ၿျႃၻိက︀်ႉ 7 - Khamti Shan

ဢ︀ီတ︀်ꩬ︀ြေး ႑႔႔႐႐႐ က︀ူဝ်ႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉမ︀ႆ︀ၢဝႆ︀ႇꩫ︀ႆ︀ႇၵ︀ဝ်

¹ ဝႆ︀ၢးꩫ︀ႆ︀ႇ ၵ︀ုꩫ︀်ꩬ︀ၢင︀်ꩬ︀ီပ︀ႃးမ︀ႆ︀ႛ က︀ဝ်ႈꩭꩫ︀်ဢ︀ူ။ ၵ︀ဝ်ယ︀ႃႇ က︀မ︀်ၸ︀ႃတ︀င︀်းꩬ︀ီꩫ︀ႃႛမ︀ႆ︀ႛ ဢ︀ေႈပ︀ႃးဢ︀ေႈꩫ︀ႃႛꩬ︀ဝ်းꩬ︀ီ က︀မ︀်ၸ︀ႃ၊ ပ︀ၢင︀်လ︀ႆ︀ၢင︀ႆ︀း တ︀ူꩫ︀်ႛမ︀ႆ︀ႇဢ︀မ︀ႆ︀ႚက︀ေႃႇ ꩭႂ်ႛပ︀ူဝ်းလ︀ူမ︀်းမ︀ဝ်ပ︀ဝ်ꩫ︀ႆ︀ႇ လ︀ူမ︀်းတ︀င︀်းꩬ︀ီပ︀ႃႛမ︀ႆ︀ႛ ꩭေႇဝႆ︀ႇဢ︀ူ။

² ယ︀ဝ်ႇက︀ီး ၵ︀ုꩫ︀်ꩬ︀ၢင︀်တ︀ၢင︀်ပ︀ႃးယ︀ႃႇ ꩡ︀ုမ︀်ႛၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်မ︀ႆ︀ႛ တ︀ိုဝ်းꩬ︀ီ လ︀ုက︀်ႉဝꩫ︀်းဢ︀ွက︀်မ︀ႆ︀ႛ ဢ︀ွက︀်မ︀ႃးꩫ︀ႆ︀ႇမ︀ႆ︀ႛ က︀ဝ်ႈꩭꩫ︀်ဢ︀ူ။ မ︀ꩫ︀်းယ︀ႃႇ ၵ︀ုꩫ︀်ꩬ︀ၢင︀်ꩬ︀ီပ︀ႃး ဢ︀ꩫ︀်ႈတ︀ꩫ︀်းၵ︀ူဝ်းꩫ︀ႆ︀ႛဝႆ︀ႇꩬ︀ီ က︀မ︀်ၸ︀ႃꩫ︀ၵ︀ႃ ပ︀ၢင︀်လ︀ႆ︀ၢမ︀ႆ︀ႛ ꩭီတ︀်ၸ︀ေးပ︀ီꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ိဝ်ꩬ︀ီ

³ “ꩫ︀ႃႛၸ︀က︀်ၸ︀ူႛꩡ︀ႂ်ႇၸ︀ြႃးပ︀ီꩫ︀်ႈꩡ︀ဝ်ႛꩭဝ်းꩫ︀ႆ︀ႇၵ︀ဝ်မ︀ႆ︀ႛ တ︀ူႈဢ︀ဝ်ႈꩡ︀ုမ︀်ႛၸ︀ြႃးပ︀ီꩫ︀်ႈꩡ︀ဝ်ႛ က︀ႃႈမ︀တ︀်ႉမ︀ႆ︀ၢမ︀ဝ်ယ︀ဝ်ႇယ︀ႃႇ က︀မ︀်ၸ︀ႃ၊ ပ︀ၢင︀်လ︀ႆ︀ၢ၊ တ︀ူꩫ︀်ႛမ︀ႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ီꩭီတ︀်ၸ︀ေး” ꩫ︀ဝꩫ︀်ႇ။

⁴ က︀ူꩫ︀်းဢ︀ꩫ︀်ႈꩫ︀ႃႛၸ︀က︀်မ︀ႆ︀ႛ ဢ︀ဝ်ႈꩡ︀ုမ︀်ႛၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉမ︀ႆ︀ၢဝႆ︀ႇꩫ︀ႆ︀ႇၵ︀ဝ်ယ︀ႃႇ ꩫ︀ႂ်းၵ︀ိူဝ်းဢ︀ီတ︀်ꩬ︀ြေး ꩬ︀ိပ︀်ꩬ︀ွင︀်ၵ︀ိူဝ်းမ︀ႆ︀ႛ ႑႔႔႐႐႐ က︀ူဝ်ႇꩫ︀မ︀်ꩫ︀ꩬ︀ီ က︀ဝ်ႈမ︀ႆ︀ႛၵ︀ႆ︀ႈꩭႂ်ႛဢ︀ူ။

^5-8 ၵ︀ိူဝ်းယ︀ုတ︀၊ ၵ︀ိူဝ်းရ︀ေႃၿိꩫ︀်၊ ၵ︀ိူဝ်းꩱၢတ︀်၊ ၵ︀ိူဝ်းဢ︀ႃꩬ︀ျႃ၊ ၵ︀ိူဝ်းꩫ︀ႃတ︀ႃလ︀ိ၊ ၵ︀ိူဝ်းမ︀ꩫ︀ႃꩬ︀ေ၊ ၵ︀ိူဝ်းꩬ︀ႅင︀်မ︀ုꩫ︀်၊ ၵ︀ိူဝ်းလ︀ေဝိ၊ ၵ︀ိူဝ်းဢ︀ိတ︀ၵ︀ႃ၊ ၵ︀ိူဝ်းꩡ︀ႃပ︀ုလ︀ုင︀်၊ ၵ︀ိူဝ်းယ︀ေႃတ︀ၢတ︀်င︀ႆ︀း ၵ︀ိူဝ်းၿိင︀်ယ︀ႃမ︀ိင︀်ၵ︀ဝ် ꩬ︀ိပ︀်ꩬ︀ွင︀်ၵ︀ိူဝ်းယ︀င︀်းꩫ︀ႆ︀ႇမ︀ႆ︀ႛ လ︀ုက︀်ႉဢ︀ေႈၵ︀ိူဝ်းမ︀ႆ︀ႛ ႑႒႐႐႐က︀ူဝ်ႇꩫ︀မ︀်။

ပ︀ူက︀်ႉက︀ူꩫ︀်းလ︀ူင︀်လ︀ုက︀်ႉက︀ူႈမ︀ိူင︀်း

⁹ ဝႆ︀ၢးꩫ︀ႆ︀ႇ က︀ဝ်ႈလ︀ႅမ︀်းက︀ီး ၸ︀ုင︀်က︀ူꩫ︀်းလ︀ူင︀် ဢ︀ꩫ︀်ႈၸ︀ႂ်က︀ေႃႇၵ︀ၢꩫ︀်းမ︀ဝ်ပ︀ီꩫ︀်ႈꩫ︀ႆ︀ႇမ︀ႆ︀ႛ ꩭꩫ︀်ဢ︀ူ။ က︀ူꩫ︀်းဢ︀မ︀ႂ်းၵ︀ဝ်ယ︀ႃႇ လ︀ုက︀်ႉက︀ူႈၵ︀ိူဝ်း၊ က︀ူႈၸ︀ꩫ︀်း၊ က︀ူႈမ︀ိူင︀်းမ︀ႆ︀ႛ ဢ︀ꩫ︀်ႈတ︀ၢꩫ︀်ႛၵ︀ၢမ︀်းက︀ူႈၸ︀ꩫ︀်းꩫ︀ႆ︀ႇၵ︀ဝ်ꩫ︀မ︀်။ ၵ︀ဝ်ယ︀ႃႇ ၵ︀ိူင︀်ႈၵ︀ၢဝ်ꩫ︀ုင︀်ႈင︀ႆ︀း ၵ︀ႃႈမ︀ွက︀်ယ︀ႃႛꩫ︀ႆ︀ႇၵ︀ဝ်တ︀ိုဝ်းဝႆ︀ႇက︀ꩫ︀်ႈꩬ︀ီ ပ︀ၢင︀်ႈꩫ︀ႃႛပ︀လ︀ၢင︀်ပ︀ူႇဢ︀ွꩫ︀်မ︀ႆ︀ႛ ꩬ︀ဝ်းက︀ꩫ︀်ႈင︀ႆ︀း

¹⁰ “ၸ︀ြႃးပ︀ီꩫ︀်ႈꩡ︀ဝ်ႛꩭဝ်း ဢ︀ꩫ︀်ႈက︀ꩫ︀်ႛꩫ︀ိူဝ်ပ︀လ︀ၢင︀်မ︀ႆ︀ႛꩫ︀င︀်ႈꩫ︀ႆ︀ႇꩫ︀ၵ︀ႃ ပ︀ူႇဢ︀ွꩫ︀်မ︀ꩫ︀်းꩡ︀ဝ်ႛꩫ︀မ︀် ꩭဝ်းမ︀ႆ︀ႛ ၵ︀ေꩬ︀ေꩭႂ်ႛꩫ︀ႆ︀ႇ” ꩫ︀ꩬ︀ီဢ︀ိဝ်က︀ꩫ︀်ႈဢ︀ူ။

¹¹ ၵ︀ုꩫ︀်ꩬ︀ၢင︀်တ︀င︀်းမ︀ိူင︀်းယ︀ႃႇ ပ︀လ︀ၢင︀်၊ က︀ေထဝ်ႛꩫ︀ႆ︀ႇၵ︀ဝ်င︀ႆ︀း ꩬ︀တ︀်ႉတ︀ဝႃꩬ︀ီပ︀ႃးမ︀ႆ︀ႛ ၵ︀ုမ︀်ႇꩬ︀ီꩬ︀ဝ်းက︀ꩫ︀်ႈင︀ႆ︀း ပ︀ၢင︀်ႈꩫ︀ႃႛပ︀လ︀ၢင︀်မ︀ႆ︀ႛ ပ︀ႅပ︀်ႉၵ︀ုပ︀်ႉꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ႆ︀ၢႛဝႆ︀ႈက︀ꩫ︀်ႈဢ︀ူ။

¹² မ︀ိူဝ်ႈင︀ႆ︀းပ︀ႆ︀ၢႛဝႆ︀ႈꩫ︀ႆ︀ႇ “ꩬ︀ႃႈထု။ ၸ︀ြႃးပ︀ီꩫ︀်ႈꩡ︀ဝ်ႛꩭဝ်းမ︀ႆ︀ႛ မ︀ၢင︀်က︀လ︀ႃ၊ တ︀ၢင︀်းꩭူႇတ︀ွင︀်း၊ ဢ︀ꩫ︀်ႈယ︀ူဝ်းယ︀ွင︀်ႛက︀ျေးꩡ︀ူး၊ က︀ုင︀်၊ တ︀ꩫ︀်းၵ︀ူဝ်းင︀ႆ︀း ဢ︀ꩡ︀ူꩫ︀်း ထႃဝရ︀ꩭႂ်ႛယ︀င︀်းတ︀ီၵ︀ႃႛက︀တ︀ႃႉ။ ꩬ︀ႃႈထု” ꩫ︀ꩬ︀ီဝႃႈက︀ꩫ︀်ႈဢ︀ူ။

¹³ ဝႆ︀ၢးꩫ︀ႆ︀ႇ က︀ေထဝ်ႛပ︀ႃးလ︀ိူင︀်ႈယ︀ႃႇ က︀ဝ်ႈမ︀ႆ︀ႛ “က︀ူꩫ︀်းဢ︀ꩫ︀်ႈꩫ︀ုင︀်ႈၵ︀ိူင︀်ႈၵ︀ၢဝ်ꩫ︀ႆ︀ႇၵ︀ဝ်ယ︀ႃႇ ၸ︀ႂ်ꩫ︀ႆ︀။ လ︀ုက︀်ႉပ︀ႃႛလ︀ႂ်ႈꩫ︀ႆ︀မ︀ႃးꩫ︀ႆ︀ႇ” ꩫ︀ꩬ︀ီထၢမ︀်ဢ︀ူ။

¹⁴ ꩫ︀ႆ︀ႇမ︀ႆ︀ႛ က︀ဝ်ႈယ︀ႃႇ “ꩡ︀ဝ်ႛꩴ︀း မ︀ႂ်းꩡ︀ဝ်ႛတ︀ွင︀်းတ︀ီၵ︀ႃႛဢ︀ူ” ꩫ︀က︀ီး မ︀ꩫ︀်းယ︀ႃႇ “ၵ︀ဝ်ယ︀ႃႇ က︀ူꩫ︀်းဢ︀ꩫ︀်ႈလ︀ုက︀်ႉၸ︀ေးဢ︀ꩫ︀်ႈပ︀ိူꩫ︀်ႈꩫ︀ိက︀်ႉꩬ︀ၢက︀်ႉလ︀ူင︀်မ︀ႆ︀ႛ လ︀ွတ︀်ႉမ︀ႃးꩫ︀ႆ︀ႇၵ︀ဝ်ꩫ︀မ︀်။ ၵ︀ဝ်ယ︀ႃႇ ၵ︀ိူင︀်ႈၵ︀ဝ်မ︀ႆ︀ႛ ဢ︀ဝ်ႈꩫ︀ိူတ︀်ႉပ︀ူႇဢ︀ွꩫ︀်ꩬ︀ၢက︀်ႉၵ︀ၢဝ်ꩰယ︀ဝ်ႇ။

¹⁵ င︀ႆ︀းꩫ︀ႆ︀ႇꩬ︀ီ ၵ︀ဝ်ယ︀ႃႇက︀ꩫ︀်ႛꩫ︀ႂ်းꩡ︀ွင︀်းၿိက︀်ႉမ︀ၢꩫ︀်ၸ︀ြႃးပ︀ီꩫ︀်ႈꩡ︀ဝ်ႛ၊ ပ︀ၢင︀်ႈꩫ︀ႃႛပ︀လ︀ၢင︀်မ︀ꩫ︀်းꩡ︀ဝ်ႛမ︀ႆ︀ႛ ꩫ︀ႆ︀ႛꩬ︀ဝ်းင︀ႆ︀း ၵ︀မ︀်ႈꩰလ︀ႂ်ꩰ ꩫ︀ႆ︀ႛပ︀ႆ︀ၢႛဝႆ︀ႈမ︀ꩫ︀်းꩡ︀ဝ်ႛက︀ꩫ︀်ႈꩫ︀မ︀်။ ꩡ︀ဝ်ႛဢ︀ꩫ︀်ႈꩫ︀င︀်ႈပ︀လ︀ၢင︀်ꩫ︀ႆ︀ႇက︀ေႃႇ တ︀င︀်းၵ︀ဝ်ၵ︀ိင︀်းင︀ႆ︀း ၵ︀ဝ်မ︀ႆ︀ႛဢ︀ဝ်ႈမ︀ူꩫ︀်ႈမ︀ꩫ︀်းꩡ︀ဝ်ႛ တ︀ီꩭူမ︀်ꩡ︀ႃꩭႂ်ႛꩫ︀မ︀်။

¹⁶ ၵ︀ဝ်ယ︀ႃႇ မ︀ိူဝ်ႈလ︀ႂ်ႈက︀ေႃႇ တ︀ွင︀်ႇꩵ︀ႈမ︀ႆ︀ႛ၊ ꩵ︀ႈက︀ုတ︀်ꩫ︀မ︀်ႇယ︀ဝ်ႇ။ ၵ︀ဝ်မ︀ႆ︀ႛ ꩫ︀ႅတ︀်ပ︀တ︀ု၊ ဢ︀ꩫ︀်ႈꩫ︀ိူတ︀်က︀ꩬ︀င︀်ပ︀တ︀ု ꩵ︀ႈမ︀ႆ︀ႛပ︀ိူင︀်ႈလ︀ူင︀်ယ︀ဝ်ႇ။

¹⁷ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ပ︀ူႇဢ︀ွꩫ︀်ဢ︀ꩫ︀်ႈၵ︀ိူင︀်းက︀ၢင︀်ႈပ︀လ︀ၢင︀်မ︀ႆ︀ႛဢ︀ူꩫ︀ႆ︀ႇ ၵ︀ဝ်မ︀ႆ︀ႛမ︀ိုင︀်ႇပ︀ွင︀်ႈꩭႂ်ႛꩬ︀ီ မ︀ူဝ်ꩫ︀မ︀်ႇဢ︀ꩬ︀ၢက︀်ႉမ︀ႆ︀ႛ တ︀ီဢ︀ွꩫ︀်ႈက︀ႃꩭႂ်ႛꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ꩫ︀မ︀်ႇတ︀ႃႈၵ︀ဝ်က︀ႃႈꩫ︀င︀်ယ︀င︀်းမ︀ႆ︀ႛ တ︀ီꩡ︀ီတ︀်ႉꩭႂ်ႛꩫ︀မ︀်။