ဢ︀ေၸ︀ႅတ︀် 1 - Khamti Shanလ︀ွင︀်ႈပ︀ေႃလ︀ုꩬ︀င︀်ၵ︀ၢမ︀်း 1 ꩬ︀ူꩡ︀ဝ်ႛက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈဢ︀ူဝီင︀်းဢ︀ေၸ︀ႅတ︀် ဢ︀ꩫ︀်ႈက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩬ︀ႅတ︀်ႉꩡ︀ႃယ︀င︀်းꩬ︀ီဢ︀ူꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈပ︀ေႃလ︀ု တ︀မ︀ၢꩫ︀်ꩡ︀ဝ်ႛꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇ လ︀ိက︀်ႉတ︀ႅမ︀်ႛမ︀ႃးယ︀ဝ်ႇ။ 2 ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩭဝ်းꩫ︀ၵ︀ႃꩡ︀ဝ်ႛယ︀ေꩬ︀ုၵ︀ရ︀ီတ︀် ꩬ︀ူꩡ︀ဝ်ႛမ︀ႆ︀ႛ ဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃက︀ႃတ︀ႃႉ။ လ︀ွင︀်ႈဢ︀က︀ိဝ်းၵ︀ွꩫ︀် ဢ︀ꩫ︀်ႈလ︀ုက︀်ႉꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩫ︀ႆ︀ႛꩭၢပ︀်ႉဢ︀ဝ်ႈ 3 ၸ︀ြႃးပ︀ီꩫ︀်ႈꩡ︀ဝ်ႛၸ︀ူႛပ︀ီꩫ︀်ႈꩡ︀ဝ်ႛၸ︀ြႃးꩫ︀ၵ︀ႃပ︀ူဝ်ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်းမ︀ႆ︀ႛ က︀ူꩫ︀်းတ︀င︀်းလ︀ုင︀်ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩭဝ်းဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ မ︀ိူင︀်းက︀ၢင︀်ႈꩭၢဝ်မ︀ႆ︀ႛ ဢ︀က︀ိဝ်းꩡ︀ႃႇꩭၢင︀်းၵ︀ွꩫ︀်ꩭဝ်းꩫ︀ႆ︀ႇၵ︀ဝ်က︀ူႈဢ︀ꩫ︀်ႈ ပ︀ူင︀်ႈꩭႂ်ႛဝႆ︀ႇယ︀ဝ်ႇ။ 4 ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ လ︀ုက︀်ႉမ︀ိူဝ်ႈက︀မ︀်ၸ︀ႃꩵ︀ႈပ︀ႆ︀တ︀ေပ︀ုꩫ︀်ႛ ꩭဝ်းမ︀ႆ︀ႛ က︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ လ︀ိူက︀်ႉမ︀ႆ︀ၢက︀ွတ︀်ꩫ︀ꩬ︀ီ ꩬ︀ၢင︀်ဝႆ︀ႇမ︀ႃးꩫ︀မ︀်။ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ ꩭႂ်ႛပ︀ူဝ်းꩭဝ်း ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ မ︀ူတ︀်ꩡ︀ၢင︀်ꩬ︀ီ ꩭဝ်းမ︀ႆ︀ႛဢ︀ꩫ︀်ႈတ︀ီတ︀ၢင︀်ဢ︀ပ︀ႅတ︀်ႉမ︀ဝ်ယ︀င︀်းꩫ︀ႆ︀ႇꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ ꩭဝ်းမ︀ႆ︀ႛꩭၢက︀်ႉꩫ︀ႆ︀ႇꩬ︀ီ 5 ၵ︀ႂ်ႈꩭႂ်ႛပ︀ီꩫ︀်ႈလ︀ုက︀်ႉမ︀ꩫ︀်းꩡ︀ဝ်ႛꩬ︀ီ လ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ႅပ︀်တ︀တ︀်ဝႆ︀ႇမ︀ႃးꩫ︀မ︀်။ င︀ႆ︀းꩫ︀ႆ︀ႇꩬ︀ီ လ︀ွင︀်ႈꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛꩡ︀ူမ︀်းလ︀ူင︀်ꩫ︀မ︀်။ 6 ပ︀ႆ︀ႉꩭဝ်း က︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈမ︀ူꩫ︀်ႈၸ︀ုင︀်းယ︀ႂ်မ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈꩫ︀မ︀်။ က︀ျေးꩡ︀ူးꩡ︀ဝ်ႛဢ︀မ︀ႂ်းယ︀ႃႇ ဢ︀ꩫ︀်ႈမ︀ꩫ︀်းꩡ︀ဝ်ႛ ꩭဝ်းမ︀ႆ︀ႛ က︀ꩫ︀်ႛꩫ︀ႂ်းလ︀ုက︀်ႉꩭၢက︀်ႉမ︀ꩫ︀်းꩡ︀ဝ်ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩭႂ်ႛꩫ︀ႆ︀ၢႈမ︀ႃးꩫ︀ႆ︀ႇꩫ︀မ︀်။ 7-8 ၸ︀ြႃးပ︀ီꩫ︀်ႈꩡ︀ဝ်ႛ ꩭဝ်းမ︀ႆ︀ႛဢ︀ီꩫ︀ူႈꩭၢက︀်ႉꩭွမ︀်လ︀ူင︀်ꩫ︀ႆ︀ႇꩬ︀ီ ဢ︀ဝ်ႈꩫ︀ိူတ︀်ႉလ︀ုက︀်ႉꩡ︀ႆ︀ၢးမ︀ꩫ︀်းꩡ︀ဝ်ႛ ထွတ︀်ꩭႂ်ႛ လ︀ုက︀်ႉဢ︀ပ︀ႅတ︀်ႉမ︀ႆ︀ႛဢ︀ဝ်ႈလ︀ွတ︀်ႉꩭႂ်ႛမ︀ႃးင︀ႆ︀းꩬ︀ီ ဢ︀ဝ်ႈꩥ︀ႅꩫ︀်ꩫ︀ၵ︀ႃပ︀ိင︀်ꩥ︀ႃတ︀င︀်းမ︀ိူင︀်း ꩭဝ်းမ︀ႆ︀ႛ က︀ျေးꩡ︀ူးမ︀ꩫ︀်းꩡ︀ဝ်ႛ ၵ︀ွင︀်းꩰလ︀ွင︀်းꩰꩭႂ်ႛမ︀ႃးယ︀ဝ်ႇ။ 9 ꩡ︀ႃႇလ︀ိူင︀်ႈ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀တ︀်ဝႆ︀ႇꩫ︀က︀ꩫ︀်ႈ လ︀ွင︀်ႈဢ︀ꩫ︀်ႈလ︀ိူက︀်ႉလ︀မ︀် ဢ︀ꩫ︀်ႈမ︀ꩫ︀်းꩡ︀ဝ်ႛꩬ︀ၢင︀်ဝႆ︀ႇꩫ︀ႆ︀ႇ ꩭဝ်းမ︀ႆ︀ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် ပ︀ုတ︀်ပ︀ျႃးꩭႂ်ႛမ︀ႃးယ︀ဝ်ႇ။ 10 ဢ︀ꩫ︀်ႈမ︀ꩫ︀်းꩡ︀ဝ်ႛꩬ︀ၢင︀်ဝႆ︀ႇဢ︀မ︀ႂ်းယ︀ႃႇ မ︀ိူဝ်ႈယ︀ၢမ︀်းထိုင︀်ꩫ︀ႆ︀ႇ ဢ︀ဝ်ႈတ︀ီမ︀်ႈက︀ုမ︀်မ︀ႃးꩬ︀ီ ꩫ︀ိူဝ်ꩫ︀ိꩫ︀်ႈတ︀ႂ်ႛၸ︀ႃႇ ဢ︀ꩫ︀်ႈက︀ႃႈꩡ︀ိုဝ်ႈၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ဢ︀ဝ်ႈတ︀ုမ︀်ႈꩬ︀ီ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ တ︀ီꩭႂ်ႛဢ︀ုပ︀်ႉပ︀ိုင︀်ꩫ︀ႆ︀ႇꩫ︀မ︀်။ 11 ဢ︀ꩫ︀်ႈက︀ႃႈꩫ︀င︀်ယ︀င︀်းꩫ︀ႆ︀ႇတ︀င︀်းမ︀ိူင︀်း ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀တ︀်ဝႆ︀ႇ ꩬ︀ၢင︀်မ︀ူဝ်ဝႆ︀ႇꩫ︀က︀ꩫ︀်ႈပ︀ီꩫ︀်ႈꩬ︀ီဢ︀ူꩫ︀မ︀်။ ꩫ︀င︀်မ︀ꩫ︀်းꩡ︀ဝ်ႛ လ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ တ︀ႅပ︀်တ︀တ︀်ဝႆ︀ႇမ︀ႃးꩫ︀ႆ︀ႇꩫ︀က︀ꩫ︀်ႈ ꩭဝ်းမ︀ႆ︀ႛ က︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ လ︀ိူက︀်ႉဢ︀ဝ်ႈပ︀ီꩫ︀်ႈက︀ူꩫ︀်းမ︀ꩫ︀်းꩡ︀ဝ်ႛမ︀ႃးယ︀ဝ်ႇ။ 12 ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀တ︀်ဝႆ︀ႇꩫ︀ႆ︀ႇယ︀ႃႇ က︀ျူးꩭဝ်းဢ︀ꩫ︀်ႈ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛတ︀ႂ်းထႃႛမ︀ႃးဢ︀ွꩫ︀်ႈꩫ︀ႆ︀ႇၵ︀ဝ် ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛမ︀ႃးက︀ꩫ︀်ႈꩫ︀ႆ︀ႇꩫ︀မ︀်။ 13 ꩡ︀ႃႇလ︀ိူင︀်ႈ ꩬ︀ူဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်က︀ေႃႇ ꩬ︀မ︀်မ︀ႃတ︀ြႃး ၵ︀ၢဝ်ႈၵ︀ၢမ︀်းꩫ︀ီႈဢ︀ꩫ︀်ႈꩬ︀ူမ︀ႆ︀ႛၵ︀ေꩬ︀ေꩭႂ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးꩬ︀ီ ပ︀ီꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႃးက︀ꩫ︀်ႈယ︀ဝ်ႇ။ ꩬ︀ူ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈမ︀ႃးꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ွꩫ︀်မ︀ꩫ︀်းꩡ︀ဝ်ႛ ဢ︀ꩫ︀်ႈမ︀ိူဝ်ႈင︀ႃးပ︀ုꩫ︀်ႛက︀တ︀ိꩭႂ်ႛဝႆ︀ႇ ဢ︀ꩫ︀်ႈꩬ︀ူမ︀ႆ︀ႛတ︀ွက︀်ꩡ︀ုမ︀်ႛꩬ︀ီ ဢ︀ဝ်ႈပ︀ီꩫ︀်ႈက︀ူꩫ︀်းမ︀ꩫ︀်းꩡ︀ဝ်ႛꩫ︀ႆ︀ႇ ꩬ︀ူမ︀ႆ︀ႛ ပ︀ူင︀်ႈꩭႂ်ႛမ︀ႃးယ︀ဝ်ႇ။ 14 ၵ︀ွꩫ︀်ဢ︀မ︀ႂ်းယ︀ႃႇ ဢ︀ꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛက︀တ︀ိꩭႂ်ႛဝႆ︀ႇꩫ︀ႆ︀ႇ ꩭဝ်းတ︀ီꩫ︀ႆ︀ႛꩫ︀မ︀်ꩫ︀ꩬ︀ီ ဢ︀ဝ်ႈတ︀မ︀်းꩡ︀ႂ်ႈꩭႂ်ႛꩫ︀ႆ︀ႇꩬ︀ီ ꩭဝ်းၸ︀ူႛပ︀ီꩫ︀်ႈက︀ူꩫ︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛ တ︀ီဢ︀ဝ်ႈလ︀ွတ︀်ႉလ︀ေႚလ︀ေႚꩭႂ်ႛꩫ︀မ︀်ꩫ︀ꩫ︀ႆ︀ႇ ꩭဝ်းတ︀မ︀်းꩡ︀ႂ်ႈꩫ︀ႆ︀ႛဢ︀ူ။ င︀ႆ︀းꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။ လ︀ွင︀်ႈပ︀ေႃလ︀ုယ︀ွꩫ︀်းꩬ︀ူး 15-16 င︀ႆ︀းꩫ︀ႆ︀ႇꩬ︀ီ ꩬ︀ူꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီ က︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛတ︀င︀်းမ︀ိူင︀်းမ︀ႆ︀ႛ ꩭၢက︀်ႉꩭွမ︀်ꩫ︀ႆ︀ႇမ︀ႆ︀ႛ လ︀ုက︀်ႉက︀ႃႈ က︀ဝ်ႈꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ဝ်ႈယ︀ူဝ်းယ︀ွင︀်ႛဢ︀ူမ︀ဝ်ꩬ︀ဝ်းင︀ႆ︀းꩬ︀ီ ꩡ︀ႃႇꩬ︀ူက︀ေႃႇ ယ︀ွꩫ︀်းꩬ︀ူးဢ︀ူꩫ︀မ︀်။ 17 ၸ︀ြႃးꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်း ပ︀ူဝ်ꩡ︀ဝ်ႛဢ︀ꩫ︀်ႈမ︀ူꩫ︀်ႈၸ︀ုင︀်းယ︀ႂ်မ︀ႆ︀ႛ ꩭႂ်ႛပ︀ူဝ်းꩬ︀ူတ︀ွင︀်းမ︀ႃးꩫ︀ႆ︀ႇ မ︀ꩫ︀်းꩡ︀ဝ်ႛꩬ︀ူမ︀ႆ︀ႛ ၵ︀ွꩫ︀်မ︀ꩫ︀်းꩡ︀ဝ်ႛ ဢ︀ꩫ︀်ႈꩬ︀ူမ︀ႆ︀ႛပ︀ိင︀်ꩥ︀ႃပ︀ူင︀်ႈꩭႂ်ႛꩬ︀ီ ပ︀ုတ︀်ပ︀ျႃးလ︀ွင︀်ႈမ︀ꩫ︀်းꩡ︀ဝ်ႛꩫ︀ႆ︀ႇ ꩭႂ်ႛပ︀ူင︀်ႈꩭႂ်ႛက︀ႃတ︀ႃႉ။ 18-19 ဢ︀ꩫ︀်ႈမ︀ꩫ︀်းꩡ︀ဝ်ႛ ꩬ︀ူ ၸ︀ူႛမ︀ူတ︀်ꩡ︀ၢင︀်ꩫ︀ႆ︀ႇၵ︀ဝ်မ︀ႆ︀ႛꩭွင︀်ႇꩬ︀ီ ꩭႂ်ႛတ︀ႂ်းထႃႛမ︀ႆ︀ႛ ꩭႂ်ႛပ︀ူဝ်းꩬ︀ူတ︀ွင︀်းမ︀ႃးꩫ︀ႆ︀ႇ တ︀ၢင︀်းꩭူႇတ︀ၢင︀်းꩭꩫ︀်ꩬ︀ူꩭႂ်ႛပ︀ုတ︀်က︀ꩫ︀်ႈက︀ႃတ︀ႃႉ။ ဢ︀က︀ိဝ်းဢ︀ꩫ︀်ႈမ︀ꩫ︀်းꩡ︀ဝ်ႛ ꩬ︀ူမ︀ႆ︀ႛꩭႂ်ႛက︀ွတ︀်ꩫ︀ꩬ︀ီ က︀တ︀ိꩭႂ်ႛဝႆ︀ႇဢ︀မ︀ႂ်း ၵ︀ႂ်ႈလ︀ႂ်ႈမ︀ီးတ︀ꩫ︀်းꩫ︀ꩫ︀ႆ︀ႇင︀ႆ︀း တ︀ꩫ︀်းၵ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩭဝ်းၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ဢ︀မ︀ူးဢ︀ူဢ︀မ︀ႂ်း ၵ︀ႂ်ႈလ︀ႂ်ႈယ︀ႂ်ꩫ︀ꩫ︀ႆ︀ႇ ꩬ︀ူꩭႂ်ႛတ︀ွင︀်းမ︀ႃးက︀ႃတ︀ႃႉ။ 20 တ︀ꩫ︀်းၵ︀ူဝ်းဢ︀မ︀ႂ်းယ︀ႃႇ တ︀ꩫ︀်းၵ︀ူဝ်းဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ လ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ ဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩬ︀ီ မ︀ိူင︀်းက︀ၢင︀်ႈꩭၢဝ် ပ︀ႃႛၵ︀ႃမ︀ိုဝ်းမ︀ꩫ︀်းꩡ︀ဝ်ႛတ︀ီႈဢ︀ꩫ︀်ႈမ︀ႅတ︀်ႉလ︀ူင︀်မ︀ႆ︀ႛ ဢ︀ဝ်ႈꩫ︀င︀်ႈꩭႂ်ႛꩫ︀ႆ︀ႇꩫ︀မ︀်။ 21 ꩡ︀ဝ်ႛယ︀ေꩬ︀ုၵ︀ရ︀ီတ︀်က︀ေႃႇ ၵ︀ူင︀်းက︀ၢင︀်ႈꩭၢဝ်မ︀ႆ︀ႛ ၵ︀ုꩫ︀်တ︀င︀်းလ︀ုင︀်၊ ဢ︀ႃꩫ︀ႃတ︀င︀်းလ︀ုင︀်၊ တ︀ꩫ︀်းၵ︀ူဝ်းတ︀င︀်းလ︀ုင︀်မ︀ႆ︀ႛင︀ႆ︀း ꩡ︀ဝ်ႛတ︀င︀်းလ︀ုင︀်မ︀ႆ︀ႛ ဢ︀ုပ︀်ႉပ︀ိုင︀်ဢ︀ူꩫ︀မ︀်။ ꩡ︀ိုဝ်ႈမ︀ꩫ︀်းꩡ︀ဝ်ႛယ︀ႃႇ ꩡ︀ူဝ်ႈꩫ︀ႆ︀ႇꩡ︀ူဝ်ႈꩫ︀ႃႛ ꩡ︀ိုဝ်ႈꩡ︀ဝ်ႛတ︀င︀်းလ︀ုင︀်မ︀ႆ︀ႛ ယ︀ႂ်မ︀ႅတ︀်ႉꩬ︀ႃဢ︀ူ။ 22 ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀က︀ိဝ်းꩡ︀ိူဝ်းꩡ︀ဝ်ႛမ︀ႆ︀ႛꩫ︀ူႈꩬ︀ီ က︀ꩫ︀်ႛတ︀ႂ်ႛတ︀ိꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ တ︀င︀်းလ︀ုင︀်တ︀င︀်းမ︀ိူင︀်းတ︀မ︀်းဝႆ︀ႇယ︀ဝ်ႇက︀ီး မ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈပ︀ီꩫ︀်ႈꩭူဝ်တ︀င︀်းလ︀ုင︀်ဝႆ︀ႇဢ︀ူ။ 23 ꩡ︀ိူဝ်းꩡ︀ဝ်ႛဢ︀မ︀ႂ်းယ︀ႃႇ ဢ︀ꩫ︀်ႈတ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ဢ︀ဝ်ႈတ︀ီမ︀်ႈက︀ုမ︀်ꩫ︀မ︀်။ ꩡ︀ဝ်ႛယ︀ေꩬ︀ုၵ︀ရ︀ီတ︀်ပ︀ိူꩫ︀်ႈꩡ︀ဝ်ႛက︀ေႃႇ က︀ူႈတ︀ီႈက︀ူႈꩫ︀ႅꩫ︀်ႈမ︀ႆ︀ႛ က︀ူႈꩡ︀ွင︀်ႈက︀ူႈလ︀ွင︀်ႈဢ︀ဝ်ႈတ︀ီမ︀်ႈက︀ုမ︀်ဝႆ︀ႇဢ︀ူ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.