ရ︀ေႃမ︀ 16 - Khamti Shanလ︀ွင︀်ႈပ︀ေႃလ︀ုꩬ︀င︀်ၵ︀ၢမ︀်း 1 ꩫ︀ွင︀်ႇꩬ︀ၢဝ်ꩭဝ်းၸ︀ိပ︀ေ ဢ︀ꩫ︀်ႈꩡ︀ိူဝ်းဝီင︀်းက︀ီꩫ︀်ၵ︀ျေမ︀ႆ︀ႛ ထၢမ︀်းဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ က︀ူꩫ︀်းꩫ︀ီႈꩫ︀မ︀်ꩫ︀ꩬ︀ီ ꩬ︀ူမ︀ႆ︀ႛဢ︀ၢပ︀်ႉꩭႂ်ႛဢ︀ူ။ 2 ꩫ︀င︀်က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ထုက︀်ꩫ︀ီႈꩭီတ︀်ꩫ︀က︀ꩫ︀်ႈ မ︀ꩫ︀်းမ︀ႆ︀ႛမ︀တ︀်ႉက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩬ︀ီ ꩭၢပ︀်ႉတ︀ွꩫ︀်ႛက︀ꩫ︀်ႈမ︀ႃးတ︀ႃႉ။ ဢ︀ꩫ︀်ႈꩫ︀င︀်မ︀ꩫ︀်းꩭၢင︀်ႇꩫ︀ႆ︀ႇၵ︀ဝ်က︀ေႃႇ ꩡ︀ွႆ︀ႈꩭႂ်ႛမ︀ႃးတ︀ႃႉ။ မ︀ꩫ︀်းၸ︀ူႛꩡ︀ဝ်ႛက︀ေႃႇ က︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛတ︀မ︀ိူင︀်း က︀ဝ်ႈမ︀ႆ︀ႛတ︀မ︀ိူင︀်း ꩡ︀ွႆ︀ႈꩭႂ်ႛမ︀ႃးယ︀ဝ်ႇ။ 3 ပ︀ီတ︀်က︀ိလ︀ꩫ︀ၵ︀ႃဢ︀ႃက︀ုလ︀ ဢ︀ꩫ︀်ႈတ︀င︀်းက︀ဝ်ႈ ꩭူမ︀်ႈထၢမ︀်းဢ︀မ︀ူးꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်းမ︀ႆ︀ႛ က︀ဝ်ႈထိုင︀်ꩡ︀ႂ်ႈဢ︀ူꩫ︀ꩫ︀ႆ︀ႇ ၵ︀ႆ︀ႈꩭႂ်ႛမ︀ႃးတ︀ႃႉ။ 4 ꩬ︀ွင︀်ၵ︀ႃယ︀ႃႇ တ︀ူဝ်ပ︀ူဝ်းဢ︀ꩬ︀ၢက︀်ႉၵ︀ႂ်ႈၵ︀ွတ︀်ပ︀ုꩫ︀်ႛꩫ︀မ︀် က︀ဝ်ႈမ︀ႆ︀ႛꩡ︀ွႆ︀ႈမ︀ႃးꩫ︀ႆ︀ႇ။ ꩬ︀ွင︀်ၵ︀ႃမ︀ႆ︀ႛ က︀ဝ်ႈꩫ︀ၢႆ︀ႈမ︀ဝ်က︀ႃး ꩡ︀ိူဝ်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်တ︀င︀်းမ︀ိူင︀်းက︀ေႃႇ က︀ျေးꩡ︀ူးတ︀ၢင︀်လ︀ူင︀်ꩫ︀မ︀်။ 5 က︀ူꩫ︀်းဢ︀ꩫ︀်ႈꩭိူꩫ︀်းၵ︀ဝ်မ︀ႆ︀ႛꩭီတ︀်ꩡ︀ွင︀်းၸ︀ြႃးꩬ︀ီ ꩭူမ︀်ႈဝႆ︀ႈၸ︀ြႃးꩫ︀ႆ︀ႇၵ︀ဝ်၊ က︀ူဝ်ႇꩬ︀ေႛꩭၢက︀်ႉက︀ဝ်ႈ ဢ︀ေပ︀ႄꩫ︀တ︀်ဢ︀ꩫ︀်ႈလ︀ုက︀်ႉꩡ︀ေႈဝီင︀်းဢ︀ႃꩬ︀ျမ︀ႆ︀ႛ ဢ︀ွꩫ︀်ႈတ︀ၢင︀်းလ︀ေႚလ︀ေႚ ပ︀ီꩫ︀်ႈၵ︀ရ︀ီတ︀်ယ︀ၢꩫ︀်မ︀ႃး၊ 6 မ︀ေရ︀ီဢ︀ꩫ︀်ႈꩡ︀ႃႇꩬ︀ူ ꩭီတ︀်ဢ︀မ︀ူးꩬ︀ေႈꩡ︀ႃႉမ︀ႃးင︀ႆ︀း 7 ဢ︀ꩫ︀်တ︀ြေဢ︀ေႃꩫ︀ိက︀်ꩫ︀ၵ︀ႃ ယ︀ုꩫ︀ိ ပ︀ီႈꩫ︀ွင︀်ႇက︀ျူးဢ︀ꩫ︀်ႈတ︀င︀်းက︀ဝ်ႈ ꩫ︀ႆ︀ႛꩭူမ︀်ႈတ︀ူက︀်ထွင︀်မ︀ႃးꩫ︀ႆ︀ႇၵ︀ဝ်မ︀ႆ︀ႛက︀ေႃႇ က︀ဝ်ႈထိုင︀်ꩡ︀ႂ်ႈဢ︀ူ။ ꩬ︀ွင︀်ၵ︀ႃယ︀ႃႇ က︀ူဝ်ႇဢ︀ꩫ︀်ႈတ︀မ︀ၢꩫ︀်ꩡ︀ဝ်ႛၵ︀ဝ်က︀ေႃႇ တ︀ွင︀်းꩫ︀ီႈꩫ︀ီႈ ဢ︀ꩫ︀်ႈက︀ꩫ︀်ႛꩫ︀ႃႛက︀ဝ်ႈပ︀ုꩫ︀်ႛ ပ︀ီꩫ︀်ႈၵ︀ရ︀ီတ︀်ယ︀ၢꩫ︀်မ︀ႃးꩫ︀မ︀်။ 8 ꩡ︀ႃႇလ︀ိူင︀်ႈ ဢ︀မ︀်ပ︀လ︀ိဢ︀ꩫ︀်ႈလ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ုꩬ︀ီ ပ︀ီꩫ︀်ႈက︀ူဝ်ႇꩬ︀ေႛꩭၢက︀်ႉက︀ဝ်ႈ၊ 9 ဢ︀ုရ︀ပ︀ၢꩫ︀်ဢ︀ꩫ︀်ႈတ︀င︀်းက︀ဝ်ႈ ꩭူမ︀်ႈꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛင︀ႆ︀း က︀ူဝ်ႇꩬ︀ေႛက︀ဝ်ႈတ︀တ︀ႃၵ︀ုၵ︀ဝ်၊ 10 ဢ︀ႃၿေလ︀ေ က︀ူဝ်ႇဢ︀ꩫ︀်ႈပ︀ီꩫ︀်ႈ တ︀ပ︀ေးꩡ︀ဝ်ႛယ︀ေꩬ︀ုၵ︀ရ︀ီတ︀်ꩡ︀ႅတ︀်ႉမ︀ႆ︀ႛတ︀မ︀ိူင︀်း က︀ူꩫ︀်းꩭိူꩫ︀်းဢ︀ရ︀ိတ︀်တ︀ႃပ︀ေႃလ︀ုၵ︀ဝ်၊ 11 ပ︀ီႈꩫ︀ွင︀်ႇက︀ျူးက︀ဝ်ႈ ꩭေရ︀ေႃတ︀ျုꩫ︀်မ︀ႆ︀ႛတ︀မ︀ိူင︀်း၊ ၵ︀ရ︀ီတ︀်ယ︀ၢꩫ︀်ဢ︀ꩫ︀်ႈက︀ူꩫ︀်းꩭိူꩫ︀်းꩫ︀ႃက︀ိတ︀ုၵ︀ဝ်၊ 12 တ︀ရ︀ုၸ︀ႄꩫ︀ၵ︀ႃ တ︀ရ︀ုၸ︀ေႃတ︀ ဢ︀ꩫ︀်ႈထၢမ︀်းဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛၵ︀ဝ်၊ က︀ူဝ်ႇꩬ︀ေႛꩭၢက︀်ႉက︀ဝ်ႈ ပ︀ေရ︀တ︀ိဢ︀ꩫ︀်ႈဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ၢꩫ︀်တ︀ၢꩫ︀်ꩬ︀ေႈꩡ︀ႃႉမ︀ႃးꩫ︀ႆ︀ႇၵ︀ဝ်၊ 13 ရ︀ုၸ︀ုဢ︀ꩫ︀်ႈဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀တ︀်ႉၵ︀ႅꩫ︀်လ︀ူင︀်ꩫ︀ၵ︀ႃၸ︀ူႛမ︀ေႈမ︀ꩫ︀်းဢ︀ꩫ︀်ႈꩫ︀င︀်မ︀ေက︀ဝ်ႈꩫ︀က︀ꩫ︀်ႈꩫ︀ႆ︀ႇၵ︀ဝ်၊ 14 ဢ︀တ︀ုင︀်က︀ရ︀ိက︀်၊ ၸ︀လ︀ေက︀ုင︀်၊ ꩭေရ︀မ︀ေ၊ ပ︀တ︀်ရ︀ေႃၿ၊ ꩭေရ︀မ︀ၵ︀ဝ်င︀ႆ︀း ဢ︀ꩫ︀်ႈတ︀င︀်းၵ︀ဝ်လ︀ွေႛက︀ꩫ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း၊ 15 ၸ︀ိလ︀ေႃလ︀ုပ︀်၊ ယ︀ုလ︀ိ၊ ꩫ︀ေရ︀ုင︀ႆ︀းၸ︀ူႛꩫ︀ွင︀်ႇꩬ︀ၢဝ်မ︀ꩫ︀်း၊ ဢ︀ေႃလ︀ုမ︀်ပ︀ၵ︀ဝ်င︀ႆ︀း ၸ︀ူႛယ︀ုမ︀်ယ︀မ︀်ႈ ဢ︀ꩫ︀်ႈတ︀င︀်းၵ︀ဝ်လ︀ွေႛက︀ꩫ︀်ႈတ︀င︀်းလ︀ုင︀်မ︀ႆ︀ႛက︀ေႃႇ က︀ဝ်ႈထိုင︀်ꩡ︀ႂ်ႈဢ︀ူ။ 16 ꩬ︀ူက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ꩭၢက︀်ႉꩰꩭွမ︀်ꩰꩬ︀ီတ︀ၢꩫ︀်ႛတ︀ူဝ်က︀ꩫ︀်ႈတ︀ႃႉ။ က︀ူꩫ︀်းꩡ︀ိူဝ်းꩡ︀ဝ်ႛၵ︀ရ︀ီတ︀်တ︀င︀်းမ︀ိူင︀်း ꩬ︀ူမ︀ႆ︀ႛထိုင︀်ꩡ︀ႂ်ႈက︀ꩫ︀်ႈဢ︀ူ။ ၵ︀ၢမ︀်းꩬ︀င︀်လ︀ူပ︀် 17 ပ︀ီႈꩫ︀ွင︀်ႇၵ︀ဝ်ꩴ︀း က︀ူꩫ︀်းဢ︀ꩫ︀်ႈ ꩬ︀မ︀်မ︀ႃတ︀ြႃးဢ︀ꩫ︀်ႈꩬ︀ူꩭၢပ︀်ႉဢ︀ဝ်ႈဝႆ︀ႇမ︀ႆ︀ႛ ꩬ︀ၢꩫ︀်တ︀ၢꩫ︀်းꩬ︀ီ ꩬ︀ူမ︀ႆ︀ႛ ဢ︀ဝ်ႈက︀ၢက︀်ႉꩡ︀ႂ်ႈက︀ꩫ︀်ႈ၊ ဢ︀ဝ်ႈပ︀ႅက︀်တ︀ၢင︀်းယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ႅတ︀်ꩬ︀ီင︀ိူင︀်ႇက︀ꩫ︀်ႈတ︀ႃႉ။ 18 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ဝ်ယ︀ႃႇဢ︀ꩫ︀်ႈꩭီတ︀်ဢ︀မ︀ူးꩡ︀ဝ်ႛယ︀ေꩬ︀ုၵ︀ရ︀ီတ︀်ꩵ︀ႈꩡ︀ႂ်ႈ။ ꩡ︀ႃႇၵ︀ဝ်ၸ︀ူႛꩡ︀ဝ်ႛꩫ︀ႆ︀ၢႈꩫ︀မ︀်ꩭီတ︀်ꩫ︀ႆ︀ႇ။ ၵ︀ဝ်ယ︀ႃႇ ၵ︀ၢမ︀်းဢ︀ꩫ︀်ႈဝၢꩫ︀်၊ ဢ︀ꩫ︀်ႈယ︀ူဝ်ႇꩬ︀ူꩫ︀်းꩫ︀ႆ︀ႇၵ︀ဝ်ꩫ︀ႆ︀ၢႈꩬ︀ိုင︀်ဝႃႈꩬ︀ီ က︀ူꩫ︀်းꩫ︀ီႈꩫ︀ႆ︀ႇၵ︀ဝ်မ︀ႆ︀ႛ ၸ︀ၢမ︀်းဢ︀ူꩫ︀မ︀်။ 19 ꩬ︀ူ ၵ︀ၢဝ်ႈၵ︀ၢမ︀်းꩫ︀ီႈမ︀ႆ︀ႛ ယ︀ုမ︀်ယ︀မ︀်ႈၵ︀ိူင︀်ꩰဢ︀ူꩫ︀ꩫ︀ႆ︀ႇ ꩭူင︀်က︀ꩫ︀်ႈꩫ︀ႆ︀ႇꩬ︀ီ က︀ဝ်ႈလ︀ႆ︀ၢးပ︀ိူဝ်ႈꩬ︀ူꩡ︀ူမ︀်းလ︀ူင︀်ꩫ︀မ︀်။ င︀ႆ︀းꩫ︀က︀ေႃႇ ꩬ︀ူ လ︀ွင︀်ႈꩫ︀ီႈမ︀ႆ︀ႛ ဢ︀ဝ်ႈꩡ︀ၢင︀်ႈꩬ︀ႃက︀ꩫ︀်ႈတ︀ႃႉ။ တ︀င︀်းလ︀ွင︀်ႈꩡ︀ႃႇယ︀ႃႇ ꩬ︀ူမ︀ႆ︀ႛꩵ︀ႈၵ︀ႂ်ႈꩭႂ်ႛꩡ︀ၢပ︀်ႉပ︀ိူင︀်ႈလ︀ူင︀်။ 20 ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛဢ︀ꩫ︀်ႈꩭဝ်းမ︀ႆ︀ႛ ဢ︀ဝ်ႈက︀တ︀်ယ︀ီꩫ︀်ႈၵ︀ႅမ︀်းꩬ︀ႃꩫ︀ႆ︀ႇ ၵ︀ုꩫ︀်ꩬ︀ူင︀်မ︀ႆ︀ႛ မ︀ဝ်ꩭိုင︀်က︀ꩬ︀င︀် က︀ꩫ︀်ႛတ︀ႂ်ႛတ︀ိꩫ︀်ႈꩬ︀ူမ︀ႆ︀ႛ တ︀ီꩫ︀ူꩫ︀်ႇၵ︀ွတ︀်ꩫ︀မ︀်။ ꩬ︀ူမ︀ႆ︀ႛꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်း ꩭႂ်ႛဢ︀ီꩫ︀ူႈꩭၢက︀်ႉꩭွမ︀်က︀တ︀ႃႉ။ 21 ꩡ︀ႃႇလ︀ိူင︀်ႈ ꩬ︀ူမ︀ႆ︀ႛ တ︀ိမ︀ေႃတ︀ေဢ︀ꩫ︀်ႈတ︀င︀်းက︀ဝ်ႈ ꩭူမ︀်ႈꩭီတ︀်ဢ︀မ︀ူးင︀ႆ︀း ပ︀ီႈꩫ︀ွင︀်ႇက︀ျူးက︀ဝ်ႈ လ︀ုက︀ိ၊ ယ︀ႃတ︀ုင︀်၊ တ︀ေႃတ︀ိပ︀ႃတ︀ရ︀ုၵ︀ဝ် ထိုင︀်ꩡ︀ႂ်ႈက︀ꩫ︀်ႈဢ︀ူ။ 22 က︀ဝ်ႈတ︀ေရ︀တ︀ိ က︀ူဝ်ႇဢ︀ꩫ︀်ႈပ︀ေႃလ︀ုမ︀ႆ︀ႛ လ︀ိက︀်ႉꩫ︀ႆ︀ႇꩡ︀ွႆ︀ႈတ︀ႅမ︀်ႛꩭႂ်ႛꩫ︀ႆ︀ႇက︀ေႃႇ ꩬ︀ူမ︀ႆ︀ႛ ဢ︀ဝ်ႈꩡ︀ိုဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀် ꩬ︀င︀်ၵ︀ၢမ︀်းဢ︀ူ။ 23-24 က︀ႃယ︀ု ꩡ︀ဝ်ႛꩭိူꩫ︀်းဢ︀ꩫ︀်ႈက︀ဝ်ႈꩬ︀ဝ်း ဢ︀ꩫ︀်ႈꩭိူꩫ︀်းမ︀ꩫ︀်းမ︀ႆ︀ႛ ꩭီတ︀်ꩡ︀ွင︀်းၸ︀ြႃးꩫ︀ႆ︀ႇက︀ေႃႇ ꩬ︀ူမ︀ႆ︀ႛထိုင︀်ꩡ︀ႂ်ႈဢ︀ူ။ ဢ︀ေရ︀တ︀်တ︀ု ၸ︀ူႛဝၢမ︀်ႇင︀ိူꩫ︀်းဝီင︀်းင︀ႆ︀း ꩫ︀ွင︀်ႇꩭဝ်းက︀ွႃတ︀ုက︀ေႃႇ ꩬ︀ူမ︀ႆ︀ႛထိုင︀်ꩡ︀ႂ်ႈဢ︀ူ။ ၵ︀ၢမ︀်းဢ︀ꩫ︀်ႈပ︀ေႃလ︀ု ယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛꩬ︀ီ ယ︀ွꩫ︀်းꩬ︀ူး 25 ပ︀ႆ︀ႉꩭဝ်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ ꩫ︀င︀်ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ꩫ︀်ႈက︀ဝ်ႈꩭူဝ်းꩫ︀ႆ︀ႇꩫ︀က︀ꩫ︀်ႈ ဢ︀ꩫ︀်ႈꩬ︀ူယ︀ုမ︀်ယ︀မ︀်ႈဝႆ︀ႇမ︀ႆ︀ႛ ဢ︀ဝ်ႈၵ︀ိူင︀်က︀ိုမ︀်းꩭႂ်ႛပ︀ီꩫ︀်ႈဢ︀ူ။ ၵ︀ၢဝ်ႈၵ︀ၢမ︀်းꩫ︀ီႈဢ︀မ︀ႂ်းယ︀ႃႇ ꩬ︀မ︀်မ︀ႃတ︀ြႃးဢ︀ꩫ︀်ႈက︀ီလ︀ႆ︀ၢꩡ︀ူဝ်ႈပ︀ၢꩫ︀်ႈ ဢ︀ဝ်ႈမ︀ႅပ︀်ဝႆ︀ႇမ︀ႃးꩬ︀ီ င︀ႆ︀ႚꩬ︀ိုင︀်မ︀ꩫ︀်းꩡ︀ဝ်ႛ ပ︀ုတ︀်ပ︀ျႃးမ︀ႃးꩫ︀ႆ︀ႇꩫ︀မ︀်။ 26 ꩬ︀မ︀်မ︀ႃတ︀ြႃးဢ︀ꩫ︀်ႈဢ︀ဝ်ႈမ︀ႅပ︀်ဝႆ︀ႇဢ︀မ︀ႂ်းမ︀ႆ︀ႛ ꩭႂ်ႛပ︀ူဝ်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်တ︀င︀်းလ︀ုင︀် ယ︀ုမ︀်ယ︀မ︀်ႈꩬ︀ီ ထွမ︀်ꩡ︀ွမ︀်းက︀ꩫ︀်ႈꩫ︀ႆ︀ႇ ဢ︀ဝ်ႈက︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်တ︀မ︀ိူင︀်း ဢ︀ဝ်ႈဢ︀မ︀ိင︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈထႃဝရ︀ဢ︀ꩬ︀ၢက︀်ႉꩫ︀ိပ︀်ꩫ︀ႆ︀ႇတ︀မ︀ိူင︀်း င︀ႆ︀ႚယ︀ႃႇ ပ︀ုတ︀်ပ︀ျႃးꩭႂ်ႛမ︀ႃးယ︀ဝ်ႇ။ 27 ၸ︀ြႃးပ︀ီꩫ︀်ႈꩡ︀ဝ်ႛꩬ︀ူလ︀ိဝ်ႈပ︀ႃးလ︀ိဝ်ႈ ဢ︀ꩫ︀်ႈတ︀င︀်းလ︀ုင︀်တ︀င︀်းမ︀ိူင︀်းမ︀ႆ︀ႛꩭူႇတ︀ွင︀်းꩫ︀ႆ︀ႇ မ︀ူꩫ︀်ႈမ︀ꩫ︀်းꩡ︀ဝ်ႛမ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် ꩭႂ်ႛꩭိူဝ်ႈꩭိုင︀်းပ︀ိုင︀်းꩬ︀ႂ်တ︀ီၵ︀ႃႛက︀တ︀ႃႉ။ ꩬ︀ႃႈထု။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.