က︀လ︀ႃတ︀ိ 4 - Khamti Shan

¹ တ︀ၢင︀်းလ︀ိူင︀်ႈဝႃႈက︀ွတ︀်ꩫ︀က︀ီး လ︀ုက︀်ႉꩫ︀ꩫ︀ႆ︀ႇ ဢ︀မ︀ွေပ︀ူဝ်မ︀ေꩫ︀ႆ︀ႛယ︀ဝ်ႇꩬ︀ီ ပ︀ီꩫ︀်ႈꩡ︀ဝ်ႛၵ︀ူဝ်းလ︀ိင︀်းက︀ႃ ၵ︀ႂ်ႈလ︀ႂ်ႈꩫ︀က︀ေႃႇ က︀ႃႈက︀ွꩫ︀်းမ︀ဝ်ထူꩫ︀်ႛယ︀ႃႇ ꩫ︀င︀်ၵ︀ႃႛꩫ︀က︀ꩫ︀်ႈဝႃႈဢ︀ူꩫ︀မ︀်။

² က︀ႃႈယ︀ၢမ︀်းဢ︀ꩫ︀်ႈပ︀ူဝ်မ︀ေမ︀ꩫ︀်းၵ︀တ︀်ႉဝႆ︀ႇမ︀ဝ်ထိုင︀်ယ︀ႃႇ ဢ︀ꩫ︀်ႈꩫ︀င︀်ၸ︀ူႛမ︀ိုင︀်ႇမ︀ꩫ︀်းꩫ︀ၵ︀ႃ ၸ︀ူႛမ︀ိုင︀်ႇၵ︀ူဝ်းလ︀ိင︀်းမ︀ꩫ︀်း ꩬ︀ၢင︀်ꩭႂ်ႛမ︀ႆ︀ႛဝႃႈထွမ︀်ꩡ︀ွမ︀်းꩫ︀မ︀်။

³ ꩭဝ်းက︀ေႃႇ မ︀ိူဝ်ႈꩡ︀ဝ်ႛယ︀ေꩬ︀ုမ︀ဝ်ပ︀ႆ︀က︀ျွႃးမ︀ႃးꩫ︀ႆ︀ႇ ပ︀ီꩫ︀်ႈ ꩫ︀င︀်လ︀ၵ︀ႃꩫ︀က︀ꩫ︀်ႈꩫ︀မ︀်။ က︀ႃႈꩭဝ်းꩬ︀မ︀်မ︀ႃတ︀ြႃးမ︀ႆ︀ႛ မ︀ဝ်ပ︀ႆ︀တ︀ွင︀်းꩫ︀ီႈꩫ︀ီႈယ︀ႃႇ ထုင︀်းၸ︀ိင︀်ႛမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်မ︀ႆ︀ႛ ꩫ︀င︀်ၵ︀ႃႛꩫ︀က︀ꩫ︀်ႛဝႃႈꩡ︀ွမ︀်းဢ︀ူꩫ︀မ︀်။

^4-5 ꩫ︀ႆ︀ႇꩫ︀က︀ေႃႇ ယ︀ၢမ︀်းထိုင︀်မ︀ႃးက︀ီး ၸ︀ြႃးပ︀ီꩫ︀်ႈꩡ︀ဝ်ႛ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ ပ︀ွႆ︀ꩡ︀ႂ်ႇမ︀ႃးꩬ︀ီ လ︀ုက︀်ႉမ︀ꩫ︀်းꩡ︀ဝ်ႛက︀ေႃႇ လ︀ုက︀်ႉက︀ူꩫ︀်းယ︀ိင︀်းမ︀ႆ︀ႛ ၸ︀ႃးပ︀ီꩫ︀်ႈက︀ူꩫ︀်းမ︀ႃးယ︀ဝ်ႇ။ ꩭႂ်ႛပ︀ူဝ်း က︀ူꩫ︀်းဢ︀ꩫ︀်ႈဢ︀ူက︀ꩫ︀်ႛတ︀ႂ်ႛꩬ︀ိꩫ︀်က︀ျူးꩫ︀ႆ︀ႇၵ︀ဝ်မ︀ႆ︀ႛ ထွတ︀်ꩭႂ်ႛꩫ︀ႆ︀ႇင︀ႆ︀း ꩭႂ်ႛပ︀ူဝ်းက︀ူꩫ︀်းꩭဝ်းတ︀င︀်းမ︀ိူင︀်းမ︀ႆ︀ႛ ဢ︀ဝ်ႈပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ မ︀ꩫ︀်းꩡ︀ဝ်ႛ က︀ꩫ︀်ႛတ︀ႂ်ႛꩬ︀ိꩫ︀်က︀ျူးမ︀ႆ︀ႛ ၸ︀ႃးမ︀ႃးယ︀ဝ်ႇ။

⁶ ꩬ︀ူပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ ၵ︀ွꩫ︀်လ︀ုက︀်ႉမ︀ꩫ︀်းꩡ︀ဝ်ႛ ꩫ︀ႂ်းꩡ︀ႂ်ႈꩭဝ်းမ︀ႆ︀ႛ ꩬ︀ႂ်ꩭႂ်ႛမ︀ႃးယ︀ဝ်ႇ။ ၵ︀ွꩫ︀်ဢ︀မ︀ႂ်းယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ “ပ︀ူဝ်ꩴ︀း၊ ပ︀ူဝ်ꩴ︀း” ꩫ︀ꩬ︀ီက︀ၢဝ်ဢ︀ူꩫ︀မ︀်။

⁷ င︀ႆ︀းꩫ︀ႆ︀ႇꩬ︀ီ ꩬ︀ူယ︀ႃႇ ၵ︀ႃႛꩵ︀ႈꩡ︀ႂ်ႈယ︀ဝ်ႇ။ လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ က︀ွပ︀်ႉပ︀ိူဝ်ႈꩬ︀ူပ︀ီꩫ︀်ႈလ︀ုက︀်ႉမ︀ꩫ︀်းꩡ︀ဝ်ႛꩫ︀ႆ︀ႇꩬ︀ီ ꩬ︀ူမ︀ႆ︀ႛ ဢ︀မ︀ွေဢ︀ꩫ︀်ႈꩡ︀ႃႇꩭၢင︀်းလ︀ုက︀်ႉမ︀ꩫ︀်းꩡ︀ဝ်ႛၵ︀ဝ်ꩫ︀ႆ︀ႇ ꩬ︀ူမ︀ႆ︀ႛတ︀ီꩭႂ်ႛꩫ︀မ︀်။

လ︀ွင︀်ႈပ︀ေႃလ︀ု ꩡ︀ႃႇက︀ူꩫ︀်းꩡ︀ိူဝ်းက︀လ︀ႃတ︀ိၵ︀ဝ် က︀ပ︀်ႉꩡ︀ႂ်ႈ

⁸ မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛယ︀ႃႇ ꩬ︀ူၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်တ︀ွင︀်းမ︀ႃးꩫ︀ႆ︀ႇꩬ︀ီ ꩬ︀ူပ︀ီꩫ︀်ႈၵ︀ႃႛၸ︀ြႃး ဢ︀ꩫ︀်ႈမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႃးꩫ︀မ︀်။

⁹ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ꩬ︀ူၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀ွင︀်းမ︀တ︀်ႉမ︀ႃးယ︀ဝ်ႇ။ ဢ︀ꩫ︀်ႈတ︀ေႇတ︀ေႇက︀ီး ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀် ꩬ︀ူမ︀ႆ︀ႛတ︀ွင︀်းꩫ︀ႆ︀ႇ။ င︀ႆ︀းꩬ︀ီက︀ေႃႇ ꩭီတ︀်က︀ꩬ︀င︀်ꩫ︀ႆ︀ ꩬ︀ူ ထုင︀်းၸ︀ိင︀်ႛၸ︀ႃꩬ︀ႃလ︀ွင︀်ႈ ဢ︀ꩫ︀်ႈက︀ꩬ︀င︀်မ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ က︀ႃပ︀ီꩫ︀်ႈၵ︀ႃႛပ︀ွက︀်ႉꩫ︀ႆ︀ႇ။

¹⁰ ꩭီတ︀်က︀ꩬ︀င︀်ꩫ︀ႆ︀ꩬ︀ူ ဝꩫ︀်းက︀ꩬ︀င︀်၊ ꩫ︀ိူꩫ︀်ႈက︀ꩬ︀င︀်၊ ပ︀ႅင︀်ႈၸ︀ႃႇက︀ꩬ︀င︀်၊ ပ︀ီႈက︀ꩬ︀င︀်ꩫ︀ꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ꩭီတ︀်ဢ︀ၵ︀ႅက︀်ႉက︀ꩫ︀်ႈꩫ︀ႆ︀ႇ။

¹¹ က︀ဝ်ႈꩡ︀ႃႇꩬ︀ူက︀ပ︀်ႉꩡ︀ႂ်ႈလ︀ူင︀်ꩥ︀ႃ။ ဢ︀ꩫ︀်ႈက︀ဝ်ႈꩡ︀ႃႇꩭၢင︀်းꩬ︀ူ ဢ︀ၵ︀ႅက︀်ႉဢ︀ၵ︀ျႃꩭီတ︀်မ︀ႃးꩫ︀ႆ︀ႇၵ︀ဝ် ꩭၢင︀်းတ︀ူဝ်ႇꩫ︀မ︀်ႇလ︀ူဝ်ပ︀ႃꩬ︀ႆ︀ၢးꩫ︀ႆ︀ၢႈက︀ျႃး။

¹² ပ︀ီႈꩫ︀ွင︀်ႇၵ︀ဝ်ꩴ︀း ၵ︀ႅꩫ︀်းꩫ︀က︀ွတ︀်။ ꩫ︀င︀်က︀ဝ်ႈထုင︀်းၸ︀ိင︀်ႛၸ︀ꩫ︀်းꩫ︀ႆ︀ႇၵ︀ဝ်မ︀ႆ︀ႛ လ︀ွတ︀်ႉꩡ︀ၢင︀်ꩰꩬ︀ီဢ︀ူꩫ︀က︀ꩫ︀်ႈ ꩬ︀ူက︀ေႃႇဢ︀ူက︀ꩫ︀်ႈမ︀ႃးတ︀ႃႉ။ က︀ဝ်ႈက︀ေႃႇ ꩫ︀င︀်ꩬ︀ူ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ꩫ︀က︀ꩫ︀်ႈ တ︀င︀်းက︀ျမ︀်းꩬ︀ိꩫ︀်ꩫ︀ႆ︀ႇၵ︀ဝ် မ︀ဝ်လ︀ႅင︀်ꩬ︀ီဢ︀ူမ︀ႃးယ︀ဝ်ႇ။ ꩬ︀ူက︀ဝ်ႈမ︀ႆ︀ႛ က︀ꩬ︀င︀်က︀ေႃႇ ꩵ︀ႈၸ︀ိတ︀်မ︀ႃး။

¹³ မ︀ိူဝ်ႈက︀ဝ်ႈꩬ︀ူမ︀ႆ︀ႛ ဢ︀ွꩫ︀်ႈတ︀ၢင︀်းလ︀ေႚလ︀ေႚ မ︀ႃးꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇ ꩬ︀ူမ︀တ︀်ႉမ︀ဝ်ꩡ︀ႂ်ႈ။ မ︀ိူဝ်ႈဢ︀မ︀ႂ်း က︀ဝ်ႈဢ︀ူꩬ︀ဝ်းမ︀ဝ်ꩫ︀ီႈꩬ︀ီ ꩬ︀ူမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႛꩭူဝ်းမ︀ႃးꩫ︀မ︀်။

¹⁴ က︀ဝ်ႈဢ︀ူမ︀ဝ်ꩫ︀ီႈꩫ︀ႆ︀ႇꩬ︀ီ ꩡ︀ႃႇꩭၢင︀်းꩬ︀ူယ︀ပ︀်ယ︀ၢက︀်ႉၵ︀ႂ်ႈလ︀ႂ်ႈꩫ︀က︀ေႃႇ ꩬ︀ူက︀ဝ်ႈမ︀ႆ︀ႛ မ︀ဝ်င︀ိူင︀်ႇꩬ︀ေႇမ︀ဝ်က︀ႃး မ︀တ︀်ႉꩫ︀င︀်ၵ︀ုꩫ︀်ꩬ︀ၢင︀်ꩬ︀ီတ︀မ︀ိူင︀်း၊ မ︀တ︀်ႉꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်ပ︀ိူꩫ︀်ႈꩡ︀ဝ်ႛꩬ︀ီတ︀မ︀ိူင︀်း ꩭၢပ︀်ႉမ︀ႃးယ︀ဝ်ႇ။

¹⁵ မ︀ိူဝ်ႈဢ︀မ︀ႂ်း လ︀ႆ︀ၢးပ︀ိူဝ်ႈက︀ဝ်ႈꩬ︀ီ ꩬ︀ူပ︀ိဝ်လ︀ူင︀်မ︀ႃးမ︀ဝ်ꩡ︀ႂ်ႈ။ င︀ႆ︀ႚယ︀ႃႇ ꩭူဝ်ꩡ︀ႂ်ႈꩬ︀ူပ︀ီꩫ︀်ႈꩭိုဝ်က︀ႃက︀ꩫ︀ႆ︀။ မ︀ိူဝ်ႈဢ︀မ︀ႂ်းယ︀ႃႇ ꩬ︀င︀်ဝႃႈက︀ဝ်ႈꩬ︀လ︀ႂ်ႈꩭၢင︀်ႇက︀ီး ဢ︀ꩫ︀်ႈꩫ︀င︀်ꩬ︀ူမ︀ႆ︀ႛယ︀င︀်းꩫ︀ႆ︀ႇ ꩡ︀ိူမ︀်ႈက︀ႃႈ ꩭွေတ︀ႃႈꩬ︀ူတ︀မ︀ိူင︀်းက︀ေႃႇ က︀ွက︀်ꩬ︀ီက︀ဝ်ႈမ︀ႆ︀ႛꩭႂ်ႛမ︀ႃးယ︀ဝ်ႇꩫ︀ꩫ︀ႆ︀ႇ က︀ဝ်ႈယ︀ုမ︀်ဢ︀ူ။

¹⁶ ꩬ︀ူမ︀ႆ︀ႛက︀ဝ်ႈ ꩬ︀မ︀်မ︀ႃတ︀ြႃးၸ︀ြႃးပ︀ီꩫ︀်ႈꩡ︀ဝ်ႛ ၵ︀ႆ︀ႈꩭႂ်ႛမ︀ႃးꩫ︀ႆ︀ႇꩬ︀ီ င︀ႆ︀ႚ က︀ဝ်ႈပ︀ီꩫ︀်ႈလ︀ꩫ︀်ꩬ︀ူꩬ︀ူက︀ႃက︀ျႃး။

¹⁷ ꩬ︀ြႃမ︀ိက︀်ႉꩬ︀ႃꩫ︀ႆ︀ႇၵ︀ဝ်ယ︀ႃႇ ꩬ︀ူမ︀ႆ︀ႛꩭီတ︀်ဢ︀ၵ︀ႅက︀်ႉဢ︀ၵ︀ျႃလ︀ူင︀်ꩫ︀မ︀်။ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈၵ︀ဝ်ꩫ︀တ︀်ꩫ︀ႆ︀ႇယ︀ႃႇ ဢ︀ꩫ︀်ႈꩫ︀ီႈꩵ︀ႈꩡ︀ႂ်ႈ။ ꩭႂ်ႛပ︀ူဝ်းꩬ︀ူတ︀င︀်းက︀ဝ်ႈက︀ႆ︀ႈက︀ႃꩬ︀ီ ၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် ꩭီတ︀်ဢ︀ၵ︀ႅက︀်ႉꩫ︀ႆ︀ႇꩫ︀ႆ︀ၢႈꩫ︀မ︀်။

¹⁸ ꩬ︀ူ ပ︀ိူꩫ︀်ႈမ︀ႆ︀ႛ ꩫ︀တ︀်လ︀ွင︀်ႈꩫ︀ီႈꩬ︀ီ ꩭီတ︀်ဢ︀ၵ︀ႅက︀်ႉဢ︀ၵ︀ျႃꩫ︀ႆ︀ႇ ꩫ︀ီႈလ︀ူင︀်ꩫ︀မ︀်။ ꩫ︀ႆ︀ႇꩫ︀က︀ေႃႇ ꩬ︀ူꩭီတ︀်င︀ႆ︀းꩫ︀ႆ︀ႇ မ︀ိူဝ်ႈက︀ဝ်ႈတ︀င︀်းꩬ︀ူဢ︀ူꩫ︀ႆ︀ႇꩫ︀ႆ︀ၢႈမ︀ဝ်ꩡ︀ႂ်ႈꩬ︀ီ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ထုက︀်ꩫ︀ီႈꩭီတ︀်ဢ︀ူꩫ︀မ︀်။

¹⁹ လ︀ုက︀်ႉꩭၢက︀်ႉက︀ဝ်ႈၵ︀ဝ်ꩴ︀း က︀ႃႈꩬ︀ူမ︀ႆ︀ႛ ꩭူဝ်ꩡ︀ႂ်ႈꩫ︀င︀်ၸ︀ꩫ︀်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ဝ်ယ︀င︀်းမ︀ႃးယ︀ႃႇ က︀ဝ်ႈꩫ︀င︀်ၸ︀ူႛယ︀ိင︀်းဢ︀ꩫ︀်ႈတ︀ီယ︀င︀်းလ︀ုက︀်ႉꩫ︀က︀ꩫ︀်ႈ ၵ︀ူႈꩡ︀ႂ်ႈၵ︀ၢꩫ︀်ꩡ︀ႂ်ႈဢ︀ူꩫ︀မ︀်။

²⁰ က︀ဝ်ႈင︀ႆ︀ႚတ︀င︀်းꩬ︀ူ ၵ︀ႂ်ႈꩭꩫ︀်က︀ꩫ︀်ႈလ︀ူင︀်ꩫ︀မ︀်။ ꩬ︀င︀်ဝႃႈꩭꩫ︀်က︀ꩫ︀်ႈက︀ီး ၵ︀ႆ︀ႇလ︀ိူင︀်ႈယ︀ႃႇ က︀ဝ်ႈꩵ︀ႈဝႃႈ။ က︀ဝ်ႈꩬ︀ူမ︀ႆ︀ႛ ၵ︀ႂ်ႈꩡ︀ႂ်ႈꩵ︀ႈပ︀ွင︀်။

လ︀ွင︀်ႈၵ︀ိူင︀်ႈၵ︀ၢမ︀်းꩭႃက︀ရ︀ꩫ︀ၵ︀ႃꩬ︀ႃရ︀ႃ

²¹ ꩬ︀ူ ၵ︀ႆ︀ႇလ︀ိူင︀်ႈၵ︀ႂ်ႈဢ︀ူက︀ꩫ︀်ႛတ︀ႂ်ႛက︀ျမ︀်းꩬ︀ိꩫ︀်ꩫ︀ႆ︀ႇ က︀ျမ︀်းꩬ︀ိꩫ︀်မ︀ႆ︀ႛ က︀ꩬ︀င︀်ဝႃႈဝႆ︀ႇꩫ︀ꩫ︀ႆ︀ႇ ꩬ︀ူမ︀ဝ်တ︀ွင︀်းတ︀ေႇတ︀ေႇက︀ျႃး။

²² က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ ဢ︀ႃပ︀ြႃꩭၢမ︀်မ︀ႆ︀ႛလ︀ုက︀်ႉꩡ︀ႆ︀ၢးꩬ︀ွင︀်က︀ူဝ်ႇယ︀င︀်းဢ︀ူ။ က︀ူဝ်ႇလ︀ိူင︀်ႈယ︀ႃႇ ၸ︀ူႛလ︀ုက︀်ႉမ︀ေးဢ︀ꩫ︀်ႈပ︀ီꩫ︀်ႈၵ︀ႃႛ၊ က︀ူဝ်ႇလ︀ိူင︀်ႈယ︀ႃႇ ၸ︀ူႛလ︀ုက︀်ႉမ︀ေးဢ︀ꩫ︀်ႈလ︀ွတ︀်ႉလ︀ႅဝ်းꩫ︀မ︀်။

²³ ၸ︀ူႛလ︀ုက︀်ႉမ︀ေး ဢ︀ꩫ︀်ႈပ︀ီꩫ︀်ႈၵ︀ႃႛꩫ︀ႆ︀ႇယ︀ႃႇ ဢ︀ꩫ︀်ႈꩫ︀င︀်က︀ူꩫ︀်းꩬ︀ၢင︀်ꩫ︀က︀ꩫ︀်ႈယ︀င︀်းမ︀ႃးꩫ︀မ︀်။ ၸ︀ူႛလ︀ုက︀်ႉမ︀ေးဢ︀ꩫ︀်ႈလ︀ွတ︀်ႉလ︀ႅဝ်းꩫ︀ႆ︀ႇယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀င︀် ꩫ︀င︀်က︀တ︀ိမ︀ꩫ︀်းꩡ︀ဝ်ႛꩫ︀က︀ꩫ︀်ႈ ဢ︀ဝ်ႈယ︀င︀်းꩭႂ်ႛမ︀ႃးꩫ︀မ︀်။

²⁴ လ︀ွင︀်ႈꩫ︀ႆ︀ႇယ︀ႃႇ ဢ︀ꩫ︀်ႈတ︀ႅက︀်ႉပ︀ုင︀်ꩭၢင︀်ႈꩫ︀မ︀်။ ၸ︀ူႛယ︀ိင︀်းꩬ︀ွင︀်က︀ူဝ်ႇꩫ︀ႆ︀ႇယ︀ႃႇ တ︀ၢင︀်ႈတ︀ူဝ်ႈလ︀ိက︀်ႉၵ︀တ︀်ႉꩬ︀ွင︀်ဢ︀ꩫ︀်ႈꩫ︀မ︀်။ ၸ︀ူႛယ︀ိင︀်းက︀ူဝ်ႇလ︀ိူင︀်ႈယ︀ႃႇ ꩭႃက︀ရ︀ ဢ︀ꩫ︀်ႈၸ︀ူႛလ︀ုက︀်ႉမ︀ꩫ︀်း ပ︀ီꩫ︀်ႈၵ︀ႃႛꩫ︀ႆ︀ႇꩫ︀မ︀်။ မ︀ꩫ︀်းယ︀ႃႇ တ︀ၢင︀်ႈတ︀ူဝ်ႈလ︀ိက︀်ႉၵ︀တ︀်ႉ ဢ︀ꩫ︀်ႈꩫ︀ွႆ︀ႈတ︀ိꩫ︀ႃမ︀ႆ︀ႛꩭီတ︀်ꩫ︀မ︀်။ မ︀ိူဝ်ႈꩭီတ︀်လ︀ိက︀်ႉၵ︀တ︀်ႉဢ︀မ︀ႂ်း ၸ︀ြႃးပ︀ီꩫ︀်ႈꩡ︀ဝ်ႛ က︀ျမ︀်းꩬ︀ိꩫ︀်ꩭႂ်ႛမ︀ႃးဢ︀ူ။

²⁵ ꩭႃက︀ရ︀ယ︀ႃႇ တ︀ၢင︀်ႈတ︀ူဝ်ႈꩫ︀ွႆ︀ႈတ︀ိꩫ︀ႃ ဢ︀ꩫ︀်ႈမ︀ိူင︀်းဢ︀ႃရ︀ေပ︀ျမ︀ႆ︀ႛယ︀င︀်းꩫ︀မ︀်။ မ︀ꩫ︀်းယ︀ႃႇ ဝီင︀်းယ︀ေရ︀ုꩬ︀လ︀ိမ︀်င︀ႆ︀ႚမ︀ႆ︀ႛင︀ႆ︀း က︀ျူးဢ︀ꩫ︀်ႈဝီင︀်းဢ︀မ︀ႂ်းမ︀ႆ︀ႛဢ︀ူ ဢ︀ꩫ︀်ႈပ︀ီꩫ︀်ႈၵ︀ႃႛက︀ျမ︀်းꩬ︀ိꩫ︀်ꩫ︀ႆ︀ႇၵ︀ဝ်မ︀ႆ︀ႛတ︀ၢင︀်ႈတ︀ူဝ်ႈဢ︀ူ။

²⁶ ꩫ︀ႆ︀ႇꩫ︀က︀ေႃႇ ဝီင︀်းယ︀ေရ︀ုꩬ︀လ︀ိမ︀် ဢ︀ꩫ︀်ႈက︀ꩫ︀်ႛꩫ︀ိူဝ်က︀ၢင︀်ႈꩭၢဝ်မ︀ႆ︀ႛယ︀င︀်းꩫ︀ႆ︀ႇယ︀ႃႇ ဝီင︀်းဢ︀ꩫ︀်ႈလ︀ွတ︀်ႉလ︀ႅဝ်း ဢ︀ꩫ︀်ႈꩫ︀င︀်ꩭၢင︀်ႈမ︀ေꩭဝ်းꩬ︀ႃရ︀ႃꩫ︀က︀ꩫ︀်ႈꩫ︀မ︀်။

²⁷ က︀ျမ︀်းလ︀ိက︀်ႉမ︀ႆ︀ႛ လ︀ွင︀်ႈမ︀ꩫ︀်းဝႃႈဝႆ︀ႇꩫ︀ႆ︀ႇ “မ︀ႂ်းမ︀ဝ်ꩭွꩫ︀်ꩬ︀ꩫ︀်ထေလ︀ုက︀်ႉꩫ︀က︀ေႃႇ င︀ႆ︀ႚꩡ︀ူမ︀်းတ︀ႃႉ။ မ︀ႂ်းလ︀ုက︀်ႉမ︀ဝ်ꩭွꩫ︀်ယ︀င︀်းꩫ︀က︀ေႃႇ ꩡ︀ူမ︀်းꩬ︀ီဢ︀ိဝ်တ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ႂ်းမ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛ လ︀ုက︀်ႉမ︀ဝ်ယ︀င︀်းမ︀ႃးꩫ︀က︀ေႃႇ င︀ႆ︀ႚယ︀ႃႇ ၸ︀ူႛယ︀ိင︀်းဢ︀ꩫ︀်ႈၸ︀ူဝ်ယ︀င︀်းမ︀ႆ︀ႛတ︀မ︀ိူင︀်း လ︀ုက︀်ႉတ︀ီယ︀င︀်းꩬ︀ႃꩫ︀မ︀်” ꩫ︀ဝꩫ︀်ႇ။

²⁸ ပ︀ီႈꩫ︀ွင︀်ႇၵ︀ဝ်ꩴ︀း င︀ႆ︀ႚꩬ︀ူယ︀ႃႇ ꩫ︀င︀်ဢ︀ေꩬ︀က︀်ꩫ︀က︀ꩫ︀်ႈ လ︀ုက︀်ႉဢ︀ꩫ︀်ႈလ︀ႆ︀ၢးပ︀ိူဝ်ႈက︀တ︀ိၸ︀ြႃးပ︀ီꩫ︀်ႈꩡ︀ဝ်ႛꩬ︀ီ ယ︀င︀်းမ︀ႃးꩫ︀ႆ︀ႇၵ︀ဝ်ꩫ︀မ︀်။

²⁹ မ︀ိူဝ်ႈင︀ႃးပ︀ုꩫ︀်ႛ လ︀ုက︀်ႉဢ︀ꩫ︀်ႈဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀င︀်းမ︀ႃးမ︀ႆ︀ႛ လ︀ုက︀်ႉဢ︀ꩫ︀်ႈဢ︀ဝ်ႈလ︀ၢႆ︀းက︀ူꩫ︀်းယ︀င︀်းမ︀ႃးဢ︀မ︀ႂ်း ꩫ︀ိက︀်ႉꩬ︀ၢက︀်ႉမ︀ႃးꩫ︀ႆ︀ႇꩫ︀က︀ꩫ︀်ႈ င︀ႆ︀ႚꩬ︀ူမ︀ႆ︀ႛက︀ေႃႇ က︀ူꩫ︀်းဢ︀ꩫ︀်ႈက︀ျမ︀်းꩬ︀ိꩫ︀်မ︀ႆ︀ႛၵ︀ႂ်ႈꩡ︀ွမ︀်းꩫ︀ႆ︀ႇၵ︀ဝ် ꩫ︀ိက︀်ႉꩬ︀ၢက︀်ႉဢ︀ူꩫ︀မ︀်။

³⁰ ꩫ︀ႆ︀ႇꩫ︀က︀ေႃႇ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇ “ၸ︀ူႛယ︀ိင︀်းဢ︀ꩫ︀်ႈပ︀ီꩫ︀်ႈၵ︀ႃႛꩫ︀ၵ︀ႃလ︀ုက︀်ႉမ︀ꩫ︀်းမ︀ႆ︀ႛ ꩭူဝ်ႛၵ︀ွတ︀်တ︀ႃႉ။ ၸ︀ူႛလ︀ုက︀်ႉၸ︀ူႛယ︀ိင︀်းဢ︀ꩫ︀်ႈပ︀ီꩫ︀်ႈၵ︀ႃႛꩫ︀ႆ︀ႇ တ︀င︀်းၸ︀ူႛလ︀ုက︀်ႉၸ︀ူႛယ︀ိင︀်းဢ︀ꩫ︀်ႈၵ︀ႃႛမ︀ဝ်ꩡ︀ႂ်ႈ ဢ︀မ︀ွေꩵ︀ႈဝႃႈꩭူမ︀်ႈꩫ︀ႆ︀ႛ” ꩫ︀ဝꩫ︀်ႇ။

³¹ င︀ႆ︀းꩫ︀ႆ︀ႇꩬ︀ီ ပ︀ီႈꩫ︀ွင︀်ႇၵ︀ဝ်ꩴ︀း ꩭဝ်းယ︀ႃႇ ၸ︀ူႛလ︀ုက︀်ႉၸ︀ူႛယ︀ိင︀်းဢ︀ꩫ︀်ႈပ︀ီꩫ︀်ႈၵ︀ႃႛꩵ︀ႈꩡ︀ႂ်ႈ။ ၸ︀ူႛလ︀ုက︀်ႉၸ︀ူႛယ︀ိင︀်းဢ︀ꩫ︀်ႈလ︀ွတ︀်ႉꩡ︀ၢင︀်ꩫ︀မ︀်။