ၿျႃၻိက︀်ႉ 3 - Khamti Shanၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းꩬ︀ႃတ︀ိ 1 “ၵ︀ုꩫ︀်ꩬ︀ၢင︀် ꩡ︀ိူဝ်းꩬ︀ႃတ︀ိမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ ꩡ︀ဝ်ႛဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩡ︀ီတ︀်ပ︀ႃးꩫ︀ၵ︀ႃ ꩫ︀ၢဝ်ႈꩡ︀ီတ︀်လ︀ုက︀်ႉယ︀င︀်းꩫ︀ႆ︀ႇ ဝႃႈꩫ︀ႆ︀ႇယ︀ႃႇ ဢ︀ꩫ︀်ႈမ︀ႂ်းꩭီတ︀်မ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ က︀ဝ်ႈတ︀ွင︀်းဢ︀ူ။ မ︀ႂ်းယ︀ႃႇ ဢ︀ꩬ︀ၢက︀်ႉꩫ︀ိပ︀်ဢ︀ူꩫ︀ꩬ︀ီ ပ︀ိူꩫ︀်ႈဝႃႈၵ︀ႂ်ႈလ︀ႂ်ႈꩫ︀က︀ေႃႇ တ︀ႆ︀ၢႈတ︀ေႇတ︀ေႇဢ︀ူꩫ︀မ︀်။ 2 လ︀ုက︀်ႉတ︀ႃႉ။ တ︀ၢင︀်းယ︀ုမ︀်ယ︀မ︀်ႈမ︀ႂ်း ဢ︀ꩫ︀်ႈတ︀ီတ︀ႆ︀ၢႈက︀ႃလ︀ေႚလ︀ေႚꩡ︀မ︀်ႈꩫ︀ႆ︀ႇ ဢ︀ဝ်ႈၵ︀ိူင︀်က︀ိုမ︀်းပ︀ွက︀်ႉတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ႂ်းၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛက︀ဝ်ႈမ︀ႆ︀ႛ ꩵ︀ႈထွမ︀်ꩡ︀ွမ︀်းတ︀ီမ︀်ႈꩰꩫ︀ꩫ︀ႆ︀ႇ က︀ဝ်ႈꩭꩫ︀်ဢ︀ူ။ 3 င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈမ︀ႂ်းမ︀ႆ︀ႛꩬ︀ွꩫ︀်ꩭႂ်ႛမ︀ႃး၊ ဢ︀ꩫ︀်ႈမ︀ႂ်းꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛ ဢ︀ွက︀်ꩡ︀ႂ်ႈꩬ︀ီ ထွမ︀်ꩡ︀ွမ︀်းꩫ︀ီႈꩫ︀ီႈတ︀ႃႉ။ ꩬ︀ၢင︀်ဝွေတ︀ႃႉ။ က︀ဝ်ႈမ︀ႆ︀ႛယ︀ုမ︀်ယ︀မ︀်ႈၵ︀ိူင︀်ꩰတ︀ႃႉ။ မ︀ႂ်းမ︀ဝ်လ︀ုက︀်ႉက︀ီး က︀ဝ်ႈမ︀ႂ်းမ︀ႆ︀ႛ ꩫ︀င︀်ၸ︀ူႛလ︀ၢက︀်ႉꩫ︀က︀ꩫ︀်ႈ တ︀ီမ︀ႃးꩫ︀မ︀် မ︀ိူဝ်ႈက︀ဝ်ႈမ︀ႃးꩫ︀ႆ︀ၢႈက︀ေႃႇ မ︀ႂ်းꩵ︀ႈꩫ︀ႆ︀ႛတ︀ွင︀်း။ 4 ꩫ︀ႆ︀ႇꩫ︀က︀ေႃႇ ꩫ︀ႂ်းꩬ︀ူꩡ︀ိူဝ်းꩬ︀ႃတ︀ိမ︀ႆ︀ႛ က︀ူဝ်ႇဢ︀ꩫ︀်ႈၵ︀ိူင︀်ႈၸ︀ူႛꩡ︀ဝ်ႛမ︀ႆ︀ႛ တ︀င︀်းဢ︀ပ︀ႅတ︀်ႉ မ︀ဝ်ဢ︀ဝ်ႈꩭင︀်ႛꩫ︀ႆ︀ႇ ꩡ︀ွꩫ︀်လ︀ိူင︀်ႈယ︀င︀်းဢ︀ူ။ က︀ူဝ်ႇဢ︀မ︀ႂ်းၵ︀ဝ်ယ︀ႃႇ ထႅက︀်ႉꩫ︀ႆ︀ႇꩬ︀ီ ꩫ︀ုင︀်ႈၵ︀ိူင︀်ႈၵ︀ၢဝ်င︀ႆ︀း တ︀င︀်းက︀ဝ်ႈတ︀ီꩫ︀ႆ︀ႛꩭူမ︀်ႈက︀ႃꩭူမ︀်ႈမ︀ႃးꩫ︀မ︀်။ 5 က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်ယ︀ႃႇ ꩫ︀င︀်င︀ႆ︀းꩫ︀က︀ꩫ︀်ႈ ၵ︀ိူင︀်ႈၵ︀ၢဝ်တ︀ီꩫ︀ႆ︀ႛꩫ︀ုင︀်ႈꩫ︀မ︀်။ ꩡ︀ိုဝ်ႈၵ︀ဝ်မ︀ႆ︀ႛ က︀ဝ်ႈလ︀ုက︀်ႉပ︀ၢပ︀်ႉဢ︀ꩬ︀ၢက︀်ႉမ︀ႆ︀ႛ ꩵ︀ႈလ︀ုပ︀်ႉမ︀ွတ︀်ပ︀ိူင︀်ႈလ︀ူင︀်။ ၵ︀ဝ်ပ︀ီꩫ︀်ႈက︀ူꩫ︀်းက︀ဝ်ႈꩫ︀မ︀်ꩫ︀ꩫ︀ႆ︀ႇ ပ︀ၢင︀်ႈꩫ︀ႃႛပ︀ူဝ်က︀ဝ်ႈꩫ︀ၵ︀ႃ ၵ︀ုꩫ︀်ꩬ︀ၢင︀်မ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ က︀ဝ်ႈတ︀ီတ︀ႅဝ်ꩡ︀ုꩫ︀်ႈꩰလ︀ႅင︀်းꩰꩫ︀မ︀်။ 6 ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ” ꩫ︀ဝꩫ︀်ႇ။ ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းၸ︀ီလ︀ႃတ︀ႄၸ︀ိယ︀ 7 “ၵ︀ုꩫ︀်ꩬ︀ၢင︀် ꩡ︀ိူဝ်းၸ︀ိလ︀ႃတ︀ႄၸ︀ိယ︀မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ ꩫ︀ႆ︀ႇယ︀ႃႇ ၵ︀ၢဝ်ႈၵ︀ၢမ︀်းꩡ︀ဝ်ႛဢ︀ꩫ︀်ႈမ︀ူတ︀်ꩡ︀ၢင︀်၊ ဢ︀ꩫ︀်ႈꩬ︀ိုဝ်ႈတ︀ူဝ် ဢ︀ꩫ︀်ႈတ︀ိုဝ်းꩬ︀ူဝ်းပ︀တ︀ူႈꩡ︀ဝ်ႛꩭူဝ်ၵ︀မ︀်းၻႃဝိꩫ︀မ︀်။ ပ︀တ︀ူႈဢ︀ꩫ︀်ႈမ︀ꩫ︀်းꩡ︀ဝ်ႛပ︀ုတ︀်မ︀ႆ︀ႛ ၸ︀ႂ်က︀ေႃႇ ꩭၢပ︀်ꩵ︀ႈꩫ︀ႆ︀ႛ၊ ဢ︀ꩫ︀်ႈမ︀ꩫ︀်းꩡ︀ဝ်ႛꩭၢပ︀်ဝႆ︀ႇမ︀ႆ︀ႛက︀ေႃႇ ၸ︀ႂ်က︀ေႃႇ ပ︀ုတ︀်ꩵ︀ႈꩫ︀ႆ︀ႛ။ 8 တ︀ၢင︀်းပ︀တ︀ူႈဢ︀ꩫ︀်ႈၸ︀ႂ်က︀ေႃႇ ꩭၢပ︀်မ︀ဝ်ꩫ︀ႆ︀ႛꩫ︀ႆ︀ႇ က︀ဝ်ႈက︀ꩫ︀်ႛꩫ︀ႃႛမ︀ႂ်းမ︀ႆ︀ႛပ︀ုတ︀်ဝႆ︀ႇဢ︀ူ။ ဢ︀ꩫ︀်ႈမ︀ႂ်းꩭီတ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်း က︀ဝ်ႈတ︀ွင︀်းဢ︀ူ။ မ︀ႂ်းမ︀ႆ︀ႛꩭႅင︀်းꩡ︀ွꩫ︀်လ︀ိူင︀်ႈꩫ︀ႆ︀ၢႈယ︀င︀်းꩫ︀က︀ေႃႇ မ︀ႂ်းၵ︀ၢမ︀်းက︀ဝ်ႈထွမ︀်ꩬ︀ီ က︀ဝ်ႈမ︀ႆ︀ႛꩬ︀ႅတ︀်ႉꩡ︀ႃယ︀င︀်းမ︀ႃးယ︀ဝ်ႇ။ 9 က︀ဝ်ႈဝႃႈက︀ွတ︀်။ က︀ုမ︀်ႛၵ︀ုꩫ︀်ꩬ︀ူင︀် ၸ︀ူႛၸ︀ႅတ︀်ႉ ဢ︀ꩫ︀်ႈꩭႅꩫ︀်းꩭီတ︀်က︀ျူးꩫ︀ႆ︀ႇၵ︀ဝ်မ︀ႆ︀ႛယ︀ႃႇ တ︀ႆ︀ၢႛတ︀ိꩫ︀်ႈမ︀ႂ်းမ︀ႆ︀ႛ တ︀ီမ︀ႃးꩭႂ်ႛၵ︀ုပ︀်ႉၵ︀ဝ်ꩫ︀မ︀်။ ꩭီတ︀်င︀ႆ︀းꩬ︀ီ မ︀ႂ်းမ︀ႆ︀ႛက︀ဝ်ႈꩭၢက︀်ႉဢ︀ူꩫ︀ꩫ︀ႆ︀ႇ ၵ︀ဝ်မ︀ႆ︀ႛတ︀ီꩭႂ်ႛတ︀ွင︀်းꩫ︀မ︀်။ 10 မ︀ႂ်းယ︀ႃႇ ၵ︀ၢမ︀်းက︀ဝ်ႈမ︀ႆ︀ႛထွမ︀်ꩬ︀ီ က︀ꩫ︀်ႛမ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ မ︀ိူဝ်ႈက︀ဝ်ႈက︀ူꩫ︀်းတ︀င︀်းက︀မ︀်ၸ︀ႃမ︀ႆ︀ႛ ၸ︀ေးတ︀ၢမ︀်ပ︀ူင︀်ႈꩬ︀ီꩡ︀ႅပ︀်ႉꩫ︀ႆ︀ႇ မ︀ႂ်းမ︀ႆ︀ႛယ︀ႃႇလ︀ုက︀်ႉၸ︀ေးမ︀ႆ︀ႛ က︀ဝ်ႈတ︀ီက︀ုမ︀်ႇꩭႂ်ႛꩫ︀မ︀်။ 11 က︀ဝ်ႈတ︀ီမ︀ႃးꩡ︀မ︀်ႈယ︀ဝ်ႇ။ ꩫ︀င︀်င︀ႆ︀ႚၵ︀ၢမ︀်းက︀ဝ်ႈထွမ︀်ꩫ︀က︀ꩫ︀်ႈ က︀ၢပ︀်ꩬ︀ီထွမ︀်က︀ႃတ︀ႃႉ။ ပ︀ွင︀်းဢ︀ꩫ︀်ႈမ︀ႂ်းတ︀ီꩫ︀ႆ︀ႛꩬ︀ူးမ︀ႆ︀ႛ ၸ︀ႂ်က︀ေႃႇ ပ︀ီꩭႂ်ႛꩭိမ︀်ဢ︀ဝ်ႈ။ 12 က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်မ︀ႆ︀ႛယ︀ႃႇ ꩡ︀ွင︀်းၿိက︀်ႉမ︀ၢꩫ︀်ၸ︀ြႃးက︀ဝ်ႈမ︀ႆ︀ႛ တ︀ီဢ︀ဝ်ႈပ︀ီꩫ︀်ႈꩬ︀ဝ်ꩫ︀မ︀်။ ၵ︀ဝ်မ︀ႆ︀ႛမ︀ိူဝ်ႈလ︀ႂ်ႈက︀ေႃႇ လ︀ုက︀်ႉꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ꩵ︀ႈဢ︀ဝ်ႈဢ︀ွက︀်ယ︀ဝ်ႇ။ က︀ꩫ︀်ႛꩫ︀ိူဝ်ၵ︀ဝ်မ︀ႆ︀ႛ ꩡ︀ိုဝ်ႈၸ︀ြႃးက︀ဝ်ႈ၊ ꩡ︀ိုဝ်ႈဝီင︀်းၸ︀ြႃးက︀ဝ်ႈ ဝီင︀်းယ︀ေရ︀ုꩬ︀လ︀ိမ︀်မ︀ႂ် ဢ︀ꩫ︀်ႈလ︀ုက︀်ႉက︀ၢင︀်ႈꩭၢဝ် လ︀ုက︀်ႉၸ︀ြႃးက︀ဝ်ႈမ︀ႆ︀ႛ ဢ︀ွက︀်မ︀ႃးꩫ︀ႆ︀ႇ တ︀ီတ︀ႅမ︀်ႛꩭႂ်ႛꩫ︀မ︀်။ ꩡ︀ိုဝ်ႈမ︀ႂ်က︀ဝ်ႈက︀ေႃႇ တ︀ီတ︀ႅမ︀်ႛꩭႂ်ႛꩫ︀မ︀်။ 13 ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ” ꩫ︀ဝꩫ︀်ႇ။ ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းလ︀ေႃတ︀ိက︀ိ 14 “ၵ︀ုꩫ︀်ꩬ︀ၢင︀် ꩡ︀ိူဝ်းလ︀ေႃတ︀ိက︀ိမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇတ︀ႅမ︀်ႛꩭႂ်ႛတ︀ႃႉ။ ꩡ︀ဝ်ႛဢ︀ႃႈမ︀ိꩫ︀်ႈ၊ ꩡ︀ဝ်ႛꩬ︀ၢက︀်ႉꩬ︀ေ ဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩬ︀ီꩬ︀ိုဝ်ႈတ︀ူဝ်၊ ꩡ︀ဝ်ႛဢ︀ꩫ︀်ႈက︀ꩫ︀်ႛꩫ︀ိူဝ် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ီꩫ︀်ႈင︀ဝ်ႛင︀ႃꩫ︀ႆ︀ႇ ဝႃႈꩫ︀ႆ︀ႇယ︀ႃႇ 15 ဢ︀ꩫ︀်ႈမ︀ႂ်းꩭီတ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ က︀ဝ်ႈတ︀ွင︀်းဢ︀ူ။ မ︀ႂ်းယ︀ႃႇ မ︀ဝ်က︀တ︀်မ︀ဝ်ꩫ︀ိူတ︀်ꩫ︀မ︀်။ က︀တ︀်က︀ီးက︀တ︀်တ︀ႃႉ။ ꩫ︀ိူတ︀်က︀ီးꩫ︀ိူတ︀်တ︀ႃႉ။ 16 မ︀ဝ်က︀တ︀်မ︀ဝ်ꩫ︀ိူတ︀်င︀ႆ︀း ဢ︀ုꩫ︀်မ︀ုꩫ︀်းꩰꩫ︀ႆ︀ၢႈꩫ︀ႆ︀ႇꩬ︀ီ မ︀ႂ်းမ︀ႆ︀ႛက︀ဝ်ႈလ︀ုက︀်ႉꩬ︀ူပ︀်မ︀ႆ︀ႛ တ︀ီၵ︀ႆ︀ၢးၵ︀ွတ︀်ယ︀ဝ်ႇ။ 17 မ︀ႂ်းယ︀ႃႇ “က︀ဝ်ႈမ︀ီးတ︀ꩫ︀်းဢ︀ူ။ ၵ︀ိုꩫ︀်ႛယ︀ႂ်ဢ︀ူ။ ဢ︀ꩫ︀်ႈက︀ဝ်ႈꩭၢင︀်ႇꩫ︀ႆ︀ႇတ︀င︀်းမ︀ိူင︀်း က︀ဝ်ႈမ︀ႆ︀ႛယ︀င︀်းဢ︀ူ” ꩫ︀ꩬ︀ီဝႃႈၵ︀ႂ်ႈလ︀ႂ်ႈꩫ︀က︀ေႃႇ မ︀ႂ်းၸ︀ူႛꩡ︀ဝ်ႛယ︀ႃႇ ၵ︀ႂ်ႈလ︀ႂ်ႈၻုက︀်ႉၵ︀၊ ၵ︀ႂ်ႈလ︀ႂ်ႈၵ︀ိူင︀်ႈꩫ︀ီႈဢ︀ီꩫ︀ူႈꩫ︀ꩫ︀ႆ︀ႇ မ︀ႂ်းꩵ︀ႈတ︀ွင︀်း။ မ︀ႂ်းယ︀ႃႇ ၸ︀ၢꩫ︀်ၵ︀ႅတ︀်ႉꩰ၊ ၵ︀ိူင︀်ႈက︀ေႃႇမ︀ဝ်ꩫ︀ုင︀်ႈ၊ တ︀ႃႈက︀ေႃႇ မ︀ွတ︀်င︀ႆ︀းꩫ︀မ︀်။ 18 ꩭႂ်ႛပ︀ူဝ်းမ︀ႂ်းမ︀ီးတ︀ꩫ︀်းꩫ︀ႆ︀ႇ ၵ︀မ︀်းဢ︀ꩫ︀်ႈဢ︀ဝ်ႈၸ︀ႆ︀းꩡ︀ွတ︀်ႉဝႆ︀ႇꩫ︀ႆ︀ႇ လ︀ုက︀်ႉက︀ဝ်ႈမ︀ႆ︀ႛꩬ︀ိုဝ်ႇတ︀ႃႉ။ ဢ︀ꩫ︀်ႈမ︀ႂ်းပ︀ီꩫ︀်ႈလ︀ပ︀ုတ︀်ꩬ︀ီ ၵ︀ိူင︀်ႈꩫ︀ီႈဢ︀ႆ︀ၢႈꩫ︀ႆ︀ႇမ︀ႆ︀ႛက︀ေႃႇ ꩭႂ်ႛပ︀ူဝ်းꩭူမ︀်ႛꩡ︀ႃꩫ︀ႆ︀ႇ ၵ︀ိူင︀်ႈၵ︀ၢဝ်မ︀ႃးꩬ︀ိုဝ်ႇꩬ︀ီꩫ︀ုင︀်ႈတ︀ႃႉ။ ꩭႂ်ႛပ︀ူဝ်းမ︀ႂ်းတ︀ႃႈꩭꩫ︀်ꩫ︀ႆ︀ႇက︀ေႃႇ ယ︀ႃႛတ︀ႃႈꩡ︀ီပ︀်ꩭႆ︀ၢ မ︀ႃးꩬ︀ိုဝ်ႇꩬ︀ီꩬ︀ႂ်တ︀ႃႉ။ 19 က︀ဝ်ႈယ︀ႃႇ က︀ူဝ်ႇဢ︀ꩫ︀်ႈက︀ဝ်ႈꩭၢက︀်ႉꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ဢ︀ပ︀ႅတ︀်ႉꩡ︀ႅပ︀်ႉꩬ︀ီ ꩬ︀ုင︀်းမ︀ႃးဢ︀ူ။ င︀ႆ︀းꩫ︀ႆ︀ႇꩬ︀ီ ၸ︀ႂ်မ︀ꩫ︀်းꩭီတ︀်ဢ︀ၵ︀ႅက︀်ႉꩬ︀ီ ꩬ︀ၢင︀်ဝွေက︀ꩫ︀်ႈတ︀ႃႉ။ 20 ထွမ︀်တ︀ႃႉ။ က︀ဝ်ႈက︀ꩫ︀်ႛꩫ︀ႃႛတ︀ၢင︀်းပ︀တ︀ူႈမ︀ႆ︀ႛꩬ︀ဝ်းင︀ႆ︀း ꩭွင︀်ႇဢ︀ူꩫ︀မ︀်။ ၸ︀ႂ်မ︀ဝ်ဝႃႈ ꩬ︀ီင︀်က︀ဝ်ႈꩫ︀ႆ︀ႛꩥ︀ိꩫ︀်းꩬ︀ီ က︀ဝ်ႈမ︀ႆ︀ႛꩭၢပ︀်ႉတ︀ွꩫ︀်ႛက︀ီး ꩭိူꩫ︀်းက︀ူဝ်ႇဢ︀မ︀ႂ်းမ︀ႆ︀ႛ က︀ဝ်ႈၵ︀ဝ်ႛꩬ︀ီ တ︀င︀်းမ︀ꩫ︀်းတ︀ီꩭူမ︀်ႈက︀ိꩫ︀်ႈꩫ︀မ︀်။ မ︀ꩫ︀်းက︀ေႃႇ တ︀င︀်းက︀ဝ်ႈတ︀ီꩭူမ︀်ႈက︀ိꩫ︀်ႈꩫ︀မ︀်။ 21 က︀ဝ်ႈပ︀ေႇဢ︀ွင︀်ꩬ︀ီ တ︀င︀်းပ︀ူဝ်က︀ဝ်ႈ ပ︀လ︀ၢင︀်မ︀ꩫ︀်းꩡ︀ဝ်ႛမ︀ႆ︀ႛ ꩫ︀ႆ︀ႛꩭူမ︀်ႈꩫ︀င︀်ႈꩫ︀က︀ꩫ︀်ႈ က︀ူဝ်ႇဢ︀ꩫ︀်ႈ ဢ︀ꩫ︀်ႈမ︀ဝ်ꩫ︀ီႈမ︀ႆ︀ႛ ပ︀ေႇဢ︀ွင︀်ꩫ︀ႆ︀ႇၵ︀ဝ်က︀ေႃႇ ပ︀လ︀ၢင︀်က︀ဝ်ႈမ︀ႆ︀ႛ တ︀င︀်းက︀ဝ်ႈတ︀ီꩭႂ်ႛꩭူမ︀်ႈꩫ︀င︀်ႈꩫ︀မ︀်။ 22 ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ” ꩫ︀ဝꩫ︀်ႇ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.