ရ︀ေႃမ︀ 11 - Khamti Shan

မ︀ႅတ︀်ႉတ︀ႃၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ꩫ︀်ႛꩫ︀ိူဝ်က︀ူꩫ︀်းဢ︀ီတ︀်ꩬ︀ြေးꩫ︀ႆ︀ႇၵ︀ဝ်မ︀ႆ︀ႛဝႆ︀ႇ

¹ ꩫ︀ႆ︀ႇက︀ီး ၸ︀ြႃးပ︀ီꩫ︀်ႈꩡ︀ဝ်ႛ ဢ︀ီတ︀်ꩬ︀ြေးမ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ ၵ︀ွတ︀်က︀ႃက︀ျႃး။ ꩵ︀ႈၵ︀ွတ︀်ပ︀ိူင︀်ႈလ︀ူင︀်။ က︀ဝ်ႈၸ︀ူႛꩡ︀ဝ်ႛက︀ေႃႇ ၸ︀ꩫ︀်းဢ︀ီတ︀်ꩬ︀ြေး၊ ၵ︀ိူဝ်းၿိင︀်ယ︀ႃမ︀ိင︀် ဢ︀ꩫ︀်ႈလ︀ုက︀်ႉဢ︀ႃပ︀ြႃꩭၢမ︀်မ︀ႆ︀ႛ ၵ︀ိူဝ်းမ︀ႃးꩫ︀မ︀်။

² ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ꩫ︀်းက︀ူꩫ︀်းမ︀ꩫ︀်းꩡ︀ဝ်ႛ ဢ︀ꩫ︀်ႈလ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ လ︀ိူက︀်ႉဢ︀ဝ်ႈဝႆ︀ႇမ︀ႆ︀ႛ ꩵ︀ႈၵ︀ွတ︀်မ︀ႃး။ က︀ျမ︀်းလ︀ိက︀်ႉမ︀ႆ︀ႛ လ︀ွင︀်ႈဢ︀ီတ︀်ꩬ︀ြေးꩫ︀ႆ︀ႇၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ေလ︀ိယ︀ၵ︀ႅꩫ︀်းဝွꩫ︀်းဝႆ︀ႇꩫ︀ႆ︀ႇ ꩬ︀ူတ︀ွင︀်းဢ︀ူ။

³ မ︀ꩫ︀်းꩬ︀ွက︀်ႉꩫ︀ႆ︀ႇ “ၵ︀ိင︀်းတ︀ူဝ်ꩡ︀ဝ်ႛꩴ︀း ပ︀ရ︀ေႃးၸ︀ႅတ︀်ႉꩡ︀ဝ်ႛၵ︀ဝ်မ︀ႆ︀ႛ ၵ︀ဝ်ဢ︀ဝ်ႈတ︀ႆ︀ၢႈမ︀ူတ︀်ယ︀ဝ်ႇ။ ၵ︀ီင︀်ꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛက︀ေႃႇ ၵ︀ဝ်ယ︀ႃႇၵ︀ွတ︀်မ︀ူတ︀်ယ︀ဝ်ႇ။ ပ︀ရ︀ေႃးၸ︀ႅတ︀်ႉꩫ︀က︀ီးယ︀ႃႇ င︀ႆ︀ႚ က︀ဝ်ႈၵ︀ႃႛၸ︀ူႛꩡ︀ဝ်ႛꩫ︀ႆ︀ၢႈꩫ︀မ︀်က︀ိူတ︀်တ︀ီၵ︀ႃႛꩫ︀ႆ︀ႇ။ က︀ဝ်ႈၵ︀ႃႛမ︀ႆ︀ႛက︀ေႃႇ ၵ︀ဝ်ꩬ︀ၢင︀်ဢ︀ဝ်ႈတ︀ႆ︀ၢႈဢ︀ူတ︀ီၵ︀ႃႛꩫ︀မ︀်” ꩫ︀ဝꩫ︀်ႇ။

⁴ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ေလ︀ိယ︀မ︀ႆ︀ႛ ꩭလ︀ိုဝ်ꩫ︀ႆ︀ဝႃႈပ︀ွက︀်ႉꩫ︀ႆ︀ႇꩫ︀က︀ီး “က︀ူꩫ︀်းဢ︀ꩫ︀်ႈꩭုꩫ︀်ꩭၢင︀်ႈၿႃလ︀မ︀ႆ︀ႛ မ︀ဝ်ပ︀ႆ︀ၢႛဝႆ︀ႈꩫ︀ႆ︀ႇ ꩡ︀ီတ︀်ꩭီင︀်က︀ူဝ်ႇꩭၢင︀်းက︀ဝ်ႈꩡ︀ဝ်ႛ ဢ︀ဝ်ႈက︀ိူတ︀်ဝႆ︀ႇဢ︀ူ” ꩫ︀ဝꩫ︀်ႇ။

⁵ င︀ႆ︀ႚက︀ေႃႇ ꩫ︀င︀်မ︀ိူဝ်ႈဢ︀မ︀ႂ်းꩫ︀က︀ꩫ︀်ႈꩫ︀မ︀်။ လ︀ႆ︀ၢးပ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ီꩫ︀ူႈꩭၢက︀်ႉꩭွမ︀်ꩫ︀ႆ︀ႇꩬ︀ီ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛလ︀ိူက︀်ႉဝႆ︀ႇ ꩡ︀ွꩫ︀်လ︀ိူင︀်ႈက︀ိူတ︀်ဢ︀ူ။

⁶ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ဝ်မ︀ႆ︀ႛလ︀ိူက︀်ႉဝႆ︀ႇꩫ︀ႆ︀ႇယ︀ႃႇ ၵ︀ဝ်မ︀ႆ︀ႛဢ︀ီꩫ︀ူႈꩭၢက︀်ႉꩭွမ︀်ၸ︀ႅဝ်ꩬ︀ီꩫ︀မ︀်။ လ︀ႆ︀ၢးပ︀ိူဝ်ႈတ︀ၢင︀်းက︀ႅင︀်းၵ︀ဝ်ꩬ︀ီꩵ︀ႈꩡ︀ႂ်ႈ။ ꩬ︀င︀်ဝႃႈလ︀ႆ︀ၢးပ︀ိူဝ်ႈတ︀ၢင︀်းက︀ႅင︀်းၵ︀ဝ်ꩫ︀မ︀် လ︀ိူက︀်ႉꩫ︀ႆ︀ႇꩫ︀က︀ီး မ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ ဢ︀ီꩫ︀ူႈꩭၢက︀်ႉꩭွမ︀်ꩫ︀ႆ︀ႇ ဢ︀ꩫ︀်ႈတ︀ေႇတ︀ေႇꩵ︀ႈꩡ︀ႂ်ႈ။

⁷ င︀ႆ︀းꩫ︀ႆ︀ႇꩬ︀ီ ၸ︀ꩫ︀်းဢ︀ီတ︀်ꩬ︀ြေးယ︀ႃႇ ဢ︀ꩫ︀်ႈၵ︀ဝ်ꩭီတ︀်ဢ︀ၵ︀ႅက︀်ႉꩬ︀ီၵ︀ႃက︀ꩫ︀်ႈမ︀ႆ︀ႛ ꩵ︀ႈထိူပ︀်။ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇ ꩡ︀ွꩫ︀်လ︀ိူင︀်ႈꩫ︀ႆ︀ၢႈꩫ︀မ︀်ၵ︀ႃထိူပ︀်ꩫ︀ႆ︀ႇ။ လ︀ိူဝ်တ︀ီꩫ︀ႆ︀ႇယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭွင︀်ႇမ︀ႆ︀ႛ ꩵ︀ႈတ︀ုမ︀်ႛပ︀ိူင︀်ႈလ︀ူင︀်။

⁸ “ꩡ︀ႂ်ႈၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈတ︀ꩫ︀်ႈဝႆ︀ႇꩫ︀ႆ︀ႇꩬ︀ီ ၵ︀ဝ်ယ︀ႃႇ တ︀ူဝ်ထိုင︀်ဝꩫ︀်းꩫ︀ႆ︀ႇတ︀မ︀ိူင︀်း တ︀ႃႈꩭꩫ︀်မ︀ဝ်ꩡ︀ၢင︀်ႈ၊ ꩫ︀ႆ︀ႛꩥ︀ိꩫ︀်းမ︀ဝ်ꩡ︀ၢင︀်ႈဢ︀ူꩫ︀မ︀်” ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀က︀ꩫ︀်ႈꩫ︀မ︀်။

⁹ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩡ︀ဝ်ႛꩭူဝ်ၵ︀မ︀်းၻႃဝိက︀ေႃႇ “ပ︀ွႆ︀းၵ︀ဝ်ယ︀ႃႇ ꩭႂ်ႛပ︀ီꩫ︀်ႈꩭိဝ်ႇက︀ႃတ︀ႃႉ။ ꩭိဝ်ႇဢ︀မ︀ႂ်းမ︀ႆ︀ႛ ၵ︀ဝ်ၸ︀ူႛꩡ︀ဝ်ႛထုက︀်ꩬ︀ီ ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ꩭႂ်ႛပ︀ူဝ်းတ︀ၢမ︀်က︀ႃတ︀ႃႉ။

¹⁰ ꩭွေတ︀ႃႈၵ︀ဝ် ꩭႂ်ႛမ︀ွတ︀်က︀ႃတ︀ႃႉ။ လ︀င︀်ၵ︀ဝ်က︀ေႃႇ ပ︀ႃႉꩫ︀က︀်ၸ︀ႅဝ်ꩬ︀ီ ꩭႂ်ႛက︀ုင︀်လ︀ေႚလ︀ေႚက︀ႃတ︀ႃႉ” ꩫ︀ဝꩫ︀်ႇ။

¹¹ ꩫ︀ႆ︀ႇက︀ီး က︀ျူးꩫ︀ႆ︀ႇၵ︀ဝ် တ︀ွင︀်ႛꩬ︀ီလ︀ူမ︀်ႇꩬ︀ုမ︀်းလ︀ေႚလ︀ေႚက︀ႃက︀ျႃးꩫ︀ꩬ︀ီ ဢ︀ꩫ︀်ႈဝႃႈထၢမ︀်ယ︀င︀်းဢ︀ူ။ ꩵ︀ႈလ︀ူမ︀်ႇꩬ︀ုမ︀်းက︀ႃလ︀ေႚလ︀ေႚ။ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေမ︀ႆ︀ႛ ၵ︀ဝ်မ︀ဝ်ꩭၢပ︀်ႉမ︀ႃးꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ꩫ︀ႆ︀ႛꩭၢပ︀်ႉမ︀ႃးꩫ︀မ︀်။ ꩫ︀ႆ︀ႇမ︀ႆ︀ႛ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ဝ်တ︀ႃႈꩫ︀ႅင︀်ႈမ︀ႃးက︀ꩫ︀်ႈꩫ︀မ︀်။

¹² က︀ျူးꩫ︀ႆ︀ႇၵ︀ဝ် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛမ︀ႆ︀ႛ ပ︀ႆ︀ၵ︀ွတ︀်မ︀ႃးꩫ︀ႆ︀ႇ တ︀င︀်းက︀မ︀်ၸ︀ႃမ︀ႆ︀ႛ ဢ︀ဝ်ႈꩫ︀ႆ︀ႛꩭၢပ︀်ႉဢ︀က︀ိဝ်းလ︀ူင︀်ယ︀ဝ်ႇ။ ၵ︀ဝ်ပ︀ႆ︀ၵ︀ွတ︀်ꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ဢ︀က︀ိဝ်းလ︀ူင︀်ꩫ︀ႆ︀ႛက︀ီး ꩬ︀င︀်ဝႃႈက︀ျူးဢ︀ꩫ︀်ႈ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ တ︀ီယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း ယ︀ုမ︀်ယ︀မ︀်ႈမ︀ႃးက︀ီး ၵ︀ႆ︀ႇမ︀ဝ်က︀ႃး တ︀င︀်းက︀မ︀်ၸ︀ႃဢ︀က︀ိဝ်းꩫ︀ႆ︀ႛမ︀ႃးဢ︀ူ။

လ︀ွင︀်ႈဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛ

¹³ ပ︀ီႈꩫ︀ွင︀်ႇၵ︀ဝ်ꩴ︀း ဢ︀ꩫ︀်ႈက︀ဝ်ႈꩬ︀ူမ︀ႆ︀ႛၵ︀ႂ်ႈဝႃႈꩫ︀ႆ︀ႇယ︀ႃႇ က︀ဝ်ႈမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဢ︀ဝ်ႈပ︀ီꩫ︀်ႈတ︀မ︀ၢꩫ︀်ꩡ︀ဝ်ႛ ꩡ︀ႃႇꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ꩬ︀ီ ꩡ︀ူမ︀်းꩭုမ︀်လ︀ူင︀်ꩫ︀မ︀်။

¹⁴ လ︀ႆ︀ၢးပ︀ိူဝ်ႈဢ︀ꩫ︀်ႈက︀ဝ်ႈꩭီတ︀်ꩫ︀ႆ︀ႇၵ︀ဝ်ꩬ︀ီ ၸ︀ꩫ︀်းက︀ဝ်ႈၵ︀ဝ်တ︀ႃႈꩫ︀ႅင︀်ႈꩬ︀ီ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေမ︀ႆ︀ႛ ၵ︀ႂ်ႈꩭႂ်ႛꩭၢပ︀်ႉမ︀ႃးက︀ꩫ︀်ႈဢ︀ူ။

¹⁵ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ ၸ︀ꩫ︀်းက︀ျူးက︀ဝ်ႈၵ︀ဝ်မ︀ႆ︀ႛပ︀ႆ︀ဝႆ︀ႇꩫ︀ႆ︀ႇ က︀ူꩫ︀်းတ︀င︀်းက︀မ︀်ၸ︀ႃဢ︀ꩫ︀်ႈက︀ျူးမ︀ဝ်ꩡ︀ႂ်ႈ ဢ︀ꩫ︀်ႈပ︀ီꩫ︀်ႈလ︀ꩫ︀်ꩬ︀ူမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈထုက︀်က︀ꩫ︀်ႈပ︀ွက︀်ႉမ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ မ︀ိူဝ်ႈၸ︀ꩫ︀်းက︀ျူးက︀ဝ်ႈၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛꩭၢပ︀်ႉပ︀ွက︀်ႉꩫ︀ႆ︀ႇယ︀ႃႇ တ︀ီပ︀ီꩫ︀်ႈꩭိုဝ်မ︀ႃးꩫ︀ႆ︀ꩫ︀က︀ီး ꩫ︀င︀်ၸ︀ူႛတ︀ႆ︀ၢႈꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩫ︀က︀ꩫ︀်ႈတ︀ီပ︀ီꩫ︀်ႈမ︀ႃးꩫ︀မ︀်။

¹⁶ လ︀ုက︀်ႉၵ︀ဝ်ႛမ︀ူဝ်ႛလ︀ိူင︀်ႈမ︀ႆ︀ႛ ၵ︀ဝ်ႛꩬ︀ိက︀်ႉလ︀ိူင︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ လ︀ူက︀ီး ၵ︀ဝ်ႛဢ︀ꩫ︀်ႈမ︀ူဝ်ႛမ︀ႆ︀ႛက︀ိူတ︀်ꩫ︀ႆ︀ႇက︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ လ︀ူယ︀ဝ်ႇꩰꩫ︀က︀ꩫ︀်ႈꩫ︀မ︀်။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ူꩫ︀်ႛမ︀ႆ︀ႇတ︀ူꩫ︀်ႛလ︀ိူင︀်ႈ ပ︀ႃႛင︀ဝ်ႛလ︀ူက︀ီး ၵ︀ႃႈမ︀ꩫ︀်းꩫ︀ႆ︀ႇၵ︀ဝ်က︀ေႃႇ ပ︀ီꩫ︀်ႈၵ︀ွင︀်ၸ︀ြႃးပ︀ီꩫ︀်ႈꩡ︀ဝ်ႛယ︀ဝ်ႇ။

¹⁷ ၵ︀ိူင︀်ႈၵ︀ၢမ︀်းဝႃႈက︀ွတ︀်ꩫ︀က︀ီး ꩫ︀င︀်က︀ၢပ︀်မ︀က︀်ꩫ︀က︀ꩫ︀်ႈꩫ︀မ︀်။ မ︀ိူဝ်ႈက︀ၢပ︀်မ︀က︀်ꩫ︀ႆ︀ႇ တ︀ူꩫ︀်ႛꩬ︀ူꩫ︀်တ︀ူꩫ︀်ႛလ︀ိူင︀်ႈမ︀ႆ︀ႛ ၵ︀ႃႈမ︀ꩫ︀်းက︀မ︀်ႈၸ︀ွင︀်း တ︀ႅပ︀်ၵ︀ွတ︀်ꩬ︀ီ ဢ︀ဝ်ႈၵ︀ႃႈတ︀ူꩫ︀်ႛထိူꩫ︀်ꩫ︀ႆ︀ႇၵ︀ဝ် က︀ၢပ︀်ဝႆ︀ႇꩫ︀မ︀်။ ꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ယ︀ႃႇ ၵ︀ႃႈတ︀ူꩫ︀်ႛထိူꩫ︀် ဢ︀ꩫ︀်ႈတ︀ူꩫ︀်ႛꩬ︀ူꩫ︀်မ︀ႆ︀ႛ က︀ၢပ︀်ဝႆ︀ႇꩫ︀က︀ꩫ︀်ႈꩫ︀မ︀်။ ၵ︀ႃႈတ︀ူꩫ︀်ႛထိူꩫ︀်ꩫ︀ႆ︀ႇ လ︀ုက︀်ႉတ︀ီႈၵ︀ႃႈတ︀ူꩫ︀်ႛꩬ︀ူꩫ︀်မ︀ႆ︀ႛ င︀ႂ်ႈꩫ︀ႆ︀ႛꩡ︀ုပ︀်ဢ︀ဝ်ႈꩫ︀က︀ꩫ︀်ႈ ꩬ︀ူက︀ေႃႇ ဢ︀က︀ိဝ်းလ︀ူင︀် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇꩭၢင︀်းက︀ျူးꩫ︀ႆ︀ႇၵ︀ဝ် ꩭႅမ︀်းဝႆ︀ႇမ︀ႆ︀ႛ ꩫ︀ႆ︀ႛတ︀ုင︀်းဢ︀ဝ်ႈဢ︀ူꩫ︀မ︀်။

¹⁸ င︀ႆ︀းꩫ︀ႆ︀ႇꩬ︀ီ ꩬ︀ူယ︀ႃႇ က︀ျူးဢ︀ꩫ︀်ႈမ︀ိူꩫ︀်ꩫ︀င︀်ၵ︀ႃႈမ︀ႆ︀ႇ ဢ︀ꩫ︀်ႈလ︀ုက︀်ႉတ︀ူꩫ︀်ႛꩬ︀ူꩫ︀်မ︀ႆ︀ႛ တ︀ႅပ︀်ၵ︀ွတ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ီꩫ︀ူႈꩫ︀ၢႆ︀ႈ။ ꩬ︀ူဢ︀ꩫ︀်ႈဝႃႈက︀မ︀်ႇလ︀ွင︀်ႛက︀ꩬ︀င︀်က︀ေႃႇꩵ︀ႈယ︀င︀်း။ ꩬ︀ူယ︀ႃႇ ၵ︀ႃႈမ︀ႆ︀ႇꩫ︀ႆ︀ၢႈꩫ︀မ︀်။ ꩬ︀ူꩵ︀ႈꩡ︀ႂ်ႈ င︀ဝ်ႛမ︀ႆ︀ႛက︀မ︀်ႇထွက︀်ႉꩫ︀ႆ︀ႇ။ င︀ဝ်ႛꩫ︀မ︀်ꩬ︀ူမ︀ႆ︀ႛ က︀မ︀်ႇထွက︀်ႉꩫ︀ႆ︀ႇ။

¹⁹ င︀ႆ︀းက︀ီး ꩬ︀ူယ︀ႃႇ ꩭႂ်ႛပ︀ူဝ်းတ︀ီႈၵ︀ဝ်မ︀ႆ︀ႛတ︀ူႈꩫ︀ႆ︀ႛက︀ၢပ︀်ꩫ︀ႆ︀ႇ ၵ︀ႃႈဢ︀မ︀ႂ်းၵ︀ဝ်မ︀ႆ︀ႛ တ︀ႅပ︀်ၵ︀ွတ︀်ယ︀ဝ်ႇ ꩫ︀က︀ျႃးတ︀ီႈဝႃႈ။

²⁰ ꩭႅꩫ︀်းꩡ︀ႂ်ႈက︀တ︀ႃႉ။ ꩫ︀ႆ︀ႇꩫ︀က︀ေႃႇ ၵ︀ႃႈဢ︀မ︀ႂ်းၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ႅပ︀်ၵ︀ွတ︀်ꩫ︀ႆ︀ႇယ︀ႃႇ ၵ︀ဝ် ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ မ︀ဝ်ယ︀ုမ︀်ယ︀မ︀်ႈꩬ︀ီꩫ︀မ︀်။ င︀ႆ︀ႚꩬ︀ူ တ︀ူꩫ︀်ႛမ︀ႆ︀ႛꩫ︀ႆ︀ႛက︀ၢပ︀်ꩫ︀ႆ︀ႇယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈꩬ︀ီꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩬ︀ူပ︀ီက︀မ︀်ႇလ︀ွင︀်ႛ။ က︀ူဝ်ႈꩬ︀ီဢ︀ူက︀ꩫ︀်ႈတ︀ႃႉ။

²¹ က︀ျူးဢ︀ꩫ︀်ႈတ︀ူꩫ︀င︀် ၵ︀ႃႈတ︀ူꩫ︀်ႛꩬ︀ူꩫ︀်ꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛ မ︀ဝ်ꩬ︀ီꩫ︀ႆ︀ၢႈꩬ︀ီ လ︀ၢꩫ︀်းၵ︀ွတ︀်က︀ီး ꩬ︀ူမ︀ႆ︀ႛက︀ေႃႇ တ︀ီꩬ︀ီꩫ︀ႆ︀ၢႈꩵ︀ႈꩡ︀ႂ်ႈ။

²² ꩬ︀တ︀ိတ︀ႃႉ။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ႂ်ႈꩫ︀ီႈလ︀ူင︀်၊ ꩡ︀ႃႇꩡ︀ၢင︀်ႈလ︀ူင︀်ꩫ︀မ︀်။ မ︀ꩫ︀်းꩡ︀ဝ်ႛ က︀ူꩫ︀်းဢ︀ꩫ︀်ႈပ︀ႅက︀်တ︀ၢင︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛꩡ︀ႃႇꩬ︀ီ ꩬ︀ူမ︀ႆ︀ႛယ︀ႃႇ ꩡ︀ႂ်ႈꩫ︀ီႈဢ︀ူ။ ꩫ︀င︀်မ︀ꩫ︀်းꩡ︀ဝ်ႛꩡ︀ႂ်ႈꩫ︀ီႈꩫ︀က︀ꩫ︀်ႈ မ︀ꩫ︀်းꩡ︀ဝ်ႛမ︀ႆ︀ႛ ပ︀ိုင︀်ႈဢ︀ိင︀်ႈꩬ︀ီဢ︀ူက︀ီး ꩬ︀ူမ︀ႆ︀ႛမ︀ꩫ︀်းꩡ︀ဝ်ႛ က︀ၢပ︀်ꩬ︀ီꩡ︀ႂ်ႈꩫ︀ီႈက︀ႃဢ︀ူ။ ꩫ︀ႆ︀ႇမ︀ဝ်ꩡ︀ႂ်ႈက︀ီး ꩬ︀ူမ︀ႆ︀ႛ မ︀ꩫ︀်းꩡ︀ဝ်ႛတ︀ီလ︀ၢꩫ︀်းၵ︀ွတ︀်ꩫ︀မ︀်။

²³ ꩬ︀င︀်ဝႃႈက︀ျူးꩫ︀ႆ︀ႇၵ︀ဝ် ꩡ︀ႂ်ႈတ︀ၢဝ်ႈပ︀ွက︀်ႉမ︀ႃးꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးက︀ီး မ︀ꩫ︀်းꩡ︀ဝ်ႛယ︀ႃႇ ၵ︀ဝ်မ︀ႆ︀ႛ တ︀ူဝ်ႈၵ︀ုမ︀်ႈၵ︀ဝ်ၸ︀ူႛꩡ︀ဝ်ႛမ︀ႆ︀ႛ က︀ၢပ︀်ဝႆ︀ႇပ︀ွက︀်ႉဢ︀ူ။ မ︀ꩫ︀်းꩡ︀ဝ်ႛ က︀ၢပ︀်ပ︀ွက︀်ႉပ︀ီꩫ︀်ႈဢ︀ူ။

²⁴ ꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ယ︀ႃႇ ၵ︀ႃႈတ︀ူꩫ︀်ႛထိူꩫ︀် ဢ︀ꩫ︀်ႈတ︀ူꩫ︀်ႛꩬ︀ူꩫ︀်မ︀ႆ︀ႛ မ︀ႃးက︀ၢပ︀်ဝႆ︀ႇꩫ︀က︀ꩫ︀်ႈꩫ︀မ︀်။ က︀ျူးꩫ︀ႆ︀ႇၵ︀ဝ်ယ︀ႃႇ ၵ︀ႃႈတ︀ူꩫ︀်ႛꩬ︀ူꩫ︀်ဢ︀မ︀ႂ်းꩫ︀က︀ꩫ︀်ႈꩫ︀မ︀်။ ꩡ︀ႃႇꩭၢင︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ႃႈက︀ဝ်ပ︀ိူꩫ︀်ႈꩡ︀ဝ်ႛဢ︀ꩫ︀်ႈလ︀ၢꩫ︀်းဝႆ︀ႇဢ︀မ︀ႂ်းၵ︀ဝ် ဢ︀ဝ်ႈꩬ︀ီ တ︀ီႈက︀ဝ်ပ︀ိူꩫ︀်ႈꩡ︀ဝ်ႛမ︀ႆ︀ႛ က︀ၢပ︀်ဝႆ︀ႇပ︀ွက︀်ႉꩫ︀ႆ︀ႇ ၵ︀ႅꩫ︀်းင︀ႆ︀ၢႈꩫ︀မ︀်။

လ︀ွင︀်ႈဢ︀ီတ︀်ꩬ︀ြေးၵ︀ဝ်တ︀င︀်းလ︀ုင︀်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ီၵ︀ေꩬ︀ေ

²⁵ ပ︀ီႈꩫ︀ွင︀်ႇၵ︀ဝ်ꩴ︀း ꩭႂ်ႛပ︀ူဝ်းꩬ︀ူမ︀ဝ်က︀မ︀်ႇလ︀ွင︀်ႛꩫ︀ႆ︀ႇ လ︀ွင︀်ႈဢ︀ꩫ︀်ႈလ︀ိူက︀်ႉလ︀မ︀် ဢ︀ꩫ︀်ႈင︀ႆ︀ႚꩬ︀ိုင︀်ၸ︀ြႃးပ︀ီꩫ︀်ႈꩡ︀ဝ်ႛပ︀ုတ︀်ၵ︀ႆ︀ႈမ︀ႃးꩫ︀ႆ︀ႇ ꩬ︀ူမ︀ႆ︀ႛၵ︀ႂ်ႈꩭႂ်ႛတ︀ွင︀်းဢ︀ူ။ ဢ︀ꩫ︀်ႈဢ︀ီတ︀်ꩬ︀ြေးၵ︀ဝ် တ︀ၢꩫ︀်ႛယ︀ပ︀်ꩫ︀ႆ︀ႇယ︀ႃႇ ꩡ︀ူဝ်ႈဢ︀ꩬ︀ၢက︀်ႉꩵ︀ႈꩡ︀ႂ်ႈ။ ꩡ︀ူဝ်ႈက︀ႃႈဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀ီယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း မ︀ဝ်ပ︀ႆ︀ယ︀ုမ︀်ယ︀မ︀်ႈမ︀ႃးꩫ︀ႆ︀ၢႈꩫ︀မ︀်။

²⁶ င︀ႆ︀းꩬ︀ီ ဢ︀ီတ︀်ꩬ︀ြေးၵ︀ဝ်တ︀င︀်းမ︀ိူင︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ေꩬ︀ေꩭႂ်ႛꩫ︀မ︀်။ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ “လ︀ုက︀်ႉꩫ︀ွႆ︀ႈꩡ︀ီဢ︀ုꩫ︀်မ︀ႆ︀ႛ ꩡ︀ဝ်ႛၵ︀ေꩬ︀ေမ︀ႃးꩬ︀ီ လ︀ုက︀်ႉဢ︀ီတ︀်ꩬ︀ြေးၵ︀ဝ်မ︀ႆ︀ႛ ဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ် တ︀ီဢ︀ဝ်ႈၵ︀ွတ︀်ꩫ︀မ︀်။

²⁷ ဢ︀ꩫ︀်ႈꩫ︀ႆ︀ႇယ︀ႃႇ ၵ︀ၢမ︀်းၵ︀တ︀်ႉက︀ဝ်ႈ ဢ︀ꩫ︀်ႈဢ︀ပ︀ႅတ︀်ႉၵ︀ဝ်မ︀ႆ︀ႛ က︀ဝ်ႈတ︀ီပ︀ွႆ︀ꩭႂ်ႛꩫ︀ႆ︀ႇꩫ︀မ︀်” ꩫ︀ဝꩫ︀်ႇ။

²⁸ က︀ျူးꩫ︀ႆ︀ႇၵ︀ဝ် ၵ︀ၢဝ်ႈၵ︀ၢမ︀်းꩫ︀ီႈမ︀ႆ︀ႛ ပ︀ႆ︀ဝႆ︀ႇꩫ︀ႆ︀ႇꩬ︀ီ ပ︀ီꩫ︀်ႈလ︀ꩫ︀်ꩬ︀ူၸ︀ြႃးပ︀ီꩫ︀်ႈꩡ︀ဝ်ႛက︀ႃယ︀ဝ်ႇ။ ပ︀ီꩫ︀်ႈင︀ႆ︀းက︀ႃꩫ︀ႆ︀ႇ ꩡ︀ႃႇꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ယ︀ႃႇ ပ︀ီꩫ︀်ႈဢ︀က︀ိဝ်းလ︀ူင︀်က︀ႃꩫ︀မ︀်။ ꩫ︀ႆ︀ႇꩫ︀က︀ေႃႇ လ︀ႆ︀ၢးပ︀ိူဝ်ႈပ︀ူလ︀ီꩫ︀်ၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩭၢက︀်ႉꩫ︀ႆ︀ႇꩬ︀ီ က︀ျူးꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛလ︀ိူက︀်ႉဝႆ︀ႇꩫ︀မ︀်။

²⁹ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ိူဝ်ႈလ︀ႂ်ႈက︀ေႃႇ ꩬ︀ူးက︀ျေးꩡ︀ူး ဢ︀ꩫ︀်ႈမ︀ꩫ︀်းꩡ︀ဝ်ႛꩭႂ်ႛဝႆ︀ႇꩫ︀ႆ︀ႇမ︀ႆ︀ႛ ꩵ︀ႈယ︀ုတ︀်ပ︀ွက︀်ႉ။ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛ ꩭွင︀်ႇဝႆ︀ႇꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩵ︀ႈၵ︀ွတ︀်။

³⁰ ꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ယ︀ႃႇ မ︀ိူဝ်ႈင︀ႃးပ︀ုꩫ︀်ႛ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩵ︀ႈထွမ︀်မ︀ႃး။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇလ︀ႆ︀ၢးပ︀ိူဝ်ႈက︀ျူးꩫ︀ႆ︀ႇၵ︀ဝ် ၵ︀ၢမ︀်းမ︀ꩫ︀်းꩡ︀ဝ်ႛမ︀ဝ်ထွမ︀်ꩫ︀ႆ︀ႇꩬ︀ီ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ီꩫ︀ူႈမ︀ႆ︀ႛ ꩬ︀ူ ꩫ︀ႆ︀ႛꩭၢပ︀်ႉယ︀ဝ်ႇ။

³¹ ꩫ︀င︀်ꩫ︀ႆ︀ႇꩫ︀က︀ꩫ︀်ႈ လ︀ႆ︀ၢးပ︀ိူဝ်ႈꩬ︀ူ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ီꩫ︀ူႈမ︀ႆ︀ႛ ꩭၢပ︀်ႉမ︀ႃးꩫ︀ႆ︀ႇꩬ︀ီ ꩭႂ်ႛပ︀ူဝ်းၵ︀ဝ်မ︀ႆ︀ႛက︀ေႃႇ မ︀ꩫ︀်းꩡ︀ဝ်ႛဢ︀ီꩫ︀ူႈမ︀ႃးꩫ︀ႆ︀ႇ င︀ႆ︀ႚက︀ျူးꩫ︀ႆ︀ႇၵ︀ဝ် ၵ︀ၢမ︀်းမ︀ꩫ︀်းꩡ︀ဝ်ႛမ︀ဝ်ထွမ︀်ꩬ︀ီဢ︀ူꩫ︀မ︀်။

³² က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းဢ︀ꩫ︀်ႈၵ︀ၢမ︀်းမ︀ꩫ︀်းꩡ︀ဝ်ႛမ︀ဝ်ထွမ︀်ꩫ︀ႆ︀ႇၵ︀ဝ်တ︀င︀်းလ︀ုင︀်မ︀ႆ︀ႛ ꩭႂ်ႛပ︀ူဝ်းမ︀ꩫ︀်းꩡ︀ဝ်ႛဢ︀ီꩫ︀ူႈပ︀ျႃးꩫ︀ႆ︀ႛꩫ︀ႆ︀ႇ ၵ︀ဝ်မ︀ႆ︀ႛ ꩫ︀င︀်ၵ︀ဝ်ၵ︀ႂ်ႈပ︀ီꩫ︀်ႈꩫ︀က︀ꩫ︀်ႈ ပ︀ွႆ︀ꩭႂ်ႛဝႆ︀ႇꩫ︀မ︀်။

လ︀ွင︀်ႈပ︀ေႃလ︀ုယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛ

³³ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ီးတ︀ꩫ︀်းတ︀ီမ︀်ႈက︀ုမ︀်လ︀ူင︀်၊ ꩥ︀ႅꩫ︀်မ︀ꩫ︀်းꩡ︀ဝ်ႛꩫ︀ႆ︀ႇလ︀ိူက︀်ႉလ︀မ︀်လ︀ူင︀်၊ ပ︀ိင︀်ꩥ︀ႃမ︀ꩫ︀်းꩡ︀ဝ်ႛꩫ︀ႆ︀ႇ က︀ၢင︀်ႛꩫ︀ႃလ︀ူင︀်ꩫ︀မ︀်။ ဢ︀ꩫ︀်ႈမ︀ꩫ︀်းꩡ︀ဝ်ႛတ︀ႅပ︀်တ︀တ︀်မ︀ႆ︀ႛ ၸ︀ႂ်က︀ေႃႇ ၵ︀ႆ︀ႈꩵ︀ႈꩡ︀ၢင︀်ႈ။ ဢ︀ꩫ︀်ႈမ︀ꩫ︀်းꩡ︀ဝ်ႛꩭီတ︀်မ︀ႆ︀ႛ ၸ︀ႂ်က︀ေႃႇꩵ︀ႈပ︀ွင︀်ꩡ︀ႂ်ႈပ︀ိူင︀်ႈလ︀ူင︀်။

³⁴ ꩫ︀င︀်က︀ျမ︀်းလ︀ိက︀်ႉမ︀ႆ︀ႛ “ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ၵ︀ႂ်ႈꩡ︀ႂ်ႈမ︀ႆ︀ႛၸ︀ႂ်က︀ေႃႇꩵ︀ႈပ︀ွင︀်ꩡ︀ႂ်ႈ။ ၸ︀ႂ်က︀ေႃႇမ︀ꩫ︀်းꩡ︀ဝ်ႛမ︀ႆ︀ႛ ꩫ︀ေꩵ︀ႈပ︀ီꩫ︀်ႈ။

³⁵ ꩭႂ်ႛပ︀ူဝ်းမ︀ꩫ︀်းꩡ︀ဝ်ႛဝႃႈတ︀ွပ︀်က︀ျေးꩡ︀ူးꩫ︀ႆ︀ႇ မ︀ꩫ︀်းꩡ︀ဝ်ႛမ︀ႆ︀ႛ ၸ︀ႂ်က︀ေႃႇက︀ျေးꩡ︀ူးꩵ︀ႈꩭွꩫ︀်ꩭီတ︀်မ︀ႃး” ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈꩫ︀မ︀်။

³⁶ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀င︀်းလ︀ုင︀်တ︀င︀်းမ︀ိူင︀်းမ︀ႆ︀ႛ မ︀ꩫ︀်းꩡ︀ဝ်ႛꩫ︀မ︀်ၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇ။ တ︀င︀်းလ︀ုင︀်ယ︀င︀်းꩬ︀ီဢ︀ူꩫ︀ႆ︀ႇ လ︀ႆ︀ၢးပ︀ိူဝ်ႈမ︀ꩫ︀်းꩡ︀ဝ်ႛ၊ ꩡ︀ႃႇꩭၢင︀်းမ︀ꩫ︀်းꩡ︀ဝ်ႛꩫ︀မ︀်။ မ︀ူꩫ︀်ႈမ︀ꩫ︀်းꩡ︀ဝ်ႛ ထႃဝရ︀ꩭႂ်ႛꩭိူဝ်ႈꩭိုင︀်းပ︀ိုင︀်းꩬ︀ႂ်တ︀ီၵ︀ႃႛက︀ႃတ︀ႃႉ။