ꩭေပ︀ရ︀ူး 5 - Khamti Shan

¹ ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩫ︀ꩫ︀ႆ︀ႇယ︀ႃႇ ဢ︀ꩫ︀်ႈလ︀ုက︀်ႉက︀ူꩫ︀်းမ︀ႆ︀ႛ လ︀ိူက︀်ႉင︀ႆ︀း တ︀ၢင︀်ႈတ︀ူဝ်ႈက︀ူꩫ︀်းꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ုက︀်ႉꩡ︀ူဝ်ၵ︀ိူင︀်ႈလ︀ူင︀ႆ︀း တ︀ၢင︀်ၵ︀ႅက︀်ꩡ︀ႃႇဢ︀ပ︀ႅတ︀်ႉꩫ︀မ︀်။

² မ︀ꩫ︀်းၸ︀ူႛꩡ︀ဝ်ႛက︀ေႃႇ က︀ီလ︀ႆ︀ၢလ︀ွင︀်ႈမ︀ႆ︀ႛ ꩭႅင︀်းဢ︀ေꩫ︀ႆ︀ႇꩬ︀ီ က︀ူꩫ︀်းဢ︀ꩫ︀်ႈမ︀ိူက︀်ႉတ︀ိူမ︀်ႈꩬ︀ီ ပ︀ႅက︀်တ︀ၢင︀်းꩫ︀ႆ︀ႇၵ︀ဝ်မ︀ႆ︀ႛ တ︀ၢင︀်ႈတ︀ီႈꩬ︀ီပ︀ွင︀်ꩡ︀ႂ်ႈꩭႂ်ႛ ပ︀ီꩫ︀်ႈဢ︀ူ။

³ မ︀ꩫ︀်းၸ︀ူႛꩡ︀ဝ်ႛက︀ေႃႇ ꩭႅင︀်းဢ︀ေꩫ︀ႆ︀ႇꩬ︀ီ ꩡ︀ႃႇက︀ူꩫ︀်းꩫ︀ႆ︀ႇၵ︀ဝ်တ︀မ︀ိူင︀်း ꩡ︀ႃႇမ︀ꩫ︀်းၸ︀ူႛꩡ︀ဝ်ႛတ︀မ︀ိူင︀်း ဝႃႈတ︀ၢင︀်ၵ︀ႅက︀် ꩡ︀ႃႇဢ︀ပ︀ႅတ︀်ႉꩫ︀မ︀်။

⁴ ꩫ︀ႆ︀ႇꩫ︀က︀ေႃႇ ဢ︀ယ︀ႃဢ︀ꩫ︀်ႈပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉဢ︀မ︀ႂ်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀ိုင︀် ပ︀ူင︀်ႈဢ︀ၢပ︀်ႉꩫ︀မ︀်။ ဢ︀ႃရ︀ုꩫ︀်မ︀ႆ︀ႛက︀ေႃႇ မ︀ꩫ︀်းꩡ︀ဝ်ႛꩫ︀မ︀်လ︀ိူက︀်ႉꩫ︀ႆ︀ႇ။ က︀ူꩫ︀်းယ︀ႃႇ ၸ︀ႂ်က︀ေႃႇ လ︀ဝ်ႈတ︀ူဝ်ႈၵ︀ႂ်ႈꩫ︀ႆ︀ႛꩬ︀ီ ꩵ︀ႈꩫ︀ႆ︀ႛဝၢင︀်။

⁵ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩡ︀ဝ်ႛၵ︀ရ︀ီတ︀်က︀ေႃႇ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ယ︀ူက︀်ႉတ︀ၢင︀်ꩬ︀ီ ပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉꩵ︀ႈꩡ︀ႂ်ႈ။ ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈ “မ︀ႂ်းယ︀ႃႇ လ︀ုက︀်ႉက︀ဝ်ႈꩫ︀မ︀်။ မ︀ႂ်းမ︀ႆ︀ႛမ︀ိူဝ်ႈꩫ︀ႆ︀ႇက︀ဝ်ႈ ဢ︀ဝ်ႈၸ︀ႃးမ︀ႃးယ︀ဝ်ႇ” ꩫ︀ꩫ︀ႆ︀ႇꩫ︀မ︀် ပ︀ူင︀်ႈဢ︀ၢပ︀်ႉꩭႂ်ႛမ︀ႃးꩫ︀ႆ︀ႇ။

⁶ တ︀ၢင︀်တ︀ီႈမ︀ႆ︀ႛက︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဝႃႈꩫ︀က︀ဝ်ꩫ︀ႆ︀ႇ “မ︀ႂ်းယ︀ႃႇ ꩫ︀င︀်မ︀ေလ︀ၵ︀ိꩡ︀ေတ︀ိက︀်ꩫ︀က︀ꩫ︀်ႈ ယ︀ီတ︀်ႉပ︀ရ︀ေႃးꩭိက︀်ႉ ထႃဝရ︀ꩫ︀မ︀်” ꩫ︀ဝꩫ︀်ႇ။

⁷ မ︀ိူဝ်ႈꩡ︀ဝ်ႛယ︀ေꩬ︀ု ဢ︀ူမ︀ိူင︀်းက︀ၢင︀်ႈꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈ လ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ ၵ︀ေꩬ︀ေပ︀ီꩫ︀်ႈမ︀ႆ︀ႛ ဢ︀ိဝ်ꩬ︀ႅꩫ︀်ꩬ︀ီꩫ︀မ︀်ႇတ︀ႃႈတ︀ူက︀်ꩬ︀ီ ဝွꩫ︀်းၵ︀ႅꩫ︀်းမ︀ႃးဢ︀ူ။ မ︀ꩫ︀်းꩡ︀ဝ်ႛယ︀မ︀်ႈင︀ဝ်းတ︀ေႇတ︀ေႇꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ထွမ︀်ꩭႂ်ႛမ︀ႃးဢ︀ူ။

⁸ မ︀ꩫ︀်းꩡ︀ဝ်ႛ ပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛ ၵ︀ႂ်ႈလ︀ႂ်ႈꩫ︀က︀ေႃႇ လ︀ုက︀်ႉဢ︀ꩫ︀်ႈၵ︀ၢမ︀်ဝေတ︀ꩫ︀ႃမ︀ႆ︀ႛ ꩭႂ်ႛပ︀ူဝ်းထွမ︀်ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩡ︀ၢင︀်ႈꩫ︀ႆ︀ႇ ꩬ︀ွꩫ︀်ဢ︀ဝ်ႈမ︀ႃးဢ︀ူ။

⁹ ꩭီတ︀်င︀ႆ︀းꩬ︀ီ မ︀ꩫ︀်းꩡ︀ဝ်ႛတ︀ီမ︀်ႈက︀ုမ︀်မ︀ႃးက︀ီး ꩡ︀ႃႇက︀ူꩫ︀်းဢ︀ꩫ︀်ႈထွမ︀်ၵ︀ၢမ︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်တ︀င︀်းမ︀ိူင︀်း ပ︀ီꩫ︀်ႈꩡ︀ဝ်ႛဢ︀ꩫ︀်ႈꩭႂ်ႛတ︀ၢင︀်းၵ︀ေꩬ︀ေထႃဝရ︀မ︀ႃးꩬ︀ီ

¹⁰ မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩭွင︀်ႇၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉ ဢ︀ꩫ︀်ႈမ︀ိူꩫ︀်ꩫ︀င︀်မ︀ေလ︀ၵ︀ိꩡ︀ေတ︀ိက︀်ဢ︀ူ။

ၸ︀ူႛဢ︀ꩫ︀်ႈမ︀ိူဝ်ႈလ︀ႂ်ႈက︀ေႃႇ ꩫ︀မ︀်ႇꩡ︀ေႉꩫ︀ႆ︀ၢႈꩬ︀ိုင︀်က︀ိꩫ︀်ႈꩫ︀ႆ︀ႇၵ︀ဝ်

¹¹ လ︀ွင︀်ႈဢ︀မ︀ႂ်း ဢ︀ꩫ︀်ႈဝႃႈဝႃႈဢ︀ၢꩫ︀်တ︀ၢꩫ︀်ယ︀င︀်းꩫ︀က︀ေႃႇ ꩬ︀ူယ︀ႃႇ ꩡ︀ႂ်ႈတ︀ꩫ︀်ႈၸ︀ႅဝ်ꩫ︀ႆ︀ႇꩬ︀ီ ꩬ︀ူမ︀ႆ︀ႛၵ︀ႆ︀ႈယ︀ပ︀်ဢ︀ူ။

¹² ဢ︀ꩫ︀်ႈတ︀ေႇတ︀ေႇက︀ီး ꩬ︀ူယ︀ႃႇ ၵ︀ႆ︀ႇလ︀ိူင︀်ႈꩭိုင︀်က︀ီး ထုက︀်ꩫ︀ီႈပ︀ီꩫ︀်ႈꩬ︀ြႃက︀ꩫ︀်ႈယ︀ဝ်ႇ။ ꩫ︀ႆ︀ႇꩫ︀က︀ေႃႇ ꩬ︀ူမ︀ႆ︀ႛယ︀ႃႇ င︀ႆ︀ႚက︀ေႃႇ လ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛ လ︀ုက︀်ႉꩭူဝ်က︀ူဝ်ပ︀ုꩫ︀်ႛ ဝႃႈꩬ︀ွꩫ︀်ꩭႂ်ႛꩫ︀က︀ဝ်ꩫ︀ႆ︀ႇ။ ꩬ︀ူယ︀ႃႇ လ︀ၵ︀ႃဢ︀ꩫ︀်ႈက︀ိꩫ︀်ႈၵ︀ဝ်ႛ မ︀ဝ်ပ︀ီꩫ︀်ႈꩬ︀ီ ꩫ︀မ︀်ႇꩡ︀ေႉꩫ︀ႆ︀ၢႈꩬ︀င︀်က︀ိꩫ︀်ႈဢ︀ူꩫ︀ႆ︀ႇၵ︀ဝ်ꩫ︀က︀ꩫ︀်ႈꩫ︀မ︀်။

¹³ က︀ူꩫ︀်းဢ︀ꩫ︀်ႈꩫ︀မ︀်ႇꩡ︀ေႉꩫ︀ႆ︀ၢႈꩬ︀ိုင︀်က︀ိꩫ︀်ႈꩫ︀ႆ︀ႇၵ︀ဝ်ယ︀ႃႇ လ︀ၵ︀ႃဢ︀ွꩫ︀်ဢ︀ꩫ︀်ႈ လ︀ွင︀်ႈဢ︀ꩫ︀်ႈꩡ︀ႂ်ႈ ဢ︀ꩫ︀်ႈၸ︀ိတ︀် မ︀ဝ်ပ︀ႆ︀တ︀ွင︀်းꩫ︀ႆ︀ႇၵ︀ဝ်ꩫ︀မ︀်။

¹⁴ ဢ︀ꩫ︀်ႈက︀ိꩫ︀်ႈဢ︀ꩫ︀်ႈၵ︀ႅင︀်ယ︀ႃႇ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈက︀ေၵ︀ိူင︀် ဢ︀ꩫ︀်ႈတ︀ၢင︀်းꩭူပ︀်ႉꩭꩫ︀်ယ︀င︀်းꩬ︀ီ လ︀ွင︀်ႈꩫ︀ီႈလ︀ွင︀်ႈꩡ︀ႃႇမ︀ႆ︀ႛ က︀ၢက︀်ႉꩡ︀ၢင︀်ႈꩫ︀ႆ︀ႇၵ︀ဝ်ꩫ︀မ︀်။