ရ︀ေႃမ︀ 3 - Khamti Shan

¹ ꩫ︀ႆ︀ႇက︀ီး ပ︀ီꩫ︀်ႈက︀ျူးꩫ︀ႆ︀ႇ က︀ꩬ︀င︀်ꩫ︀ႆ︀ ဢ︀က︀ိဝ်းယ︀င︀်းꩫ︀ႆ︀ႇ။ ꩭၢပ︀်ႉမ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ꩫ︀ႆ︀ႇ ဢ︀က︀ိဝ်းက︀ꩬ︀င︀်ꩫ︀ႆ︀ ယ︀င︀်းꩫ︀ႆ︀ႇ။

² ပ︀ီꩫ︀်ႈက︀ျူးꩫ︀ႆ︀ႇ ဢ︀က︀ိဝ်းယ︀ႃႇ ယ︀င︀်းတ︀ေႇတ︀ေႇဢ︀ူ။ ဢ︀က︀ိဝ်းဢ︀ꩫ︀်ႈၵ︀ႅꩫ︀်းမ︀ႅတ︀်ႉယ︀ႃႇ က︀ျူးꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ က︀ျမ︀်းလ︀ိက︀်ႉပ︀ူင︀်ႈဢ︀ၢပ︀်ႉꩭႂ်ႛမ︀ႃးꩫ︀ႆ︀ႇꩫ︀မ︀်။

³ ꩫ︀ႆ︀ႇꩫ︀က︀ေႃႇ က︀ျူးက︀မ︀်ႈၸ︀ွင︀်းယ︀ႃႇ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ꩵ︀ႈထွမ︀်။ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ႅတ︀်ႉꩡ︀ႃꩵ︀ႈယ︀င︀်းမ︀ႃး။ င︀ႆ︀းꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ႅတ︀်ႉꩡ︀ႃꩵ︀ႈၸ︀ုꩫ︀်ႇပ︀ိူင︀်ႈလ︀ူင︀်။

⁴ က︀ျမ︀်းလ︀ိက︀်ႉမ︀ႆ︀ႛ “ၵ︀ၢမ︀်းၵ︀ိင︀်းတ︀ူဝ်ꩡ︀ဝ်ႛ ꩬ︀ိုဝ်ႈꩡ︀ႂ်ႈဢ︀ူꩫ︀ꩫ︀ႆ︀ႇ တ︀င︀်းမ︀ိူင︀်းဝႃႈတ︀ွင︀်းဢ︀ူ။ ထီင︀်တ︀ြႃးက︀ꩫ︀်ႈꩫ︀က︀ေႃႇ ၵ︀ိင︀်းတ︀ူဝ်ꩡ︀ဝ်ႛꩬ︀ိုင︀် ဝႃႈပ︀ေႇꩫ︀မ︀်” ꩫ︀ꩬ︀ီဝႃႈဝႆ︀ႇဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ဢ︀ေလ︀ူဝ်ႈ က︀ူꩫ︀်းတ︀င︀်းမ︀ိူင︀်းၸ︀ႅတ︀်ႉၵ︀ႂ်ႈလ︀ႂ်ႈꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩵ︀ႈၸ︀ႅတ︀်ႉ။ ꩫ︀င︀်မ︀ꩫ︀်းꩡ︀ဝ်ႛဝႃႈဝႆ︀ႇꩫ︀က︀ꩫ︀်ႈ တ︀ီꩭီတ︀်က︀ႃꩫ︀မ︀်။

⁵ င︀ႆ︀းက︀ီးယ︀ႃႇ ဢ︀ꩫ︀်ႈꩭဝ်းမ︀ဝ်ꩬ︀ိုဝ်ႈတ︀ူဝ်ꩫ︀ႆ︀ႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀ိုဝ်ႈတ︀ူဝ်မ︀ႆ︀ႛ ဢ︀ဝ်ႈပ︀ႅꩫ︀်ႈꩭႂ်ႛဢ︀ူꩫ︀က︀ီး ꩭဝ်းတ︀ီဝႃႈꩭိုဝ်ꩫ︀ႆ︀။ ꩫ︀ႆ︀ႇက︀ီး ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ပ︀ူင︀်ႈတ︀ၢမ︀်ꩫ︀ႆ︀ႇ ꩵ︀ႈတ︀ြႃးꩫ︀က︀ျႃးတ︀ီဝႃႈꩫ︀ႆ︀ႇ။ င︀ႆ︀းꩵ︀ႈထုက︀်ဝႃႈ။ ꩫ︀ႆ︀ႇယ︀ႃႇ ၵ︀ၢမ︀်းက︀ူꩫ︀်းမ︀ိူင︀်းက︀ၢင︀်ႈꩫ︀ၢႆ︀ႈꩫ︀မ︀်။

⁶ ၸ︀ြႃးပ︀ီꩫ︀်ႈꩡ︀ဝ်ႛ ပ︀ူဝ်းမ︀ဝ်တ︀ြႃးက︀ီး မ︀ိူင︀်းက︀ၢင︀်ႈမ︀ႆ︀ႛ တ︀ီꩭလ︀ိုဝ်ပ︀ႅတ︀်ႉတ︀ြႃးပ︀ီꩫ︀်ႈꩫ︀ႆ︀။

⁷ ꩡ︀ႃႇလ︀ိူင︀်ႈ ꩬ︀င︀်ဝႃႈ ဢ︀ꩫ︀်ႈက︀ူꩫ︀်းꩭဝ်းၸ︀ႅတ︀်ႉꩫ︀ႆ︀ႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩬ︀ိုဝ်ႈꩫ︀ꩫ︀်ႈမ︀ႆ︀ႛ ဢ︀ဝ်ႈပ︀ႅꩫ︀်ႈဢ︀ိက︀်ꩬ︀ီ မ︀ူꩫ︀်ႈမ︀ꩫ︀်းꩡ︀ဝ်ႛဢ︀ဝ်ႈꩭိူဝ်ႈꩭိုင︀်းꩭႂ်ႛဢ︀ူꩫ︀က︀ီး ꩭဝ်းၸ︀ိတ︀်ဢ︀ူꩫ︀ꩬ︀ီ လ︀ၢႆ︀းပ︀ိူဝ်ႈက︀ꩬ︀င︀်ꩫ︀ႆ︀ ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ထုက︀်ပ︀ႅတ︀်ႉတ︀ြႃးꩫ︀ႆ︀ႇ။

⁸ ꩭႂ်ႛပ︀ူဝ်းမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭိူဝ်ႈꩭိုင︀်းမ︀ႃးꩫ︀ႆ︀ႇ ပ︀ႆ︀ႉ ဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ်ꩭီတ︀်ꩫ︀မ︀်” ꩫ︀ꩬ︀ီတ︀ီဝႃႈက︀ျႃး။ င︀ႆ︀း ꩵ︀ႈထုက︀်ဝႃႈ။ ꩫ︀ႆ︀ႇꩫ︀က︀ေႃႇ က︀ူꩫ︀်းက︀မ︀်ႈၸ︀ွင︀်းယ︀ႃႇ က︀ဝ်ႈဝႃႈင︀ႆ︀းဢ︀ူꩫ︀ꩬ︀ီ တ︀ၢꩫ︀်ႛꩬ︀ယ︀ုက︀်ႉလ︀ေဢ︀ူ။ ၵ︀ဝ်ဝႃႈင︀ႆ︀းꩫ︀ႆ︀ႇꩬ︀ီ ၵ︀ဝ်မ︀ႆ︀ႛဢ︀ꩫ︀်ႈꩫ︀င︀်ထႅက︀်ႉꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ူင︀်ႈတ︀ၢမ︀်ꩫ︀မ︀်။

က︀ူꩫ︀်းတ︀င︀်းမ︀ိူင︀်းဢ︀ပ︀ႅတ︀်ႉယ︀င︀်းဢ︀ူ

⁹ င︀ႆ︀းꩫ︀ႆ︀ႇꩬ︀ီ ꩭဝ်းက︀ျူးꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ က︀ꩬ︀င︀်ꩫ︀ႆ︀ꩫ︀ီႈꩬ︀ႃꩫ︀ႆ︀ႇ။ က︀ꩬ︀င︀်က︀ေႃႇ ꩵ︀ႈꩫ︀ီႈꩬ︀ႃ။ က︀ျူးမ︀ဝ်ႈဝႃႈ၊ ဢ︀ꩫ︀်ႈက︀ျူးမ︀ဝ်ꩡ︀ႂ်ႈမ︀ဝ်ဝႃႈ က︀ူꩫ︀်းတ︀င︀်းမ︀ိူင︀်းဢ︀ူက︀ꩫ︀်ႛတ︀ႂ်ႛ တ︀ꩫ︀်းၵ︀ူဝ်းဢ︀ပ︀ႅတ︀်ႉမ︀ႆ︀ႛꩫ︀မ︀်ꩫ︀ꩫ︀ႆ︀ႇ က︀ဝ်ႈဝႃႈမ︀ႃးယ︀ဝ်ႇ။

¹⁰ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ “က︀ူꩫ︀်းဢ︀ꩫ︀်ႈꩬ︀ိုဝ်ႈတ︀ူဝ်ꩫ︀ꩫ︀ႆ︀ႇ ꩵ︀ႈယ︀င︀်း။ က︀ူဝ်ႇလ︀ိူင︀်ႈꩫ︀ႆ︀ၢႈက︀ေႃႇ ꩵ︀ႈယ︀င︀်း။

¹¹ က︀ူꩫ︀်းဢ︀ꩫ︀်ႈပ︀ွင︀်ꩡ︀ႂ်ႈတ︀ေႇတ︀ေႇက︀ေႃႇꩵ︀ႈယ︀င︀်း။ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ႃꩬ︀ီပ︀ႆ︀ၢႛဝႆ︀ႈက︀ေႃႇ ꩵ︀ႈယ︀င︀်း။

¹² က︀ူꩫ︀်းတ︀င︀်းမ︀ိူင︀်း လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ွက︀်က︀ႃလ︀ေႚလ︀ေႚယ︀ဝ်ႇ။ ၸ︀ႂ်က︀ေႃႇ တ︀ိုဝ်းꩵ︀ႈꩫ︀ႆ︀ႛပ︀ိူင︀်ႈလ︀ူင︀်ယ︀ဝ်ႇ။ က︀ူꩫ︀်းဢ︀ꩫ︀်ႈꩭီတ︀်လ︀ွင︀်ႈꩫ︀ီႈꩫ︀ꩫ︀ႆ︀ႇꩵ︀ႈယ︀င︀်း။ က︀ူဝ်ႇလ︀ိူင︀်ႈꩫ︀ႆ︀ၢႈက︀ေႃႇ ꩵ︀ႈယ︀င︀်း။

¹³ ၵ︀ဝ်ယ︀ႃႇ ၵ︀ၢမ︀်းဢ︀ꩫ︀်ႈၵ︀ိူင︀်ႈꩫ︀ီႈက︀ူဝ်ႈꩫ︀ႆ︀ၢႈꩫ︀မ︀်ဝႃႈꩫ︀ႆ︀ႇ။ ၸ︀ၢမ︀်းက︀ေႃႇꩭႆ︀ၢႇလ︀ူင︀်ꩫ︀မ︀်။ ꩬ︀ူပ︀်ၵ︀ဝ်ယ︀ႃႇ ꩬ︀ူပ︀်င︀ူးဢ︀ꩫ︀်ႈက︀ွင︀်ႇꩭႅင︀်းလ︀ူင︀်ꩫ︀က︀ꩫ︀်ႈ ဢ︀ꩫ︀်ႈမ︀ဝ်ꩫ︀ီႈꩫ︀ႆ︀ၢႈꩬ︀ိုင︀်တ︀ီမ︀်ႈက︀ꩫ︀်ႈꩬ︀ီ

¹⁴ ပ︀ိူꩫ︀်ႈမ︀ႆ︀ႛ ပ︀ၢဝ်ꩰက︀ိꩫ︀်ꩰဢ︀ူမ︀ဝ်ꩬ︀ဝ်းꩫ︀မ︀်။

¹⁵ ၵ︀ဝ်ယ︀ႃႇ ဢ︀ဝ်ႈတ︀ႆ︀ၢႈပ︀ိူꩫ︀်ႈက︀ေႃႇꩭၢႆ︀ႇလ︀ူင︀်ꩫ︀မ︀်။

¹⁶ ၵ︀ဝ်ဢ︀မ︀ႆ︀ႚက︀ႃꩫ︀က︀ေႃႇ ပ︀ိူꩫ︀်ႈမ︀ႆ︀ႛဢ︀ဝ်ႈယ︀ပ︀်ယ︀ၢက︀်ႉ၊ ဢ︀ဝ်ႈၸ︀ေႛင︀ႆ︀းꩫ︀မ︀်။

¹⁷ ၵ︀ဝ်ယ︀ႃႇ တ︀င︀်းၸ︀ႂ်က︀ေႃႇ ꩵ︀ႈထုက︀်က︀ꩫ︀်ႈ။

¹⁸ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ ꩵ︀ႈက︀ူဝ်ႈယ︀မ︀်ႈပ︀ိူင︀်ႈလ︀ူင︀်” ꩫ︀ဝꩫ︀်ႇ။

¹⁹ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၵ︀ၢမ︀်းဢ︀ꩫ︀်ႈက︀ျမ︀်းꩬ︀ိꩫ︀်မ︀ႆ︀ႛ လ︀ွေႛꩫ︀ႆ︀ႇၵ︀ဝ်ယ︀ႃႇ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛ က︀ျမ︀်းꩬ︀ိꩫ︀်ꩭႂ်ႛဝႆ︀ႇꩫ︀ႆ︀ႇၵ︀ဝ်ꩫ︀မ︀်ꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ ꩫ︀ႆ︀ႇꩫ︀က︀ေႃႇ ၵ︀ဝ်ꩫ︀ၢႆ︀ႈꩬ︀ေႇမ︀ဝ်က︀ႃး က︀ူꩫ︀်းတ︀င︀်းမ︀ိူင︀်း ဢ︀ꩫ︀်ႈတ︀ီပ︀ိꩫ︀်ႇက︀ꩬ︀င︀်က︀ေႃႇမ︀ဝ်ယ︀င︀်းꩬ︀ီ တ︀င︀်းလ︀ုင︀်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ႅတ︀်ႉတ︀ြႃးယ︀ဝ်ႇꩫ︀ꩫ︀ႆ︀ႇက︀ေႃႇ ꩡ︀ုꩫ︀်ႈꩬ︀ႃႚꩬ︀ႃႚꩫ︀မ︀်။

²⁰ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ျမ︀်းꩬ︀ိꩫ︀်မ︀ႆ︀ႛ ꩡ︀ွမ︀်းဢ︀ဝ်ႈက︀ီး ꩭဝ်းၸ︀ႂ်မ︀ႆ︀ႛက︀ေႃႇ ꩬ︀ိုဝ်ႈတ︀ူဝ်ဢ︀ူꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛ ꩵ︀ႈမ︀တ︀်ႉ။ ꩫ︀ႆ︀ႇꩬ︀ေႇမ︀ဝ်က︀ႃး က︀ျမ︀်းꩬ︀ိꩫ︀်ယ︀ႃႇ ဢ︀ပ︀ႅတ︀်ႉꩫ︀ꩫ︀ႆ︀ႇမ︀ႆ︀ႛꩬ︀ိုင︀် ꩭႂ်ႛပ︀ူဝ်းက︀ူꩫ︀်းꩭဝ်းတ︀ွင︀်းꩫ︀ႆ︀ႇ ပ︀ျႃးꩭႂ်ႛဢ︀ူꩫ︀မ︀်။

တ︀ၢင︀်းဢ︀ꩫ︀်ႈက︀ူꩫ︀်းꩭဝ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉဢ︀ꩫ︀်ႈꩬ︀ိုဝ်ႈတ︀ူဝ်

²¹ ꩡ︀ႃႇလ︀ိူင︀်ႈ တ︀င︀်းက︀ျမ︀်းꩬ︀ိꩫ︀်မ︀ဝ်ꩡ︀ၢပ︀်ႉလ︀ႅင︀်ꩬ︀ီ က︀ူꩫ︀်းꩭဝ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩭလ︀ိုဝ်မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ꩫ︀ႆ︀ႇ မ︀ꩫ︀်းꩡ︀ဝ်ႛပ︀ုတ︀်ၵ︀ႆ︀ႈꩭႂ်ႛမ︀ႃးယ︀ဝ်ႇ။ လ︀ွင︀်ႈꩫ︀ႆ︀ႇမ︀ႆ︀ႛ က︀ျမ︀်းꩬ︀ိꩫ︀်ꩫ︀ၵ︀ႃက︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်က︀ေႃႇ ꩭီတ︀်ꩬ︀ၢက︀်ႉꩬ︀ေဝႆ︀ႇဢ︀ူ။

²² ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းꩭဝ်း ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈက︀ီးꩬ︀ိုင︀် ꩭဝ်းမ︀ႆ︀ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ျူးꩫ︀ၵ︀ႃဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် က︀ꩬ︀င︀်က︀ေႃႇꩵ︀ႈလ︀ၢက︀်က︀ꩫ︀်ႈ။

²³ က︀ူꩫ︀်းတ︀င︀်းမ︀ိူင︀်း ဢ︀ပ︀ႅတ︀်ႉယ︀င︀်းꩬ︀ီ မ︀ူꩫ︀်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛဝႆ︀ႇꩫ︀ႆ︀ႇ တ︀ူက︀်ယ︀ွမ︀်းက︀ႃက︀ꩫ︀်ႈယ︀ဝ်ႇ။

²⁴ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းꩭဝ်းမ︀ႆ︀ႛဢ︀ီꩫ︀ူႈꩭၢက︀်ႉꩭွမ︀်လ︀ူင︀်ꩫ︀မ︀်။ င︀ႆ︀းꩬ︀ီ မ︀ꩫ︀်းꩡ︀ဝ်ႛ က︀ႃႈၵ︀ꩫ︀်မ︀ဝ်ဢ︀ဝ်ႈင︀ႆ︀း က︀ူꩫ︀်းꩭဝ်းမ︀ႆ︀ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩬ︀ီ ဢ︀ပ︀ႅတ︀်ႉꩭဝ်းတ︀င︀်းလ︀ုင︀်မ︀ႆ︀ႛ ပ︀ွႆ︀လ︀ွတ︀်ႉꩭႂ်ႛဢ︀ူ။

²⁵ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩡ︀ႃႇꩭၢင︀်းꩭဝ်း ꩭႂ်ႛꩭီတ︀်တ︀ူဝ်ႈၵ︀ႅက︀်မ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ မ︀ိူဝ်ႈက︀ူꩫ︀်းꩭဝ်း ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇ လ︀ႆ︀ၢးပ︀ိူဝ်ႈꩫ︀ိူတ︀်ႉမ︀ꩫ︀်းꩡ︀ဝ်ႛꩬ︀ီ ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ဢ︀ပ︀ႅတ︀်ႉပ︀ွႆ︀ꩭႂ်ႛဢ︀ူ။ ၸ︀ြႃးပ︀ီꩫ︀်ႈꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ မ︀ꩫ︀်းꩡ︀ဝ်ႛꩬ︀ိုဝ်ႈတ︀ူဝ်ဢ︀ူꩫ︀ꩫ︀ႆ︀ႇ ပ︀ျႃးက︀ွတ︀်ꩫ︀ꩬ︀ီ ဢ︀ꩫ︀်ႈမ︀ိူဝ်ႈင︀ႃးပ︀ုꩫ︀်ႛ က︀ူꩫ︀်းꩭဝ်းၸ︀ိတ︀်မ︀ႃးꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛꩬ︀ေးၵ︀ၢမ︀်ꩬ︀ီ ဢ︀ပ︀ႅတ︀်ႉမ︀ဝ်ပ︀ူင︀်ႈꩭႂ်ႛမ︀ႃးꩫ︀မ︀်။

²⁶ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ မ︀ꩫ︀်းꩡ︀ဝ်ႛꩬ︀ိုဝ်ႈတ︀ူဝ်ဢ︀ူꩫ︀ꩫ︀ႆ︀ႇ ꩡ︀ူဝ်ႈပ︀ၢꩫ︀်ႈင︀ႆ︀ႚက︀ေႃႇပ︀ျႃးက︀ွတ︀်ꩫ︀ꩫ︀မ︀်။ င︀ႆ︀းꩬ︀ီ မ︀ꩫ︀်းꩡ︀ဝ်ႛတ︀ြႃးဢ︀ူꩫ︀ꩫ︀ႆ︀ႇ ဢ︀ဝ်ႈတ︀ၢင︀်းဢ︀ꩫ︀်ႈယ︀ုမ︀်ယ︀မ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀် က︀ူꩫ︀်းꩭဝ်းမ︀ႆ︀ႛ ꩬ︀ိုဝ်ႈတ︀ူဝ်ဢ︀ူꩫ︀ꩬ︀ီမ︀ꩫ︀်းꩡ︀ဝ်ႛ မ︀တ︀်ႉꩫ︀ႆ︀ႇ။

²⁷ င︀ႆ︀းꩫ︀ႆ︀ႇꩬ︀ီ က︀ူꩫ︀်းꩭဝ်းဢ︀ꩫ︀်ႈဝႃႈက︀မ︀်ႇလ︀ွင︀်ႛ က︀ꩬ︀င︀်က︀ေႃႇꩵ︀ႈယ︀င︀်း။ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀က︀ီး ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇ ꩭဝ်းမ︀ႆ︀ႛ က︀ျမ︀်းꩬ︀ိꩫ︀်ယ︀င︀်းꩬ︀ီꩵ︀ႈꩡ︀ႂ်ႈ။ ꩡ︀ွမ︀်းက︀ျမ︀်းꩬ︀ိꩫ︀်ꩬ︀ီက︀ေႃႇꩵ︀ႈꩡ︀ႂ်ႈ။ က︀ွပ︀်ႉပ︀ိူဝ်ႈ ယ︀ုမ︀်ယ︀မ︀်ႈꩬ︀ီꩫ︀ႆ︀ၢႈꩫ︀မ︀်။

²⁸ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ႂ်မ︀ႆ︀ႛꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇ က︀ွပ︀်ႉပ︀ိူဝ်ႈ ꩡ︀ွမ︀်းက︀ျမ︀်းꩬ︀ိꩫ︀်ꩬ︀ီꩵ︀ႈꩡ︀ႂ်ႈ။ က︀ွပ︀်ႉပ︀ိူဝ်ႈယ︀ုမ︀်ယ︀မ︀်ႈꩬ︀ီꩫ︀ႆ︀ၢႈꩫ︀မ︀်ꩫ︀ꩫ︀ႆ︀ႇ ꩡ︀ုꩫ︀်ႈꩬ︀ႃႚꩬ︀ႃႚꩫ︀မ︀်။

²⁹ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ႃႇက︀ျူးꩫ︀ႆ︀ၢႈꩵ︀ႈꩡ︀ႂ်ႈ။ ꩡ︀ႃႇဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်က︀ေႃႇꩡ︀ႂ်ႈဢ︀ူ။

³⁰ ꩡ︀ႃႇက︀ျူးတ︀မ︀ိူင︀်း၊ ꩡ︀ႃႇဢ︀ꩫ︀်ႈက︀ျူးမ︀ဝ်ꩡ︀ႂ်ႈတ︀မ︀ိူင︀်း ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ူလ︀ိဝ်ႈꩫ︀ႆ︀ၢႈꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ က︀ျူးꩫ︀က︀ေႃႇယ︀ႃ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀က︀ေႃႇယ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈက︀ီးꩬ︀ိုင︀် ၵ︀ဝ်မ︀ႆ︀ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀မ︀်။

³¹ ꩫ︀ႆ︀ႇက︀ီး ꩭဝ်းဢ︀ꩫ︀်ႈယ︀ုမ︀်ယ︀မ︀်ႈမ︀ႆ︀ႛ ꩭီတ︀်ဢ︀ၵ︀ႅက︀်ႉက︀ီး က︀ျမ︀်းꩬ︀ိꩫ︀်မ︀ႆ︀ႛယ︀ႃႇ ဝႆ︀ႇꩬ︀ႆ︀ၢႇက︀ႃက︀ျႃး။ ꩭလ︀ိုဝ်က︀ေႃႇ ꩵ︀ႈဝႆ︀ႇꩬ︀ႆ︀ၢႇ။ ꩭဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇꩬ︀ီ က︀ျမ︀်းꩬ︀ိꩫ︀်မ︀ႆ︀ႛ ꩭႂ်ႛဝႃႈဢ︀ေႈၵ︀ႅꩫ︀်းꩡ︀ွမ︀်းတ︀ီမ︀်ႈꩰꩫ︀မ︀်။