ꩭေပ︀ရ︀ူး 9 - Khamti Shan

လ︀ႆ︀ၢးဝႆ︀ႈၸ︀ြႃး လ︀ိက︀်ႉၵ︀တ︀်ႉက︀ဝ်

¹ ꩡ︀ႃႇလ︀ိူင︀်ႈ လ︀ိက︀်ႉၵ︀တ︀်ႉပ︀ထမ︀မ︀ႆ︀ႛ ပ︀ိူင︀်ႈဝႆ︀ႈၸ︀ြႃးꩫ︀ႆ︀ႇၵ︀ဝ်င︀ႆ︀း ဝၢင︀်းၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈဢ︀ူမ︀ိူင︀်းက︀ၢင︀်ႈꩫ︀ႆ︀ႇ လ︀ွေႛဢ︀ူ။

² ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ွက︀်ႉꩬ︀ွင︀်ꩭွင︀်ႛယ︀င︀်းꩬ︀ီ ၵ︀ွက︀်ႉပ︀ထမ︀ တ︀ီႈဢ︀ꩫ︀်ႈမ︀ူတ︀်ꩡ︀ၢင︀်မ︀ႆ︀ႛယ︀ႃႇ ꩬ︀ဝ်က︀ွက︀်ၸ︀ႆ︀း၊ ၸ︀ိူꩫ︀်င︀ႆ︀း ၵ︀ဝ်ႛမ︀ုꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ုက︀်ႉꩡ︀ူဝ်ဝႆ︀ႇꩫ︀ႆ︀ႇၵ︀ဝ်ယ︀င︀်းဢ︀ူ။

³ က︀ꩫ︀်ႛလ︀င︀် ၸ︀ႃႛက︀င︀်ႛမ︀ႆ︀ႛယ︀ႃႇ တ︀ီႈဢ︀ꩫ︀်ႈၵ︀ႅꩫ︀်းမ︀ူတ︀်ꩡ︀ၢင︀်ꩫ︀ꩫ︀ႆ︀ႇယ︀င︀်းဢ︀ူ။

⁴ တ︀ီႈဢ︀မ︀ႂ်းမ︀ႆ︀ႛယ︀ႃႇ ၵ︀ီင︀်ၵ︀ႅက︀်ၵ︀မ︀်း ဢ︀ꩫ︀်ႈꩡ︀ပ︀်ꩬ︀မ︀ီးꩭွမ︀်င︀ႆ︀း တ︀ႅက︀်ႉလ︀ိက︀်ႉၵ︀တ︀်ႉ ဢ︀ꩫ︀်ႈက︀ူႈပ︀ႃႛမ︀ႆ︀ႛ ဢ︀ဝ်ႈၵ︀မ︀်းဢ︀ူမ︀်ဝႆ︀ႇꩫ︀ႆ︀ႇယ︀င︀်းဢ︀ူ။ တ︀ႅက︀်ႉဢ︀မ︀ႂ်းမ︀ႆ︀ႛ မ︀ူဝ်ႛၵ︀မ︀်းဢ︀ꩫ︀်ႈၵ︀ဝ်ႛမ︀ုꩫ︀်းမ︀ၢꩫ︀်ꩫ︀ꩬ︀ႂ်ဝႆ︀ႇ၊ ၵ︀ွꩫ︀်ႇတ︀ဝ်ႇဢ︀ႃရ︀ုꩫ︀်ဢ︀ꩫ︀်ႈပ︀ူင︀်လ︀ီင︀ႆ︀း ၵ︀ႅပ︀်ꩭိꩫ︀်လ︀ိက︀်ႉၵ︀တ︀်ႉꩫ︀ႆ︀ႇၵ︀ဝ်ယ︀င︀်းဢ︀ူ။

⁵ က︀ꩫ︀်ႛꩫ︀ိူဝ်တ︀ႅက︀်ႉဢ︀မ︀ႂ်းမ︀ႆ︀ႛ ꩭုꩫ︀်ꩭၢင︀်ႈၵ︀ေရ︀ုၿိမ︀်ဢ︀ꩫ︀်ႈမ︀ူꩫ︀်ႈၸ︀ုင︀်းယ︀ႂ်ꩫ︀ႆ︀ႇၵ︀ဝ်ယ︀ႃႇ ပ︀လ︀ၢင︀်တ︀ီႈဢ︀ꩫ︀်ႈ က︀ူꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ီꩫ︀ူႈꩭႂ်ႛမ︀ႆ︀ႛ ပ︀ိက︀်ၵ︀ဝ်င︀မ︀်းင︀ႆ︀းဢ︀ူ။ လ︀ွင︀်ႈꩫ︀ႆ︀ႇၵ︀ဝ် င︀ႆ︀ႚယ︀ႃႇ က︀ူႈꩡ︀ိပ︀်ႉက︀ူႈလ︀ိပ︀်ႉယ︀ႃႇ ၵ︀ႆ︀ႈꩭႂ်ႛꩵ︀ႈꩫ︀ႆ︀ႛ။

⁶ ဢ︀ꩫ︀်ႈꩫ︀ႆ︀ႇၵ︀ဝ် ꩫ︀င︀်င︀ႆ︀းꩭႅမ︀်းဝႆ︀ႇယ︀ဝ်ႇက︀ီး ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ႇၵ︀ဝ်ယ︀ႃႇ ၵ︀ွက︀်ႉပ︀ထမ︀မ︀ႆ︀ႛက︀ူႈမ︀ိုဝ်ႇၵ︀ဝ်ႛꩬ︀ီ ထၢမ︀်းဢ︀မ︀ူးဢ︀ူ။

⁷ ꩫ︀ႆ︀ႇꩫ︀က︀ေႃႇ ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ၢႈꩬ︀ိုင︀် ၵ︀ွက︀်ႉတ︀ုတ︀ိယ︀မ︀ႆ︀ႛ ပ︀ီႈလ︀ိူင︀်ႈမ︀ႆ︀ႛပ︀ၢꩫ︀်ႈလ︀ိူင︀်ႈꩫ︀ၢႆ︀ႈꩫ︀ႆ︀ႛၵ︀ဝ်ႛꩫ︀မ︀်။ မ︀ိူဝ်ႈၵ︀ဝ်ႛက︀ႃꩫ︀ႆ︀ႇ ꩫ︀ိူတ︀်ႉꩡ︀ႃႇဢ︀ပ︀ႅတ︀်ႉ ဢ︀ꩫ︀်ႈမ︀ꩫ︀်းၸ︀ူႛꩡ︀ဝ်ႛင︀ႆ︀း ဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ် မ︀ဝ်တ︀ွင︀်းꩬ︀ီၸ︀ိတ︀်က︀ႃꩫ︀ႆ︀ႇၵ︀ဝ် ဢ︀ဝ်ႈက︀ႃꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ုက︀်ႉꩡ︀ူဝ်ဢ︀ူ။

⁸ ꩡ︀ူဝ်ႈက︀ႃႈꩭိူꩫ︀်းဢ︀ꩫ︀်ႈဢ︀ူလ︀င︀်ꩫ︀ိꩫ︀်ႈ ယ︀င︀်းဢ︀ူꩫ︀ႆ︀ႇယ︀ႃႇ တ︀ၢင︀်းၵ︀ဝ်ႛတ︀ီႈဢ︀ꩫ︀်ႈၵ︀ႅꩫ︀်းမ︀ူတ︀်ꩡ︀ၢင︀် ꩵ︀ႈပ︀ႆ︀ပ︀ုတ︀်ꩫ︀ꩫ︀ႆ︀ႇ က︀ူꩫ︀်းꩭဝ်းမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈလ︀ွင︀်ႈꩫ︀ႆ︀ႇၵ︀ဝ် ꩬ︀ွꩫ︀်ꩭႂ်ႛဢ︀ူꩫ︀မ︀်။

⁹ ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀မ︀ႂ်းယ︀ႃႇ ပ︀ီꩫ︀်ႈပ︀ုင︀်ꩭၢင︀်ႈꩡ︀ူဝ်ႈင︀ႆ︀ႚꩫ︀မ︀်။ ၵ︀ိူင︀်ႈလ︀ူꩫ︀ၵ︀ႃၵ︀ႅက︀်ꩫ︀ႆ︀ႇၵ︀ဝ်ယ︀ႃႇ ꩡ︀ႂ်ႈၵ︀ွꩫ︀်ၸ︀ူႛဝႆ︀ႈၸ︀ြႃးꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩡ︀ုꩫ︀်ႈꩡ︀ၢင︀်ꩭႂ်ႛꩵ︀ႈꩫ︀ႆ︀ႛꩫ︀ꩫ︀ႆ︀ႇ ပ︀ုတ︀်ပ︀ျႃးဢ︀ူꩫ︀မ︀်။

¹⁰ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀မ︀ႂ်းယ︀ႃႇ လ︀ွင︀်ႈဢ︀ꩫ︀်ႈက︀ိꩫ︀်ႈ၊ ဢ︀ꩫ︀်ႈꩬ︀ူတ︀်ႉင︀ႆ︀း လ︀ႆ︀ၢးဢ︀ꩫ︀်ႈꩬ︀ုက︀်ႉလ︀ၢင︀်ႇက︀ူႈၸ︀ꩫ︀်း ဢ︀ꩫ︀်ႈက︀ꩫ︀်ႛꩫ︀ွက︀်ႉတ︀ူဝ်ႈမ︀ႆ︀ႛꩭီတ︀်ꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀်။ ယ︀ၢမ︀်းဢ︀ꩫ︀်ႈ ၸ︀ိင︀်ႛပ︀ိူင︀်ႈဢ︀မ︀ႂ်းၵ︀ဝ်မ︀ႆ︀ႛ လ︀ႆ︀ၢႈဢ︀ꩫ︀်ႈမ︀ႂ်ꩫ︀ႆ︀ႇထိုင︀်မ︀ႃးက︀ီး ၸ︀ိင︀်ႛပ︀ိူင︀်ႈဢ︀မ︀ႂ်းၵ︀ဝ်ꩵ︀ႈယ︀င︀်းယ︀ဝ်ႇ။

¹¹ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇꩡ︀ဝ်ႛၵ︀ရ︀ီတ︀် ꩭီတ︀်ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉ ပ︀ႃႛလ︀ွင︀်ႈဢ︀ꩫ︀်ႈꩫ︀ီႈ ဢ︀ꩫ︀်ႈင︀ႆ︀ႚမ︀ႆ︀ႛယ︀င︀်းꩫ︀ႆ︀ႇၵ︀ဝ်ꩬ︀ီ က︀ျွႃးမ︀ႃးယ︀ဝ်ႇ။ ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈင︀ႆ︀ႚမ︀ꩫ︀်းꩡ︀ဝ်ႛꩭီတ︀်ဢ︀မ︀ူးဢ︀ူꩫ︀ႆ︀ႇယ︀ႃႇ ယ︀ႂ်မ︀ႅတ︀်ႉꩬ︀ႃတ︀ီမ︀်ႈက︀ုမ︀်ꩬ︀ႃင︀ႆ︀း ဢ︀ꩫ︀်ႈက︀ူꩫ︀်းပ︀ူက︀်မ︀ဝ်ꩡ︀ႂ်ႈ ဢ︀ꩫ︀်ႈတ︀င︀်းက︀မ︀်ၸ︀ႃ မ︀ဝ်ꩡ︀ၢပ︀်ႉလ︀ႅင︀်ꩫ︀မ︀်။

¹² ယ︀ဝ်ႇက︀ီးမ︀ꩫ︀်းꩡ︀ဝ်ႛ တ︀ီႈဢ︀ꩫ︀်ႈၵ︀ႅꩫ︀်းမ︀ူတ︀်ꩡ︀ၢင︀်မ︀ႆ︀ႛ ꩡ︀ႃႇက︀ူꩫ︀်းတ︀င︀်းလ︀ုင︀် ၵ︀ဝ်ႛက︀ႃꩬ︀ီꩭဝ်းမ︀ႆ︀ႛ လ︀ုက︀်ႉဢ︀ပ︀ႅတ︀်ႉမ︀ႆ︀ႛ ꩡ︀ူဝ်ႈထႃဝရ︀က︀ေႛၵ︀ျွတ︀်ႉꩭႂ်ႛယ︀ဝ်ႇ။ မ︀ိူဝ်ႈဢ︀မ︀ႂ်း ဢ︀ဝ်ႈꩫ︀ိူတ︀်ႉင︀ူဝ်းဢ︀ွꩫ︀်၊ ꩫ︀ိူတ︀်ႉပ︀ေႇယ︀ႃႛꩫ︀ႆ︀ႇၵ︀ဝ်မ︀ဝ်ꩡ︀ႂ်ႈꩬ︀ီ ဢ︀ဝ်ႈꩫ︀ိူတ︀်ႉမ︀ꩫ︀်းၸ︀ူႛꩡ︀ဝ်ႛꩬ︀ိုင︀် ꩡ︀ႃႇထႃဝရ︀ ꩭီတ︀်ꩭိူဝ်ႈꩭိုင︀်းꩫ︀ႆ︀ၢႈ ပ︀ုက︀်ႉꩡ︀ူဝ်မ︀ႃးꩫ︀မ︀်။

¹³ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ွမ︀်းꩫ︀င︀်က︀ျမ︀်းꩬ︀ိꩫ︀်မ︀ေႃꩬ︀ေက︀ီး က︀ူꩫ︀်းဢ︀ꩫ︀်ႈမ︀ဝ်မ︀ူတ︀်ꩡ︀ၢင︀်ꩫ︀ႆ︀ႇၵ︀ဝ် ဝႆ︀ႈၸ︀ြႃးမ︀ဝ်ꩫ︀ႆ︀ႛꩫ︀က︀ေႃႇ ၵ︀ဝ်မ︀ႆ︀ႛꩫ︀ိူတ︀်ႉပ︀ေႇယ︀ႃႛ၊ ꩫ︀ိူတ︀်ႉင︀ူဝ်းထိူက︀်၊ တ︀ဝ်ႈင︀ူဝ်းတ︀ူဝ်ႈမ︀ေႈꩫ︀ႆ︀ႇၵ︀ဝ် ၸ︀ွက︀်ꩭႂ်ႛက︀ီး တ︀ူဝ်ႈၵ︀ဝ်မ︀ႆ︀ႛ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛဢ︀ူ။

¹⁴ ꩫ︀ိူတ︀်ႉꩡ︀ဝ်ႛၵ︀ရ︀ီတ︀်ယ︀ႃႇ ၵ︀ႆ︀ႇမ︀ဝ်က︀ႃးပ︀ီꩫ︀်ႈပ︀ေႇဢ︀ူ။ မ︀ꩫ︀်းꩡ︀ဝ်ႛယ︀ႃႇ ဢ︀ဝ်ႈတ︀ူဝ်ႈမ︀ꩫ︀်းၸ︀ူႛꩡ︀ဝ်ႛ ꩭီတ︀်ၵ︀ႅက︀်ဢ︀ꩫ︀်ႈတ︀ီမ︀်ႈက︀ုမ︀်ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ဝ်ႈၵ︀ွꩫ︀်ထႃဝရ︀ ပ︀ုက︀်ႉꩡ︀ူဝ်မ︀ႃးယ︀ဝ်ႇ။ ꩫ︀ိူတ︀်ႉမ︀ꩫ︀်းꩡ︀ဝ်ႛယ︀ႃႇ ꩭႂ်ႛပ︀ူဝ်းꩭဝ်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်မ︀ႆ︀ႛ မ︀ိုင︀်ႇꩫ︀ႆ︀ႛꩫ︀ႆ︀ႇ ꩡ︀ႂ်ႈၵ︀ွꩫ︀်ꩭဝ်းမ︀ႆ︀ႛ တ︀ၢင︀်းက︀ႅင︀်း ဢ︀ꩫ︀်ႈဢ︀က︀ိဝ်းမ︀ဝ်ယ︀င︀်းꩫ︀ႆ︀ႇၵ︀ဝ် ꩬ︀ုက︀်ႉဢ︀ဝ်ႈတ︀ွင︀်ꩭႂ်ႛဢ︀ူ။

¹⁵ င︀ႆ︀းꩫ︀ႆ︀ႇꩬ︀ီ ꩡ︀ဝ်ႛၵ︀ရ︀ီတ︀်ယ︀ႃႇ ꩡ︀ႃႇၵ︀ၢမ︀်းၵ︀တ︀်ႉမ︀ႂ် ပ︀ီꩫ︀်ႈၸ︀ူႛက︀ၢပ︀်က︀ၢႆ︀ဢ︀ဝ်ႈꩫ︀ီႈꩭႂ်ႛꩫ︀မ︀်။ ၵ︀ၢမ︀်းၵ︀တ︀်ႉမ︀ႂ်ဢ︀မ︀ႂ်းယ︀ႃႇ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭွင︀်ႇဝႆ︀ႇꩫ︀ႆ︀ႇၵ︀ဝ် ဢ︀က︀ိဝ်းထႃဝရ︀ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀တ︀ိꩭႂ်ႛဝႆ︀ႇꩫ︀ႆ︀ႇ ꩫ︀ႆ︀ႛꩭၢပ︀်ႉက︀ꩫ︀်ႈꩫ︀ႆ︀ႇꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛၵ︀ရ︀ီတ︀်ယ︀ႃႇ ꩭႂ်ႛပ︀ူဝ်းꩭဝ်း လ︀ုက︀်ႉဢ︀ပ︀ႅတ︀်ႉ ဢ︀ꩫ︀်ႈၵ︀ၢမ︀်းၵ︀တ︀်ႉက︀ဝ်မ︀ႆ︀ႛ ၸ︀ိတ︀်မ︀ႃးꩫ︀ႆ︀ႇၵ︀ဝ်မ︀ႆ︀ႛလ︀ွတ︀်ႉꩫ︀ႆ︀ႇ ၵ︀ၢမ︀်တ︀ႆ︀ၢႈꩭႂ်ႛမ︀ႃးယ︀ဝ်ႇ။

¹⁶ မ︀ိူဝ်ႈꩭဝ်းꩫ︀ႆ︀ႛꩭၢပ︀်ႉလ︀ိက︀်ႉꩬ︀င︀်တ︀ႆ︀ၢႈꩫ︀ႆ︀ႇ ၸ︀ူႛꩬ︀င︀်ဢ︀မ︀ႂ်းတ︀ႆ︀ၢႈယ︀ဝ်ႇꩫ︀ꩫ︀ႆ︀ႇ ꩬ︀ၢက︀်ႉꩬ︀ေꩭၢင︀်ႇဢ︀ူ။

¹⁷ တ︀ႆ︀ၢႈက︀ႃꩫ︀ႆ︀ႇꩬ︀ိုင︀် လ︀ိက︀်ႉဢ︀မ︀ႂ်း ၵ︀ဝ်ႛတ︀ြႃးꩫ︀မ︀်။ မ︀ဝ်ပ︀ႆ︀တ︀ႆ︀ၢႈက︀ီး ꩵ︀ႈၵ︀ဝ်ႛတ︀ြႃး။

¹⁸ င︀ႆ︀းꩬ︀ီꩫ︀မ︀် မ︀ိူဝ်ႈလ︀ိက︀်ႉၵ︀တ︀်ႉက︀ဝ်မ︀ႆ︀ႛ ဢ︀ဝ်ႈၵ︀ဝ်ႛတ︀ြႃးꩫ︀ႆ︀ႇ ဢ︀ဝ်ႈꩫ︀ိူတ︀်ႉတ︀ိုဝ်းမ︀ႃးꩫ︀ႆ︀ႇ။

¹⁹ မ︀ိူဝ်ႈမ︀ေႃꩬ︀ေ ꩬ︀ိꩫ︀်ဢ︀ꩫ︀်ႈက︀ျမ︀်းꩬ︀ိꩫ︀်မ︀ႆ︀ႛလ︀ွေႛꩫ︀ႆ︀ႇၵ︀ဝ် ပ︀ၢင︀်ႈꩫ︀ႃႛက︀ူꩫ︀်းတ︀င︀်းလ︀ုင︀်မ︀ႆ︀ႛ ဢ︀ၢꩫ︀်ပ︀ျႃးယ︀ဝ်ႇꩫ︀ႆ︀ႇ က︀ျမ︀်းဢ︀မ︀ႂ်းင︀ႆ︀း က︀ူꩫ︀်းတ︀င︀်းလ︀ုင︀်မ︀ႆ︀ႛ ꩫ︀ိူတ︀်ႉင︀ူဝ်းထိူက︀်ꩫ︀ၵ︀ႃꩫ︀ိူတ︀်ႉပ︀ေႇယ︀ႃႛ ဢ︀ꩫ︀်ႈတ︀င︀်းꩫ︀မ︀်ႇလ︀ုက︀်ဝႆ︀ႇꩫ︀ႆ︀ႇ ဢ︀ဝ်ႈက︀ၢꩫ︀်ႛတ︀ူꩫ︀်ႛꩭုꩬ︀ုပ︀် ဢ︀ꩫ︀်ႈꩫ︀ႆ︀ၢႛꩫ︀ႅင︀်ႈၸ︀ွက︀်ႉဝႆ︀ႇꩫ︀ႆ︀ႇ ၸ︀ွက︀်င︀ႆ︀းꩬ︀ီ

²⁰ “ꩫ︀ိူတ︀်ႉꩫ︀ႆ︀ႇယ︀ႃႇ ၵ︀ၢမ︀်းၵ︀တ︀်ႉဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩬ︀ူ ဝႃႈထွမ︀်ꩡ︀ွမ︀်းမ︀ႆ︀ႛ တ︀ွက︀်ꩡ︀ုမ︀်ႛꩫ︀ႆ︀ႇꩫ︀မ︀်” ꩫ︀ꩬ︀ီဝႃႈမ︀ႃးဢ︀ူ။

²¹ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛင︀ႆ︀း ၵ︀ိူင︀်ႈဢ︀ꩫ︀်ႈမ︀ိူဝ်ႈဝႆ︀ႈၸ︀ြႃးꩫ︀ႆ︀ႇ တ︀ိုဝ်းꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛက︀ေႃႇ ဢ︀ဝ်ႈꩫ︀ိူတ︀်ႉၸ︀ွက︀်ဢ︀ူ။

²² ဢ︀ꩫ︀်ႈတ︀ေႇတ︀ေႇက︀ေႃႇ တ︀င︀်းလ︀ုင︀်တ︀င︀်းမ︀ိူင︀်းမ︀ႆ︀ႛꩫ︀က︀ꩫ︀်ႈ ꩡ︀ွမ︀်းက︀ျမ︀်းꩬ︀ိꩫ︀်ꩬ︀ီ ဢ︀ဝ်ႈꩫ︀ိူတ︀်ႉဝႃႈꩬ︀ုက︀်ႉဢ︀ဝ်ႈတ︀ွင︀်ဢ︀ူ။ ဢ︀ပ︀ႅတ︀်ႉꩫ︀ꩫ︀ႆ︀ႇ ꩫ︀ိူတ︀်ႉလ︀ူဝ်က︀ီးꩬ︀ိုင︀် ပ︀ွႆ︀လ︀ွတ︀်ႉꩭႂ်ႛꩫ︀ႆ︀ႛꩫ︀မ︀်။

ၵ︀ႅက︀်ꩡ︀ဝ်ႛၵ︀ရ︀ီတ︀် ဢ︀ꩫ︀်ႈꩡ︀ႃႇထႃဝရ︀ ꩭီတ︀်ꩭႃလ︀ိဝ်ႈꩫ︀ႆ︀ၢႈ

²³ လ︀ွင︀်ႈဢ︀ꩫ︀်ႈင︀ႆ︀ႚဝႃႈ ဢ︀ꩫ︀်ႈမ︀ိူင︀်းက︀ၢင︀်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈတ︀ေႇတ︀ေႇက︀ီး ဢ︀ꩫ︀်ႈတ︀ၢင︀်ႈတ︀ူဝ်ႈ ဢ︀ꩫ︀်ႈက︀ၢင︀်ႈꩭၢဝ်မ︀ႆ︀ႛယ︀င︀်းꩫ︀ႆ︀ႇၵ︀ဝ်ꩫ︀မ︀်။ င︀ႆ︀းꩫ︀ႆ︀ႇꩬ︀ီ လ︀ွင︀်ႈဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈၵ︀ႅက︀်ဢ︀ꩫ︀်ႈꩫ︀ႆ︀ႇၵ︀ဝ် ဝႃႈဢ︀ဝ်ႈမ︀ူတ︀်ꩡ︀ၢင︀်တ︀ေႇတ︀ေႇꩫ︀မ︀်။ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈက︀ၢင︀်ႈꩭၢဝ်မ︀ႆ︀ႛယ︀င︀်းꩫ︀ႆ︀ႇၵ︀ဝ်ယ︀ႃႇ ၵ︀ႅက︀်ဢ︀ꩫ︀်ႈ ၵ︀ႅက︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ယ︀ႂ်ꩬ︀ႃꩫ︀ႆ︀ႇꩭၢင︀်ႇဢ︀ူ။

²⁴ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛၵ︀ရ︀ီတ︀်ယ︀ႃႇ ဝၢင︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ူꩫ︀်းပ︀ူက︀်မ︀ႆ︀ႛꩵ︀ႈꩡ︀ႂ်ႈ ၵ︀ဝ်ႛက︀ႃꩫ︀ႆ︀ႇ။ တ︀ီႈဢ︀ꩫ︀်ႈတ︀ႅက︀်ႉပ︀ုင︀်ꩭၢင︀်ႈမ︀ႆ︀ႛမ︀ဝ်ꩡ︀ႂ်ႈꩬ︀ီ က︀ၢင︀်ႈꩭၢဝ်တ︀ေႇတ︀ေႇမ︀ႆ︀ႛꩬ︀ိုင︀် မ︀ꩫ︀်းꩡ︀ဝ်ႛၵ︀ဝ်ႛက︀ႃင︀ႆ︀း င︀ႆ︀ႚ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ၢင︀်ႈတ︀ူဝ်ႈꩭဝ်းꩬ︀ီဢ︀ူဢ︀ူꩫ︀မ︀်။

²⁵ ꩫ︀ႆ︀ႇꩫ︀က︀ေႃႇ ꩫ︀င︀်ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ႇ တ︀ီႈဢ︀ꩫ︀်ႈၵ︀ႅꩫ︀်းမ︀ူတ︀်ꩡ︀ၢင︀်မ︀ႆ︀ႛ ဢ︀ဝ်ႈꩫ︀ိူတ︀်ႉꩫ︀ိူဝ်ႇမ︀ိူဝ်ႛ က︀ူႈပ︀ီႈဝႃႈက︀ႃပ︀ုက︀်ႉꩡ︀ူဝ်ꩫ︀က︀ꩫ︀်ႈ ꩡ︀ဝ်ႛၵ︀ရ︀ီတ︀်ယ︀ႃႇ တ︀ူဝ်ႈမ︀ꩫ︀်းꩡ︀ဝ်ႛ က︀ီလ︀ႆ︀ၢပ︀ၢꩫ︀်ႈꩵ︀ႈဝႃႈပ︀ုက︀်ႉꩡ︀ူဝ်။

²⁶ ꩬ︀င︀်ဝႃႈ င︀ႆ︀းဝႃႈပ︀ုက︀်ႉꩡ︀ူဝ်ꩫ︀မ︀်ꩫ︀က︀ီး လ︀ုက︀်ႉမ︀ိူဝ်ႈက︀မ︀်ၸ︀ႃတ︀ေပ︀ုꩫ︀်ႛ က︀ီလ︀ႆ︀ၢပ︀ၢꩫ︀်ႈဝႃႈၵ︀ၢမ︀်တ︀ႆ︀ၢႈယ︀ဝ်ႇ။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ꩭႂ်ႛပ︀ူဝ်းဢ︀ပ︀ႅတ︀်ႉမ︀ႆ︀ႛဢ︀ဝ်ႈၵ︀ွတ︀်ꩫ︀ႆ︀ႇ တ︀ူဝ်ႈမ︀ꩫ︀်းꩡ︀ဝ်ႛ ပ︀ုက︀်ႉꩡ︀ူဝ်က︀ွတ︀်ꩫ︀ꩬ︀ီ က︀ၢပ︀်ႉပ︀ႆ︀ၢႈꩭၢင︀်မ︀ႆ︀ႛꩬ︀ိုင︀် ꩡ︀ႃႇက︀ူႈꩡ︀ူဝ်ႈလ︀ႆ︀ၢၵ︀ႃး ꩭီတ︀်ꩭိူဝ်ႈꩭိုင︀်းꩫ︀ႆ︀ၢႈ က︀ျွႃးမ︀ႃးꩫ︀မ︀်။

²⁷ က︀ူꩫ︀်းꩫ︀ꩫ︀ႆ︀ႇ ပ︀ၢꩫ︀်ႈလ︀ိူင︀်ႈꩫ︀ၢႆ︀ႈꩫ︀မ︀်ဝႃႈတ︀ႆ︀ၢႈꩫ︀ႆ︀ႇ။ ယ︀ဝ်ႇက︀ီး ဝႃႈၵ︀ၢမ︀်ပ︀ႅတ︀်ႉတ︀ြႃးꩫ︀မ︀်။

²⁸ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩡ︀ဝ်ႛၵ︀ရ︀ီတ︀်က︀ေႃႇ ꩭႂ်ႛပ︀ူဝ်းဢ︀ပ︀ႅတ︀်ႉက︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛ ဢ︀ဝ်ႈၵ︀ွတ︀်ꩫ︀ႆ︀ႇ ဢ︀ဝ်ႈတ︀ူဝ်ႈမ︀ꩫ︀်းၸ︀ူႛꩡ︀ဝ်ႛ ပ︀ၢꩫ︀်ႈလ︀ိူင︀်ႈꩫ︀ႆ︀ၢႈ ပ︀ုက︀်ႉꩡ︀ူဝ်ယ︀ဝ်ႇက︀ီး တ︀င︀်းဢ︀ပ︀ႅတ︀်ႉမ︀ဝ်ꩡ︀ၢပ︀်ႉလ︀ႅင︀်ꩬ︀ီ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀ႂ်းထႃႛꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛၵ︀ေꩬ︀ေꩫ︀ႆ︀ႇ တ︀ီပ︀ွက︀်ႉမ︀ႃးꩫ︀မ︀်။