ဢ︀ေၸ︀ႅတ︀် 5 - Khamti Shan

လ︀ွင︀်ႈဢ︀ူꩫ︀ႂ်းဢ︀ꩫ︀်ႈလ︀ႅင︀်း

¹ ꩬ︀ူယ︀ႃႇ ပ︀ီꩫ︀်ႈလ︀ုက︀်ႉꩭၢက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ဝႃႈယ︀ီင︀်ႈꩡ︀ွမ︀်းက︀ꩫ︀်ႈꩫ︀မ︀်။

² ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀က︀ꩫ︀်ႈ ꩭီတ︀်က︀ꩬ︀င︀်ꩫ︀က︀ေႃႇ ဢ︀ဝ်ႈမ︀ႅတ︀်ႉတ︀ႃꩫ︀ႆ︀ၢႈꩬ︀င︀်ꩭီတ︀်က︀ꩫ︀်ႈတ︀ႃႉ။ မ︀ꩫ︀်းꩡ︀ဝ်ႛယ︀ႃႇ ꩭဝ်းမ︀ႆ︀ႛꩭၢက︀်ႉၸ︀ႅဝ်ꩫ︀ႆ︀ႇꩬ︀ီ ဢ︀ဝ်ႈဢ︀ꩬ︀ၢက︀်ႉမ︀ꩫ︀်းꩡ︀ဝ်ႛၵ︀ႅက︀်ꩡ︀ဝ်ႛꩬ︀ီ ၵ︀ၢမ︀်တ︀ႆ︀ၢႈꩭႂ်ႛမ︀ႃးယ︀ဝ်ႇ။ ဢ︀ꩫ︀်ႈမ︀ꩫ︀်းꩡ︀ဝ်ႛꩡ︀ႃႇꩭဝ်း ၵ︀ႅက︀်ꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛမ︀ႃးꩡ︀ႂ်ႈလ︀ူင︀်ꩫ︀မ︀်။

³ ꩬ︀ူယ︀ႃႇပ︀ီꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ ဢ︀ꩫ︀်ႈၸ︀ိတ︀်က︀ႃႛမ︀၊ ဢ︀ꩫ︀်ႈꩭီတ︀်ꩭင︀်ႛꩭီတ︀်ꩭိုက︀်က︀ူႈၸ︀ꩫ︀်းင︀ႆ︀း ꩡ︀ႂ်ႈတ︀ိင︀်ႈက︀ုပ︀်ꩫ︀ႆ︀ႇၵ︀ဝ် ꩵ︀ႈဝႃႈယ︀င︀်းပ︀ိူင︀်ႈလ︀ူင︀်။ ဢ︀ꩫ︀်ႈမ︀ဝ်ꩫ︀ီႈဢ︀မ︀ႂ်းၵ︀ဝ် လ︀ုက︀်ႉꩬ︀ူပ︀်မ︀ႆ︀ႛꩫ︀ႆ︀ၢႈက︀ေႃႇ ပ︀ီဢ︀ွက︀်ပ︀ိူင︀်ႈလ︀ူင︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀မ︀ႂ်းၵ︀ဝ်ယ︀ႃႇ ꩡ︀ႃႇက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် ꩵ︀ႈထုက︀်ပ︀ိူင︀်ႈလ︀ူင︀်။

⁴ ၵ︀ၢမ︀်းဢ︀ꩫ︀်မ︀ီꩫ︀်၊ ဢ︀ꩫ︀်ႈယ︀ုက︀်ႉင︀ႆ︀း ဢ︀ꩫ︀်ႈယ︀ဝ်ႇꩭင︀်ႛယ︀ဝ်ႇꩭိုက︀်ꩫ︀ႆ︀ႇၵ︀ဝ် ꩬ︀ူမ︀ဝ်ထုက︀်ဝႃႈꩫ︀ႆ︀ႇꩬ︀ီ ꩵ︀ႈဝႃႈဝႃႈပ︀ိူင︀်ႈလ︀ူင︀်။ ၵ︀ၢမ︀်းဢ︀ꩫ︀်ႈယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛꩬ︀င︀် ထုက︀်ဝႃႈꩬ︀ီဢ︀ူꩫ︀မ︀်။

⁵ က︀ူꩫ︀်းဢ︀ꩫ︀်ႈၸ︀ိတ︀်က︀ႃႛမ︀၊ ဢ︀ꩫ︀်ႈꩭီတ︀်ꩭင︀်ႛꩭီတ︀်ꩭိုက︀်က︀ူႈၸ︀ꩫ︀်းင︀ႆ︀း ဢ︀ꩫ︀်ႈꩡ︀ႂ်ႈတ︀ိင︀်ႈက︀ုပ︀်ꩫ︀ႆ︀ႇၵ︀ဝ်ယ︀ႃႇ မ︀ိူင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃꩡ︀ဝ်ႛယ︀ေꩬ︀ုၵ︀ရ︀ီတ︀်ဢ︀ုပ︀်ႉပ︀ိုင︀်မ︀ႆ︀ႛ ꩵ︀ႈꩫ︀ႆ︀ႛၵ︀ဝ်ႛꩫ︀ꩫ︀ႆ︀ႇ ꩬ︀ူတ︀ွင︀်းတ︀ေႇတ︀ေႇဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းဢ︀ꩫ︀်ႈꩡ︀ႂ်ႈတ︀ိင︀်ႈက︀ုပ︀်ယ︀င︀်းꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈပ︀ႆ︀ၢႛꩭုꩫ︀်ꩭၢင︀်ႈꩫ︀က︀ꩫ︀်ႈꩫ︀မ︀်။

⁶ ꩬ︀ူမ︀ႆ︀ႛ ၸ︀ႂ်က︀ေႃႇ ဢ︀ဝ်ႈၵ︀ၢမ︀်းဢ︀ꩫ︀်ႈလ︀ီႈမ︀ဝ်ယ︀င︀်းꩫ︀ႆ︀ႇၵ︀ဝ် ပ︀ီꩭႂ်ႛမ︀ႃးၸ︀ၢမ︀်း။ လ︀ႆ︀ၢးပ︀ိူဝ်ႈဢ︀ပ︀ႅတ︀်ႉꩫ︀ႆ︀ႇၵ︀ဝ်ꩬ︀ီ က︀ူဝ်ႇဢ︀ꩫ︀်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ဝ်ထွမ︀်ꩫ︀ႆ︀ႇၵ︀ဝ်မ︀ႆ︀ႛယ︀ႃႇ မ︀ꩫ︀်းꩡ︀ဝ်ႛတ︀ေႃးꩬ︀ႃးꩬ︀ီ တ︀ီပ︀ူင︀်ႈတ︀ၢမ︀်ꩫ︀မ︀်။

⁷ င︀ႆ︀းꩫ︀ႆ︀ႇꩬ︀ီ က︀ူꩫ︀်းၸ︀ꩫ︀်းဢ︀မ︀ႂ်းၵ︀ဝ်မ︀ႆ︀ႛ ပ︀ီလ︀ွေႛပ︀ိူင︀်ႈလ︀ူင︀်။

⁸ ꩬ︀ူၸ︀ူႛꩡ︀ဝ်ႛက︀ေႃႇ မ︀ိူဝ်ႈင︀ႃးပ︀ုꩫ︀်ႛ ဢ︀ꩫ︀်ႈꩫ︀မ︀်ႈꩬ︀ိင︀်မ︀ႆ︀ႛ ဢ︀ူမ︀ႃးယ︀ဝ်ႇ။ ꩫ︀ႆ︀ႇꩫ︀က︀ေႃႇ ꩬ︀ူပ︀ီꩫ︀်ႈက︀ူꩫ︀်းꩡ︀ဝ်ႛထႃဝရ︀ၸ︀ြႃးမ︀ႃးꩬ︀ီ င︀ႆ︀ႚယ︀ႃႇထိုင︀်ဢ︀ꩫ︀်ႈလ︀ႅင︀်းမ︀ႃးယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ꩫ︀င︀်က︀ူꩫ︀်းက︀ꩫ︀်ႛꩫ︀ႂ်းဢ︀ꩫ︀်ႈလ︀ႅင︀်းꩫ︀က︀ꩫ︀်ႈ ဢ︀ူက︀ꩫ︀်ႈတ︀ႃႉ။

⁹ ꩬ︀ူ က︀ꩫ︀်ႛꩫ︀ႂ်းဢ︀ꩫ︀်ႈလ︀ႅင︀်းမ︀ႆ︀ႛဢ︀ူက︀ီး ဢ︀ꩫ︀်ႈꩫ︀ီႈက︀ူႈၸ︀ꩫ︀်း၊ ဢ︀ꩫ︀်ႈꩬ︀ိုဝ်ႈတ︀ူဝ်င︀ႆ︀း ဢ︀ꩫ︀်ႈꩡ︀ႂ်ႈꩫ︀ႆ︀ႇၵ︀ဝ် ꩭီတ︀်ပ︀ီꩫ︀်ႈမ︀ႃးဢ︀ူ။

¹⁰ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႃးꩡ︀ႂ်ႈꩫ︀ႆ︀ႇ က︀ꩬ︀င︀်ꩫ︀ꩫ︀ႆ︀ႇ ꩭႂ်ႛပ︀ူဝ်းတ︀ွင︀်းꩫ︀ႆ︀ႇ ꩬ︀ွꩫ︀်ဢ︀ဝ်ႈက︀ꩫ︀်ႈတ︀ႃႉ။

¹¹ က︀ူꩫ︀်းက︀ꩫ︀်ႛꩫ︀ႂ်းဢ︀ꩫ︀်ႈꩫ︀မ︀်ႈꩬ︀ိင︀်ꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈမ︀ဝ်ꩫ︀ီႈ ဢ︀ꩫ︀်ႈဢ︀က︀ိဝ်းမ︀ဝ်ယ︀င︀်းꩫ︀ႆ︀ႇၵ︀ဝ် ꩭီတ︀်ꩫ︀က︀ေႃႇ ꩬ︀ူယ︀ႃႇပ︀ီꩭီတ︀်။ ၸ︀ꩫ︀်းဢ︀မ︀ႂ်းၵ︀ဝ်ꩵ︀ႈꩫ︀ီႈꩫ︀ꩫ︀ႆ︀ႇꩬ︀ိုင︀် ပ︀ိူꩫ︀်ႈမ︀ႆ︀ႛပ︀ျႃးꩭႂ်ႛတ︀ႃႉ။

¹² ဢ︀မ︀ူးဢ︀ꩫ︀်ႈလ︀ၢက︀်ႉꩬ︀ွတ︀်ႉꩬ︀ီꩭီတ︀်ꩫ︀ႆ︀ႇၵ︀ဝ်ယ︀ႃႇ တ︀ီဢ︀ွက︀်ꩬ︀ူပ︀်ꩫ︀ႆ︀ၢႈက︀ေႃႇ ၵ︀ိူင︀်ႈꩫ︀ီႈဢ︀ႆ︀ၢႈလ︀ူင︀်တ︀ေႇတ︀ေႇꩫ︀မ︀်။

¹³ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ပ︀ီꩫ︀်ႈဢ︀ꩫ︀်ႈလ︀ႅင︀်းꩫ︀ႆ︀ႇꩬ︀ီ တ︀ၢင︀်းက︀ႅင︀်းဢ︀မ︀ႂ်းၵ︀ဝ် ပ︀ီꩫ︀်ႈꩫ︀င︀်ꩭိုဝ်ꩫ︀ꩫ︀ႆ︀ႇ ꩡ︀ိုဝ်ႇပ︀ျႃးꩡ︀ုꩫ︀်ႈꩰဢ︀ူ။

¹⁴ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈလ︀ႅင︀်းယ︀ႃႇ တ︀င︀်းလ︀ုင︀်မ︀ႆ︀ႛဢ︀ဝ်ႈꩭꩫ︀်ꩡ︀ုꩫ︀်ႈꩰꩭႂ်ႛꩬ︀ီꩫ︀မ︀်။ င︀ႆ︀းꩫ︀ႆ︀ႇꩬ︀ီ ပ︀ိူꩫ︀်ႈဝႃႈက︀ꩫ︀်ႈꩫ︀ႆ︀ႇ “ၸ︀ူႛꩫ︀ွꩫ︀်းꩫ︀က︀်ꩴ︀း လ︀ုက︀်ႉတ︀ႃႉ။ လ︀ုက︀်ႉဢ︀ꩫ︀်ႈတ︀ႆ︀ၢႈမ︀ႆ︀ႛ ꩫ︀ိပ︀်ပ︀ွက︀်ႉတ︀ႃႉ။ င︀ႆ︀းက︀ီး က︀ꩫ︀်ႛꩫ︀ိူဝ်မ︀ႂ်းမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀် တ︀ွင︀်လ︀ႅင︀်းꩭႂ်ႛဢ︀ူ” ꩫ︀ဝꩫ︀်ႇ။

¹⁵ င︀ႆ︀းꩫ︀ႆ︀ႇꩬ︀ီ ꩬ︀ူꩭလ︀ိုဝ်ဢ︀ူꩫ︀ꩫ︀ႆ︀ႇ ꩬ︀တ︀ိက︀ꩫ︀်ႈတ︀ႃႉ။ ꩫ︀င︀်က︀ူꩫ︀်းမ︀ိူက︀်ႉꩫ︀ႆ︀ႇၵ︀ဝ်ꩫ︀က︀ꩫ︀်ႈပ︀ီဢ︀ူ။ ꩫ︀င︀်က︀ူꩫ︀်းဢ︀ꩫ︀်ႈပ︀ိင︀်ꩥ︀ႃယ︀င︀်းꩫ︀ႆ︀ႇၵ︀ဝ်ꩫ︀က︀ꩫ︀်ႈဢ︀ူက︀ꩫ︀်ႈတ︀ႃႉ။

¹⁶ င︀ႆ︀ႚယ︀ႃႇ ပ︀ီꩫ︀်ႈꩡ︀ူဝ်ႈဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇꩬ︀ီ ꩬ︀ူယ︀ႃႇ လ︀ွင︀်ႈꩫ︀ီႈဢ︀ꩫ︀်ႈꩬ︀ူထုက︀်ꩭီတ︀်ꩫ︀ႆ︀ႇၵ︀ဝ် က︀ႃႈꩫ︀င︀်ပ︀ီꩫ︀်ႈꩫ︀ႆ︀ႛꩫ︀ႆ︀ႇ က︀ူႈယ︀ၢမ︀်းꩭီတ︀်က︀ꩫ︀်ႈတ︀ႃႉ။

¹⁷ ꩫ︀င︀်ၸ︀ူႛမ︀ိူက︀်ႉꩫ︀က︀ꩫ︀်ႈ မ︀ဝ်ၵ︀ႂ်ႈꩡ︀ႂ်ႈၵ︀ႂ်ႈၵ︀ူဝ်းꩬ︀ီ ပ︀ီဢ︀ူက︀ꩫ︀်ႈ။ ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူမ︀ႆ︀ႛက︀ꩬ︀င︀်ၵ︀ႂ်ႈꩭႂ်ႛꩭီတ︀်ꩫ︀ꩫ︀ႆ︀ႇ ဢ︀ဝ်ႈတ︀ွင︀်းက︀ꩫ︀်ႈတ︀ႃႉ။

¹⁸ ꩬ︀ူယ︀ႃႇ ပ︀ီမ︀ူးပ︀ီမ︀ဝ်းက︀ꩫ︀်ႈ။ ꩭၢင︀်းꩭႂ်ႛꩬ︀ူၸ︀ူႛꩡ︀ဝ်ႛꩬ︀ိုင︀် လ︀ူႇပ︀ႅက︀်ႉက︀ႃꩫ︀ႆ︀ၢႈꩫ︀မ︀်။ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩬ︀ိုင︀် ꩬ︀ူမ︀ႆ︀ႛꩭႂ်ႛထႅမ︀်တ︀ီမ︀်ႈꩰꩬ︀ီ ꩭႂ်ႛဢ︀ုပ︀်ႉပ︀ိုင︀်က︀ꩫ︀်ႈတ︀ႃႉ။

¹⁹ င︀ႆ︀းꩫ︀ႆ︀ႇꩬ︀ီ မ︀ိူဝ်ႈꩬ︀ူတ︀ၢꩫ︀်ႛၵ︀ၢမ︀်းက︀ꩫ︀်ႈꩫ︀ႆ︀ႇ ဢ︀ဝ်ႈၵ︀ၢမ︀်းꩬ︀ႃလ︀ၢမ︀်၊ ဢ︀ဝ်ႈၵ︀ၢမ︀်းဢ︀ꩫ︀်ႈယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် ဝႃႈက︀ꩫ︀်ႈတ︀ႃႉ။ လ︀ုက︀်ႉꩫ︀ႂ်းꩡ︀ႂ်ႈꩬ︀ူမ︀ႆ︀ႛ ၵ︀ၢမ︀်းယ︀ွင︀်ႛၸ︀ြႃပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် ၵ︀ၢမ︀်းꩬ︀ႃလ︀ံၢꩫ︀ႆ︀ႇၵ︀ဝ် ဢ︀ွေက︀ꩫ︀်ႈတ︀ႃႉ။

²⁰ လ︀ႆ︀ၢးပ︀ိူဝ်ႈꩬ︀ူပ︀ီꩫ︀်ႈက︀ူꩫ︀်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။

²¹ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ က︀ူဝ်ႈယ︀မ︀်ႈင︀ႆ︀းꩬ︀ီ ꩬ︀ူက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ က︀ွမ︀်းဢ︀ၢပ︀်ႉက︀ꩫ︀်ႈတ︀ႃႉ။

ၵ︀ူဝ်ႛꩬ︀ွꩫ︀်လ︀ွင︀်ႈၸ︀ူဝ်မ︀ေး

²² မ︀ေႈꩭိူꩫ︀်းၵ︀ဝ်ꩴ︀း ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ က︀ွမ︀်းဢ︀ၢပ︀်ႉꩫ︀က︀ꩫ︀်ႈ ပ︀ူဝ်ႈꩭိူꩫ︀်းꩬ︀ူမ︀ႆ︀ႛ က︀ွမ︀်းဢ︀ၢပ︀်ႉက︀ꩫ︀်ႈတ︀ႃႉ။

²³ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛယ︀ေꩬ︀ုၵ︀ရ︀ီတ︀်၊ ꩡ︀ဝ်ႛၵ︀ေꩬ︀ေꩡ︀ိူဝ်း ဢ︀ꩫ︀်ပ︀ီꩫ︀်ႈတ︀ူဝ်ႈမ︀ꩫ︀်းꩡ︀ဝ်ႛယ︀ႃႇ ပ︀ီꩫ︀်ႈက︀ုမ︀်ꩭူဝ်ꩡ︀ိူဝ်းꩫ︀က︀ꩫ︀်ႈ ပ︀ူဝ်ႈꩭိူꩫ︀်းယ︀ႃႇ က︀ုမ︀်ꩭူဝ်မ︀ေႈꩭိူꩫ︀်းꩫ︀မ︀်။

²⁴ င︀ႆ︀းꩫ︀ႆ︀ႇꩬ︀ီ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩡ︀ိူဝ်းꩡ︀ဝ်ႛက︀ွမ︀်းဢ︀ၢပ︀်ႉꩫ︀က︀ꩫ︀်ႈ မ︀ေႈꩭိူꩫ︀်းꩫ︀ႆ︀ႇၵ︀ဝ်က︀ေႃႇ ပ︀ူဝ်ႈꩭိူꩫ︀်းꩬ︀ူမ︀ႆ︀ႛ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ က︀ွမ︀်းဢ︀ၢပ︀်ႉက︀ꩫ︀်ႈတ︀ႃႉ။

²⁵ ပ︀ူဝ်ႈꩭိူꩫ︀်းၵ︀ဝ်ꩴ︀း ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ိူဝ်းမ︀ꩫ︀်းꩡ︀ဝ်ႛမ︀ႆ︀ႛꩭၢက︀်ႉꩬ︀ီ ၵ︀ွတ︀်ဢ︀ꩬ︀ၢက︀်ႉမ︀ႃးꩫ︀က︀ꩫ︀်ႈ ꩬ︀ူက︀ေႃႇ မ︀ေႈꩭိူꩫ︀်းꩬ︀ူမ︀ႆ︀ႛ ꩭၢက︀်ႉက︀ꩫ︀်ႈတ︀ႃႉ။

²⁶ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ ꩡ︀ိူဝ်းꩡ︀ဝ်ႛမ︀ႆ︀ႛ ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛꩭၢပ︀်ႉဢ︀ဝ်ႈꩫ︀ႆ︀ႇ ဢ︀ဝ်ႈတ︀ꩫ︀်းၵ︀ူဝ်းၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛင︀ႆ︀း ဢ︀ဝ်ႈꩫ︀မ︀်ႇꩬ︀ုက︀်ႉလ︀ၢင︀်ႇꩬ︀ီ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛမ︀ႃးယ︀ဝ်ႇ။

²⁷ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ မ︀ိူဝ်ႈမ︀ꩫ︀်းꩡ︀ဝ်ႛမ︀ႆ︀ႛ ꩡ︀ိူဝ်းꩡ︀ဝ်ႛ ၸ︀ူႛပ︀ီꩫ︀်ႈၸ︀ူႛꩬ︀ၢဝ်မ︀ႂ်မ︀ꩫ︀်းꩡ︀ဝ်ႛဢ︀ၢပ︀်ႉꩫ︀ႆ︀ႇ ꩭႂ်ႛပ︀ူဝ်းꩡ︀ိူဝ်းꩡ︀ဝ်ႛ မ︀ိတ︀်ႉလ︀ိူင︀်ႈꩫ︀ၢႆ︀ႈက︀ေႃႇမ︀ဝ်ꩭင︀်ႛ၊ မ︀ဝ်ꩭုꩫ︀်ႛ၊ ꩭွႆ︀းက︀ꩬ︀င︀်က︀ေႃႇ မ︀ဝ်ယ︀င︀်းꩬ︀ီ ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ မ︀ူတ︀်ꩡ︀ၢင︀်င︀ႆ︀းꩬ︀ႅꩫ︀်ႛတ︀ီမ︀်ႈက︀ုမ︀်ꩬ︀ီ ဢ︀ꩫ︀်ႈတ︀ီတ︀ၢင︀်ဢ︀ပ︀ႅတ︀်ႉက︀ꩬ︀င︀်က︀ေႃႇမ︀ဝ်ယ︀င︀်းꩫ︀ႆ︀ႇꩫ︀မ︀်။

²⁸ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ပ︀ူဝ်ႈꩭိူꩫ︀်းၵ︀ဝ် ꩫ︀င︀်တ︀ူဝ်ႈၸ︀ူႛꩡ︀ဝ်ႛမ︀ႆ︀ႛꩭၢက︀်ႉꩫ︀က︀ꩫ︀်ႈ မ︀ေႈꩭိူꩫ︀်းꩬ︀ူမ︀ႆ︀ႛ ꩭၢက︀်ႉက︀ꩫ︀်ႈတ︀ႃႉ။ က︀ူဝ်ႇဢ︀ꩫ︀်ႈမ︀ေးၸ︀ူႛꩡ︀ဝ်ႛမ︀ႆ︀ႛꩭၢက︀်ႉꩫ︀ႆ︀ႇယ︀ႃႇ ဢ︀ꩫ︀်ႈꩭၢက︀်ႉၸ︀ူႛꩡ︀ဝ်ႛꩫ︀မ︀်။

²⁹ ၸ︀ႂ်က︀ေႃႇ တ︀ူဝ်ႈၸ︀ူႛꩡ︀ဝ်ႛမ︀ႆ︀ႛꩵ︀ႈꩡ︀င︀်း။ မ︀ဝ်ꩡ︀င︀်းꩬ︀ေႇမ︀ဝ်က︀ႃး ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ိူဝ်းꩡ︀ဝ်ႛမ︀ႆ︀ႛ မ︀ိုင︀်ႇပ︀ွင︀်ႈလ︀ီင︀်ႇဢ︀ွႆ︀ꩫ︀က︀ꩫ︀်ႈ တ︀ူဝ်ႈၸ︀ူႛꩡ︀ဝ်ႛမ︀ႆ︀ႛ မ︀ိုင︀်ႇပ︀ွင︀်ႈလ︀ီင︀်ႇဢ︀ွႆ︀က︀ꩫ︀်ႈဢ︀ူ။

³⁰ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်းယ︀ႃႇ ꩫ︀ႂ်းတ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ပ︀ီꩫ︀်ႈꩬ︀ိက︀်ႉတ︀ူဝ်ႈꩫ︀ႆ︀ႇ ၵ︀ဝ်ꩫ︀မ︀်။

³¹ က︀ျမ︀်းလ︀ိက︀်ႉမ︀ႆ︀ႛ “ၸ︀ူႛꩡ︀ႆ︀ၢးယ︀ႃႇ ပ︀ူဝ်မ︀ေမ︀ꩫ︀်းမ︀ႆ︀ႛၸ︀ၢက︀်ႉက︀ႃꩬ︀ီ တ︀င︀်းမ︀ေႈꩭိူꩫ︀်းမ︀ꩫ︀်းတ︀ီလ︀ွမ︀်ႈက︀ꩫ︀်ႈ၊ တ︀ီပ︀ီꩫ︀်ႈက︀ူဝ်ႇလ︀ိူင︀်ႈꩫ︀ႆ︀ၢႈꩫ︀မ︀်” ꩫ︀ꩬ︀ီဝႃႈဝႆ︀ႇဢ︀ူ။

³² ၵ︀ူဝ်ႛက︀ျမ︀်းလ︀ိက︀်ႉꩫ︀ႆ︀ႇယ︀ႃႇ ꩬ︀မ︀်မ︀ႃတ︀ြႃးဢ︀ꩫ︀်ႈလ︀ွင︀်ႈꩡ︀ဝ်ႛꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ၵ︀ႃ ꩡ︀ိူဝ်းꩡ︀ဝ်ႛမ︀ႆ︀ႛ ၵ︀ႂ်ႈဝႃႈꩫ︀မ︀်။

³³ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈꩬ︀ူၸ︀ူဝ်မ︀ေးꩫ︀ႆ︀ႇၵ︀ဝ်မ︀ႆ︀ႛ ၵ︀ႂ်ႈဝႃႈက︀ေႃႇꩡ︀ႂ်ႈဢ︀ူ။ င︀ႆ︀းꩫ︀ႆ︀ႇꩬ︀ီ ပ︀ူဝ်ႈꩭိူꩫ︀်းက︀ူႈက︀ူဝ်ႇ ꩫ︀င︀်ၸ︀ူႛꩡ︀ဝ်ႛမ︀ႆ︀ႛꩭၢက︀်ႉꩫ︀က︀ꩫ︀်ႈ မ︀ေႈꩭိူꩫ︀်းၸ︀ူႛꩡ︀ဝ်ႛမ︀ႆ︀ႛဝႃႈꩭၢက︀်ႉꩫ︀မ︀်။ မ︀ေႈꩭိူꩫ︀်းက︀ူႈက︀ူဝ်ႇက︀ေႃႇ ပ︀ူဝ်ႈꩭိူꩫ︀်းၸ︀ူႛꩡ︀ဝ်ႛမ︀ႆ︀ႛ ဝႃႈꩫ︀ၢပ︀်ႉယ︀မ︀်ႈꩫ︀မ︀်။