝ်ႇ။ ꩫ︀ႆ︀ႇꩫ︀က︀ေႃႇ င︀ႆ︀ႚꩬ︀ူ ꩬ︀မ︀်မ︀ႃတ︀ြႃးဢ︀ꩫ︀်ႈꩬ︀ူမ︀ႆ︀ႛဢ︀ွꩫ︀်ႈဢ︀ဝ်ႈပ︀ီꩫ︀်ႈၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်းထွမ︀်ꩡ︀ွမ︀်းက︀ꩫ︀်ႈꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ျေးꩡ︀ူးတ︀ၢင︀်လ︀ူင︀်ꩫ︀မ︀်။ 18 ꩬ︀ူယ︀ႃႇ လ︀ုက︀်ႉဢ︀ပ︀ႅတ︀်ႉမ︀ႆ︀ႛလ︀ွတ︀်ႉꩬ︀ီ ပ︀ီꩫ︀်ႈၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇꩭီတ︀်လ︀ွင︀်ႈꩬ︀ိုဝ်ႈတ︀ူဝ်မ︀ႃးယ︀ဝ်ႇ။ 19 က︀ဝ်ႈင︀ႆ︀းꩬ︀ီ ဢ︀ဝ်ႈၵ︀ိူင︀်ႈၵ︀ၢမ︀်းမ︀ိူင︀်းက︀ၢင︀်ႈဝႃႈꩫ︀ႆ︀ႇ ꩬ︀ူꩥ︀ၢꩫ︀်မ︀ဝ်ပ︀ုင︀်ႈꩬ︀ီꩫ︀မ︀်။ မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛယ︀ႃႇ ꩡ︀ႂ်ႈဢ︀ꩫ︀်ႈꩭီတ︀်ဢ︀ပ︀ႅတ︀်ႉ ဢ︀ꩫ︀်ႈꩬ︀ူမ︀ႆ︀ႛဢ︀ေႈၵ︀ႅꩫ︀်းဢ︀ဝ်ႈမ︀ိူက︀်ႉမ︀ႆ︀ႛ ꩬ︀ူတ︀င︀်းꩡ︀ႂ်ႈတ︀င︀်းၵ︀ူဝ်းꩡ︀ွမ︀်းမ︀ႃးယ︀ဝ်ႇ။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ꩭႂ်ႛပ︀ူဝ်းꩬ︀ူတ︀င︀်းတ︀ူဝ်ႈမ︀ူတ︀်ꩡ︀ၢင︀်ꩫ︀ႆ︀ႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ွꩫ︀်ႈမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်း ꩡ︀ွမ︀်းက︀ꩫ︀်ႈတ︀ႃႉ။ 20 မ︀ိူဝ်ႈꩬ︀ူပ︀ီꩫ︀်ႈၵ︀ႃႛဢ︀ပ︀ႅတ︀်ႉꩫ︀ႆ︀ႇယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛထုက︀်ꩡ︀ႂ်ႈꩫ︀ႆ︀ႇ ꩬ︀ူꩵ︀ႈဝႃႈꩭီတ︀်မ︀ႃး။ 21 တ︀ၢင︀်းက︀ႅင︀်းၵ︀ႃႛဢ︀ပ︀ႅတ︀်ႉဢ︀မ︀ႂ်းၵ︀ဝ်ယ︀ႃႇ ꩡ︀ႃႇꩭၢင︀်းꩬ︀ူဢ︀က︀ိဝ်းက︀ꩬ︀င︀်က︀ေႃႇ ꩵ︀ႈယ︀င︀်းမ︀ႃး။ င︀ႆ︀ႚလ︀ၢႆ︀းပ︀ိူဝ်ႈ တ︀ၢင︀်းက︀ႅင︀်းက︀ဝ်ဢ︀ꩫ︀်ႈꩬ︀ူꩭွꩫ︀်ꩭီတ︀်မ︀ႃး ဢ︀ꩫ︀်ႈꩬ︀ူမ︀ႆ︀ႛ ꩬ︀ူင︀်တ︀ၢင︀်းတ︀ၢႆ︀ႈဢ︀မ︀ႂ်းၵ︀ဝ်ꩬ︀ီ ꩬ︀ူꩫ︀ႆ︀ႛဢ︀ၢႆ︀ႈꩫ︀မ︀်။ 22 ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူမ︀ႆ︀ႛဢ︀ဝ်ႈလ︀ွတ︀်ႉꩭႂ်ႛꩬ︀ီ ပ︀ီꩫ︀်ႈၵ︀ႃႛမ︀ꩫ︀်းꩡ︀ဝ်ႛယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ဢ︀က︀ိဝ်းယ︀ႃႇ ꩬ︀ူမ︀ႆ︀ႛ ꩡ︀ႂ်ႈဢ︀ꩫ︀်ႈၵ︀ႂ်ႈမ︀ူတ︀်ꩡ︀ၢင︀်ꩫ︀ႆ︀ႇယ︀င︀်းမ︀ႃးꩬ︀ီ ꩬ︀ူဢ︀ꩬ︀ၢက︀်ႉထႃဝရ︀ꩫ︀ႆ︀ႛꩫ︀မ︀်။ 23 က︀ူꩫ︀်းꩭဝ်းဢ︀ပ︀ႅတ︀်ႉꩭီတ︀်က︀ီး က︀ႃႈဢ︀ပ︀ႅတ︀်ႉဢ︀မ︀ႂ်း ဝႃႈတ︀ႆ︀ၢႈꩫ︀မ︀်။ ꩫ︀ႆ︀ႇꩫ︀က︀ေႃႇ ꩬ︀ူးက︀ျေးꩡ︀ူးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩫ︀ႆ︀ႇယ︀ႃႇ ဢ︀ꩬ︀ၢက︀်ႉထႃဝရ︀ ဢ︀ꩫ︀်ႈက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်းꩫ︀ႆ︀ႇꩫ︀မ︀်။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.