ꩭေပ︀ရ︀ူး 7 - Khamti Shanယ︀ီတ︀်ႉပ︀ရ︀ေႃးꩭိက︀်ႉ မ︀ေလ︀ၵ︀ိꩡ︀ေတ︀ိက︀် 1 မ︀ေလ︀ၵ︀ိꩡ︀ေတ︀ိက︀်ꩫ︀ႆ︀ႇယ︀ႃႇ ꩡ︀ဝ်ႛꩭူဝ်ၵ︀မ︀်းꩬ︀ႃလ︀ိမ︀် ယ︀ီတ︀်ႉပ︀ရ︀ေႃးꩭိက︀်ႉၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛဢ︀ꩫ︀်ႈၵ︀ႅꩫ︀်းꩬ︀ုင︀်မ︀ႅတ︀်ႉꩫ︀မ︀်။ မ︀ꩫ︀်းယ︀ႃႇ မ︀ိူဝ်ႈဢ︀ႃပ︀ြႃꩭၢမ︀် ꩡ︀ဝ်ႛꩭူဝ်ၵ︀မ︀်းꩬ︀ီပ︀ႃးမ︀ႆ︀ႛတ︀ိက︀်ပ︀ေႇꩬ︀ီ ပ︀ွက︀်ႉမ︀ႃးꩫ︀ႆ︀ႇ ဢ︀ႃပ︀ြႃꩭၢမ︀်မ︀ႆ︀ႛꩭၢပ︀်ႉတ︀ွꩫ︀်ႛꩬ︀ီ ဢ︀က︀ိဝ်းပ︀ူင︀်ႈꩭႂ်ႛမ︀ႃးဢ︀ူ။ 2 ဢ︀ႃပ︀ြႃꩭၢမ︀်က︀ေႃႇ မ︀ꩫ︀်းမ︀ႆ︀ႛၵ︀ိူင︀်ႈဢ︀ꩫ︀်ႈမ︀ꩫ︀်းပ︀ေႇꩬ︀ိူက︀်မ︀ႃးꩫ︀ႆ︀ႇ ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈ လ︀ူမ︀ႃးဢ︀ူ။ မ︀ေလ︀ၵ︀ိꩡ︀ေတ︀ိက︀်ꩫ︀ꩫ︀ႆ︀ႇယ︀ႃႇ ꩡ︀ဝ်ႛꩭူဝ်ၵ︀မ︀်းလ︀ွင︀်ႈꩬ︀ိုဝ်ႈတ︀ူဝ်၊ ꩡ︀ဝ်ႛꩭူဝ်ၵ︀မ︀်းꩬ︀ႃလ︀ိမ︀်ꩫ︀ꩫ︀ႆ︀ႇယ︀ႃႇ ꩡ︀ဝ်ႛꩭူဝ်ၵ︀မ︀်းတ︀ၢင︀်းက︀တ︀်ယ︀ီꩫ︀်ႈꩫ︀ꩫ︀မ︀်။ 3 မ︀ꩫ︀်းယ︀ႃႇ ပ︀ူဝ်၊ မ︀ေ၊ ꩡ︀ိူဝ်ႇၵ︀ိူဝ်းက︀ေႃႇမ︀ဝ်ယ︀င︀်း။ ဢ︀ꩫ︀်ႈၸ︀ႃး ဢ︀ꩫ︀်ႈတ︀ႆ︀ၢႈက︀ေႃႇမ︀ဝ်ယ︀င︀်းင︀ႆ︀း ꩫ︀င︀်ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀က︀ꩫ︀်ႈပ︀ီꩫ︀်ႈꩬ︀ီ ထႃဝရ︀ ပ︀ီꩫ︀်ႈယ︀ီတ︀်ႉပ︀ရ︀ေႃးꩭိက︀်ႉဢ︀ူꩫ︀မ︀်။ 4 ꩡ︀ိူမ︀်ႈက︀ႃႈပ︀ူဝ်ၸ︀ꩫ︀်းꩭဝ်း ဢ︀ႃပ︀ြႃꩭၢမ︀်တ︀မ︀ိူင︀်းက︀ေႃႇ မ︀ꩫ︀်းမ︀ႆ︀ႛ ၵ︀ိူင︀်ႈပ︀ေႇꩬ︀ိူက︀်မ︀ꩫ︀်း ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈ လ︀ူမ︀ႃးꩫ︀မ︀်ꩫ︀က︀ီး မ︀ꩫ︀်းၵ︀ႂ်ႈလ︀ႂ်ႈယ︀ႂ်မ︀ႅတ︀်ႉꩫ︀ꩫ︀ႆ︀ႇ ၵ︀ႂ်ႈꩡ︀ႂ်ႈလ︀ႅမ︀်းက︀ꩫ︀်ႈတ︀ႃႉ။ 5 ယ︀ီတ︀်ႉပ︀ရ︀ေႃးꩭိက︀်ႉ ဢ︀ꩫ︀်ႈလ︀ုက︀်ႉၵ︀ိူဝ်းလ︀ေဝိꩫ︀ႆ︀ႇၵ︀ဝ်ယ︀ႃႇ လ︀ုက︀်ႉပ︀ီႈꩫ︀ွင︀်ႇၵ︀ဝ်ၸ︀ူႛꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း လ︀ုက︀်ႉၵ︀ိူဝ်းဢ︀ႃပ︀ြႃꩭၢမ︀်ꩫ︀ႆ︀ႇၵ︀ဝ်မ︀ႆ︀ႛ တ︀မ︀ိူင︀်း လ︀ုက︀်ႉတ︀င︀်းလ︀ုင︀်မ︀ႆ︀ႛ ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈ ဝႃႈꩭၢပ︀်ႉဢ︀ဝ်ႈꩫ︀မ︀် ꩫ︀ꩬ︀ီက︀ျမ︀်းꩬ︀ိꩫ︀်မ︀ႆ︀ႛဝႃႈဝႆ︀ႇဢ︀ူ။ 6 မ︀ေလ︀ၵ︀ိꩡ︀ေတ︀ိက︀်ယ︀ႃႇ လ︀ုက︀်ႉၵ︀ိူဝ်းလ︀ေဝိမ︀ႆ︀ႛ မ︀ဝ်ꩡ︀ႂ်ႈꩫ︀က︀ေႃႇ လ︀ုက︀်ႉဢ︀ႃပ︀ြႃꩭၢမ︀် က︀ူဝ်ႇဢ︀ꩫ︀်ႈက︀တ︀ိၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႛဝႆ︀ႇမ︀ႆ︀ႛ ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈ ꩭၢပ︀်ႉဢ︀ဝ်ႈꩬ︀ီ မ︀ꩫ︀်းမ︀ႆ︀ႛဢ︀က︀ိဝ်းပ︀ူင︀်ႈꩭႂ်ႛမ︀ႃးဢ︀ူ။ 7 က︀ူဝ်ႇဢ︀ꩫ︀်ႈပ︀ူင︀်ႈဢ︀က︀ိဝ်းꩫ︀ႆ︀ႇယ︀ႃႇ က︀ူဝ်ႇဢ︀ꩫ︀်ႈꩭၢပ︀်ႉဢ︀က︀ိဝ်းမ︀ႆ︀ႛ ယ︀ႂ်ꩬ︀ႃဢ︀ူꩫ︀ꩫ︀ႆ︀ႇ ၸ︀ႂ်က︀ေႃႇတ︀ွင︀်းဢ︀ူ။ 8 ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ႇၵ︀ဝ်ယ︀ႃႇ လ︀ုက︀်ႉက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈ ꩭၢပ︀်ႉဢ︀ဝ်ႈဢ︀ူ။ ꩫ︀ႆ︀ႇꩫ︀က︀ေႃႇ မ︀ေလ︀ၵ︀ိꩡ︀ေတ︀ိက︀်မ︀ႆ︀ႛလ︀ိူဝ်ꩬ︀ီ ယ︀ီတ︀်ႉပ︀ရ︀ေႃႉꩭိက︀်ႉတ︀င︀်းမ︀ိူင︀်း တ︀ႆ︀ၢႈꩡ︀ၢင︀်ႈဢ︀ူ။ မ︀ေလ︀ၵ︀ိꩡ︀ေတ︀ိက︀်ယ︀ႃႇ ဢ︀ꩬ︀ၢက︀်ႉꩫ︀ိပ︀်ဢ︀ူꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇဢ︀ူ။ 9 ၵ︀ိုꩫ︀်းꩫ︀က︀ဝ် လ︀ေဝိယ︀ႃႇ ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈꩭၢပ︀်ႉဢ︀ဝ်ႈꩫ︀က︀ေႃႇ မ︀ꩫ︀်းၸ︀ူႛꩡ︀ဝ်ႛက︀ေႃႇ ဢ︀ဝ်ႈတ︀ၢင︀်းဢ︀ႃပ︀ြႃꩭၢမ︀် ꩬ︀ိပ︀်ꩡ︀ႃႇꩡ︀ႃႇလ︀ိူင︀်ႈꩫ︀ႆ︀ႛလ︀ူယ︀ဝ်ႇꩫ︀ꩬ︀ီ ဝႃႈꩫ︀ႆ︀ႛဢ︀ူ။ 10 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ိူဝ်ႈမ︀ေလ︀ၵ︀ိꩡ︀ေတ︀ိက︀်မ︀ႆ︀ႛ ဢ︀ႃပ︀ြႃꩭၢမ︀်လ︀ူမ︀ႃးꩫ︀ႆ︀ႇ လ︀ေဝိꩵ︀ႈပ︀ႆ︀ယ︀င︀်းမ︀ႃး။ မ︀ိူဝ်ႈဢ︀မ︀ႂ်း လ︀ေဝိယ︀ႃႇ ဢ︀ူꩫ︀ႂ်းတ︀ူဝ်ႈၸ︀ူႛပ︀ူဝ်ႈမ︀ꩫ︀်း ဢ︀ႃပ︀ြႃꩭၢမ︀်မ︀ႆ︀ႛꩫ︀မ︀်။ ꩡ︀ဝ်ႛယ︀ေꩬ︀ု ꩫ︀ၵ︀ႃ မ︀ေလ︀ၵ︀ိꩡ︀ေတ︀ိက︀် 11 ယ︀ီတ︀်ႉပ︀ရ︀ေႃးꩭိက︀်ႉꩫ︀ꩫ︀ႆ︀ႇ ဝႃႈပ︀ီꩫ︀်ႈၵ︀ိူဝ်းလ︀ေဝိꩫ︀မ︀်ꩫ︀ꩬ︀ီ က︀ျမ︀်းꩬ︀ိꩫ︀်မ︀ႆ︀ႛ ဝႃႈဝႆ︀ႇꩫ︀က︀ေႃႇ ယ︀ီတ︀်ႉပ︀ရ︀ေႃးꩭိက︀်ႉဢ︀မ︀ႂ်းၵ︀ဝ်ယ︀ႃႇ ၸ︀ႂ်မ︀ႆ︀ႛက︀ေႃႇ ဢ︀ဝ်ႈတ︀ီမ︀်ႈက︀ုမ︀်ꩭႂ်ႛꩵ︀ႈꩫ︀ႆ︀ႛ။ င︀ႆ︀းꩫ︀ႆ︀ႇꩬ︀ီ ယ︀ီတ︀်ႉပ︀ရ︀ေႃးꩭိက︀်ႉဢ︀ꩫ︀်ႈ ꩫ︀င︀်ဢ︀ႃရ︀ုꩫ︀်ꩫ︀က︀ꩫ︀်ႈ မ︀ဝ်ꩡ︀ႂ်ႈꩬ︀ီ ဢ︀ꩫ︀်ႈꩫ︀င︀်မ︀ေလ︀ၵ︀ိꩡ︀ေတ︀ိက︀်ꩫ︀က︀ꩫ︀်ႈꩫ︀ႆ︀ႇ ꩭၢင︀်ႇမ︀ႃးꩫ︀မ︀်။ 12 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ိူဝ်းယ︀ီတ︀်ႉပ︀ရ︀ေႃးꩭိက︀်ႉလ︀ႆ︀ၢႈက︀ီး က︀ျမ︀်းꩬ︀ိꩫ︀်က︀ေႃႇ ဝႃႈလ︀ႆ︀ၢႈꩫ︀မ︀်။ 13 လ︀ွင︀်ႈယ︀ီတ︀်ႉပ︀ရ︀ေႃးꩭိက︀်ႉ ဢ︀ꩫ︀်ႈင︀ႆ︀ႚဝႃႈꩫ︀ႆ︀ႇယ︀ႃႇ လ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်းဢ︀ꩫ︀်ႈလ︀ုက︀်ႉတ︀ၢင︀်ၵ︀ိူဝ်း ၵ︀ိူဝ်းဢ︀ꩫ︀်ႈၵ︀ီင︀်ၵ︀ႅက︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀မ︀ူးယ︀ီတ︀်ႉပ︀ရ︀ေႃးꩭိက︀်ႉ မ︀ဝ်ꩭွꩫ︀်ꩭီတ︀်ꩫ︀ႆ︀ႇꩫ︀မ︀်။ 14 မ︀ꩫ︀်းꩡ︀ဝ်ႛယ︀ႃႇ လ︀ုက︀်ႉၵ︀ိူဝ်းယ︀ုတ︀မ︀ႆ︀ႛꩫ︀မ︀်ꩫ︀ꩫ︀ႆ︀ႇ ꩡ︀ုꩫ︀်ႈဢ︀ူ။ ꩫ︀ႆ︀ႇꩫ︀က︀ေႃႇ မ︀ေႃꩬ︀ေယ︀ႃႇ လ︀ုက︀်ႉၵ︀ိူဝ်းဢ︀မ︀ႂ်းမ︀ႆ︀ႛ ယ︀ီတ︀်ႉပ︀ရ︀ေႃးꩭိက︀်ႉတ︀ီဢ︀ွက︀်မ︀ႃးꩫ︀မ︀်ꩫ︀ꩫ︀ႆ︀ႇꩵ︀ႈꩭွꩫ︀်ဝႃႈမ︀ႃး။ 15 ꩡ︀ႃႇလ︀ိူင︀်ႈ ꩫ︀င︀်မ︀ေလ︀ၵ︀ိꩡ︀ေတ︀ိက︀်ꩫ︀က︀ꩫ︀်ႈ ယ︀ီတ︀်ႉပ︀ရ︀ေႃးꩭိက︀်ႉတ︀ၢင︀်ပ︀ႃး ပ︀ူဝ်မ︀ႃးꩫ︀ႆ︀ႇꩡ︀ႂ်ႈက︀ီးယ︀ႃႇ ၵ︀ိူဝ်းယ︀ီတ︀်ႉပ︀ရ︀ေႃးꩭိက︀်ႉလ︀ၢႆ︀ႈယ︀ဝ်ႇꩫ︀ꩫ︀ႆ︀ႇ ဢ︀ေႈၵ︀ႅꩫ︀်းꩡ︀ုꩫ︀်ႈမ︀ႃးဢ︀ူ။ 16 မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဢ︀ဝ်ႈပ︀ီꩫ︀်ႈ ယ︀ီတ︀်ႉပ︀ရ︀ေႃးꩭိက︀်ႉ ဝႆ︀ႇꩫ︀ႆ︀ႇယ︀ႃႇ ဢ︀ဝ်ႈၸ︀ိင︀်ႛပ︀ႅင︀်ႈၸ︀ꩫ︀်းလ︀ေဝိꩵ︀ႈꩡ︀ႂ်ႈ။ ဢ︀ဝ်ႈတ︀ꩫ︀်းၵ︀ူဝ်း ဢ︀ꩬ︀ၢက︀်ႉ ဢ︀ꩫ︀်ႈမ︀ဝ်လ︀ူႇပ︀ႅက︀်ႉꩡ︀ၢင︀်ႈꩫ︀ႆ︀ႇꩫ︀မ︀်။ 17 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ျမ︀်းလ︀ိက︀်ႉမ︀ႆ︀ႛက︀ေႃႇ လ︀ွင︀်ႈမ︀ꩫ︀်းꩡ︀ဝ်ႛဝႃႈဝႆ︀ႇꩫ︀ႆ︀ႇ “မ︀ႂ်းယ︀ႃႇ ꩫ︀င︀်မ︀ေလ︀ၵ︀ိꩡ︀ေတ︀ိက︀်ꩫ︀က︀ꩫ︀်ႈ ပ︀ီꩫ︀်ႈယ︀ီတ︀်ႉပ︀ရ︀ေႃးꩭိက︀်ႉထႃဝရ︀ꩫ︀မ︀်” ꩫ︀ဝꩫ︀်ႇ။ 18 ၸ︀ိင︀်ႛပ︀ႅင︀်ႈက︀ဝ်ယ︀ႃႇ ꩭႅင︀်းဢ︀ေင︀ႆ︀း ဢ︀က︀ိဝ်းမ︀ဝ်ယ︀င︀်းꩫ︀ႆ︀ႇꩬ︀ီ ꩫ︀ႆ︀ႛပ︀ႆ︀ၵ︀ွတ︀်ယ︀ဝ်ႇ။ 19 က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ျမ︀်းꩬ︀ိꩫ︀်မ︀ေႃꩬ︀ေꩫ︀ႆ︀ႇယ︀ႃႇ က︀ꩬ︀င︀်မ︀ႆ︀ႛက︀ေႃႇ ဢ︀ဝ်ႈတ︀ီမ︀်ႈက︀ုမ︀်ꩭႂ်ႛꩵ︀ႈꩫ︀ႆ︀ႛ။ င︀ႆ︀ႚယ︀ႃႇတ︀ၢင︀်းတ︀ႂ်းထႃႛဢ︀ꩫ︀်ႈꩫ︀ီႈꩬ︀ႃ ထိုင︀်မ︀ႃးꩫ︀ႆ︀ႇꩬ︀ီ ꩭဝ်းယ︀ႃႇ ဢ︀ဝ်ႈတ︀ၢင︀်းတ︀ႂ်းထႃႛဢ︀မ︀ႂ်း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ူးက︀ႂ်ႛက︀ꩫ︀်ႈဢ︀ူ။ 20 မ︀ိူဝ်ႈယ︀ီတ︀်ႉပ︀ရ︀ေႃးꩭိက︀်ႉမ︀ႂ်မ︀ႆ︀ႛ လ︀ိူက︀်ႉတ︀ၢင︀်ꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ က︀ိꩫ︀်မ︀ႃးꩬ︀ီ မ︀ိူဝ်ႈယ︀ီတ︀်ႉပ︀ရ︀ေႃးꩭိက︀်ႉၵ︀ိူဝ်းလ︀ေဝိꩫ︀ႆ︀ႇၵ︀ဝ်မ︀ႆ︀ႛ လ︀ိူက︀်ႉတ︀ၢင︀်ꩫ︀ႆ︀ႇယ︀ႃႇ မ︀ꩫ︀်းꩡ︀ဝ်ႛမ︀ိူဝ်ႈလ︀ႂ်ႈက︀ေႃႇ ꩵ︀ႈက︀ိꩫ︀်မ︀ႃး။ 21 ꩫ︀ႆ︀ႇꩫ︀က︀ေႃႇ မ︀ိူဝ်ႈꩡ︀ဝ်ႛယ︀ေꩬ︀ုမ︀ႆ︀ႛ လ︀ိူက︀်ႉတ︀ၢင︀်ယ︀ီတ︀်ႉပ︀ရ︀ေႃးꩭိက︀်ႉꩫ︀ႆ︀ႇယ︀ႃႇ က︀ျမ︀်းလ︀ိက︀်ႉမ︀ႆ︀ႛ “က︀ဝ်ႈꩡ︀ဝ်ႛထႃဝရ︀ၸ︀ြႃးက︀တ︀ိꩭႂ်ႛဢ︀ူ။ “မ︀ႂ်းယ︀ႃႇ တ︀ီပ︀ီꩫ︀်ႈယ︀ီတ︀်ႉပ︀ရ︀ေႃးꩭိက︀်ႉ ထႃဝရ︀ꩫ︀မ︀်” က︀ဝ်ႈမ︀ိူဝ်ႈလ︀ႂ်ႈက︀ေႃႇ ၵ︀ၢမ︀်းꩵ︀ႈလ︀ၢႆ︀ႈ” ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛက︀ိꩫ︀်ꩬ︀ီ လ︀ိူက︀်ႉတ︀ၢင︀်မ︀ႃးꩫ︀မ︀်။ 22 က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩡ︀ဝ်ႛယ︀ေꩬ︀ုယ︀ႃႇ ဢ︀ႃႛမ︀ၵ︀ၢမ︀်ၵ︀ၢမ︀်းၵ︀တ︀်ႉ ဢ︀ꩫ︀်ႈမ︀ႅတ︀်ႉꩬ︀ႃꩫ︀မ︀်။ 23 ယ︀ီတ︀်ႉပ︀ရ︀ေႃးꩭိက︀်ႉတ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ တ︀ႆ︀ၢႈꩡ︀ၢင︀်ႈꩫ︀ႆ︀ႇꩬ︀ီ တ︀ီႈၵ︀ဝ်မ︀ႆ︀ႛ ယ︀ီတ︀်ႉပ︀ရ︀ေႃးꩭိက︀်ႉဢ︀ၢꩫ︀်တ︀ၢꩫ︀်ꩫ︀ႆ︀ႛꩬ︀ုပ︀်ႉက︀ႃဢ︀ူ။ 24 ꩫ︀ႆ︀ႇꩫ︀က︀ေႃႇ ꩡ︀ဝ်ႛယ︀ေꩬ︀ုယ︀ႃႇ ထႃဝရ︀ ဢ︀ꩬ︀ၢက︀်ႉꩫ︀ိပ︀်ဢ︀ူꩫ︀ႆ︀ႇꩬ︀ီ ဢ︀ယ︀ႃယ︀ီတ︀်ႉပ︀ရ︀ေႃးꩭိက︀်ႉ မ︀ꩫ︀်းꩡ︀ဝ်ႛယ︀ႃႇ ၸ︀ႂ်မ︀ႆ︀ႛက︀ေႃႇ ဢ︀ꩫ︀်ႈဝႃႈꩭႂ်ႛꩬ︀ုပ︀်ႉꩵ︀ႈꩭၢင︀်ႇ။ 25 င︀ႆ︀းꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛယ︀ႃႇ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ဢ︀ꩬ︀ၢက︀်ႉꩫ︀ိပ︀်င︀ႆ︀း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ႃႇက︀ူꩫ︀်းꩫ︀ႆ︀ႇၵ︀ဝ် ဝွꩫ︀်းၵ︀ႅꩫ︀်းꩭႂ်ႛပ︀ီꩫ︀်ႈꩫ︀ႆ︀ႇꩬ︀ီ က︀ူဝ်ႇဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ပ︀ိုင︀်ႈဢ︀ိင︀်ႈꩬ︀ီ မ︀ႃးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ မ︀ိူဝ်ႈလ︀ႂ်ႈက︀ေႃႇ ၵ︀ေꩬ︀ေꩭႂ်ႛပ︀ီꩫ︀်ႈဢ︀ူ။ 26 င︀ႆ︀းꩬ︀ီ မ︀ꩫ︀်းꩡ︀ဝ်ႛယ︀ႃႇ ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉ ဢ︀ꩫ︀်ႈꩭဝ်းမ︀ႆ︀ႛꩡ︀ွႆ︀ႈꩭႂ်ႛပ︀ီꩫ︀်ႈꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ မ︀ူတ︀်ꩡ︀ၢင︀်၊ ဢ︀ပ︀ႅတ︀်ႉက︀ၢင︀်း၊ ꩫ︀ီႈမ︀ျတ︀်ႉင︀ႆ︀း တ︀င︀်းက︀ူꩫ︀်းဢ︀ꩫ︀်ႈဢ︀ပ︀ႅတ︀်ႉꩫ︀ႃꩫ︀ႆ︀ႇၵ︀ဝ် မ︀ဝ်ꩡ︀ၢပ︀်ႉလ︀ႅင︀်က︀ꩫ︀်ႈꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ က︀ၢင︀်ႈꩭၢဝ်ဢ︀ꩫ︀်ႈၵ︀ႅꩫ︀်းꩬ︀ုင︀်မ︀ႆ︀ႛ ယ︀ွင︀်ႛတ︀ၢင︀်ဝႆ︀ႇဢ︀ူ။ 27 မ︀ꩫ︀်းꩡ︀ဝ်ႛယ︀ႃႇ ꩫ︀င︀်ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉ တ︀ၢင︀်ပ︀ႃးꩫ︀ႆ︀ႇၵ︀ဝ်ꩫ︀က︀ꩫ︀်ႈ ဢ︀ꩫ︀်ႈက︀ူႈမ︀ိုဝ်ႇ ꩡ︀ႃႇဢ︀ပ︀ႅတ︀်ႉၸ︀ူႛꩡ︀ဝ်ႛ တ︀ၢင︀်ၵ︀ႅက︀်ယ︀ဝ်ႇက︀ီး ꩡ︀ႃႇဢ︀ပ︀ႅတ︀်ႉက︀ူꩫ︀်းꩫ︀ႆ︀ႇၵ︀ဝ် တ︀ၢင︀်ၵ︀ႅက︀်ꩫ︀ႆ︀ႇ ꩵ︀ႈဝႃႈꩭီတ︀်။ ဢ︀ဝ်ႈတ︀ူဝ်ႈမ︀ꩫ︀်းꩡ︀ဝ်ႛꩬ︀ိုင︀် ꩡ︀ႃႇထႃဝရ︀ ꩭီတ︀်ꩭိူဝ်ႈꩭိုင︀်းꩫ︀ႆ︀ၢႈတ︀ၢင︀်ၵ︀ႅက︀်ꩬ︀ီ ဢ︀မ︀ူးဢ︀ꩫ︀်ႈတ︀ၢင︀်ၵ︀ႅက︀်ဢ︀မ︀ႂ်း ဢ︀ဝ်ႈယ︀ဝ်ႇလ︀ေႚလ︀ေႚယ︀ဝ်ႇ။ 28 က︀ျမ︀်းꩬ︀ိꩫ︀်ယ︀ႃႇ က︀ူꩫ︀်းဢ︀ꩫ︀်ႈꩭႅင︀်းဢ︀ေꩫ︀ႆ︀ႇၵ︀ဝ်မ︀ႆ︀ႛ လ︀ိူက︀်ႉတ︀ၢင︀်ဢ︀ဝ်ႈပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉဢ︀ူ။ ꩫ︀ႆ︀ႇꩫ︀က︀ေႃႇ က︀တ︀ိၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ꩫ︀်ႛလ︀င︀် က︀ျမ︀်းꩬ︀ိꩫ︀်မ︀ႆ︀ႛမ︀ႃးꩫ︀ႆ︀ႇယ︀ႃႇ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩬ︀ီ ꩡ︀ႃႇထႃဝရ︀ ဢ︀ဝ်ႈတ︀ီမ︀်ႈက︀ုမ︀်ꩭႂ်ႛမ︀ႃးယ︀ဝ်ႇ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.