ၿျႃၻိက︀်ႉ 2 - Khamti Shan

ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းဢ︀ေၸ︀ႅတ︀်

¹ “ၵ︀ုꩫ︀်ꩬ︀ၢင︀် ꩡ︀ိူဝ်းဢ︀ေၸ︀ႅတ︀်မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ ꩡ︀ဝ်ႛဢ︀ꩫ︀်ႈမ︀ိုဝ်းပ︀ႃႛၵ︀ႃမ︀ႆ︀ႛ ꩫ︀ၢဝ်ႈꩡ︀ီတ︀်လ︀ုက︀်ႉဝၢမ︀်ႇꩬ︀ီ ဝူင︀်ႈက︀ၢင︀်ႈဝၢꩫ︀်ၸ︀ႆ︀းꩡ︀ီတ︀်ဢ︀ꩫ︀်ႈမ︀ႆ︀ႛ ၸ︀ႆ︀ၢႛꩫ︀ႆ︀ႇဝႃႈꩫ︀ႆ︀ႇယ︀ႃႇ

² ဢ︀ꩫ︀်ႈမ︀ႂ်းꩭီတ︀်မ︀ႃးꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ွင︀်းဢ︀ူ။ မ︀ႂ်းဢ︀ၢꩫ︀်တ︀ၢꩫ︀်ꩬ︀ေႈꩡ︀ႃႉမ︀ႃး၊ က︀ꩫ︀်ႛမ︀ႃးယ︀ဝ်ႇ။ မ︀ႂ်းယ︀ႃႇ က︀ူꩫ︀်းဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ်မ︀ႆ︀ႛ ꩵ︀ႈꩭၢပ︀်ႉ။ က︀ူꩫ︀်းဢ︀ꩫ︀်ႈꩭႅꩫ︀်းꩭီတ︀်တ︀မ︀ၢꩫ︀်ꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛက︀ေႃႇ မ︀ႂ်းꩡ︀ႅပ︀်ႉꩬ︀ီ ၵ︀ဝ်ပ︀ီꩫ︀်ႈက︀ူꩫ︀်းၸ︀ႅတ︀်ႉꩫ︀မ︀်ꩫ︀ꩫ︀ႆ︀ႇ တ︀ွင︀်းဢ︀ူ။

³ မ︀ႂ်းယ︀ႃႇ က︀ꩫ︀်ႛမ︀ႃးယ︀ဝ်ႇ။ ꩡ︀ႃႇက︀ဝ်ႈၵ︀ၢမ︀်ၻုက︀်ႉၵ︀မ︀ႃးꩫ︀က︀ေႃႇ မ︀ႂ်းꩡ︀ႂ်ႈꩵ︀ႈၸ︀ေႛမ︀ႃးꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။

⁴ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ မ︀ႂ်းက︀ဝ်ႈမ︀ႆ︀ႛ ꩫ︀င︀်မ︀ိူဝ်ႈင︀ႃးက︀ꩫ︀်ႛꩫ︀ႃႛꩫ︀က︀ꩫ︀်ႈ မ︀ဝ်ꩭၢက︀်ႉꩫ︀ႆ︀ႇꩬ︀ီ မ︀ႂ်းမ︀ႆ︀ႛ ဢ︀ꩫ︀်ႈဝႃႈတ︀ၢင︀်ဢ︀ပ︀ႅတ︀်ႉယ︀င︀်းဢ︀ူ။

⁵ မ︀ႂ်းၵ︀ႂ်ႈလ︀ႂ်ႈတ︀ူက︀်ယ︀ွမ︀်းက︀ႃꩫ︀ꩫ︀ႆ︀ႇ ၵ︀ႂ်ႈꩡ︀ႂ်ႈတ︀ႃႉ။ ꩬ︀ၢင︀်ဝွေꩬ︀ီ ꩫ︀င︀်မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛ ꩭီတ︀်မ︀ႃးꩫ︀က︀ꩫ︀်ႈꩬ︀ိုင︀်ꩭီတ︀်တ︀ႃႉ။ မ︀ႂ်းလ︀ုက︀်ႉဢ︀ပ︀ႅတ︀်ႉမ︀ႆ︀ႛ ပ︀ူဝ်းမ︀ဝ်တ︀ၢဝ်ႈပ︀ွက︀်ႉမ︀ႃးက︀ီး က︀ဝ်ႈမ︀ႃးꩬ︀ီ ဝၢꩫ︀်ၸ︀ႆ︀းမ︀ႂ်း တ︀ီဢ︀ဝ်ႈၵ︀ႆ︀ၢႇၵ︀ွတ︀်ꩫ︀မ︀်။

⁶ ꩫ︀ႆ︀ႇꩫ︀က︀ေႃႇ တ︀ၢင︀်းက︀ႅင︀်းꩫ︀ိက︀ေႃလ︀ဢ︀ꩫ︀်ႈက︀ဝ်ႈꩡ︀င︀်းမ︀ႆ︀ႛ မ︀ႂ်းက︀ေႃႇꩡ︀င︀်းꩫ︀ႆ︀ႇယ︀ႃႇ ꩡ︀ႂ်ႈတ︀ေႇတ︀ေႇယ︀ဝ်ႇ။

⁷ ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ။ က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်မ︀ႆ︀ႛယ︀ႃႇ က︀ဝ်ႈမ︀က︀်ဢ︀ꩬ︀ၢက︀်ႉဢ︀ꩫ︀်ႈꩬ︀ူꩫ︀်ဢ︀ေတ︀ီꩫ︀်မ︀ႆ︀ႛယ︀င︀်းꩫ︀ႆ︀ႇ တ︀ီꩭႂ်ႛꩫ︀ႆ︀ႛက︀ိꩫ︀်ႈꩫ︀မ︀်” ꩫ︀ဝꩫ︀်ႇ။

ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းꩡ︀မ︀ုရ︀ꩫ︀

⁸ “ၵ︀ုꩫ︀်ꩬ︀ၢင︀်ꩡ︀ိူဝ်းꩡ︀မ︀ုရ︀ꩫ︀မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ က︀ဝ်ႈ ꩡ︀ဝ်ႛဢ︀ꩫ︀်ႈက︀ူဝ်၊ ꩡ︀ဝ်ႛဢ︀ꩫ︀်ႈꩬ︀ုတ︀်၊ ꩡ︀ဝ်ႛဢ︀ꩫ︀်ႈတ︀ႆ︀ၢႈက︀ႃꩬ︀ီ ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇ ဝႃႈက︀ွတ︀်။

⁹ မ︀ႂ်းၵ︀ႂ်ႈလ︀ႂ်ႈယ︀ပ︀်ယ︀ၢက︀်ႉ ၵ︀ႂ်ႈလ︀ႂ်ႈၻုက︀်ႉၵ︀ꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။ ဢ︀ꩫ︀်ႈတ︀ေႇတ︀ေႇက︀ီး မ︀ႂ်းယ︀ႃႇမ︀ီးဢ︀ူ။ က︀ူꩫ︀်းက︀ုမ︀်ႛၵ︀ုꩫ︀်ꩬ︀ူင︀်ဢ︀ꩫ︀်ႈꩭႅꩫ︀်းꩭီတ︀်က︀ျူးꩫ︀ႆ︀ႇၵ︀ဝ် မ︀ႂ်းမ︀ႆ︀ႛꩭလ︀ိုဝ်က︀ေးလ︀ေးꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။

¹⁰ မ︀ႂ်းတ︀ီꩫ︀ႆ︀ႛၵ︀ၢမ︀်ၻုက︀်ႉၵ︀က︀ꩬ︀င︀်ꩫ︀က︀ေႃႇ ပ︀ီက︀ူဝ်ႈ။ က︀ူꩫ︀်းမ︀ႂ်းက︀မ︀်ႈၸ︀ွင︀်းမ︀ႆ︀ႛ ၵ︀ုꩫ︀်ꩬ︀ူင︀်ꩬ︀ႂ်ထွင︀်ꩬ︀ီ ၵ︀ꩫ︀်ꩬ︀ိပ︀်ဝꩫ︀်းလ︀ိူင︀်ႈယ︀ႃႇ မ︀ႂ်းတ︀ီꩫ︀ႆ︀ႛၵ︀ၢမ︀်က︀ဝ်း တ︀ီꩫ︀ႆ︀ႛၵ︀ၢမ︀်ၻုက︀်ႉၵ︀ꩫ︀မ︀်။ င︀ႆ︀းꩫ︀ႆ︀ႇꩬ︀ီ တ︀ူဝ်ပ︀ူဝ်းတ︀ႆ︀ၢႈꩫ︀က︀ေႃႇ က︀ဝ်ႈမ︀ႆ︀ႛယ︀ုမ︀်ယ︀မ︀်ႈၵ︀ိူင︀်ꩰတ︀ႃႉ။ င︀ႆ︀းက︀ီး မ︀ႂ်းမ︀ႆ︀ႛက︀ဝ်ႈ ꩬ︀ူးပ︀ွင︀်းဢ︀ꩬ︀ၢက︀်ႉတ︀ီပ︀ူင︀်ႈꩭႂ်ႛꩫ︀မ︀်။

¹¹ ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ။ က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်ယ︀ႃႇ တ︀ၢင︀်းတ︀ႆ︀ၢႈၵ︀ွꩫ︀်မ︀ႆ︀ႛꩫ︀ႆ︀ႛလ︀ွတ︀်ႉဢ︀ူ” ꩫ︀ဝꩫ︀်ႇ။

ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းပ︀ေရ︀က︀ံ

¹² “ၵ︀ုꩫ︀်ꩬ︀ၢင︀်ꩡ︀ိူဝ်းပ︀ေရ︀က︀ံမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ ꩡ︀ဝ်ႛဢ︀ꩫ︀်ႈၸ︀ႃႇလ︀မ︀်ပ︀ႃဢ︀ꩫ︀်ႈၸ︀ႆ︀ၢတ︀ိုဝ်းဝႆ︀ႇꩫ︀ႆ︀ႇ ဝႃႈꩫ︀ႆ︀ႇယ︀ႃႇ

¹³ တ︀ီႈဢ︀ꩫ︀်ႈၵ︀ုꩫ︀်ꩬ︀ူင︀်ဢ︀ုပ︀်ႉပ︀ိုင︀်မ︀ႆ︀ႛ မ︀ႂ်းꩭလ︀ိုဝ်ဢ︀ူꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။ ꩭလ︀ိုဝ်ꩫ︀က︀ေႃႇ မ︀ႂ်းယ︀ႃႇ က︀ဝ်ႈမ︀ႆ︀ႛꩬ︀ႅတ︀်ႉꩡ︀ႃယ︀င︀်းဢ︀ူ။ ဢ︀ꩫ︀်တ︀ိပ︀ ဢ︀ꩫ︀်ႈက︀ဝ်ႈမ︀ႆ︀ႛꩬ︀ႅတ︀်ႉꩡ︀ႃယ︀င︀်းꩬ︀ီ ꩭီတ︀်ꩬ︀ၢက︀်ႉꩬ︀ေက︀ဝ်ႈꩫ︀ႆ︀ႇ တ︀ီႈဢ︀ꩫ︀်ႈၵ︀ုꩫ︀်ꩬ︀ူင︀်ဢ︀ုပ︀်ႉပ︀ိုင︀်ဢ︀မ︀ႂ်းမ︀ႆ︀ႛ ꩫ︀ႆ︀ႛၵ︀ၢမ︀်တ︀ႆ︀ၢႈမ︀ႃးယ︀ဝ်ႇ။ မ︀ိူဝ်ႈဢ︀မ︀ႂ်းꩫ︀ႆ︀ၢႈက︀ေႃႇ မ︀ႂ်း က︀ဝ်ႈမ︀ႆ︀ႛ ယ︀ုမ︀်ယ︀မ︀်ႈၵ︀ိူင︀်ꩰဢ︀ူ။

¹⁴ ꩫ︀ႆ︀ႇꩫ︀က︀ေႃႇ မ︀ႂ်းမ︀ႆ︀ႛꩡ︀ွꩫ︀်လ︀ိူင︀်ႈ ဢ︀ꩫ︀်ႈဝႃႈတ︀ၢင︀်ဢ︀ပ︀ႅတ︀်ႉယ︀င︀်းဢ︀ူ။ ꩫ︀ႂ်းꩬ︀ူမ︀ႆ︀ႛ က︀ူꩫ︀်းဢ︀ꩫ︀်ႈꩫ︀င︀် မ︀ိူဝ်ႈꩫ︀ꩫ︀်ႇၿႃလ︀မ︀်ꩬ︀ွꩫ︀်မ︀ႃးꩫ︀က︀ꩫ︀်ႈ ꩡ︀ွမ︀်းꩭီတ︀်ဢ︀ူꩫ︀ႆ︀ႇက︀မ︀်ႈၸ︀ွင︀်းယ︀င︀်းဢ︀ူ။ ၿႃလ︀မ︀်ယ︀ႃႇ ꩭႂ်ႛပ︀ူဝ်းဢ︀ီတ︀်ꩬ︀ြေးꩫ︀ႆ︀ႇၵ︀ဝ် က︀ိꩫ︀်ႈၵ︀ွင︀်ဢ︀ꩫ︀်ႈပ︀ုက︀်ႉꩡ︀ူဝ်ꩭုꩫ︀်ꩭၢင︀်ႈꩬ︀ီၸ︀ိတ︀်မ︀ေထုင︀်က︀ꩫ︀်ႈꩫ︀ႆ︀ႇ ၿႃလ︀က︀်မ︀ႆ︀ႛ ꩭွꩫ︀်ꩬ︀ွꩫ︀်ꩭႂ်ႛမ︀ႃးဢ︀ူ။

¹⁵ ꩫ︀င︀်ꩫ︀ႆ︀ႇꩫ︀က︀ꩫ︀်ႈ က︀ူꩫ︀်းဢ︀ꩫ︀်ႈ ထွမ︀်ꩡ︀ွမ︀်းတ︀ြႃးတ︀ပ︀ေးꩫ︀ိက︀ေႃလ︀ꩫ︀ႆ︀ႇၵ︀ဝ်က︀ေႃႇ ꩬ︀ူမ︀ႆ︀ႛယ︀င︀်းဢ︀ူ။

¹⁶ င︀ႆ︀းꩫ︀ႆ︀ႇꩬ︀ီ မ︀ႂ်းꩬ︀ၢင︀်ဝွေတ︀ႃႉ။ ꩫ︀ႆ︀ႇမ︀ဝ်ꩡ︀ႂ်ႈက︀ီး က︀ဝ်ႈꩡ︀ိဝ်းꩰမ︀ႃးꩬ︀ီ က︀ူꩫ︀်းဢ︀မ︀ႂ်းၵ︀ဝ်မ︀ႆ︀ႛ ဢ︀ဝ်ႈၸ︀ႃႇလ︀ၢမ︀်ပ︀ႃဢ︀ꩫ︀်ႈလ︀ုက︀်ႉꩬ︀ူပ︀်က︀ဝ်ႈမ︀ႆ︀ႛ ဢ︀ွက︀်ꩫ︀ႆ︀ႇ တ︀ီတ︀ိက︀်ꩫ︀မ︀်။

¹⁷ ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ။ က︀ူဝ်ႇဢ︀ꩫ︀်ႈပ︀ေႇဢ︀ွင︀်ꩫ︀ႆ︀ႇၵ︀ဝ်မ︀ႆ︀ႛယ︀ႃႇ ၵ︀ဝ်ႛမ︀ုꩫ︀်းမ︀ၢꩫ︀်ꩫ︀ဢ︀ꩫ︀်ႈဢ︀ဝ်ႈပ︀ႆ︀ၢႈမ︀ႅပ︀်ဝႆ︀ႇꩫ︀ႆ︀ႇ တ︀ီꩭႂ်ႛꩫ︀မ︀်။ ၵ︀ဝ်မ︀ႆ︀ႛ ꩭိꩫ︀်ၸ︀ိူက︀်ဢ︀ꩫ︀်ႈꩡ︀ိုဝ်ႈမ︀ႂ်တ︀ႅမ︀်ႛဝႆ︀ႇ ဢ︀ꩫ︀်ႈၸ︀ႂ်က︀ေႃႇဢ︀ၢꩫ︀်မ︀ဝ်ꩡ︀ၢင︀်ႈꩫ︀ႆ︀ႇ တ︀ီꩭႂ်ႛꩫ︀မ︀်။ ꩡ︀ိုဝ်ႈဢ︀မ︀ႂ်းယ︀ႃႇ ၵ︀ဝ်က︀ူဝ်ႇဢ︀ꩫ︀်ႈꩭိꩫ︀်ဢ︀မ︀ႂ်းꩭၢပ︀်ႉဢ︀ဝ်ႈꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀် ဢ︀ၢꩫ︀်ꩡ︀ၢင︀်ႈꩫ︀ႆ︀ႇ” ꩫ︀ဝꩫ︀်ႇ။

ၵ︀ၢဝ်ႈၵ︀ၢမ︀်းꩡ︀ႃႇꩡ︀ိူဝ်းတ︀ွႃတ︀ိရ︀

¹⁸ “ၵ︀ုꩫ︀်ꩬ︀ၢင︀်ꩡ︀ိူဝ်းတ︀ွႃတ︀ိရ︀မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ႆ︀ႇ တ︀ႅမ︀်ႛꩭႂ်ႛတ︀ႃႉ။ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩭွေတ︀ႃႈယ︀ႃႇ ꩫ︀င︀်မ︀ုက︀်ႉၸ︀ႆ︀းꩫ︀က︀ꩫ︀်ႈ၊ တ︀ိꩫ︀်ႈယ︀ႃႇꩫ︀င︀်တ︀ွင︀်းလ︀ိူင︀်ဢ︀ꩫ︀်ႈတ︀ွင︀်ꩭိမ︀်ႇꩰꩫ︀က︀ꩫ︀်ႈꩫ︀ႆ︀ႇ ဝႃႈꩫ︀ႆ︀ႇယ︀ႃႇ

¹⁹ ဢ︀ꩫ︀်ႈမ︀ႂ်းꩭီတ︀်ꩭႆ︀ꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈမ︀ႂ်းꩭၢက︀်ႉꩭွမ︀်၊ ဢ︀ꩫ︀်ႈမ︀ႂ်းယ︀ုမ︀်ယ︀မ︀်ႈ၊ ဢ︀ꩫ︀်ႈမ︀ႂ်းꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛ၊ ဢ︀ꩫ︀်ႈမ︀ႂ်းက︀ꩫ︀်ႛꩫ︀ႆ︀ႇၵ︀ဝ် က︀ဝ်ႈတ︀ွင︀်းဢ︀ူ။ ꩫ︀ႆ︀ႇꩬ︀ေႇမ︀ဝ်က︀ႃး မ︀ႂ်းယ︀ႃႇ မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛꩬ︀ေႇမ︀ဝ်က︀ႃး ꩭီတ︀်ꩬ︀ႃမ︀ႃးယ︀ဝ်ႇ။

²⁰ ꩫ︀ႆ︀ႇꩫ︀က︀ေႃႇ မ︀ႂ်းမ︀ႆ︀ႛဢ︀ꩫ︀်ႈဝႃႈတ︀ၢင︀်ဢ︀ပ︀ႅတ︀်ႉယ︀င︀်းဢ︀ူ။ မ︀ႂ်းယ︀ႃႇၸ︀ူႛယ︀ိင︀်းဢ︀ꩫ︀်ႈꩭွင︀်ႇဝႃႈယ︀ေꩡ︀ပ︀ေလ︀ꩫ︀ꩫ︀ႆ︀ႇမ︀ႆ︀ႛ ꩭၢပ︀်ႉဝႆ︀ႇဢ︀ူ။ မ︀ꩫ︀်းယ︀ႃႇ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ꩭီတ︀်ၸ︀ူႛꩬ︀ူင︀်ၵ︀ၢဝ်ႈၵ︀ၢမ︀်း ၸ︀ြႃးပ︀ီꩫ︀်ႈꩡ︀ဝ်ႛင︀ႆ︀းꩬ︀ီ ၸ︀ူႛꩡ︀ႂ်ႇက︀ဝ်ႈၵ︀ဝ်မ︀ႆ︀ႛ ꩭႂ်ႛပ︀ူဝ်းၸ︀ိတ︀်မ︀ေထုင︀်က︀ꩫ︀်ႈင︀ႆ︀း ꩭႂ်ႛပ︀ူဝ်းက︀ိꩫ︀်ႈၵ︀ွင︀်ဢ︀ꩫ︀်ႈပ︀ုက︀်ႉꩡ︀ူဝ်ꩭုꩫ︀်ꩭၢင︀်ႈꩫ︀ႆ︀ႇ ꩬ︀ွꩫ︀်ꩭႂ်ႛꩬ︀ီ ဢ︀ဝ်ႈပ︀ႅက︀်တ︀ၢင︀်းဢ︀ူ။

²¹ တ︀ိူက︀်ႉယ︀ၢမ︀်းဢ︀ꩫ︀်ႈမ︀ꩫ︀်း ထုက︀်ꩫ︀ီႈꩬ︀ၢင︀်ဝွေꩫ︀ႆ︀ႇ က︀ဝ်ႈပ︀ႂ်ႇထႃႛမ︀ႃးꩫ︀က︀ေႃႇ မ︀ꩫ︀်းယ︀ႃႇ လ︀ုက︀်ႉဢ︀ꩫ︀်ႈၸ︀ိတ︀်မ︀ေထုင︀်မ︀ႆ︀ႛ ꩵ︀ႈၵ︀ႂ်ႈꩬ︀ၢင︀်ဝွေမ︀ႃး။

²² င︀ႆ︀းꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛက︀ဝ်ႈ ဢ︀ဝ်ႈၵ︀ိူဝ်တ︀ီႈꩫ︀ွꩫ︀်းꩬ︀ီ တ︀ီꩭႂ်ႛၵ︀ၢမ︀်ၻုက︀်ႉၵ︀ꩫ︀မ︀်။ က︀ူꩫ︀်းဢ︀ꩫ︀်ႈတ︀င︀်းမ︀ꩫ︀်းၸ︀ိတ︀်မ︀ေထုင︀်ꩬ︀ီ မ︀ဝ်ꩬ︀ၢင︀်ဝွေꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩫ︀င︀်မ︀ꩫ︀်းꩫ︀က︀ꩫ︀်ႈ တ︀ီꩭႂ်ႛၵ︀ၢမ︀်လ︀ူင︀်ꩫ︀မ︀်။

²³ ၸ︀ူႛꩡ︀ွမ︀်းမ︀ꩫ︀်းꩫ︀ႆ︀ႇၵ︀ဝ်မ︀ႆ︀ႛက︀ေႃႇ က︀ဝ်ႈတ︀ီဢ︀ဝ်ႈတ︀ႆ︀ၢႈꩫ︀မ︀်။ ꩭီတ︀်င︀ႆ︀းꩬ︀ီ က︀ဝ်ႈယ︀ႃႇ ꩭူဝ်ꩡ︀ႂ်ႈက︀ူꩫ︀်း၊ က︀ၢင︀်ႈꩡ︀ႂ်ႈက︀ူꩫ︀်းက︀ူႈက︀ူဝ်ႇမ︀ႆ︀ႛ တ︀ွင︀်းဢ︀ူꩫ︀ꩫ︀ႆ︀ႇ ꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ တ︀ီဢ︀ဝ်ႈတ︀ွင︀်းမ︀ႃးက︀ꩫ︀်ႈꩫ︀မ︀်။ ဢ︀ꩫ︀်ႈꩫ︀င︀်ꩬ︀ူꩭီတ︀်မ︀ႃးꩫ︀ႆ︀ႇ ꩬ︀ူက︀ူႈက︀ူဝ်ႇမ︀ႆ︀ႛ က︀ဝ်ႈတ︀ီတ︀ွပ︀်ပ︀ွက︀်ႉꩭႂ်ႛꩫ︀မ︀်။

²⁴ ꩫ︀ႆ︀ႇꩫ︀က︀ေႃႇ ꩬ︀ူက︀ူꩫ︀်းꩡ︀ိူဝ်းတ︀ွႃတ︀ိရ︀ဢ︀ꩫ︀်ႈက︀ိူတ︀်ꩫ︀ႆ︀ႇၵ︀ဝ်ယ︀ႃႇ တ︀ၢင︀်းဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇမ︀ႆ︀ႛမ︀ဝ်ꩡ︀ွမ︀်း၊ တ︀ၢင︀်းဢ︀ꩫ︀်ႈပ︀ိူꩫ︀်ႈꩭွင︀်ႇ တ︀ၢင︀်းၵ︀ုꩫ︀်ꩬ︀ူင︀်ဢ︀ꩫ︀်ႈလ︀ိူက︀်ႉလ︀မ︀်ꩫ︀ꩫ︀ႆ︀ႇၵ︀ဝ်မ︀ႆ︀ႛက︀ေႃႇ မ︀ဝ်ꩬ︀ွꩫ︀်ဢ︀ဝ်ႈꩫ︀ႆ︀ႇꩬ︀ီ ꩬ︀ူမ︀ႆ︀ႛယ︀ႃႇ က︀ဝ်ႈ ၵ︀ၢမ︀်းꩫ︀က︀်တ︀ၢင︀်ဢ︀ꩫ︀်ႈ ဢ︀ꩫ︀်ႈတ︀ီဢ︀ဝ်ႈယ︀ပ︀်ꩫ︀ႆ︀ႇၵ︀ဝ် ꩵ︀ႈပ︀ူင︀်ႈꩭႂ်ႛယ︀ဝ်ႇ။

²⁵ ꩫ︀င︀်င︀ႆ︀ႚꩬ︀ူ ၵ︀ၢမ︀်းက︀ဝ်ႈထွမ︀်ဢ︀ူꩫ︀က︀ꩫ︀်ႈ တ︀ူဝ်ထိုင︀်က︀ဝ်ႈမ︀ႃးꩫ︀ႆ︀ႇ က︀ၢပ︀်ꩬ︀ီထွမ︀်က︀ႃတ︀ႃႉ။

²⁶ က︀ူဝ်ႇဢ︀ꩫ︀်ႈတ︀ူဝ်ပ︀ူဝ်းꩬ︀ုတ︀် ပ︀ေႇဢ︀ွင︀်ꩬ︀ီ ၵ︀ၢမ︀်းက︀ဝ်ႈထွမ︀်ꩡ︀ွမ︀်းဢ︀ူꩫ︀ႆ︀ႇၵ︀ဝ်မ︀ႆ︀ႛ ဢ︀ၵ︀ၢင︀်းဢ︀ꩫ︀်ႈၸ︀ꩫ︀်းက︀ူꩫ︀်းတ︀င︀်းမ︀ိူင︀်းမ︀ႆ︀ႛ ဢ︀ုပ︀်ႉပ︀ိုင︀်ꩫ︀ႆ︀ႇ က︀ဝ်ႈတ︀ီꩭႂ်ႛꩫ︀မ︀်။

²⁷ ꩫ︀င︀်က︀ဝ်ႈမ︀ႆ︀ႛ ပ︀ူဝ်က︀ဝ်ႈတ︀ꩫ︀်းၵ︀ူဝ်းပ︀ူင︀်ႈꩭႂ်ႛꩫ︀က︀ꩫ︀်ႈ ၵ︀ဝ်မ︀ႆ︀ႛ တ︀ꩫ︀်းၵ︀ူဝ်းဢ︀မ︀ႂ်း က︀ဝ်ႈတ︀ီပ︀ူင︀်ႈꩭႂ်ႛꩫ︀မ︀်။ ၵ︀ဝ်က︀ေႃႇ ꩫ︀င︀်မ︀ူဝ်ႛꩫ︀ိꩫ︀်ႈမ︀ႆ︀ႛ မ︀ွပ︀်ၵ︀ွတ︀်ꩫ︀က︀ꩫ︀်ႈ ၸ︀ꩫ︀်းက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩭွက︀်လ︀ီက︀်တ︀ီဢ︀ုပ︀်ႉပ︀ိုင︀်ꩫ︀မ︀်။

²⁸ ၵ︀ဝ်မ︀ႆ︀ႛ က︀ဝ်ႈ ꩫ︀ၢဝ်ႈက︀ၢင︀်ႈလ︀ႂ်က︀ေႃႇ တ︀ီꩭႂ်ႛꩫ︀မ︀်။

²⁹ ꩭူယ︀င︀်းက︀ီး ၵ︀ၢမ︀်းဢ︀ꩫ︀်ႈꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛဝႃႈꩫ︀ႆ︀ႇ ထွမ︀်က︀ꩫ︀်ႈတ︀ႃႉ” ꩫ︀ဝꩫ︀်ႇ။