ၿျႃၻိက︀်ႉ 9 - Khamti Shan

¹ ꩡ︀ႃႇလ︀ိူင︀်ႈ ၵ︀ုꩫ︀်ꩬ︀ၢင︀်ပ︀ီꩫ︀်ႈꩡ︀မ︀ꩫ︀ႆ︀ႇ တ︀ုတ︀်ပ︀ဝ်က︀ီး လ︀ုက︀်ႉက︀ၢင︀်ႈꩭၢဝ်မ︀ႆ︀ႛ ꩫ︀ၢဝ်ႈလ︀ုက︀်ႉလ︀ိူင︀်ႈ လ︀င︀်ꩫ︀ိꩫ︀်ႈမ︀ႆ︀ႛတ︀ူက︀်မ︀ႃးꩫ︀ႆ︀ႇမ︀ႆ︀ႛ က︀ဝ်ႈꩭꩫ︀်ဢ︀ူ။ ꩫ︀ၢဝ်ႈဢ︀မ︀ႂ်းမ︀ႆ︀ႛ ꩬ︀ူဝ်းထၢင︀်ၵ︀ူင︀်းတ︀ႆ︀ၢႈꩭႂ်ႛဝႆ︀ႇဢ︀ူ။

² ꩫ︀ၢဝ်ႈဢ︀မ︀ႂ်း ထၢင︀်ၵ︀ူင︀်းတ︀ႆ︀ၢႈပ︀ုတ︀်ၵ︀ွတ︀်က︀ီး လ︀ုက︀်ႉꩭူဝ်တ︀ီႈၸ︀ႆ︀းလ︀ူင︀်မ︀ႆ︀ႛ က︀ွꩫ︀်ႈၸ︀ႆ︀းဢ︀ွက︀်မ︀ႃးꩫ︀က︀ꩫ︀်ႈပ︀ီꩫ︀်ႈင︀ႆ︀း ꩫ︀ႅတ︀်လ︀ုမ︀်ႛက︀ႃꩫ︀ႆ︀ႇꩬ︀ီ က︀ၢင︀်ႈဝꩫ︀်းꩫ︀ၵ︀ႃက︀ၢင︀်ႈၸ︀ႃႇ ꩫ︀မ︀်ႈꩬ︀ိင︀်က︀ႃဢ︀ူ။

³ လ︀ုက︀်ႉက︀ွꩫ︀်ႈၸ︀ႆ︀းဢ︀မ︀ႂ်းမ︀ႆ︀ႛ ꩬ︀က︀ႃႚꩫ︀ႆ︀ႇၵ︀ဝ် ဢ︀ွက︀်မ︀ႃးင︀ႆ︀း လ︀င︀်ꩫ︀ိꩫ︀်ႈမ︀ႆ︀ႛ တ︀ူက︀်မ︀ႃးက︀ꩫ︀်ႈဢ︀ူ။ ꩬ︀က︀ႃႚဢ︀မ︀ႂ်းၵ︀ဝ်မ︀ႆ︀ႛ တ︀ꩫ︀်းၵ︀ူဝ်းဢ︀ꩫ︀်ႈꩫ︀င︀်တ︀ꩫ︀်းၵ︀ူဝ်းမ︀ႅင︀်းင︀ူဝ်းꩫ︀က︀ꩫ︀်ႈꩭႅင︀်းꩫ︀ႆ︀ႇ ꩭႂ်ႛဝႆ︀ႇဢ︀ူ။

⁴ ꩬ︀က︀ႃႚဢ︀မ︀ႂ်းၵ︀ဝ်မ︀ႆ︀ႛ ဢ︀ၵ︀ၢင︀်းဢ︀ꩫ︀်ႈ ၸ︀ိူဝ်ယ︀ႃႛ၊ တ︀ူꩫ︀်ႛမ︀ႆ︀ႇ တ︀ူꩫ︀်ႛတ︀ၢင︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ၸ︀ေးယ︀ႃႇ ꩵ︀ႈꩭႂ်ႛဝႆ︀ႇ။ က︀ူꩫ︀်းဢ︀ꩫ︀်ႈꩫ︀ႃႛၸ︀က︀်ၵ︀ဝ်မ︀ႆ︀ႛ ꩡ︀ုမ︀်ႛၸ︀ြႃးပ︀ီꩫ︀်ႈꩡ︀ဝ်ႛ မ︀ဝ်တ︀ွက︀်ဝႆ︀ႇꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩫ︀မ︀် ꩭႂ်ႛꩭီတ︀်ၸ︀ေးꩫ︀ႆ︀ႇ။

⁵ က︀ူꩫ︀်းဢ︀မ︀ႂ်းၵ︀ဝ်မ︀ႆ︀ႛယ︀ႃႇ ꩭႃႛꩫ︀ိူꩫ︀်ႈꩭႂ်ႛꩭီတ︀်ၸ︀ေးဢ︀ူ။ တ︀ႆ︀ၢႈယ︀ႃႇꩵ︀ႈꩭႂ်ႛဢ︀ဝ်ႈတ︀ႆ︀ၢႈ။ ꩬ︀က︀ႃႚဢ︀မ︀ႂ်းၵ︀ဝ်က︀ၢပ︀်ႉက︀ီးယ︀ႃႇ ꩫ︀င︀်မ︀ႅင︀်းင︀ူဝ်းက︀ၢပ︀်ႉꩫ︀က︀ꩫ︀်ႈꩡ︀ီပ︀်လ︀ူင︀်ꩫ︀မ︀်။

⁶ ဝူင︀်ႈမ︀ိူဝ်ႈဢ︀မ︀ႂ်းမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ် ၵ︀ႂ်ႈတ︀ႆ︀ၢႈꩭႅင︀်းက︀ꩫ︀်ႈꩬ︀ီ တ︀ႆ︀ၢႈယ︀ႃႇတ︀ီမ︀ဝ်ꩫ︀ႆ︀ႛင︀ႆ︀းꩫ︀မ︀်။ ၵ︀ဝ်ၵ︀ႂ်ႈတ︀ႆ︀ၢႈၵ︀ႂ်ႈလ︀ႂ်ႈꩫ︀က︀ေႃႇ ၵ︀ုꩫ︀်တ︀ႆ︀ၢႈယ︀ႃႇ လ︀ုက︀်ႉၵ︀ဝ်မ︀ႆ︀ႛတ︀ီပ︀ႆ︀ၢႈက︀ႃꩫ︀မ︀်။

⁷ ꩬ︀က︀ႃႚဢ︀မ︀ႂ်းၵ︀ဝ်ယ︀ႃႇ ꩫ︀င︀်မ︀ႃႇဢ︀ꩫ︀်ႈꩡ︀ႃႇက︀ႃတ︀ိတ︀်ꩬ︀ိူက︀် ꩭႅမ︀်းဝႆ︀ႇꩫ︀က︀ꩫ︀်ႈꩫ︀မ︀်။ က︀ုမ︀်ꩭူဝ်ၵ︀ဝ်မ︀ႆ︀ႛ ꩫ︀င︀်ပ︀ွင︀်းၵ︀မ︀်းꩬ︀ုပ︀်ဝႆ︀ႇꩫ︀က︀ꩫ︀်ႈင︀ႆ︀း ꩫ︀ႃႛၵ︀ဝ်ယ︀ႃႇ ꩫ︀ႃႛက︀ူꩫ︀်းꩫ︀က︀ꩫ︀်ႈꩫ︀မ︀်။

⁸ ၵ︀ူꩫ︀်ꩭူဝ်ၵ︀ဝ်ယ︀ႃႇ ꩫ︀င︀်ၵ︀ူꩫ︀်ꩭူဝ်ၸ︀ူႛယ︀ိင︀်းꩫ︀က︀ꩫ︀်ႈ၊ ၵ︀ိဝ်ႛယ︀ႃႇ ꩫ︀င︀်ၵ︀ိဝ်ႛၵ︀ၢင︀်ꩬ︀ီႛꩫ︀က︀ꩫ︀်ႈꩫ︀မ︀်။

⁹ ဢ︀ူင︀်ႛꩡ︀ႂ်ႈၵ︀ဝ်ယ︀ႃႇ ꩫ︀င︀်ꩬ︀ိူဝ်ႛတ︀ူဝ်ႈလ︀ီက︀်ꩫ︀ုင︀်ႈဝႆ︀ႇꩫ︀က︀ꩫ︀်ႈꩬ︀ီ ꩬ︀ီင︀်ပ︀ိက︀်ၵ︀ဝ်ယ︀ႃႇ ꩫ︀င︀်ꩬ︀ီင︀်လ︀ႅင︀်မ︀ႃႇ ဢ︀ꩫ︀်ႈၸ︀ွပ︀်ႉက︀ႃတ︀ိက︀်ꩬ︀ိူက︀်ꩫ︀ႆ︀ႇၵ︀ဝ်ꩫ︀က︀ꩫ︀်ႈꩫ︀မ︀်။

¹⁰ ꩭၢင︀်ၵ︀ဝ်ယ︀ႃႇ ꩫ︀င︀်ꩭၢင︀်မ︀ႅင︀်းင︀ူဝ်းꩫ︀က︀ꩫ︀်ႈ ꩬ︀ီꩫ︀်ႛက︀ွင︀်ႇယ︀င︀်းင︀ႆ︀း တ︀ꩫ︀်းၵ︀ူဝ်းဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭႃႛꩫ︀ိူꩫ︀်ႈတ︀ၢင︀်ႈꩰ ဢ︀ဝ်ႈၵ︀ၢမ︀်ဝေၻꩫ︀ႃပ︀ီꩫ︀်ႈꩫ︀ႆ︀ႇယ︀င︀်းဢ︀ူ။

¹¹ ꩡ︀ဝ်ႛꩭူဝ်ၵ︀မ︀်းၵ︀ဝ်ယ︀ႃႇ ၵ︀ုꩫ︀်ꩬ︀ၢင︀်ထၢင︀်ၵ︀ူင︀်းတ︀ႆ︀ၢႈꩫ︀မ︀်။ ꩡ︀ိုဝ်ႈမ︀ꩫ︀်းယ︀ႃႇ ဢ︀ဝ်ႈၵ︀ၢမ︀်းꩭေပ︀ရ︀ူးယ︀ႃႇဢ︀ႃပ︀တ︀ုင︀်၊ ဢ︀ဝ်ႈၵ︀ၢမ︀်းက︀ရ︀ိက︀်ယ︀ႃႇ ဢ︀ႃပ︀ေႃးလ︀ျꩫ︀်၊ တ︀ီႈပ︀ွင︀်မ︀ꩫ︀်းယ︀ႃႇ ၸ︀ူႛယ︀ႃႇၸ︀ႅက︀်ႉꩫ︀ꩫ︀မ︀်။

¹² ဢ︀မ︀ၢင︀်က︀လ︀ႃ ပ︀ႃးပ︀ထမ︀ယ︀ႃႇ ယ︀ဝ်ႇက︀ႃယ︀ဝ်ႇ။ က︀ꩫ︀်ႛလ︀င︀်မ︀ႆ︀ႛ ဢ︀မ︀ၢင︀်က︀လ︀ႃꩬ︀ွင︀်ပ︀ႃးတ︀ီပ︀ီꩫ︀်ႈမ︀ႃးဢ︀ိက︀်ꩫ︀မ︀်။

¹³ ၵ︀ုꩫ︀်ꩬ︀ၢင︀်ꩬ︀ထမ︀ တ︀ုတ︀်ပ︀ဝ်က︀ီး လ︀ုက︀်ႉၵ︀ီင︀်ၵ︀ႅက︀်ၵ︀မ︀်းꩡ︀ဝ်ႛ ဢ︀ꩫ︀်ႈပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ လ︀ုက︀်ႉၵ︀ဝ်ꩬ︀ီဢ︀ꩫ︀်ႈ ဢ︀ꩫ︀်ႈၵ︀ီင︀်​ၵ︀ႅက︀်ၵ︀မ︀်းပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ီင︀်ဢ︀ွက︀်မ︀ႃးꩫ︀ႆ︀ႇမ︀ႆ︀ႛ က︀ဝ်ႈꩫ︀ႆ︀ႛꩥ︀ိꩫ︀်းဢ︀ူ။

¹⁴ ၵ︀ုꩫ︀်ꩬ︀ၢင︀်ဢ︀မ︀ႂ်းမ︀ႆ︀ႛဝႃႈꩫ︀ႆ︀ႇယ︀ႃႇ “ၵ︀ုꩫ︀်ꩬ︀ၢင︀်ꩬ︀ီပ︀ႃး ဢ︀ꩫ︀်ႈတ︀ႆ︀ၢႛꩫ︀မ︀်ႇလ︀ူင︀်ယ︀ူၸ︀ရ︀ေတ︀ီမ︀ႆ︀ႛ ၸ︀ုက︀်ဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ွႆ︀ꩭႂ်ႛတ︀ႃႉ” ꩫ︀ဝꩫ︀်ႇ။

¹⁵ ၵ︀ုꩫ︀်ꩬ︀ၢင︀်ဢ︀မ︀ႂ်းၵ︀ဝ်ယ︀ႃႇ ဢ︀ꩫ︀်ႈယ︀ၢမ︀်းꩫ︀ႆ︀ႇ၊ ဝꩫ︀်းꩫ︀ႆ︀ႇ၊ ꩫ︀ိူꩫ︀်ႈꩫ︀ႆ︀ႇ၊ ပ︀ီႈꩫ︀ႆ︀ႇမ︀ႆ︀ႛ ꩡ︀ႃႇꩭၢင︀်းဢ︀ဝ်ႈတ︀ႆ︀ၢႈက︀ူꩫ︀်းက︀မ︀်ၸ︀ႃ ꩬ︀ၢမ︀်ꩡ︀ႃႇꩡ︀ႃႇလ︀ိူင︀်ႈꩫ︀ꩬ︀ီ ꩭႅမ︀်းဝႆ︀ႇꩫ︀ႆ︀ႇၵ︀ဝ်ꩫ︀မ︀်။ င︀ႆ︀းꩫ︀ႆ︀ႇꩬ︀ီ င︀ႆ︀ႚၵ︀ဝ်မ︀ႆ︀ႛပ︀ွႆ︀လ︀ွတ︀်ႉꩭႂ်ႛꩫ︀မ︀်။

¹⁶ လ︀ုက︀်ႉꩬ︀ိူက︀်ဢ︀ꩫ︀်ႈၵ︀ီမ︀ႃႇꩫ︀ႆ︀ႇၵ︀ဝ်ယ︀ႃႇ ꩬ︀ွင︀်က︀ုက︀်ႉတ︀ေယ︀င︀်းဢ︀ူꩫ︀ꩫ︀ႆ︀ႇမ︀ႆ︀ႛ က︀ဝ်ႈꩫ︀ႆ︀ႛꩥ︀ိꩫ︀်းဢ︀ူ။

¹⁷ ꩫ︀ႂ်းၿျႃၻိက︀်ႉက︀ဝ်ႈမ︀ႆ︀ႛ မ︀ႃႇꩫ︀ႆ︀ႇၵ︀ဝ်င︀ႆ︀း ၸ︀ူႛၵ︀ီမ︀ႃႇ ဢ︀ꩫ︀်ႈꩫ︀ုင︀်ႈ ꩬ︀ိူဝ်ႛတ︀ူဝ်ႈလ︀ီက︀်ꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈꩭꩫ︀်ဢ︀ူ။ ꩬ︀ိူဝ်ႛဢ︀မ︀ႂ်းၵ︀ဝ်ယ︀ႃႇ ဢ︀ꩫ︀်ႈꩫ︀ႅင︀်ႈၸ︀ႆ︀း၊ ဢ︀ꩫ︀်ႈၵ︀ၢဝ်ꩭွတ︀်ႉင︀ႆ︀း ဢ︀ꩫ︀်ႈလ︀ိူင︀်င︀ဝ်းက︀ၢꩫ︀်ႇꩫ︀ႆ︀ႇၵ︀ဝ်ꩫ︀မ︀်။ က︀ုမ︀်ꩭူဝ်မ︀ႃႇဢ︀ꩫ︀်ႈၵ︀ဝ်ၵ︀ီꩫ︀ႆ︀ႇၵ︀ဝ်ယ︀ႃႇ ꩫ︀င︀်က︀ုမ︀်ꩭူဝ်ၵ︀ၢင︀်ꩬ︀ီႛꩫ︀က︀ꩫ︀်ႈꩫ︀မ︀်။ လ︀ုက︀်ႉꩬ︀ူပ︀်မ︀ႃႇဢ︀မ︀ႂ်းၵ︀ဝ်မ︀ႆ︀ႛယ︀ႃႇ ၸ︀ႆ︀း၊ က︀ွꩫ︀်ႈၸ︀ႆ︀းင︀ႆ︀း က︀ၢꩫ︀်ႇꩫ︀ႆ︀ႇၵ︀ဝ်ဢ︀ွက︀်က︀ꩫ︀်ႈဢ︀ူ။

¹⁸ လ︀ႆ︀ၢးပ︀ိူဝ်ႈၸ︀ႆ︀း၊ က︀ွꩫ︀်ႈၸ︀ႆ︀းင︀ႆ︀းက︀ၢꩫ︀်ႇဢ︀မ︀ႂ်းၵ︀ဝ် ဢ︀ဝ်ႈပ︀ီꩫ︀်ႈၸ︀ေးꩫ︀ႆ︀ႇꩬ︀ီ က︀ူꩫ︀်းက︀မ︀်ၸ︀ႃ ꩬ︀ၢမ︀်ꩡ︀ႃႇꩡ︀ႃႇလ︀ိူင︀်ႈ တ︀ႆ︀ၢႈက︀ႃမ︀ူတ︀်ဢ︀ူ။

¹⁹ မ︀ႃႇဢ︀မ︀ႂ်းၵ︀ဝ်ယ︀ႃႇ ꩬ︀ူပ︀်မ︀ႆ︀ႛꩫ︀ၢႆ︀ႈꩬ︀ေႇမ︀ဝ်က︀ႃး ꩭၢင︀်မ︀ႆ︀ႛတ︀မ︀ိူင︀်း တ︀ꩫ︀်းၵ︀ူဝ်းဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ၸ︀ေးပ︀ီꩫ︀်ႈꩫ︀ႆ︀ႇယ︀င︀်းဢ︀ူ။ ꩭၢင︀်ၵ︀ဝ်ယ︀ႃႇ ꩫ︀င︀်င︀ူးꩫ︀က︀ꩫ︀်ႈ က︀ုမ︀်ꩭူဝ်ယ︀င︀်းꩬ︀ီ ဢ︀ဝ်ႈꩭၢင︀်ဢ︀မ︀ႂ်း က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ၸ︀ေးဢ︀ူ။

²⁰ က︀ူꩫ︀်းဢ︀ꩫ︀်ႈက︀ိူတ︀်ဢ︀ꩫ︀်ႈလ︀ွတ︀်ႉၸ︀ေးဢ︀မ︀ႂ်းၵ︀ဝ်ꩬ︀ီ မ︀ဝ်တ︀ႆ︀ၢႈꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈၵ︀ဝ်ꩭီတ︀်ꩭုꩫ︀်ꩭၢင︀်ႈင︀ႆ︀း ပ︀ႆ︀ၢႛဝႆ︀ႈၸ︀ီꩫ︀ႆ︀ႇၵ︀ဝ်မ︀ႆ︀ႛ မ︀ဝ်ꩬ︀ၢင︀်ဝွေꩬ︀ီ ꩭုꩫ︀်ꩭၢင︀်ႈဢ︀ꩫ︀်ႈဢ︀ဝ်ႈ ၵ︀မ︀်း၊ င︀ိူꩫ︀်း၊ တ︀ွင︀်း၊ ꩭိꩫ︀်င︀ႆ︀း ဢ︀ဝ်ႈမ︀ႆ︀ႇꩭီတ︀်ဝႆ︀ႇ ဢ︀ꩫ︀်ႈတ︀ႃႈမ︀ဝ်ꩭꩫ︀်၊ ꩭူမ︀ဝ်ꩫ︀ႆ︀ႛꩥ︀ိꩫ︀်း၊ ၸ︀ႆ︀ၢႛမ︀ဝ်ꩫ︀ႆ︀ႛꩫ︀ႆ︀ႇၵ︀ဝ်မ︀ႆ︀ႛ က︀ၢပ︀်ꩬ︀ီပ︀ႆ︀ၢႛဝႆ︀ႈဢ︀ူꩫ︀မ︀်။

²¹ ၵ︀ဝ်ယ︀ႃႇ လ︀ုက︀်ႉဢ︀ꩫ︀်ႈဢ︀ဝ်ႈတ︀ႆ︀ၢႈပ︀ိူꩫ︀်ႈ၊ ꩡ︀ွႆ︀းပ︀ိူꩫ︀်ႈ၊ ၸ︀ိတ︀်မ︀ေထုင︀်င︀ႆ︀း ဢ︀ꩫ︀်ႈလ︀ၢက︀်ႉၵ︀ွင︀်ပ︀ိူꩫ︀်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩵ︀ႈꩬ︀ၢင︀်ဝွေမ︀ႃး။