ၿျႃၻိက︀်ႉ 13 - Khamti Shan

တ︀ူဝ်ႈꩭႆ︀ၢႇလ︀ူင︀် ဢ︀ꩫ︀်ႈလ︀ုက︀်ႉပ︀ၢင︀်လ︀ႆ︀ၢမ︀ႆ︀ႛဢ︀ွက︀်မ︀ႃး

¹ ဝၢႆ︀းꩫ︀ႆ︀ႇ က︀ဝ်ႈလ︀ႅမ︀်းၵ︀ွတ︀်က︀ီး လ︀ုက︀်ႉꩫ︀မ︀်ႇပ︀ၢင︀်လ︀ႆ︀ၢမ︀ႆ︀ႛ တ︀ူဝ်ႈꩭႆ︀ၢႇလ︀ူင︀် ဢ︀ꩫ︀်ႈၵ︀ဝ်ꩬ︀ိပ︀်ဢ︀ꩫ︀်ႈင︀ႆ︀း က︀ုမ︀်ꩭူဝ်ꩡ︀ီတ︀်ဢ︀ꩫ︀်ႈယ︀င︀်းꩫ︀ႆ︀ႇတ︀ူဝ်ႈလ︀ိူင︀်ႈ ၵ︀ိုꩫ︀်ႛမ︀ႃးꩫ︀ႆ︀ႇမ︀ႆ︀ႛ က︀ဝ်ႈꩭꩫ︀်ဢ︀ူ။ ၵ︀ဝ်မ︀ꩫ︀်းက︀ူႈဢ︀ꩫ︀်ႈမ︀ႆ︀ႛ ပ︀ွင︀်းဢ︀ေႈဢ︀ꩫ︀်ႈꩰꩬ︀ုပ︀်ဝႆ︀ႇင︀ႆ︀း က︀ုမ︀်ꩭူဝ်မ︀ꩫ︀်းက︀ူႈဢ︀ꩫ︀်ႈမ︀ႆ︀ႛယ︀ႃႇ ꩡ︀ိုဝ်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ေးလ︀ေးꩫ︀ႆ︀ႇၵ︀ဝ်က︀ေႃႇယ︀င︀်းဢ︀ူ။

² တ︀ူဝ်ႈꩭႆ︀ၢႇဢ︀မ︀ႂ်းယ︀ႃႇ ꩬ︀ိူဝ်ꩡ︀ုမ︀်ႛꩫ︀က︀ꩫ︀်ႈꩫ︀မ︀်။ တ︀ိꩫ︀်ႈမ︀ꩫ︀်းယ︀ႃႇ တ︀ိꩫ︀်ႈမ︀ီꩫ︀က︀ꩫ︀်ႈ၊ ꩬ︀ူပ︀်မ︀ꩫ︀်းယ︀ႃႇ ꩬ︀ူပ︀်ၵ︀ၢင︀်ꩬ︀ီႛꩫ︀က︀ꩫ︀်ႈꩫ︀မ︀်။ ꩫ︀က︀ႃးယ︀ႃႇ တ︀ꩫ︀်းၵ︀ူဝ်းမ︀ꩫ︀်း၊ ပ︀လ︀ၢင︀်မ︀ꩫ︀်းင︀ႆ︀း ဢ︀ႃꩫ︀ႃလ︀ူင︀်မ︀ꩫ︀်းꩫ︀ႆ︀ႇၵ︀ဝ် တ︀ူဝ်ႈꩭႆ︀ၢႇလ︀ူင︀်ဢ︀မ︀ႂ်းမ︀ႆ︀ႛ ဢ︀ၢပ︀်ႉꩭႂ်ႛဢ︀ူ။

³ က︀ုမ︀်ꩭူဝ်တ︀ူဝ်ႈꩭႆ︀ၢႇဢ︀ꩫ︀်ႈလ︀ိူင︀်ႈမ︀ႆ︀ႛယ︀ႃႇ ꩭွႆ︀းတ︀ိင︀်ႈဢ︀ꩫ︀်ႈပ︀ိူꩫ︀်ႈ ဢ︀ဝ်ႈတ︀ႆ︀ၢႈဝႆ︀ႇꩫ︀က︀ꩫ︀်ႈꩫ︀ႆ︀ႇယ︀င︀်းꩫ︀က︀ေႃႇ င︀ႆ︀ႚယ︀ႃႇ တ︀ီႈꩡ︀ီပ︀်ဢ︀မ︀ႂ်းꩭႆ︀ၢက︀ႃယ︀ဝ်ႇ။ က︀ူꩫ︀်းတ︀င︀်းက︀မ︀်ၸ︀ႃယ︀ႃႇ တ︀ူဝ်ႈꩭႆ︀ၢႇလ︀ူင︀်ဢ︀မ︀ႂ်းမ︀ႆ︀ႛ ဢ︀ၢမ︀်းꩬ︀ီက︀ꩫ︀်ႛလ︀င︀်မ︀ꩫ︀်းမ︀ႆ︀ႛ ꩡ︀ွမ︀်းက︀ꩫ︀်ႈဢ︀ူ။

⁴ ꩫ︀က︀ႃးဢ︀မ︀ႂ်း တ︀ူဝ်ႈꩭႆ︀ၢႇမ︀ႆ︀ႛ ဢ︀ႃꩫ︀ႃဢ︀ၢပ︀်ႉꩭႂ်ႛꩫ︀ႆ︀ႇꩬ︀ီ က︀ူꩫ︀်းက︀ူႈက︀ူဝ်ႇ မ︀ꩫ︀်းမ︀ႆ︀ႛပ︀ႆ︀ၢႛဝႆ︀ႈက︀ꩫ︀်ႈဢ︀ူ။ တ︀ူဝ်ႈꩭႆ︀ၢႇဢ︀မ︀ႂ်းမ︀ႆ︀ႛက︀ေႃႇပ︀ႆ︀ၢႛꩬ︀ီ “ꩫ︀င︀်ၸ︀ꩫ︀်းတ︀ူဝ်ႈꩫ︀ႆ︀ႇယ︀ႃႇ ၸ︀ႂ်က︀ေႃႇꩵ︀ႈယ︀င︀်း။ မ︀ꩫ︀်းမ︀ႆ︀ႛယ︀ႃႇ ၸ︀ႂ်က︀ေႃႇတ︀ီပ︀ေႇꩵ︀ႈꩡ︀ႂ်ႈ” ꩫ︀ꩬ︀ီဝႃႈက︀ꩫ︀်ႈဢ︀ူ။

⁵ တ︀ူဝ်ႈꩭႆ︀ၢႇလ︀ူင︀်ဢ︀မ︀ႂ်းယ︀ႃႇ ဢ︀ၵ︀ၢင︀်းဢ︀ꩫ︀်ႈက︀မ︀်ႇလ︀ွင︀်ႛ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ေးလ︀ေးင︀ႆ︀း ဢ︀ၵ︀ၢင︀်းဢ︀ꩫ︀်ႈꩬ︀ီꩬ︀ိပ︀်ꩬ︀ွင︀်ꩫ︀ိူꩫ︀်ႈ ဢ︀ုပ︀်ႉပ︀ိုင︀်ꩫ︀ႆ︀ႇꩫ︀ႆ︀ႛဝႆ︀ႇဢ︀ူ။

⁶ င︀ႆ︀းꩬ︀ီ တ︀ူဝ်ႈꩭႆ︀ၢႇဢ︀မ︀ႂ်းယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀မ︀ိူင︀်း ꩡ︀ိုဝ်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀မ︀ိူင︀်း တ︀ီႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ိင︀်းမ︀ႆ︀ႛင︀ႆ︀း ၸ︀ူႛဢ︀ꩫ︀်ႈဢ︀ူက︀ၢင︀်ႈꩭၢဝ်ꩫ︀ႆ︀ႇၵ︀ဝ်မ︀ႆ︀ႛ ပ︀ၢဝ်ꩰက︀ိꩫ︀်ꩰဢ︀ူ။

⁷ မ︀ꩫ︀်းယ︀ႃႇ ဢ︀ၵ︀ၢင︀်းဢ︀ꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ တ︀ိက︀်ꩬ︀ိူက︀်ပ︀ေႇꩫ︀ႆ︀ႇင︀ႆ︀း ဢ︀ၵ︀ၢင︀်းဢ︀ꩫ︀်ႈ က︀ူꩫ︀်းဢ︀ꩫ︀်ႈတ︀ၢꩫ︀်ႛၵ︀ၢမ︀်းက︀ူႈၸ︀ꩫ︀်း၊ က︀ူꩫ︀်းက︀ူႈၸ︀ꩫ︀်း၊ က︀ူႈၵ︀ိူဝ်းဢ︀ꩫ︀်ႈဢ︀ူ က︀ူႈမ︀ိူင︀်းꩰꩫ︀ႆ︀ႇၵ︀ဝ်မ︀ႆ︀ႛ ဢ︀ုပ︀်ႉပ︀ိုင︀်ꩫ︀ႆ︀ႇက︀ေႃႇ ꩫ︀ႆ︀ႛဝႆ︀ႇဢ︀ူ။

⁸ က︀ူꩫ︀်းဢ︀ꩫ︀်ႈပ︀ၢပ︀်ႉဢ︀ꩬ︀ၢက︀်ႉပ︀ူႇဢ︀ွꩫ︀် ဢ︀ꩫ︀်ႈပ︀ိူꩫ︀်ႈဢ︀ဝ်ႈတ︀ႆ︀ၢႈက︀ႃမ︀ႆ︀ႛ ဢ︀ꩫ︀်ႈလ︀ုက︀်ႉမ︀ိူဝ်ႈက︀မ︀်ၸ︀ႃတ︀ေပ︀ုꩫ︀်ႛ ꩡ︀ိုဝ်ႈမ︀ဝ်လ︀ွေႛꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ တ︀ူဝ်ႈꩭႆ︀ၢႇဢ︀မ︀ႂ်းမ︀ႆ︀ႛ တ︀ီပ︀ႆ︀ၢႛဝႆ︀ႈက︀ꩫ︀်ႈꩫ︀မ︀်။

⁹ ꩭူယ︀င︀်းက︀ီး ထွမ︀်က︀ꩫ︀်ႈတ︀ႃႉ။

¹⁰ က︀ူဝ်ႇဢ︀ꩫ︀်ႈပ︀ိူꩫ︀်ႈဝႃႈꩬ︀ႅဝ်ႛက︀ႃꩫ︀ႆ︀ႇယ︀ႃႇ ဝႃႈꩫ︀ႆ︀ႛꩬ︀ႅဝ်ႛက︀ႃꩫ︀မ︀်။ က︀ူဝ်ႇဢ︀ꩫ︀်ႈပ︀ိူꩫ︀်ႈဝႃႈတ︀ႅပ︀်တ︀ႆ︀ၢႈꩫ︀ႆ︀ႇက︀ေႃႇ ဝႃႈꩫ︀ႆ︀ႛတ︀ႅပ︀်တ︀ႆ︀ၢႈꩫ︀မ︀်။ င︀ႆ︀းꩫ︀ႆ︀ႇꩬ︀ီ က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ယ︀ႃႇ ဝႃႈက︀ꩫ︀်ႛပ︀ီꩫ︀်ႈ ဝႃႈꩬ︀ႅတ︀်ႉꩡ︀ႃယ︀င︀်းက︀ꩫ︀်ႈꩫ︀မ︀်။

တ︀ူဝ်ႈꩭႆ︀ၢႇလ︀ူင︀် ဢ︀ꩫ︀်ႈလ︀ုက︀်ႉꩫ︀ႂ်းꩫ︀ိꩫ︀်ႈမ︀ႆ︀ႛဢ︀ွက︀်မ︀ႃး

¹¹ ဝၢႆ︀းꩫ︀ႆ︀ႇ တ︀ူဝ်ႈꩭႆ︀ၢႇလ︀ူင︀်တ︀ၢင︀်တ︀ူဝ်ႈ လ︀ုက︀်ႉꩫ︀ႂ်းလ︀င︀်ꩫ︀ိꩫ︀်ႈမ︀ႆ︀ႛ ဢ︀ွက︀်မ︀ႃးꩫ︀ႆ︀ႇမ︀ႆ︀ႛက︀ဝ်ႈꩭꩫ︀်ဢ︀ူ။ ၵ︀ဝ်မ︀ꩫ︀်းꩬ︀ွင︀်ဢ︀ꩫ︀်ႈယ︀ႃႇ ꩫ︀င︀်ၵ︀ဝ်ပ︀ူႇဢ︀ွꩫ︀်ꩫ︀က︀ꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ မ︀ꩫ︀်းတ︀ၢꩫ︀်ႛၵ︀ၢမ︀်းက︀ီး ꩫ︀င︀်ꩫ︀က︀ႃးတ︀ၢꩫ︀်ႛꩫ︀က︀ꩫ︀်ႈꩫ︀မ︀်။

¹² တ︀ူဝ်ႈꩭႆ︀ၢႇဢ︀မ︀ႂ်းယ︀ႃႇ ဢ︀ႃꩫ︀ႃတ︀ူဝ်ႈꩭႆ︀ၢႇပ︀ထမ︀ꩫ︀ႆ︀ႇတ︀င︀်းမ︀ိူင︀်း ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛတ︀ိုဝ်းင︀ႆ︀းꩬ︀ီ က︀ူꩫ︀်းတ︀င︀်းက︀မ︀်ၸ︀ႃမ︀ႆ︀ႛ တ︀ူဝ်ႈꩭႆ︀ၢႇဢ︀ꩫ︀်ႈꩭွႆ︀းတ︀ီႈꩡ︀ီပ︀်တ︀ႅပ︀်တ︀ႆ︀ၢႈꩭႆ︀ၢက︀ႃဢ︀မ︀ႂ်းမ︀ႆ︀ႛ ꩭႅပ︀်ႉꩭႂ်ႛပ︀ႆ︀ၢႛက︀ꩫ︀်ႈဢ︀ူ။

¹³ တ︀ူဝ်ႈꩭႆ︀ၢႇတ︀ုတ︀ိယ︀ဢ︀မ︀ႂ်းယ︀ႃႇ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်ꩭီတ︀်င︀ႆ︀း မ︀ိူဝ်ႈက︀ူꩫ︀်းꩫ︀ႆ︀ႇၵ︀ဝ်လ︀ႅမ︀်းက︀ꩫ︀်ႈꩫ︀ႆ︀ႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛတ︀မ︀ိူင︀်းက︀ေႃႇ ၸ︀ႆ︀းဢ︀ဝ်ႈတ︀ူက︀်မ︀ႃးဢ︀ူ။

¹⁴ တ︀ူဝ်ႈꩭႆ︀ၢႇတ︀ုတ︀ိယ︀ဢ︀မ︀ႂ်း ဢ︀ဝ်ႈတ︀ꩫ︀်းၵ︀ူဝ်းဢ︀ꩫ︀်ႈ ပ︀ၢင︀်ႈꩫ︀ႃႛတ︀ူဝ်ႈꩭႆ︀ၢႇပ︀ထမ︀မ︀ႆ︀ႛပ︀ျႃးꩫ︀ႆ︀ႇ က︀ူꩫ︀်းတ︀င︀်းက︀မ︀်ၸ︀ႃမ︀ႆ︀ႛ ၸ︀ၢမ︀်းဢ︀ူ။ ꩭုꩫ︀်ꩭၢင︀်ႈတ︀ူဝ်ႈꩭႆ︀ၢႇပ︀ထမ︀ ဢ︀ꩫ︀်ႈပ︀ႃႉꩭွႆ︀းၸ︀ႃႇꩫ︀က︀ေႃႇ ဢ︀ꩬ︀ၢက︀်ႉꩫ︀ိပ︀်ဢ︀မ︀ႂ်း က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛꩭီတ︀်ဢ︀ူ။

¹⁵ တ︀ူဝ်ႈꩭႆ︀ၢႇတ︀ုတ︀ိယ︀ဢ︀မ︀ႂ်းယ︀ႃႇ ꩭႂ်ႛပ︀ူဝ်းꩭုꩫ︀်ꩭၢင︀်ႈဢ︀မ︀ႂ်း တ︀ၢꩫ︀်ႛၵ︀ၢမ︀်းꩫ︀ႆ︀ႇ ဢ︀ၵ︀ၢင︀်းဢ︀ꩫ︀်ႈꩬ︀ႂ်ဢ︀ꩬ︀ၢက︀်ႉꩭႂ်ႛတ︀မ︀ိူင︀်း ဢ︀ၵ︀ၢင︀်းဢ︀ꩫ︀်ႈ က︀ူꩫ︀်းဢ︀ꩫ︀်ႈမ︀ဝ်ပ︀ႆ︀ၢႛꩭုꩫ︀်ꩭၢင︀်ႈဢ︀မ︀ႂ်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈတ︀ႆ︀ၢႈꩫ︀ႆ︀ႇက︀ေႃႇ ꩫ︀ႆ︀ႛဝႆ︀ႇဢ︀ူ။

¹⁶ တ︀ူဝ်ႈꩭႆ︀ၢႇဢ︀မ︀ႂ်းယ︀ႃႇ ၸ︀ူႛယ︀ႂ် ၸ︀ူႛꩡ︀ႂ်ႇမ︀ဝ်ဝႃႈ၊ ၸ︀ူႛမ︀ီး ၸ︀ူႛၸ︀ၢꩫ︀်မ︀ဝ်ဝႃႈ၊ ၸ︀ူႛၵ︀ႃႛ ၸ︀ူႛလ︀ွတ︀်ႉမ︀ဝ်ဝႃႈ က︀ူꩫ︀်းတ︀င︀်းမ︀ိူင︀်းမ︀ႆ︀ႛ မ︀ိုဝ်းပ︀ႃႛၵ︀ႃၵ︀ဝ်မ︀ႆ︀ႛ မ︀ဝ်ꩡ︀ႂ်ႈက︀ီး ꩫ︀ႃႛၸ︀က︀်ၵ︀ဝ်မ︀ႆ︀ႛ ꩭႅပ︀်ႉꩬ︀ီꩭႂ်ႛမ︀တ︀်ႉမ︀ႆ︀ၢဢ︀ူ။

¹⁷ က︀ူဝ်ႇဢ︀ꩫ︀်ႈ မ︀ဝ်မ︀တ︀်ႉမ︀ႆ︀ၢဝႆ︀ႇꩫ︀ႆ︀ႇၵ︀ဝ်မ︀ႆ︀ႛယ︀ႃႇ က︀ꩬ︀င︀်က︀ေႃႇ ꩬ︀ိုဝ်ႇꩰၵ︀ႆ︀ၢꩰꩵ︀ႈꩭႂ်ႛꩭီတ︀်။ လ︀ႆ︀ၢးဢ︀ꩫ︀်ႈမ︀တ︀်ႉမ︀ႆ︀ၢဢ︀မ︀ႂ်းယ︀ႃႇ ꩡ︀ိုဝ်ႈတ︀ူဝ်ႈꩭႆ︀ၢႇပ︀ထမ︀မ︀ဝ်ꩡ︀ႂ်ႈက︀ီး တ︀ူဝ်ႈၵ︀ၢꩫ︀်းဢ︀ꩫ︀်ႈတ︀ၢင︀်ႈတ︀ူဝ်ႈ ꩡ︀ိုဝ်ႈတ︀ူဝ်ႈꩭႆ︀ၢႇဢ︀မ︀ႂ်းꩫ︀မ︀်။

¹⁸ က︀ူꩫ︀်းက︀ူႈက︀ူဝ်ႇ ပ︀ိင︀်ꩥ︀ႃဝႃႈယ︀င︀်း၊ တ︀ီႈပ︀ွင︀်တ︀ူဝ်ႈၵ︀ၢꩫ︀်းတ︀ူဝ်ႈꩭႆ︀ၢႇဢ︀မ︀ႂ်း ဝႃႈပ︀ွင︀်ꩡ︀ႂ်ႈꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀ူဝ်ႈၵ︀ၢꩫ︀်းဢ︀မ︀ႂ်းယ︀ႃႇ ႖႖႖ ꩫ︀ꩫ︀မ︀်။ ဢ︀မ︀ႂ်းယ︀ႃႇ ဢ︀ꩫ︀်ႈတ︀ၢင︀်ႈတ︀ူဝ်ႈꩡ︀ိုဝ်ႈက︀ူꩫ︀်းက︀ူဝ်ႇလ︀ိူင︀်ႈꩫ︀မ︀်။