ꩭေပ︀ရ︀ူး 6 - Khamti Shan

^1-2 င︀ႆ︀းꩫ︀ႆ︀ႇꩬ︀ီ ꩭဝ်းတ︀ြႃးလ︀ွင︀်ႈꩡ︀ဝ်ႛၵ︀ရ︀ီတ︀် ꩡ︀ꩫ︀်ႇင︀ဝ်ႛမ︀ႆ︀ႛ ပ︀ူꩫ︀်ႇꩬ︀ီ ꩭႂ်ႛပ︀ူဝ်းက︀ေၵ︀ိူင︀်ꩫ︀ႆ︀ႇ ပ︀ႆ︀ႉၵ︀ိုꩫ︀်ႛဢ︀ိက︀်က︀ꩫ︀်ႈꩫ︀မ︀်။ တ︀ြႃးလ︀ွင︀်ႈလ︀ုက︀်ႉဢ︀ပ︀ႅတ︀်ႉမ︀ႆ︀ႛꩬ︀ၢင︀်ဝွေ၊ လ︀ွင︀်ႈယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈၸ︀ြႃးပ︀ီꩫ︀်ႈꩡ︀ဝ်ႛ၊ လ︀ွင︀်ႈၵ︀ၢမ︀်မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇ၊ လ︀ွင︀်ႈတ︀ၢင︀်မ︀ိုဝ်းꩬ︀ီ ပ︀ူင︀်ႈဢ︀က︀ိဝ်းꩭႂ်ႛ၊ လ︀ွင︀်ႈၸ︀ူႛတ︀ႆ︀ၢႈꩫ︀ႆ︀ႇၵ︀ဝ်ꩫ︀ိပ︀်ပ︀ွက︀်ႉ၊ လ︀ွင︀်ႈပ︀ႅတ︀်ႉတ︀ြႃးထႃဝရ︀ꩫ︀ႆ︀ႇၵ︀ဝ်ꩫ︀ႆ︀ၢႈꩬ︀ိုင︀် င︀ႆ︀ႚင︀ႆ︀ႚ ꩵ︀ႈထုက︀်ꩬ︀ွꩫ︀်ပ︀ွက︀်ႉယ︀ဝ်ႇ။

³ ၸ︀ြႃးပ︀ီꩫ︀်ႈꩡ︀ဝ်ႛ ဢ︀လ︀ၢင︀်းယ︀င︀်းက︀ီး ꩭႂ်ႛပ︀ူဝ်းပ︀ွင︀်ꩡ︀ႂ်ႈဢ︀ိက︀်ꩫ︀ႆ︀ႇ ပ︀ႆ︀ႉꩭဝ်း ၵ︀ိုꩫ︀်ႛက︀ႃက︀ꩫ︀်ႛꩫ︀ႃႛက︀ꩫ︀်ႈꩫ︀မ︀်။

⁴ က︀ူꩫ︀်းဢ︀ꩫ︀်ႈ တ︀ၢင︀်းယ︀ုမ︀်ယ︀မ︀်ႈၵ︀ဝ်မ︀ႆ︀ႛ ၵ︀ွတ︀်က︀ႃꩫ︀ႆ︀ႇၵ︀ဝ် ꩭႂ်ႛပ︀ူဝ်းꩬ︀ၢင︀်ဝွေပ︀ွက︀်ႉꩫ︀ႆ︀ႇ ꩭလ︀ိုဝ်က︀ေႃႇꩵ︀ႈပ︀ီꩫ︀်ႈꩫ︀ႆ︀ႛ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ဝ်ယ︀ႃႇ ဢ︀ꩫ︀်ႈလ︀ႅင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭွꩫ︀်ထိုင︀်မ︀ႃးယ︀ဝ်ႇ။ ꩬ︀ူးက︀ျေးꩡ︀ူးက︀ၢင︀်ႈꩭၢဝ်မ︀ႆ︀ႛက︀ေႃႇ ꩭူပ︀်ႉꩭꩫ︀်ꩬ︀ီၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ꩫ︀ႆ︀ႛမ︀ႃးယ︀ဝ်ႇ။

⁵ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ꩫ︀ီႈဢ︀ူꩫ︀ꩫ︀ႆ︀ႇက︀ေႃႇတ︀ွင︀်းယ︀ဝ်ႇꩬ︀ီ တ︀ꩫ︀်းၵ︀ူဝ်းꩡ︀ူဝ်ႈꩫ︀ႃႛꩫ︀ႆ︀ႇၵ︀ဝ်က︀ေႃႇ ꩫ︀ႆ︀ႛꩭၢပ︀်ႉယ︀ဝ်ႇ။

⁶ င︀ႆ︀းꩬ︀ီက︀ေႃႇ တ︀ၢင︀်းယ︀ုမ︀်ယ︀မ︀်ႈၵ︀ဝ်မ︀ႆ︀ႛၵ︀ွတ︀်ꩫ︀ႆ︀ႇꩬ︀ီ ၵ︀ဝ်ယ︀ႃႇ ꩭႂ်ႛပ︀ူဝ်းꩬ︀ၢင︀်ဝွေပ︀ွက︀်ႉꩫ︀ꩫ︀ႆ︀ႇ ꩵ︀ႈပ︀ီꩫ︀်ႈꩫ︀ႆ︀ႛယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ဝ်ယ︀ႃႇ လ︀ုက︀်ႉꩡ︀ၢႆ︀းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ွက︀်ꩬ︀ဝ်ဝႃးမ︀ိုဝ်းပ︀ွက︀်ႉꩬ︀ီ ပ︀ၢင︀်ႈꩫ︀ႃႛက︀ူꩫ︀်းမ︀ႆ︀ႛ ဢ︀ဝ်ႈဢ︀ႆ︀ၢႈꩬ︀ီꩫ︀မ︀်။

⁷ က︀ူꩫ︀်းꩭဝ်းယ︀ႃႇ ꩫ︀င︀်လ︀င︀်ꩫ︀ိꩫ︀်ႈꩫ︀က︀ꩫ︀်ႈꩫ︀မ︀်။ ꩫ︀ိꩫ︀်ႈꩫ︀ꩫ︀ႆ︀ႇ ꩫ︀မ︀်ႇၸ︀ူꩫ︀်က︀ိꩫ︀်ႈꩬ︀ီ တ︀ူꩫ︀်ႛၸ︀က︀်တ︀ူꩫ︀်ႛမ︀က︀် ဢ︀ꩫ︀်ႈဢ︀က︀ိဝ်းယ︀င︀်းꩫ︀ႆ︀ႇၵ︀ဝ် ꩡ︀ႃႇၸ︀ူႛပ︀ုက︀်ꩬ︀ွမ︀်ႛ ဢ︀ဝ်ႈပ︀ီꩫ︀်ႈꩭႂ်ႛက︀ီး လ︀င︀်ꩫ︀ိꩫ︀်ႈဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀က︀ိဝ်းပ︀ူင︀်ႈဢ︀ူ။

⁸ ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈတ︀ူꩫ︀်ႛꩫ︀ၢမ︀်က︀ူႈၸ︀ꩫ︀်းꩫ︀ႆ︀ႇၵ︀ဝ်ꩬ︀ိုင︀် ပ︀ီꩫ︀်ႈမ︀ႃးက︀ီး ဢ︀က︀ိဝ်းမ︀ဝ်ယ︀င︀်းꩫ︀ႆ︀ႇꩬ︀ီ ꩫ︀ိꩫ︀်ႈဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛက︀ိꩫ︀်ꩬ︀ီ တ︀ီꩬ︀ုမ︀်ၸ︀ႆ︀းၵ︀ွတ︀်ꩫ︀မ︀်။

⁹ ပ︀ီႈꩫ︀ွင︀်ႇၵ︀ဝ်ꩴ︀း တ︀ူႈဝႃႈင︀ႆ︀းꩫ︀က︀ေႃႇ ꩬ︀ူမ︀ႆ︀ႛဢ︀က︀ိဝ်းဢ︀ꩫ︀်ႈꩫ︀ီႈꩬ︀ႃ ဢ︀ꩫ︀်ႈတ︀င︀်းတ︀ၢင︀်းက︀ေႛၵ︀ျွတ︀်ႉ ꩡ︀ၢပ︀်ႉလ︀ႅင︀်က︀ꩫ︀်ႈယ︀င︀်းဢ︀ူꩫ︀ꩫ︀ႆ︀ႇ တ︀ူႈတ︀မ︀်းꩡ︀ႂ်ႈဢ︀ူ။

¹⁰ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀ြႃးꩫ︀ႆ︀ႇꩬ︀ီ ဢ︀ꩫ︀်ႈꩬ︀ူက︀ူꩫ︀်းမ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ ꩫ︀င︀်မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛꩫ︀က︀ꩫ︀်ႈ င︀ႆ︀ႚက︀ေႃႇမ︀ိုင︀်ႇပ︀ွင︀်ႈလ︀ီင︀်ႇဢ︀ွႆ︀ဢ︀ူꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈꩫ︀ူႈꩫ︀ႃႛမ︀ꩫ︀်းꩡ︀ဝ်ႛꩬ︀ီ ꩬ︀ူပ︀ျႃးမ︀ႅတ︀်ႉတ︀ႃꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛမ︀ိူဝ်ႈလ︀ႂ်ႈက︀ေႃႇꩵ︀ႈလ︀ုမ︀်း။

¹¹ ꩫ︀ႆ︀ႇꩬ︀ေႇမ︀ဝ်က︀ႃး ꩫ︀င︀်ဢ︀ꩫ︀်ႈꩬ︀ူ တ︀ႂ်းထႃႛꩫ︀ႆ︀ႇꩫ︀က︀ꩫ︀်ႈ ꩭႂ်ႛပ︀ူဝ်းပ︀ီꩫ︀်ႈမ︀ႃးꩫ︀ႆ︀ႇ ꩫ︀င︀်င︀ႆ︀ႚꩬ︀ူꩭီတ︀်ဢ︀ူꩫ︀က︀ꩫ︀်ႈ ꩬ︀ူက︀ူႈက︀ူဝ်ႇမ︀ႆ︀ႛ တ︀ူဝ်ပ︀ူဝ်းꩬ︀ုတ︀် က︀ၢပ︀်ꩬ︀ီၵ︀ႂ်ႈꩭႂ်ႛꩭီတ︀်က︀ႃလ︀ူင︀်ꩫ︀မ︀်။

¹² ပ︀ႃႛလ︀ွင︀်ႈၵ︀ွꩫ︀်မ︀ႆ︀ႛယ︀ႃႇ ꩬ︀ူမ︀ဝ်ၵ︀ၢꩫ︀်ႇꩬ︀ီ ꩫ︀င︀်က︀ူꩫ︀်းဢ︀ꩫ︀်ႈယ︀ုမ︀်ယ︀မ︀်ႈင︀ႆ︀း ꩡ︀ႂ်ႈယ︀ၢဝ်းꩬ︀ီ ꩫ︀ႆ︀ႛꩭၢပ︀်ႉက︀တ︀ိၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ꩫ︀က︀ꩫ︀်ႈ ၵ︀ႂ်ႈꩭႂ်ႛပ︀ီꩫ︀်ႈမ︀ႃးက︀ꩫ︀်ႈꩫ︀မ︀်။

က︀တ︀ိၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈမ︀ꩫ︀်ႛတ︀ိူင︀်ႈ

¹³ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ႃပ︀ြႃꩭၢမ︀်မ︀ႆ︀ႛ ꩭႂ်ႛက︀တ︀ိꩫ︀ႆ︀ႇ ꩡ︀ဝ်ႛဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ယ︀ႂ်မ︀ႅတ︀်ႉꩬ︀ႃꩫ︀ႆ︀ႇ ၸ︀ႂ်က︀ေႃႇမ︀ဝ်ယ︀င︀်းꩫ︀ႆ︀ႇꩬ︀ီ ဢ︀ဝ်ႈꩡ︀ိုဝ်ႈမ︀ꩫ︀်းꩡ︀ဝ်ႛက︀ိꩫ︀်င︀ႆ︀းꩬ︀ီ

¹⁴ “က︀ဝ်ႈ မ︀ႂ်းမ︀ႆ︀ႛ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ဢ︀က︀ိဝ်းပ︀ူင︀်ႈꩭႂ်ႛꩬ︀ီ ၵ︀ိူဝ်းမ︀ႂ်းမ︀ႆ︀ႛ တ︀ီဢ︀ဝ်ႈꩫ︀မ︀်လ︀ႆ︀ၢꩭႂ်ႛတ︀ေႇတ︀ေႇꩫ︀မ︀်” ꩫ︀ဝꩫ︀်ႇ။

¹⁵ င︀ႆ︀းꩬ︀ီ ဢ︀ႃပ︀ြႃꩭၢမ︀်က︀ေႃႇ ꩡ︀ႂ်ႈꩭီးꩡ︀ႂ်ႈယ︀ၢဝ်းထႃႛယ︀ဝ်ႇက︀ီး ဢ︀က︀ိဝ်းက︀တ︀ိဢ︀မ︀ႂ်း ꩫ︀ႆ︀ႛꩭၢပ︀်ႉမ︀ႃးဢ︀ူ။

¹⁶ မ︀ိူဝ်ႈက︀ူꩫ︀်းꩭဝ်းက︀ိꩫ︀်ꩫ︀ႆ︀ႇ ဢ︀ဝ်ႈꩡ︀ိုဝ်ႈꩡ︀ဝ်ႛဢ︀ꩫ︀်ႈꩭဝ်းမ︀ႆ︀ႛ ယ︀ႂ်ꩬ︀ႃမ︀ႆ︀ႛ တ︀ိူင︀်ꩬ︀ီ ၵ︀ၢမ︀်းက︀ိꩫ︀်ဢ︀ဝ်ႈမ︀ꩫ︀်ႛတ︀ိူင︀်ႈင︀ႆ︀း ဢ︀ꩫ︀်ႈထီင︀်က︀ꩫ︀်ႈထႅင︀်းက︀ꩫ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ဢ︀ဝ်ႈꩬ︀ုတ︀်ꩬ︀ႆ︀ၢဢ︀ူ။

¹⁷ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ က︀တ︀ိမ︀ꩫ︀်းꩡ︀ဝ်ႛ ꩵ︀ႈလ︀ွက︀်ႉလ︀ႆ︀ၢႈꩫ︀ꩫ︀ႆ︀ႇ က︀ူꩫ︀်းဢ︀ꩫ︀်ႈꩭၢပ︀်ႉက︀တ︀ိမ︀ꩫ︀်းꩡ︀ဝ်ႛၵ︀ဝ်မ︀ႆ︀ႛ ၵ︀ႂ်ႈပ︀ျႃးꩡ︀ုꩫ︀်ႈꩰꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛက︀ိꩫ︀်ꩬ︀ီဢ︀ႃႛမ︀ၵ︀ၢမ︀်ꩭႂ်ႛဝႆ︀ႇꩫ︀မ︀်။

¹⁸ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ႅတ︀်ႉမ︀ဝ်ꩫ︀ႆ︀ႛꩫ︀ႆ︀ႇꩬ︀ီ က︀တ︀ိမ︀ꩫ︀်းꩡ︀ဝ်ႛꩫ︀ၵ︀ႃၵ︀ၢမ︀်းက︀ိꩫ︀်မ︀ꩫ︀်းꩡ︀ဝ်ႛ လ︀ွင︀်ႈꩬ︀ွင︀်ဢ︀ꩫ︀်ႈꩫ︀ႆ︀ႇက︀ေႃႇ လ︀ႆ︀ၢႈꩵ︀ႈꩫ︀ႆ︀ႛ။ င︀ႆ︀းꩫ︀ႆ︀ႇꩬ︀ီ ꩭဝ်း ဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ၵ︀ႃတ︀ီႈꩬ︀ွꩫ︀်ႈꩫ︀ႆ︀ႇၵ︀ဝ်ယ︀ႃႇ ꩫ︀င︀်ဢ︀ꩫ︀်ႈက︀တ︀ိမ︀ꩫ︀်းꩡ︀ဝ်ႛမ︀ႆ︀ႛ တ︀ႂ်းထႃႛဢ︀ၵ︀ႅက︀်ႉꩫ︀ႆ︀ႇꩫ︀က︀ꩫ︀်ႈ ꩭႅင︀်းꩫ︀ႆ︀ႛဢ︀ူ။

¹⁹ ဢ︀ꩫ︀်ႈတ︀ႂ်းထႃႛဢ︀မ︀ႂ်းယ︀ႃႇ ꩡ︀ႃႇꩭၢင︀်းꩡ︀ူဝ်ႈတ︀ႃႈဢ︀ꩬ︀ၢက︀်ႉꩭဝ်း ꩫ︀င︀်ꩭွက︀်က︀ိဝ်ꩬ︀ၢင︀်ႈၸ︀ူဝ်း ဢ︀ꩫ︀်ႈၵ︀ိူင︀်က︀ိုမ︀်းလ︀ူင︀်ꩫ︀က︀ꩫ︀်ႈ ꩭဝ်းမ︀ႆ︀ႛယ︀င︀်းꩬ︀ီ ဢ︀ဝ်ႈထိုင︀်က︀ꩫ︀်ႛꩫ︀ႂ်းၸ︀ႃႛက︀င︀်ႛ ꩡ︀ွင︀်းၿိက︀်ႉမ︀ၢꩫ︀်က︀ၢင︀်ႈꩭၢဝ် ၵ︀ဝ်ႛက︀ႃꩬ︀ီ တ︀ီႈဢ︀ꩫ︀်ႈၵ︀ႅꩫ︀်းမ︀ူတ︀်ꩡ︀ၢင︀်မ︀ႆ︀ႛထိုင︀်က︀ႃဢ︀ူ။

²⁰ ꩡ︀ဝ်ႛယ︀ေꩬ︀ုယ︀ႃႇ ꩫ︀င︀်မ︀ေလ︀ၵ︀ိꩡ︀ေတ︀ိက︀်ꩫ︀က︀ꩫ︀်ႈ က︀ူႈꩡ︀ူဝ်ႈလ︀ၢႆ︀ၵ︀ႃး ပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉင︀ႆ︀း က︀ꩫ︀်ႛꩫ︀ႂ်းၸ︀ႃႛက︀င︀်ႛဢ︀မ︀ႂ်းမ︀ႆ︀ႛ က︀ꩫ︀်ႛꩫ︀ႃႛꩭဝ်းမ︀ႆ︀ႛ တ︀ၢင︀်ႈတ︀ူဝ်ႈꩭဝ်းꩬ︀ီ ၵ︀ဝ်ႛက︀ႃယ︀ဝ်ႇ။