ꩭေပ︀ရ︀ူး 2 - Khamti Shan

ပ︀ီမ︀ဝ်တ︀ိူဝ်လ︀ိူဝ်

¹ င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းꩭဝ်းမ︀ဝ်ပ︀ႅက︀်တ︀ၢင︀်းက︀ႃꩫ︀ႆ︀ႇ ဢ︀ꩫ︀်ႈꩭဝ်းꩫ︀ႆ︀ႛꩥ︀ိꩫ︀်းဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ႆ︀ႉထွမ︀်ꩫ︀ီႈꩫ︀ီႈ က︀ꩫ︀်ႈꩫ︀မ︀်။

² က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ၢဝ်ႈၵ︀ၢမ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈလ︀ုက︀်ႉၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛ ပ︀ူလ︀ီꩫ︀်ꩭဝ်းၵ︀ဝ်မ︀ႆ︀ႛ ဝႃႈမ︀ႃးꩫ︀ႆ︀ႇ မ︀ꩫ︀်ႛတ︀ိူင︀်ႈꩬ︀ီ ၸ︀ူႛဢ︀ꩫ︀်ႈမ︀ဝ်ထွမ︀်ꩡ︀ွမ︀်း၊ ဢ︀ꩫ︀်ႈပ︀ႆ︀ၵ︀ွတ︀်ꩫ︀ႆ︀ႇၵ︀ဝ်မ︀ႆ︀ႛ တ︀ၢမ︀်ဢ︀ပ︀ႅတ︀်ႉဢ︀ꩫ︀်ႈၵ︀ဝ်ထႅက︀်ႉꩫ︀ႆ︀ႇ ပ︀ူင︀်ႈꩭႂ်ႛဢ︀ူ။

³ တ︀ၢင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛမ︀ႆ︀ႛ ꩭဝ်းဝႆ︀ႇꩬ︀ႆ︀ၢႇက︀ီး လ︀ုက︀်ႉတ︀ၢမ︀်ဢ︀ပ︀ႅတ︀်ႉမ︀ႆ︀ႛ ꩭလ︀ိုဝ်က︀ေႃႇꩵ︀ႈလ︀ွတ︀်ႉ။ တ︀ၢင︀်းၵ︀ေꩬ︀ေꩫ︀ႆ︀ႇ ꩡ︀ဝ်ႛယ︀ေꩬ︀ုၸ︀ူႛꩡ︀ဝ်ႛ တ︀ႅဝ်ဢ︀ွꩫ︀်ႈမ︀ႃးꩬ︀ီ က︀ူꩫ︀်းဢ︀ꩫ︀်ႈꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ႇၵ︀ဝ်က︀ေႃႇ ၵ︀ၢဝ်ႈၵ︀ၢမ︀်းꩫ︀ႆ︀ႇ ꩡ︀ႂ်ႈဢ︀ူꩫ︀ꩫ︀ႆ︀ႇ ꩭဝ်းမ︀ႆ︀ႛ ꩬ︀ၢက︀်ႉꩬ︀ေပ︀ျႃးမ︀ႃးယ︀ဝ်ႇ။

⁴ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ လ︀ႆ︀ၢးꩫ︀ိမ︀ိက︀်ႉꩫ︀ႆ︀ႇၵ︀ဝ်၊ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်၊ တ︀ꩫ︀်းၵ︀ူဝ်းက︀ူႈၸ︀ꩫ︀်းꩰꩭီတ︀်င︀ႆ︀း က︀ူꩫ︀်းမ︀ꩫ︀်းꩡ︀ဝ်ႛၵ︀ဝ်မ︀ႆ︀ႛက︀ေႃႇ ꩫ︀င︀်မ︀ꩫ︀်းꩡ︀ဝ်ႛဢ︀လ︀ၢင︀်းယ︀င︀်းꩫ︀က︀ꩫ︀်ႈ ꩬ︀ူးၵ︀ွꩫ︀်မ︀ꩫ︀်းꩡ︀ဝ်ႛ ပ︀ူင︀်ႈပ︀ꩫ︀်ႈꩭႂ်ႛꩬ︀ီ ꩭီတ︀်ꩬ︀ၢက︀်ႉꩬ︀ေမ︀ႃးယ︀ဝ်ႇ။

လ︀ွင︀်ႈꩡ︀ဝ်ႛယ︀ေꩬ︀ု ပ︀ီꩫ︀်ႈလ︀ုက︀်ႉက︀ူꩫ︀်း

⁵ က︀မ︀်ၸ︀ႃဢ︀ꩫ︀်ႈက︀ꩫ︀်ႛꩫ︀ႃႛမ︀ႆ︀ႛ တ︀ီပ︀ီꩫ︀်ႈမ︀ႃးꩫ︀ꩬ︀ီ ꩭဝ်းဝႃႈက︀ꩫ︀်ႈꩫ︀ႆ︀ႇမ︀ႆ︀ႛယ︀ႃႇ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩵ︀ႈꩭႂ်ႛဢ︀ုပ︀်ႉပ︀ိုင︀်မ︀ႃး။

⁶ ꩫ︀ႆ︀ႇꩫ︀က︀ေႃႇ က︀ျမ︀်းတ︀ီႈလ︀ိူင︀်ႈမ︀ႆ︀ႛဝႃႈဝႆ︀ႇꩫ︀ႆ︀ႇ “ၸ︀ြႃးပ︀ီꩫ︀်ႈꩡ︀ဝ်ႛꩴ︀း က︀ူꩫ︀်းယ︀ႃႇ ပ︀ီꩫ︀်ႈꩭိုဝ်ꩬ︀ီꩫ︀ႆ︀ ၵ︀ိင︀်းတ︀ူဝ်ꩡ︀ဝ်ႛလ︀ႅင︀်ႇတ︀ီၵ︀ႃႛꩫ︀ႆ︀ႇ။

⁷ ၵ︀ိင︀်းတ︀ူဝ်ꩡ︀ဝ်ႛယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ က︀ꩫ︀်ႛတ︀ႂ်ႛၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛ က︀ိုမ︀်ႇဢ︀ွꩫ︀်လ︀ိူင︀်ႈဢ︀ဝ်ႈယ︀ွမ︀်းဝႆ︀ႇꩬ︀ီ မ︀ူꩫ︀်ႈၸ︀ုင︀်းဢ︀ဝ်ႈတ︀ီမ︀်ႈက︀ုမ︀်ꩭႂ်ႛ တ︀ၢင︀်ꩭုမ︀်ꩭႂ်ႛယ︀ဝ်ႇ။

⁸ က︀ꩫ︀်ႛတ︀ႂ်ႛတ︀ိꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀င︀်းလ︀ုင︀်တ︀င︀်းမ︀ိူင︀်းတ︀မ︀်းဝႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩭႂ်ႛဢ︀ုပ︀်ႉပ︀ိုင︀်ယ︀ဝ်ႇ” ꩫ︀ဝꩫ︀်ႇ။ “က︀ꩫ︀်ႛတ︀ႂ်ႛတ︀ိꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀င︀်းမ︀ိူင︀်းတ︀မ︀်းဝႆ︀ႇဢ︀ူ” ꩫ︀ꩬ︀ီ ဝႃႈꩫ︀ႆ︀ႇꩬ︀ီ ဢ︀ꩫ︀်ႈမ︀ဝ်ပ︀ႆ︀တ︀မ︀်းꩫ︀ႆ︀ႇ က︀ꩬ︀င︀်က︀ေႃႇꩵ︀ႈက︀ိူတ︀်။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ က︀ꩫ︀်ႛတ︀ႂ်ႛမ︀ꩫ︀်းꩡ︀ဝ်ႛမ︀ႆ︀ႛ တ︀င︀်းလ︀ုင︀်တ︀မ︀်းဝႆ︀ႇꩫ︀ႆ︀ႇမ︀ႆ︀ႛ ꩭဝ်းꩵ︀ႈပ︀ႆ︀ꩭꩫ︀်။

⁹ ဢ︀ꩫ︀်ႈꩭဝ်းꩭꩫ︀်ꩫ︀ႆ︀ႇယ︀ႃႇ ꩡ︀ဝ်ႛယ︀ေꩬ︀ုဢ︀ꩫ︀်ႈ က︀ꩫ︀်ႛတ︀ႂ်ႛၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛ က︀မ︀်ႇဢ︀ွꩫ︀်လ︀ိူင︀်ႈ ဢ︀ဝ်ႈယ︀ွမ︀်းဝႆ︀ႇ ဢ︀ꩫ︀်ႈꩭႂ်ႛပ︀ူဝ်းဢ︀ဝ်ႈက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇက︀ူꩫ︀်းက︀ူႈက︀ူဝ်ႇ ꩫ︀ႆ︀ႛꩭူပ︀်ႉꩭꩫ︀်တ︀ၢင︀်းတ︀ႆ︀ၢႈꩫ︀ႆ︀ႇꩫ︀မ︀်။ မ︀ꩫ︀်းꩡ︀ဝ်ႛ ꩡ︀ႃႇꩭဝ်းၵ︀ၢမ︀်းတ︀ႆ︀ၢႈမ︀ႃးꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ မ︀ူꩫ︀်ႈၸ︀ုင︀်းဢ︀ဝ်ႈတ︀ီမ︀်ႈက︀ုမ︀်ꩭႂ်ႛ တ︀ၢင︀်ꩭုမ︀်ꩭႂ်ႛယ︀ဝ်ႇ။

¹⁰ ဢ︀ꩫ︀်ႈက︀ႃႈꩫ︀င︀်ယ︀င︀်းꩫ︀ႆ︀ႇယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇꩭၢင︀်းမ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛ ၸ︀ၢꩫ︀်းꩬ︀ၢင︀်းဝႆ︀ႇꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းက︀ူꩫ︀်းမ︀ꩫ︀်းꩡ︀ဝ်ႛၵ︀ဝ် ꩫ︀ႆ︀ႛမ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛယ︀ေꩬ︀ုမ︀ႆ︀ႛ ꩭႂ်ႛၵ︀ၢမ︀်ဝေတ︀ꩫ︀ႃꩬ︀ီ ဢ︀ဝ်ႈတ︀ီမ︀်ႈက︀ုမ︀်ꩭႂ်ႛꩫ︀ႆ︀ႇ ꩥ︀ႃးလ︀ွင︀်ႈဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛယ︀ေꩬ︀ုယ︀ႃႇ ꩡ︀ဝ်ႛဢ︀ꩫ︀်ႈၵ︀ဝ်မ︀ႆ︀ႛ ၵ︀ေꩬ︀ေꩭႂ်ႛꩫ︀မ︀်။

¹¹ ꩡ︀ဝ်ႛယ︀ေꩬ︀ုဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈမ︀ူတ︀်ꩡ︀ၢင︀်ꩫ︀ၵ︀ႃ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛဢ︀မ︀ႂ်းၵ︀ဝ်ယ︀ႃႇ ပ︀ီꩫ︀်ႈꩡ︀ုမ︀်ႛꩭိူꩫ︀်းလ︀ိဝ်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛ ၵ︀ဝ်မ︀ႆ︀ႛꩭွင︀်ႇပ︀ီႈꩫ︀ွင︀်ႇမ︀ꩫ︀်းꩡ︀ဝ်ႛၵ︀ဝ်ꩫ︀ႆ︀ႇ ꩵ︀ႈဢ︀ႆ︀ၢႈ။

¹² ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ꩫ︀်းꩡ︀ဝ်ႛဝႃႈꩫ︀ႆ︀ႇ “ပ︀ီႈꩫ︀ွင︀်ႇက︀ဝ်ႈၵ︀ႃႛၵ︀ဝ်မ︀ႆ︀ႛ ꩡ︀ိုဝ်ႈၵ︀ိင︀်းတ︀ူဝ်ꩡ︀ဝ်ႛတ︀ႅဝ်ꩬ︀ီ ပ︀ၢင︀်ႈꩫ︀ႃႛၵ︀ဝ်မ︀ႆ︀ႛ က︀ဝ်ႈၵ︀ႃႛၵ︀ိင︀်းတ︀ူဝ်ꩡ︀ဝ်ႛမ︀ႆ︀ႛ တ︀ီယ︀ူဝ်းယ︀ွင︀်ႛꩫ︀မ︀်” ꩫ︀ဝꩫ︀်ႇ။

¹³ ꩡ︀ႃႇလ︀ိူင︀်ႈ “ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ဝ်ႈတ︀ီပ︀ိုင︀်ႈဢ︀ိင︀်ႈꩫ︀မ︀်” ꩫ︀ယ︀ဝ်ႇက︀ီး “လ︀ုက︀်ႉဢ︀ွꩫ︀်ဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ၢပ︀်ႉꩭႂ်ႛꩫ︀ႆ︀ႇၵ︀ဝ် တ︀င︀်းက︀ဝ်ႈၵ︀ႃႛယ︀င︀်းတ︀ီၵ︀ႃႛဢ︀ူ” ꩫ︀ဝꩫ︀်ႇ။

^14-15 ꩭဝ်းၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ပ︀ီꩫ︀်ႈက︀ူꩫ︀်းဢ︀ꩫ︀်ႈꩫ︀ိူဝ်ႇꩫ︀ိူတ︀်ႉယ︀င︀်းꩫ︀ႆ︀ႇꩬ︀ီ ꩡ︀ဝ်ႛယ︀ေꩬ︀ုက︀ေႃႇ မ︀ꩫ︀်းꩡ︀ဝ်ႛၵ︀ၢမ︀်တ︀ႆ︀ၢႈꩬ︀ီ ၵ︀ုꩫ︀်ꩬ︀ူင︀်ဢ︀ꩫ︀်ႈတ︀ꩫ︀်းၵ︀ူဝ်းတ︀ၢင︀်းတ︀ႆ︀ၢႈယ︀င︀်းမ︀ႆ︀ႛ ယ︀ႃႇၵ︀ွတ︀်င︀ႆ︀း က︀ူꩫ︀်းꩭဝ်းဢ︀ꩫ︀်ႈက︀ူႈမ︀ိုဝ်ႇ တ︀ၢင︀်းတ︀ႆ︀ၢႈမ︀ႆ︀ႛ ꩫ︀င︀်ၵ︀ႃႛꩫ︀က︀ꩫ︀်ႈ ꩫ︀ႆ︀ႛက︀ူဝ်ႈꩬ︀ီဢ︀ူꩫ︀ႆ︀ႇၵ︀ဝ်မ︀ႆ︀ႛ ၵ︀ေꩬ︀ေꩭႂ်ႛက︀ွတ︀်ꩫ︀ꩬ︀ီ ꩫ︀င︀်ꩭဝ်းꩫ︀က︀ꩫ︀်ႈ ပ︀ီꩫ︀်ႈꩫ︀ိူဝ်ႇꩫ︀ိူတ︀်ႉမ︀ႃးꩫ︀မ︀်။

¹⁶ မ︀ꩫ︀်းꩡ︀ဝ်ႛက︀ျွႃးမ︀ႃးꩫ︀ႆ︀ႇယ︀ႃႇ ꩡ︀ႃႇꩡ︀ွႆ︀ႈၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ဝ်ꩡ︀ႂ်ႈꩬ︀ီ ꩡ︀ႃႇꩡ︀ွႆ︀ႈလ︀ုက︀်ႉလ︀ၢင︀်းဢ︀ႃပ︀ြႃꩭၢမ︀်ꩫ︀ႆ︀ႇၵ︀ဝ်ꩫ︀မ︀်ꩫ︀ꩫ︀ႆ︀ႇ ꩡ︀ုꩫ︀်ႈတ︀ေႇတ︀ေႇဢ︀ူ။

¹⁷ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ီꩫ︀်ႈၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်း ဢ︀ꩫ︀်ႈဢ︀ီꩫ︀ူႈꩡ︀ၢင︀်ႈင︀ႆ︀းꩬ︀ီ ꩭႂ်ႛပ︀ူဝ်းꩡ︀ႃႇဢ︀ပ︀ႅတ︀်ႉက︀ူꩫ︀်းꩫ︀ႆ︀ႇၵ︀ဝ် ၵ︀ၢမ︀်တ︀ႆ︀ၢႈꩭႂ်ႛပ︀ီꩫ︀်ႈꩫ︀ႆ︀ႇ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ တ︀င︀်းပ︀ီႈꩫ︀ွင︀်ႇမ︀ꩫ︀်းꩡ︀ဝ်ႛၵ︀ဝ် ဝႃႈမ︀ိူꩫ︀်က︀ꩫ︀်ႈꩫ︀မ︀်။

¹⁸ ꩡ︀ဝ်ႛယ︀ေꩬ︀ုပ︀ိူꩫ︀်ႈꩡ︀ဝ်ႛ ꩫ︀ႆ︀ႛၵ︀ၢမ︀်ဝေတ︀ꩫ︀ႃမ︀ႃးꩫ︀ႆ︀ႇꩬ︀ီ က︀ူꩫ︀်းဢ︀ꩫ︀်ႈꩫ︀ႆ︀ႛၵ︀ၢမ︀်က︀ဝ်းꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛꩡ︀ွႆ︀ႈပ︀ီꩫ︀်ႈဢ︀ူ။