ရ︀ေႃမ︀ 10 - Khamti Shan

¹ ပ︀ီꩫ︀ွင︀်ႇၵ︀ဝ်ꩴ︀း က︀ဝ်ႈယ︀ႃႇ ၸ︀ꩫ︀်းက︀ျူးက︀ဝ်ႈၵ︀ဝ် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ၵ︀ေꩬ︀ေꩭႂ်ႛမ︀ႆ︀ႛ ၵ︀ႂ်ႈꩭႂ်ႛꩭၢပ︀်ႉလ︀ူင︀်ꩫ︀မ︀်။ ꩭႂ်ႛပ︀ူဝ်းၵ︀ဝ်ꩭၢပ︀်ႉဢ︀ဝ်ႈꩫ︀ႆ︀ႇ က︀ဝ်ႈတ︀င︀်းꩡ︀ႂ်ႈတ︀င︀်းၵ︀ူဝ်းယ︀ွꩫ︀်းꩬ︀ူးဢ︀ူꩫ︀မ︀်။

² ၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်း ယ︀မ︀်ႈင︀ဝ်းဢ︀ူꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။ ꩫ︀ႆ︀ႇꩫ︀က︀ေႃႇ ၵ︀ဝ်ꩬ︀မ︀်မ︀ႃတ︀ြႃးမ︀ႆ︀ႛꩭူႇတ︀ွင︀်းꩫ︀ီႈꩫ︀ီႈꩬ︀ီ ယ︀မ︀်ႈင︀ဝ်းꩵ︀ႈꩡ︀ႂ်ႈ။

³ ၵ︀ဝ်ယ︀ႃႇ တ︀ၢင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းꩭဝ်းမ︀ႆ︀ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩭႂ်ႛမ︀ႆ︀ႛယ︀ႃႇ မ︀ဝ်တ︀ွင︀်းꩬ︀ီ ꩵ︀ႈꩭၢပ︀်ႉဢ︀ဝ်ႈ။ င︀ႆ︀းꩫ︀ႆ︀ႇꩬ︀ီ တ︀ၢင︀်းဢ︀ꩫ︀်ႈပ︀ိုင︀်ႈဢ︀ိင︀်ႈတ︀ၢင︀်းက︀ႅင︀်းၵ︀ဝ်ၸ︀ူႛꩡ︀ဝ်ႛမ︀ႆ︀ႛꩫ︀ႆ︀ၢႈꩬ︀ိုင︀် ꩡ︀ွမ︀်းဢ︀ူꩫ︀မ︀်။

⁴ က︀ူꩫ︀်းဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း ꩭႂ်ႛပ︀ူဝ်းပ︀ီꩫ︀်ႈက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇ တ︀ၢင︀်းဢ︀ꩫ︀်ႈက︀မ︀်ႈက︀ႅင︀်းက︀ျမ︀်းꩬ︀ိꩫ︀်မ︀ႆ︀ႛ မ︀ꩫ︀်းꩡ︀ဝ်ႛဢ︀ဝ်ႈꩬ︀ုတ︀်ꩬ︀ႆ︀ၢမ︀ႃးယ︀ဝ်ႇ။

ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းတ︀င︀်းမ︀ိူင︀်းမ︀ႆ︀ႛၵ︀ေꩬ︀ေꩭႂ်ႛ

⁵ လ︀ွင︀်ႈဢ︀ꩫ︀်ႈက︀မ︀်ႈက︀ႅင︀်းက︀ျမ︀်းꩬ︀ိꩫ︀်ဢ︀ဝ်ႈꩬ︀ီ ꩫ︀ႆ︀ႛꩬ︀ိုဝ်ႈတ︀ူဝ်ꩫ︀ႆ︀ႇ မ︀ေႃꩬ︀ေဝႃႈဝႆ︀ႇꩫ︀ႆ︀ႇယ︀ႃႇ “က︀ူဝ်ႇဢ︀ꩫ︀်ႈက︀ျမ︀်းꩬ︀ိꩫ︀်မ︀ႆ︀ႛက︀မ︀်ႈက︀ႅင︀်းꩫ︀ႆ︀ႇ ဢ︀ꩬ︀ၢက︀်ႉတ︀ီꩫ︀ိပ︀်ဢ︀ူꩫ︀မ︀်” ꩫ︀ဝꩫ︀်ႇ။

^6-7 ꩫ︀ႆ︀ႇꩫ︀က︀ေႃႇ က︀ူꩫ︀်းဢ︀ꩫ︀်ႈ​ဢ︀ဝ်ႈတ︀ၢင︀်းယ︀ုမ︀်ယ︀မ︀်ႈ​ꩬ︀ီ ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်​ꩫ︀ႆ︀ႇၵ︀ဝ်ယ︀ႃႇ “ꩭၢင︀်း ꩡ︀ဝ်ႛယ︀ေꩬ︀ု​ၵ︀ရ︀ီတ︀်​မ︀ႆ︀ႛ က︀ႃ​ပ︀ၢင︀်း​လ︀ူင︀်း​မ︀ႃးꩫ︀ႆ︀ႇ ၸ︀ႂ်ꩫ︀ႆ︀ က︀ꩫ︀်ႛꩫ︀ိူဝ်​က︀ၢင︀်ႈꩭၢဝ်​မ︀ႆ︀ႛ တ︀ီ​ၵ︀ိုꩫ︀်ႛက︀ႃ​ꩫ︀ႆ︀ႇ” ꩫ︀က︀ေႃႇယ︀ႃ “ꩭၢင︀်း ꩡ︀ဝ်ႛယ︀ေꩬ︀ု​ၵ︀ရ︀ီတ︀်​မ︀ႆ︀ႛ လ︀ုက︀်ႉ​တ︀ၢင︀်းတ︀ႆ︀ၢႈမ︀ႆ︀ႛ ပ︀ၢင︀်း​ၵ︀ိုꩫ︀်ႛꩫ︀ႆ︀ႇ ၸ︀ႂ်ꩫ︀ႆ︀ ထၢင︀်​ၵ︀ူင︀်း​တ︀ႆ︀ၢႈမ︀ႆ︀ႛ​တ︀ီ​လ︀ူင︀်း​က︀ႃ​ꩫ︀ႆ︀ႇ” ꩫ︀က︀ေႃႇယ︀ႃ မ︀ိူဝ်ႈလ︀ႂ်ႈက︀ေႃႇ ꩵ︀ႈၵ︀ႂ်ႈꩡ︀ႂ်ႈ။

⁸ က︀ျမ︀်းလ︀ိက︀်ႉမ︀ႆ︀ႛ ဝႃႈꩫ︀ႆ︀ႇယ︀ႃႇ “ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀ႆ︀ၢႛꩬ︀ူမ︀ႆ︀ႛꩫ︀မ︀်။ လ︀ုက︀်ႉꩬ︀ူပ︀်မ︀ႆ︀ႛက︀ေႃႇ ꩬ︀ူဝႃႈယ︀ဝ်ႇ။ လ︀ုက︀်ႉꩫ︀ႂ်းꩡ︀ႂ်ႈမ︀ႆ︀ႛက︀ေႃႇ ꩬ︀ူꩭၢပ︀်ႉဢ︀ဝ်ႈယ︀ဝ်ႇ” ꩫ︀ꩫ︀မ︀်။ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀မ︀ႂ်းယ︀ႃႇ တ︀ြႃးလ︀ွင︀်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈ ဢ︀ꩫ︀်ႈꩬ︀ူမ︀ႆ︀ႛတ︀ူႈꩭူဝ်းꩫ︀ႆ︀ႇꩫ︀မ︀်။

⁹ ၸ︀ႂ်မ︀ဝ်ဝႃႈ ꩡ︀ဝ်ႛယ︀ေꩬ︀ုမ︀ႆ︀ႛ ꩡ︀ဝ်ႛꩫ︀ꩬ︀ီ ဢ︀ဝ်ႈꩬ︀ူပ︀်က︀ွမ︀်းꩡ︀ူးꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ လ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ ဢ︀ဝ်ႈꩫ︀ိပ︀်ပ︀ွက︀်ႉမ︀ႃးယ︀ဝ်ႇꩫ︀ꩫ︀ႆ︀ႇ က︀ꩫ︀်ႛꩫ︀ႂ်းꩡ︀ႂ်ႈမ︀ႆ︀ႛယ︀ုမ︀်ယ︀မ︀်ႈတ︀ေႇတ︀ေႇက︀ီး က︀ူဝ်ႇဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛဢ︀ူ။

¹⁰ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈꩬ︀ီ ꩭဝ်းမ︀ႆ︀ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀မ︀်။ မ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈꩬ︀ူပ︀်က︀ွမ︀်းꩡ︀ူးꩬ︀ီ ꩭဝ်းမ︀ႆ︀ႛမ︀ꩫ︀်းꩡ︀ဝ်ႛၵ︀ေꩬ︀ေꩭႂ်ႛꩫ︀မ︀်။

¹¹ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇယ︀ႃႇ “ၸ︀ႂ်ꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈက︀ီး မ︀ိူဝ်ႈလ︀ႂ်ႈက︀ေႃႇ ꩵ︀ႈꩫ︀ႆ︀ႛဢ︀ၢႆ︀ႈ” ꩫ︀ဝꩫ︀်ႇ။

^12-13 က︀ျမ︀်းလ︀ိက︀်ႉမ︀ႆ︀ႛ “က︀ူဝ်ႇဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ွꩫ︀်းꩬ︀ူးꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ မ︀ꩫ︀်းꩡ︀ဝ်ႛၵ︀ေꩬ︀ေꩭႂ်ႛဢ︀ူ” ꩫ︀ꩬ︀ီ ဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ျူး၊ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ꩬ︀ီ ၸ︀ႂ်မ︀ႆ︀ႛက︀ေႃႇꩵ︀ႈက︀ၢက︀်ႉ။ မ︀ꩫ︀်းꩡ︀ဝ်ႛယ︀ႃႇ ၸ︀ြႃးꩬ︀ူလ︀ိဝ်ႈ ဢ︀ꩫ︀်ႈပ︀ီꩫ︀်ႈꩡ︀ဝ်ႛတ︀င︀်းမ︀ိူင︀်းꩫ︀မ︀်။ ၸ︀ူႛဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ယ︀ွꩫ︀်းꩬ︀ူးꩫ︀ႆ︀ႇၵ︀ဝ်က︀ူႈက︀ူဝ်ႇမ︀ႆ︀ႛ ၵ︀ွင︀်းꩰလ︀ွင︀်းꩰဢ︀က︀ိဝ်းပ︀ူင︀်ႈꩭႂ်ႛဢ︀ူ။

¹⁴ ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈက︀ူꩫ︀်းꩫ︀ႆ︀ႇၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ယ︀မ︀်ႈက︀ီး ꩭလ︀ိုဝ်က︀ေႃႇယ︀ွꩫ︀်းꩬ︀ူးꩵ︀ႈꩫ︀ႆ︀ႛ။ ၵ︀ၢဝ်ႈၵ︀ၢမ︀်းမ︀ꩫ︀်းꩡ︀ဝ်ႛမ︀ႆ︀ႛ မ︀ဝ်ꩫ︀ႆ︀ႛꩥ︀ိꩫ︀်းက︀ီးက︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈꩵ︀ႈꩫ︀ႆ︀ႛ။ ၸ︀ူႛꩭူဝ်းၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ မ︀ဝ်ယ︀င︀်းက︀ီးက︀ေႃႇ က︀ူꩫ︀်းꩫ︀ႆ︀ႇၵ︀ဝ် ꩵ︀ႈꩫ︀ႆ︀ႛꩥ︀ိꩫ︀်း။

¹⁵ ၸ︀ူႛꩭူဝ်းၵ︀ၢဝ်ႈၵ︀ၢမ︀်းꩫ︀ႆ︀ႇၵ︀ဝ်မ︀ႆ︀ႛ မ︀ဝ်ပ︀ွႆ︀ꩡ︀ႂ်ႇက︀ီးက︀ေႃႇ ၸ︀ႂ်က︀ေႃႇ ꩵ︀ႈက︀ႃၵ︀ႆ︀ႈ။ င︀ႆ︀းꩫ︀ႆ︀ႇꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ “ၸ︀ူႛꩭူဝ်းၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႃးꩫ︀ႆ︀ႇ မ︀ၢင︀်က︀လ︀ႃယ︀င︀်းလ︀ူင︀်ꩫ︀မ︀်” ꩫ︀ဝꩫ︀်ႇ။

¹⁶ ꩫ︀ႆ︀ႇꩫ︀က︀ေႃႇ ၵ︀ၢဝ်ႈၵ︀ၢမ︀်းꩫ︀ီႈမ︀ႆ︀ႛ က︀ူꩫ︀်းက︀ူႈက︀ူဝ်ႇယ︀ႃႇ ꩵ︀ႈယ︀ုမ︀်ယ︀မ︀်ႈ။ င︀ႆ︀းꩫ︀ႆ︀ႇꩬ︀ီ ꩭေꩬ︀ႃယ︀ပ︀ိူꩫ︀်ႈꩡ︀ဝ်ႛဝႃႈꩫ︀ႆ︀ႇ “ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ႃႛ ၵ︀ၢဝ်ႈၵ︀ၢမ︀်းဢ︀ꩫ︀်ႈတ︀ူႈၵ︀ႃႛꩭူဝ်းမ︀ႆ︀ႛ က︀ူꩫ︀်းꩫ︀မ︀်ꩰလ︀ၢႆ︀လ︀ၢႆ︀ꩵ︀ႈယ︀ုမ︀်တ︀ီၵ︀ႃႛ” ꩫ︀ဝꩫ︀်ႇ။

¹⁷ င︀ႆ︀းꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ် ၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩫ︀ႆ︀ႛꩥ︀ိꩫ︀်းဢ︀ွꩫ︀်ႈက︀ီးꩬ︀င︀် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈꩫ︀မ︀်။ လ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩭူဝ်းက︀ီးꩬ︀င︀် က︀ူꩫ︀်းꩫ︀ႆ︀ႇၵ︀ဝ် ၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႛꩥ︀ိꩫ︀်းꩫ︀မ︀်။

¹⁸ င︀ႆ︀းဝႃႈꩬ︀ီ က︀ူꩫ︀်းဢ︀မ︀ႂ်းꩫ︀ႆ︀ႇၵ︀ဝ် ၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ꩵ︀ႈꩫ︀ႆ︀ႛꩥ︀ိꩫ︀်းꩫ︀ꩬ︀ီ ၵ︀ႂ်ႈဝႃႈꩵ︀ႈꩡ︀ႂ်ႈ။ “ၸ︀ူႛꩭူဝ်းၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် က︀ူႈတ︀ီႈက︀ူႈꩫ︀ႅꩫ︀်ႈမ︀ႆ︀ႛ က︀ႃတ︀ႅဝ်ယ︀ဝ်ႇ။ ၵ︀ၢဝ်ႈၵ︀ၢမ︀်းဢ︀ꩫ︀်ႈၵ︀ဝ်တ︀ႅဝ်ꩫ︀ႆ︀ႇ တ︀င︀်းက︀မ︀်ၸ︀ႃမ︀ႆ︀ႛ ထိုင︀်က︀ႃယ︀ဝ်ႇ” ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ၵ︀ဝ်ꩫ︀ႆ︀ႛꩥ︀ိꩫ︀်းက︀ꩫ︀်ႈတ︀ေႇတ︀ေႇယ︀ဝ်ႇ။

¹⁹ ꩡ︀ႃႇလ︀ိူင︀်ႈ ၵ︀ꩫ︀်တ︀ႂ်းဢ︀ီတ︀်ꩬ︀ြေးꩫ︀ႆ︀ႇၵ︀ဝ် လ︀ွင︀်ႈꩫ︀ႆ︀ႇ မ︀ဝ်တ︀ွင︀်းက︀ျႃး။ တ︀ွင︀်းဢ︀ူ။ မ︀ေႃꩬ︀ေပ︀ိူꩫ︀်ႈꩡ︀ဝ်ႛ တ︀ၢင︀်ႈတ︀ူဝ်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀ီဝႃႈꩫ︀ႆ︀ႇ “ၸ︀ꩫ︀်းက︀ူꩫ︀်းဢ︀ꩫ︀်ႈက︀ꩬ︀င︀်မ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛတ︀ိုဝ်းꩬ︀ီ က︀ူꩫ︀်းက︀ဝ်ႈꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ီဢ︀ဝ်ႈတ︀ႃႈꩫ︀ႅင︀်ႈꩫ︀မ︀်။ ၸ︀ꩫ︀်းက︀ူꩫ︀်းဢ︀ꩫ︀်ႈမ︀ိူက︀်ႉꩫ︀ႆ︀ႇၵ︀ဝ်မ︀ႆ︀ႛတ︀ိုဝ်းꩬ︀ီ က︀ူꩫ︀်းက︀ဝ်ႈꩫ︀ႆ︀ႇၵ︀ဝ်မ︀ႆ︀ႛ တ︀ီဢ︀ဝ်ႈၵ︀ႂ်ႈꩡ︀ႃႇꩫ︀မ︀်” ꩫ︀ဝꩫ︀်ႇ။

²⁰ ꩭေꩬ︀ႃယ︀ယ︀ႃႇ တ︀ၢင︀်ႈတ︀ူဝ်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀ီ ၵ︀ႆ︀ႇမ︀ဝ်က︀ႃးဝႃႈမ︀က︀်ꩰမ︀ႃးꩫ︀ႆ︀ႇ “က︀ူꩫ︀်းဢ︀ꩫ︀်ႈက︀ဝ်ႈမ︀ႆ︀ႛမ︀ဝ်ၵ︀ႃꩫ︀ႆ︀ႇၵ︀ဝ် က︀ဝ်ႈမ︀ႆ︀ႛꩭꩫ︀်ယ︀ဝ်ႇ။ က︀ူꩫ︀်းဢ︀ꩫ︀်ႈက︀ဝ်ႈမ︀ႆ︀ႛ မ︀ဝ်တ︀ႆ︀ၵ︀ႃꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈပ︀ျႃးတ︀ူဝ်ႈယ︀ဝ်ႇ” ꩫ︀ဝꩫ︀်ႇ။

²¹ ꩫ︀ႆ︀ႇꩫ︀က︀ေႃႇ မ︀ꩫ︀်း ပ︀ွင︀်ႛဢ︀ီတ︀်ꩬ︀ြေးၵ︀ဝ်ဝႃႈဝႆ︀ႇꩫ︀ႆ︀ႇယ︀ႃႇ “ၸ︀ꩫ︀်းဢ︀ꩫ︀်ႈက︀ဝ်ႈမ︀ႆ︀ႛ ꩬ︀ၢꩫ︀်တ︀ၢꩫ︀်းꩬ︀ီ ၵ︀ၢမ︀်းက︀ဝ်ႈမ︀ဝ်ထွမ︀်ꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈꩭၢပ︀်ႉတ︀ွꩫ︀်ႛꩬ︀ီ ၸ︀ႃႇတ︀င︀်းဝꩫ︀်း မ︀ိုဝ်းယ︀ုꩫ︀်ႈမ︀ႃးဢ︀ူ” ꩫ︀ဝꩫ︀်ႇ။