က︀လ︀ႃတ︀ိ 6 - Khamti Shan

က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈꩡ︀ွႆ︀ႈက︀ꩫ︀်ႈတ︀ႃႉ

¹ ပ︀ီႈꩫ︀ွင︀်ႇၵ︀ဝ်ꩴ︀း ꩬ︀င︀်ဝႃႈၸ︀ူႛယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈ ꩭီတ︀်ဢ︀ပ︀ႅတ︀်ႉꩫ︀ႆ︀ႇမ︀ႆ︀ႛꩬ︀ူတ︀ွင︀်းက︀ီး က︀ူဝ်ႇဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ေꩭႂ်ႛꩫ︀ႆ︀ႇၵ︀ဝ်ယ︀ႃႇ ဢ︀ူꩫ︀်ႛဢ︀ူꩫ︀်ႛꩥ︀ေႈꩰꩬ︀ီ မ︀ꩫ︀်းမ︀ႆ︀ႛမ︀ေးꩭႂ်ႛက︀ꩫ︀်ႈတ︀ႃႉ။ ꩬ︀ူၸ︀ူႛꩡ︀ဝ်ႛက︀ေႃႇ ဢ︀ꩫ︀်ႈၵ︀ုꩫ︀်ꩬ︀ူင︀်က︀ဝ်းမ︀ႆ︀ႛ ꩭႂ်ႛပ︀ူဝ်းမ︀ဝ်လ︀ွေႛက︀ႃꩫ︀ႆ︀ႇ ꩬ︀တ︀ိက︀ꩫ︀်ႈတ︀ႃႉ။

² က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ မ︀ိူဝ်ႈယ︀ပ︀်ꩫ︀ႆ︀ႇꩡ︀ွႆ︀ႈက︀ꩫ︀်ႈင︀ႆ︀းꩬ︀ီ ꩬ︀ိꩫ︀်ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ထွမ︀်ꩡ︀ွမ︀်းက︀ꩫ︀်ႈတ︀ႃႉ။

³ ꩬ︀င︀်ဝႃႈꩬ︀ူ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ၵ︀ꩫ︀်တ︀ႂ်းဢ︀မ︀်ꩬ︀ႃပ︀ိူꩫ︀်ႈက︀ီး က︀ူဝ်ႇဢ︀မ︀ႂ်းယ︀ႃႇဢ︀ꩫ︀်ႈၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ၸ︀ၢမ︀်းꩫ︀ႆ︀ၢႈꩫ︀မ︀်။ တ︀ေႇတ︀ေႇက︀ီး က︀ူဝ်ႇဢ︀မ︀ႂ်းယ︀ႃႇက︀ꩬ︀င︀်က︀ေႃႇꩵ︀ႈꩡ︀ႂ်ႈ။

⁴ ꩭဝ်းက︀ူႈက︀ူဝ်ႇ ဢ︀ꩫ︀်ႈၸ︀ူႛꩡ︀ဝ်ႛꩭီတ︀်မ︀ႆ︀ႛၸ︀ူႛꩡ︀ဝ်ႛ ထုက︀်ꩫ︀ီႈꩡ︀ႅပ︀်ႉလ︀ႅမ︀်းꩫ︀ီႈꩫ︀ီႈဢ︀ူ။ င︀ႆ︀းꩬ︀ီꩭီတ︀်ꩫ︀ီႈꩫ︀ီႈက︀ီး ဢ︀ꩫ︀်ႈၸ︀ူႛꩡ︀ဝ်ႛꩭီတ︀်မ︀ႆ︀ႛ ၸ︀ူႛꩡ︀ဝ်ႛꩫ︀ႆ︀ႛꩡ︀ူမ︀်းဢ︀ူ။ တ︀င︀်းပ︀ိူꩫ︀်ႈꩵ︀ႈဝႃႈယ︀ိူင︀်းက︀ꩫ︀်ႈ။

⁵ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်းက︀ူႈက︀ူဝ်ႇ ꩫ︀ႃႛတ︀ီႈၸ︀ူႛꩡ︀ဝ်ႛမ︀ႆ︀ႛ ၸ︀ူႛꩡ︀ဝ်ႛဝႃႈမ︀ႅက︀်ဢ︀ဝ်ႈယ︀ဝ်ႇက︀ꩫ︀်ႈꩫ︀မ︀်။

⁶ မ︀ူဝ်ꩬ︀ွꩫ︀်ဢ︀ꩫ︀်ႈꩬ︀ူမ︀ႆ︀ႛ ꩬ︀ွꩫ︀်ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ၵ︀ူဝ်းလ︀ိင︀်းဢ︀ꩫ︀်ႈꩬ︀ူမ︀ႆ︀ႛယ︀င︀်းꩫ︀ႆ︀ႇၵ︀ဝ် ပ︀ꩫ︀်ႈꩭႂ်ႛက︀ꩫ︀်ႈတ︀ႃႉ။

⁷ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭဝ်းၸ︀ႅတ︀်ႉꩵ︀ႈꩫ︀ႆ︀ႛ။ ၵ︀ꩫ︀်တ︀ႂ်းၸ︀ႅတ︀်ႉꩫ︀ႆ︀ႛꩫ︀မ︀်ꩫ︀က︀ီး က︀ူဝ်ႇဢ︀မ︀ႂ်းယ︀ႃႇ ဢ︀ꩫ︀်ႈၸ︀ူႛꩡ︀ဝ်ႛမ︀ႆ︀ႛ ၸ︀ူႛꩡ︀ဝ်ႛၸ︀ၢမ︀်းꩫ︀မ︀်။ ဢ︀ꩫ︀်ႈꩫ︀င︀်ꩬ︀ူပ︀ုက︀်ꩫ︀ႆ︀ႇ ꩬ︀ူတ︀ီꩫ︀ႆ︀ႛဢ︀ဝ်ႈꩫ︀မ︀်။

⁸ ၸ︀ူႛꩭီတ︀်ꩬ︀ူꩫ︀်ꩫ︀ႆ︀ႇၵ︀ဝ် ၸ︀ꩫ︀်းက︀ꩬ︀င︀်ပ︀ုက︀်ꩫ︀က︀ေႃႇ ဢ︀ꩫ︀်ႈၸ︀ူႛꩡ︀ဝ်ႛပ︀ုက︀်ꩫ︀ႆ︀ႇတ︀ီꩫ︀ႆ︀ႛပ︀တ︀်ဢ︀ဝ်ႈꩫ︀က︀ꩫ︀်ႈ ꩬ︀ူꩡ︀ွမ︀်းꩡ︀ႂ်ႈꩫ︀ိူဝ်ႇꩫ︀ိူတ︀်ႉၸ︀ူႛꩡ︀ဝ်ႛက︀ီး တ︀ၢင︀်းတ︀ႆ︀ၢႈတ︀ီꩫ︀ႆ︀ႛပ︀တ︀်ဢ︀ဝ်ႈꩫ︀မ︀်။ ဢ︀လ︀ၢင︀်းၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩡ︀ွမ︀်းက︀ီး ဢ︀ꩬ︀ၢက︀်ႉထႃဝရ︀တ︀ီꩫ︀ႆ︀ႛပ︀တ︀်ဢ︀ဝ်ႈꩫ︀မ︀်။

⁹ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩭႅင︀်းမ︀ဝ်ယ︀ူဝ်ႈ၊ ꩡ︀ႂ်ႈမ︀ဝ်ၸ︀ေႛꩬ︀ီ ꩭီတ︀်လ︀ွင︀်ႈꩫ︀ီႈက︀ꩫ︀်ႈတ︀ႃႉ။ င︀ႆ︀းက︀ီး မ︀ိူဝ်ႈယ︀ၢမ︀်းထိုင︀်ꩫ︀ႆ︀ႇ ဢ︀က︀ိဝ်းဢ︀ꩫ︀်ႈꩫ︀ီႈꩫ︀ႆ︀ႛပ︀တ︀်ဢ︀ဝ်ႈဢ︀ူ။

¹⁰ င︀ႆ︀းꩫ︀ႆ︀ႇꩬ︀ီ က︀ႃႈꩫ︀င︀်တ︀ၢင︀်းတ︀ူဝ်ꩫ︀ႆ︀ႇ က︀ူႈက︀ူဝ်ႇမ︀ႆ︀ႛ ꩭီတ︀်လ︀ွင︀်ႈꩫ︀ီႈꩭႂ်ႛတ︀ႃႉ။ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ေႈၵ︀ႅꩫ︀်းꩭီတ︀်ꩭႂ်ႛတ︀ႃႉ။

လ︀ွင︀်ႈပ︀ေႃလ︀ုꩬ︀င︀်ၵ︀ၢမ︀်းလ︀ူပ︀်

¹¹ လ︀ိက︀်ႉတ︀ွꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈဢ︀ဝ်ႈမ︀ိုဝ်းက︀ဝ်ႈၸ︀ူႛꩡ︀ဝ်ႛတ︀ႅမ︀်ႛꩫ︀မ︀်။ တ︀ူဝ်ႈလ︀ိက︀်ႉက︀ဝ်ႈဢ︀ꩫ︀်ႈယ︀ႂ်ꩰꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းတ︀ႃႉ။

¹² ꩬ︀ြႃဢ︀ꩫ︀်ႈꩬ︀ူမ︀ႆ︀ႛ ꩭႅပ︀်ႉꩭႂ်ႛꩭၢပ︀်ႉမ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ꩫ︀ႆ︀ႇၵ︀ဝ်ယ︀ႃႇ ၵ︀ဝ်ꩡ︀ွမ︀်းထုင︀်းတ︀ြႃးက︀ျူးဢ︀ူꩫ︀ꩫ︀ႆ︀ႇ ꩭၢင︀်းပ︀ိူꩫ︀်ႈꩭꩫ︀်ꩬ︀ီ ၵ︀ဝ်မ︀ႆ︀ႛယ︀ူဝ်းယ︀ွင︀်ႛꩫ︀ႆ︀ၢႈꩫ︀မ︀်။ ၵ︀ဝ်ꩭီတ︀်င︀ႆ︀းꩫ︀ႆ︀ႇ မ︀ိူဝ်ႈၵ︀ဝ်ꩭူဝ်းလ︀ွင︀်ႈꩬ︀ဝ်ဝႃးမ︀ိုဝ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇ ꩭႂ်ႛပ︀ူဝ်းၵ︀ဝ်မ︀ႆ︀ႛ ပ︀ိူꩫ︀်ႈမ︀ဝ်ꩫ︀ိက︀်ႉꩬ︀ၢက︀်ႉꩫ︀ႆ︀ႇꩫ︀မ︀်။

¹³ ꩫ︀ႆ︀ႇꩫ︀က︀ေႃႇ ၵ︀ဝ်ၸ︀ူႛꩡ︀ဝ်ႛꩫ︀ႆ︀ၢႈက︀ေႃႇ က︀ျမ︀်းꩬ︀ိꩫ︀်ꩵ︀ႈက︀မ︀်ႈက︀ႅင︀်းတ︀ေႇတ︀ေႇ။ ꩬ︀ူမ︀ႆ︀ႛၵ︀ဝ်ၵ︀ႂ်ႈꩭႂ်ႛꩭၢပ︀်ႉမ︀ၢင︀်က︀လ︀ႃꩫ︀ႆ︀ႇယ︀ႃႇ ꩬ︀ူမ︀ႆ︀ႛပ︀တ︀်ပ︀ႆ︀ၢႈꩫ︀င︀်ꩭႂ်ႛက︀ီး ꩬ︀ူပ︀ီꩫ︀်ႈတ︀ပ︀ေးၵ︀ဝ်ယ︀ဝ်ႇꩫ︀ꩬ︀ီ ၵ︀ႂ်ႈဢ︀ဝ်ႈꩫ︀ႃႛꩬ︀ီꩫ︀မ︀်။

¹⁴ က︀ဝ်ႈက︀ီးယ︀ႃႇ လ︀ွင︀်ႈꩬ︀ဝ်ဝႃးမ︀ိုဝ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛလ︀ိူဝ်ꩬ︀ီ လ︀ွင︀်ႈက︀ꩬ︀င︀်မ︀ႆ︀ႛက︀ေႃႇ ꩵ︀ႈꩭုမ︀်ယ︀ဝ်ႇ။ လ︀ႆ︀ၢးပ︀ိူဝ်ႈꩬ︀ဝ်ဝႃးမ︀ိုဝ်းဢ︀မ︀ႂ်းꩬ︀ီ ဢ︀ꩫ︀်ႈက︀ဝ်ႈမ︀ိူင︀်းက︀ၢင︀်ႈမ︀ႆ︀ႛ ꩭွႆ︀ႛꩡ︀ႂ်ႈꩫ︀ႆ︀ႇ က︀ꩫ︀်ႛꩫ︀ိူဝ်ꩬ︀ဝ်ဝႃးမ︀ိုဝ်းမ︀ႆ︀ႛ တ︀ွက︀်တ︀ႆ︀ၢႈၵ︀ွတ︀်ယ︀ဝ်ႇ။ မ︀ိူင︀်းက︀ၢင︀်ႈꩫ︀ႆ︀ႇက︀ေႃႇ ꩡ︀ႃႇက︀ဝ်ႈက︀ီး က︀ꩬ︀င︀်က︀ေႃႇꩵ︀ႈꩡ︀ႂ်ႈယ︀ဝ်ႇ။

¹⁵ ꩭဝ်းမ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀် ꩭၢပ︀်ႉမ︀ဝ်ꩭၢပ︀်ႉꩫ︀ႆ︀ႇယ︀ႃႇ ꩵ︀ႈဢ︀ၵ︀ႅက︀်ႉပ︀ိူင︀်ႈလ︀ူင︀်။ ဢ︀ꩫ︀်ႈဢ︀ၵ︀ႅက︀်ႉꩫ︀ႆ︀ႇယ︀ႃႇ ဢ︀ꩫ︀်ႈꩭဝ်းဝႃႈပ︀ီꩫ︀်ႈက︀ူꩫ︀်းမ︀ႂ်ꩫ︀ႆ︀ႇꩫ︀မ︀်။

¹⁶ က︀ူꩫ︀်းဢ︀ꩫ︀်ႈၵ︀ၢမ︀်းꩫ︀ႆ︀ႇမ︀ႆ︀ႛ ထွမ︀်ꩡ︀ွမ︀်းꩬ︀ီ ပ︀ီꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ီꩫ︀ူႈꩬ︀ီꩭႂ်ႛဢ︀ဝ်ႈက︀တ︀်ယ︀ီꩫ︀်ႈက︀ႃတ︀ႃႉ။

¹⁷ လ︀ုက︀်ႉင︀ႆ︀ႚက︀ူဝ်ꩬ︀ီ က︀ဝ်ႈမ︀ႆ︀ႛၸ︀ႂ်က︀ေႃႇ ဢ︀ဝ်ႈလ︀ွင︀်ႈꩫ︀ႆ︀ႇၵ︀ဝ် ပ︀ီမ︀ႃးဢ︀ဝ်ႈယ︀ပ︀်ယ︀ဝ်ႇ။ ꩭွႆ︀းတ︀ီႈꩡ︀ီပ︀်ဢ︀ꩫ︀်ႈက︀ဝ်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ်ယ︀ႃႇ က︀ဝ်ႈပ︀ီꩫ︀်ႈက︀ူꩫ︀်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်ꩫ︀ꩫ︀ႆ︀ႇ ပ︀ျႃးဢ︀ူꩫ︀မ︀်။

¹⁸ ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူတ︀င︀်းမ︀ိူင︀်းမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭႂ်ႛဢ︀ီꩫ︀ူႈꩭၢက︀်ႉꩭွမ︀်က︀ႃတ︀ႃႉ။ ꩬ︀ႃႈထု။