ထဝ်ꩡ︀တ︀်ႉၵ︀ဝ် 25 - Khamti Shanလ︀ွင︀်ႈပ︀ေႃလ︀ု ꩡ︀ဝ်ႛꩭူဝ်ꩬ︀ႅင︀်မ︀ႆ︀ႛဝွꩫ︀်းၵ︀ႅꩫ︀်း 1 ၸ︀ေတ︀ုယ︀ႃႇ တ︀ိူင︀်းက︀ႄတ︀ရ︀ိမ︀ႆ︀ႛ ပ︀ီꩫ︀်ႈꩡ︀ဝ်ႛက︀ႅမ︀်ႈဝွင︀်ႇမ︀ႃးꩬ︀ီ ꩬ︀ၢမ︀်ဝꩫ︀်းꩭိုင︀်က︀ီး လ︀ုက︀်ႉဝီင︀်းက︀ႄတ︀ရ︀ိမ︀ႆ︀ႛ က︀ႃဝီင︀်းယ︀ေရ︀ုꩬ︀လ︀ိမ︀်ဢ︀ူ။ 2-3 ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း ꩭူဝ်က︀ေက︀ျူးꩫ︀ႆ︀ႇၵ︀ဝ်ယ︀ႃႇ ပ︀ေႃလ︀ုမ︀ႆ︀ႛ ဢ︀ပ︀ႅတ︀်ႉတ︀ၢင︀်ဢ︀ဝ်ႈꩫ︀က︀်ꩰꩬ︀ီ ꩭႂ်ႛပ︀ူဝ်း မ︀ꩫ︀်းမ︀ႆ︀ႛꩭွင︀်ႇမ︀ႃးဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇ ꩡ︀ဝ်ႛက︀ႅမ︀်ႈဝွင︀်ႇမ︀ႆ︀ႛ ꩬ︀ွက︀်ႉတ︀ၢင︀်က︀ꩫ︀်ႈဢ︀ူ။ ၵ︀ဝ်ယ︀ႃႇ ပ︀ေႃလ︀ုမ︀ႆ︀ႛ ၵ︀ူꩫ︀်တ︀ၢင︀်းမ︀ႆ︀ႛ င︀ွမ︀်ဢ︀ဝ်ႈတ︀ၢႆ︀ႈက︀ွတ︀်ꩫ︀ꩬ︀ီ က︀ႅမ︀်က︀ꩫ︀်ႈဝႆ︀ႇယ︀ဝ်ႇꩰ။ 4 ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ “ပ︀ေႃလ︀ု ဝီင︀်းက︀ႄတ︀ရ︀ိမ︀ႆ︀ႛယ︀င︀်းဢ︀ူ။ မ︀ꩫ︀်းမ︀ႆ︀ႛ ၸ︀ူႛပ︀ႂ်ႇꩫ︀ႆ︀ႇၵ︀ဝ် ꩭႂ်ႛပ︀ႂ်ႇဝႆ︀ႇဢ︀ူ။ က︀ဝ်ႈၸ︀ူႛꩡ︀ဝ်ႛက︀ေႃႇ မ︀ဝ်ꩭိုင︀်က︀ꩬ︀င︀်ဝီင︀်းဢ︀မ︀ႂ်းမ︀ႆ︀ႛ တ︀ီက︀ႃꩫ︀မ︀်။ 5 မ︀ꩫ︀်းမ︀ႆ︀ႛဢ︀ပ︀ႅတ︀်ႉယ︀င︀်းက︀ီး ꩭူဝ်က︀ေꩬ︀ူꩫ︀ႆ︀ႇၵ︀ဝ် တ︀င︀်းက︀ဝ်ႈဝီင︀်းက︀ႄတ︀ရ︀ိမ︀ႆ︀ႛ ꩡ︀ွမ︀်းမ︀ႃးꩬ︀ီ ပ︀ၢင︀်ႈꩫ︀ႃႛက︀ဝ်ႈမ︀ႆ︀ႛ မ︀ႃးထိုင︀်တ︀ြႃးꩫ︀ႆ︀ႛဢ︀ူ” ꩫ︀ဝꩫ︀်ႇ။ 6 ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ၵ︀ꩫ︀်ပ︀ႅတ︀်ဝꩫ︀်း ꩬ︀ိပ︀်ဝꩫ︀်းလ︀ိူင︀်ႈဢ︀ူꩬ︀ီ ပ︀ွက︀်ႉက︀ႃဝီင︀်းက︀ႄတ︀ရ︀ိဢ︀ူ။ ꩫ︀င︀်မ︀ိူဝ်ႈꩭုက︀်ႉ ပ︀ၢင︀်ႈတ︀ြႃးမ︀ႆ︀ႛꩫ︀င︀်ႈꩬ︀ီ ပ︀ေႃလ︀ုမ︀ႆ︀ႛꩭႂ်ႛꩭွင︀်ႇမ︀ႃးဢ︀ူ။ 7 ပ︀ေႃလ︀ုထိုင︀်မ︀ႃးက︀ီး က︀ျူးဢ︀ꩫ︀်ႈလ︀ုက︀်ႉဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛမ︀ႃးꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛ ဢ︀ပ︀ႅတ︀်ႉဢ︀ꩫ︀်ႈꩫ︀က︀်ꩰꩫ︀ႆ︀ႇ ၵ︀ဝ်ပ︀ိꩫ︀်ႇက︀ꩫ︀်ႈဢ︀ူ။ ꩫ︀ႆ︀ႇꩫ︀က︀ေႃႇ ꩬ︀ၢက︀်ႉꩬ︀ေဢ︀ꩫ︀်ႈၵ︀ိူင︀်ဢ︀ꩫ︀်ႈလ︀ိူင︀်ႈꩫ︀ၢႆ︀ႈက︀ေႃႇ ၵ︀ဝ်ပ︀ျႃးꩵ︀ႈꩫ︀ႆ︀ႛ။ 8 ပ︀ေႃလ︀ုယ︀ႃႇ “တ︀ြႃးက︀ျူးမ︀ႆ︀ႛꩫ︀က︀ေႃႇယ︀ႃ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛꩫ︀က︀ေႃႇယ︀ႃ၊ ꩡ︀ဝ်ႛꩭူဝ်ꩬ︀ႅင︀်ရ︀ေႃမ︀မ︀ႆ︀ႛꩫ︀က︀ေႃႇယ︀ႃ က︀ဝ်ႈၵ︀ႃႛက︀ꩬ︀င︀်က︀ေႃႇꩵ︀ႈၸ︀ိတ︀်မ︀ႃး” ꩫ︀ꩬ︀ီက︀ေႛတ︀ွပ︀်ဢ︀ူ။ 9 ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ က︀ျူးꩫ︀ႆ︀ႇၵ︀ဝ်မ︀ႆ︀ႛ ၵ︀ႂ်ႈꩭီတ︀်ꩫ︀ႃႛꩬ︀ီ “မ︀ႂ်းဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ႃꩬ︀ီ ပ︀ၢင︀်ႈꩫ︀ႃႛက︀ဝ်ႈမ︀ႆ︀ႛ ၵ︀ႂ်ႈထီင︀်တ︀ြႃးဢ︀ေႃး” ꩫ︀ꩬ︀ီပ︀ေႃလ︀ုမ︀ႆ︀ႛထၢမ︀်က︀ီး 10 ပ︀ေႃလ︀ုယ︀ႃႇ “ဢ︀ꩫ︀်ႈꩫ︀ႆ︀ႇပ︀ၢင︀်ႈတ︀ြႃးꩡ︀ဝ်ႛꩭူဝ်ꩬ︀ႅင︀်တ︀ီၵ︀ႃႛꩫ︀မ︀်။ ပ︀ၢင︀်ႈတ︀ြႃးꩡ︀ဝ်ႛꩭူဝ်ꩬ︀ႅင︀်မ︀ႆ︀ႛလ︀ိူဝ်ꩬ︀ီ က︀ဝ်ႈၵ︀ႃႛဢ︀မ︀ႆ︀ႚက︀ေႃႇ ꩵ︀ႈဝႃႈက︀ႃတ︀ီၵ︀ႃႛ။ ꩫ︀င︀်ၵ︀ိင︀်းတ︀ူဝ်ꩡ︀ဝ်ႛတ︀ွင︀်းꩫ︀ီႈꩫ︀ီႈꩫ︀က︀ꩫ︀်ႈ က︀ဝ်ႈၵ︀ႃႛက︀ျူးꩫ︀ႆ︀ႇၵ︀ဝ်မ︀ႆ︀ႛ က︀ꩬ︀င︀်က︀ေႃႇ ꩵ︀ႈၸ︀ိတ︀်မ︀ႃးတ︀ီၵ︀ႃႛ။ 11 ꩬ︀င︀်ဝႃႈက︀ဝ်ႈၵ︀ႃႛ ၸ︀ိတ︀်ပ︀ိူင︀်ႈꩡ︀ဝ်ႛဝွင︀်ႇꩬ︀ီ ထုက︀်ꩫ︀ီႈတ︀ၢႆ︀ႈက︀ီး က︀ဝ်ႈၵ︀ႃႛꩵ︀ႈယ︀ွꩫ︀်းတ︀ၢင︀်းလ︀ွတ︀်ႉတ︀ီၵ︀ႃႛ။ ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈဢ︀ꩫ︀်ႈၵ︀ဝ်တ︀ၢင︀်ဢ︀ပ︀ႅတ︀်ႉꩫ︀ႆ︀ႇ င︀ဝ်ႛလ︀ွင︀်ႈမ︀ဝ်ꩭꩫ︀်က︀ီး က︀ဝ်ႈၵ︀ႃႛမ︀ႆ︀ႛၸ︀ႂ်က︀ေႃႇ က︀ꩫ︀်ႛꩫ︀ႂ်းမ︀ိုဝ်းၵ︀ဝ်မ︀ႆ︀ႛ ဢ︀ၢပ︀်ႉꩵ︀ႈꩫ︀ႆ︀ႛတ︀ီၵ︀ႃႛ။ င︀ႆ︀းꩫ︀ႆ︀ႇꩬ︀ီ က︀ဝ်ႈၵ︀ႃႛ ၵ︀ႂ်ႈဝွꩫ︀်းၵ︀ႅꩫ︀်းပ︀ၢင︀်ႈတ︀ြႃးꩡ︀ဝ်ႛꩭူဝ်ꩬ︀ႅင︀်တ︀ီၵ︀ႃႛဢ︀ူ” ꩫ︀ꩬ︀ီꩬ︀ွက︀်ႉဢ︀ူ။ 12 ꩫ︀ႆ︀ႇမ︀ႆ︀ႛꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ တ︀င︀်းꩡ︀ဝ်ႛၸ︀ူႛꩬ︀ူဝ်ႛꩡ︀ွႆ︀ႈပ︀င︀်ႈꩡ︀ွႆ︀ႈꩫ︀ႆ︀ႇၵ︀ဝ် မ︀ူꩫ︀်ႈက︀ꩫ︀်ႈယ︀ဝ်ႇက︀ီး ပ︀ေႃလ︀ုမ︀ႆ︀ႛ “က︀ွပ︀်ႉပ︀ိူဝ်ႈမ︀ႂ်း ယ︀ွꩫ︀်းက︀ႃပ︀ၢင︀်ႈꩫ︀ႃႛꩡ︀ဝ်ႛꩭူဝ်ꩬ︀ႅင︀်ꩫ︀ႆ︀ႇꩬ︀ီ မ︀ႂ်းဝႃႈက︀ႃဢ︀ူ” ꩫ︀ဝꩫ︀်ႇ။ လ︀ွင︀်ႈꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀မ︀ႆ︀ႛ ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုၵ︀ႆ︀ႈလ︀ွင︀်ႈပ︀ေႃလ︀ု 13 ꩬ︀ွင︀်ꩬ︀ၢမ︀်ဝꩫ︀်းလ︀ိူင︀်ႈꩭိုင︀်က︀ီး ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ꩫ︀ၵ︀ႃ ꩫ︀ၢင︀်းၻေဝီမ︀ꩫ︀်းၿေရ︀ꩫ︀ိယ︀ႃႇ ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုမ︀ႆ︀ႛ ꩭꩫ︀်က︀ွတ︀်ꩫ︀ꩬ︀ီ ဝီင︀်းက︀ႄတ︀ရ︀ိမ︀ႆ︀ႛ ထိုင︀်မ︀ႃးဢ︀ူ။ 14 မ︀ိူဝ်ႈꩬ︀ွင︀်ၵ︀ႃ ဝီင︀်းဢ︀မ︀ႂ်းမ︀ႆ︀ႛꩬ︀ဝ်းꩬ︀ီဢ︀ူꩫ︀ႆ︀ႇ ꩡ︀ဝ်ႛက︀ႅမ︀်ႈဝွင︀်ႇယ︀ႃႇ ꩡ︀ဝ်ႛꩭူဝ်ၵ︀မ︀်းမ︀ႆ︀ႛ လ︀ွင︀်ႈပ︀ေႃလ︀ုၵ︀ႆ︀ႈꩭႂ်ႛဢ︀ူ။ မ︀ꩫ︀်းယ︀ႃႇ “မ︀ႆ︀ႛက︀ူꩫ︀်းဢ︀ꩫ︀်ႈꩡ︀ဝ်ႛက︀ႅမ︀်ႈဝွင︀်ႇက︀ဝ်ၸ︀ေလ︀ီတ︀် ꩬ︀ႂ်ထွင︀်ဝႆ︀ႇꩫ︀ႆ︀ႇ က︀ူဝ်ႇလ︀ိူင︀်ႈယ︀င︀်းဢ︀ူ။ 15 မ︀ိူဝ်ႈက︀ဝ်ႈၵ︀ႃႛထိုင︀်ဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း ꩭူဝ်က︀ေက︀ျူးꩫ︀ႆ︀ႇၵ︀ဝ်ယ︀ႃႇ ပ︀ၢင︀်ႈꩫ︀ႃႛက︀ဝ်ႈၵ︀ႃႛမ︀ႆ︀ႛ မ︀ꩫ︀်းမ︀ႆ︀ႛထိုင︀်တ︀ြႃးက︀ꩫ︀်ႈꩬ︀ီ ꩭႂ်ႛပ︀ူဝ်းမ︀ꩫ︀်းမ︀ႆ︀ႛတ︀ၢမ︀်တ︀ႆ︀ၢႈꩭႂ်ႛꩫ︀ႆ︀ႇ မ︀ႃးꩬ︀ွက︀်ႉက︀ꩫ︀်ႈဢ︀ူ။ 16 က︀ဝ်ႈၵ︀ႃႛယ︀ႃႇ “ၸ︀ူႛထီင︀်တ︀ြႃးမ︀ႆ︀ႛ တ︀င︀်းၸ︀ူႛထိုင︀်တ︀ြႃးမ︀ꩫ︀်းၵ︀ဝ် တ︀ူဝ်ꩫ︀ႃႛက︀ꩫ︀်ႈꩬ︀ီ ဢ︀ꩫ︀်ႈၵ︀ဝ်ပ︀ိꩫ︀်ႇꩫ︀ႆ︀ႇၵ︀ဝ်မ︀ႆ︀ႛ မ︀ဝ်ꩭႂ်ႛတ︀ွပ︀်က︀ေႛꩬ︀ီ ꩭႂ်ႛတ︀ၢမ︀်ဢ︀ပ︀ႅတ︀်ႉꩫ︀ႆ︀ႇ ထုင︀်းရ︀ေႃမ︀ꩵ︀ႈꩡ︀ႂ်ႈ” ꩫ︀ꩬ︀ီတ︀ွပ︀်ꩭႂ်ႛဢ︀ူ။ 17 င︀ႆ︀းꩫ︀ႆ︀ႇꩬ︀ီ ၵ︀ဝ်ဝီင︀်းꩫ︀ႆ︀ႇမ︀ႆ︀ႛ ထိုင︀်မ︀ႃးက︀ီး က︀ဝ်ႈၵ︀ႃႛမ︀ဝ်ꩫ︀ႂ်မ︀ဝ်ꩬ︀ဝ်းꩬ︀ီ ꩫ︀င︀်မ︀ိူဝ်ႈꩭုက︀်ႉ ပ︀ၢင︀်ႈတ︀ြႃးမ︀ႆ︀ႛꩫ︀င︀်ႈꩬ︀ီ ပ︀ေႃလ︀ုမ︀ႆ︀ႛꩭႂ်ႛꩭွင︀်ႇဢ︀ူ။ 18 ၸ︀ူႛထိုင︀်တ︀ြႃးꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛၵ︀ႂ်ႈလ︀ႂ်ႈတ︀ၢင︀်ဢ︀ပ︀ႅတ︀်ႉက︀ꩫ︀်ႈꩫ︀က︀ေႃႇ ဢ︀ပ︀ႅတ︀်ႉဢ︀ꩫ︀်ႈက︀ဝ်ႈၵ︀ႃႛတ︀ႂ်းꩫ︀ႆ︀ႇၵ︀ဝ် ꩵ︀ႈလ︀ွေႛမ︀ႃး။ 19 ဢ︀ꩫ︀်ႈၵ︀ဝ်ဝႃႈက︀ꩫ︀်ႈꩫ︀ႆ︀ႇယ︀ႃႇ လ︀ွင︀်ႈၸ︀ႃꩬ︀ႃတ︀ြႃးၵ︀ဝ်င︀ႆ︀း လ︀ွင︀်ႈယ︀ေꩬ︀ုဢ︀ꩫ︀်ႈတ︀ႆ︀ၢႈက︀ႃꩫ︀ႆ︀ႇၵ︀ဝ်ꩫ︀ၢႆ︀ႈꩫ︀မ︀်။ ꩫ︀ႆ︀ႇꩫ︀က︀ေႃႇပ︀ေႃလ︀ုယ︀ႃႇ ယ︀ေꩬ︀ု ဢ︀မ︀ႂ်းဢ︀ꩬ︀ၢက︀်ႉꩫ︀ိပ︀်ꩬ︀ီဢ︀ူꩫ︀မ︀်ꩫ︀ဝꩫ︀်ႇ။ 20 ဢ︀မ︀ူးၸ︀ꩫ︀်းꩫ︀ႆ︀ႇၵ︀ဝ် က︀ဝ်ႈၵ︀ႃႛတ︀ီပ︀ႅတ︀်ႉတ︀ြႃးမ︀ဝ်ꩡ︀ၢင︀်ႈꩫ︀ႆ︀ႇꩬ︀ီ “မ︀ႂ်းဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ၵ︀ႂ်ႈက︀ႃထီင︀်တ︀ြႃးဢ︀ေႃး” ꩫ︀ꩬ︀ီ ပ︀ေႃလ︀ုမ︀ႆ︀ႛထၢမ︀်ဢ︀ူ။ 21 ꩫ︀ႆ︀ႇꩫ︀က︀ေႃႇ ပ︀ေႃလ︀ုယ︀ႃႇ ꩡ︀ဝ်ႛꩭူဝ်ꩬ︀ႅင︀်မ︀ႆ︀ႛꩬ︀ိုင︀် ၵ︀ႅꩫ︀်းဝွꩫ︀်းꩬ︀ီ ꩭႂ်ႛပ︀ႅတ︀်ႉတ︀ြႃးဢ︀ူ။ ယ︀ဝ်ႇက︀ီး ꩫ︀ႂ်းမ︀ိုဝ်းꩡ︀ဝ်ႛၵ︀ုꩫ︀်မ︀ႆ︀ႛꩬ︀ိုင︀် မ︀ꩫ︀်းမ︀ႆ︀ႛꩭႂ်ႛဢ︀ူꩬ︀ီ ꩭႂ်ႛꩭွင︀်ႇက︀ႃပ︀ၢင︀်ႈꩫ︀ႃႛꩡ︀ဝ်ႛꩭူဝ်ꩬ︀ႅင︀်ဢ︀ူ။ င︀ႆ︀းꩬ︀ီ ꩡ︀ူဝ်ႈက︀ႃႈꩵ︀ႈပ︀ႆ︀က︀ႃပ︀ၢင︀်ႈꩫ︀ႃႛꩡ︀ဝ်ႛꩭူဝ်ꩬ︀ႅင︀်ꩫ︀ႆ︀ႇ မ︀ꩫ︀်းမ︀ႆ︀ႛꩬ︀ႂ်ထွင︀်ꩬ︀ီ ၸ︀ူႛပ︀ႂ်ႇꩫ︀ႆ︀ႇၵ︀ဝ်ꩭႂ်ႛပ︀ႂ်ႇဝႆ︀ႇဢ︀ူ” ꩫ︀ဝꩫ︀်ႇ။ 22 ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ယ︀ႃႇ “ဢ︀ꩫ︀်ႈမ︀ꩫ︀်းဝႃႈꩫ︀ႆ︀ႇ က︀ဝ်ႈၸ︀ူႛꩡ︀ဝ်ႛၵ︀ႂ်ႈꩫ︀ႆ︀ႛꩥ︀ိꩫ︀်းဢ︀ူ” ꩫ︀က︀ီး ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ “မ︀ိူဝ်ႈꩭုက︀်ႉꩭႂ်ႛꩫ︀ႆ︀ႛထွမ︀်တ︀ီၵ︀ႃႛက︀ွတ︀်” ꩫ︀ဝꩫ︀်ႇ။ လ︀ွင︀်ႈပ︀ေႃလ︀ုထီင︀်တ︀ြႃးပ︀ၢင︀်ႈꩫ︀ႃႛꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ 23 ꩫ︀င︀်မ︀ိူဝ်ႈꩭုက︀်ႉ ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀ꩫ︀ၵ︀ႃꩫ︀ၢင︀်းၻေဝီၿေရ︀ꩫ︀ိယ︀ႃႇ ꩭၢင︀်ႛꩭႅမ︀်းꩫ︀ီႈꩫ︀ီႈ ꩬ︀ီ တ︀င︀်းꩡ︀ဝ်ႛꩭူဝ်ꩬ︀ိူက︀်ꩫ︀ႆ︀ႇၵ︀ဝ်၊ တ︀င︀်းက︀ူꩫ︀်းယ︀ႂ်ꩫ︀ႃႛဝီင︀်းꩫ︀ႆ︀ႇၵ︀ဝ် ꩭူမ︀်ႈက︀ျွႃးမ︀ႃးꩬ︀ီ ꩭွင︀်ႛပ︀ၢင︀်ႈက︀ုမ︀်ႈလ︀ူင︀်မ︀ႆ︀ႛၵ︀ဝ်ႛဢ︀ူ။ ပ︀ေႃလ︀ုမ︀ႆ︀ႛက︀ေႃႇ ဢ︀ဝ်ႈဢ︀မ︀ိင︀်းꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ု ꩭႂ်ႛꩭွင︀်ႇမ︀ႃးဢ︀ူ။ 24 ပ︀ၢင︀်ႈတ︀ြႃးက︀ူဝ်က︀ီး ꩡ︀ဝ်ႛက︀ႅမ︀်ႈဝွင︀်ႇၸ︀ေတ︀ုယ︀ႃႇ “ꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀င︀ႆ︀း ၸ︀ူႛမ︀ႃးပ︀ၢင︀်ႈတ︀ြႃးꩫ︀ႆ︀ႇၵ︀ဝ်တ︀င︀်းမ︀ိူင︀်း ထွမ︀်က︀ꩫ︀်ႈမ︀ႃးတ︀ႃႉ။ က︀ျူးဢ︀ꩫ︀်ႈဝီင︀်းယ︀ေရ︀ုꩬ︀လ︀ိမ︀်ꩫ︀ၵ︀ႃ ဢ︀ꩫ︀်ႈဝီင︀်းꩫ︀ႆ︀ႇမ︀ႆ︀ႛယ︀င︀်းꩫ︀ႆ︀ႇၵ︀ဝ်ယ︀ႃႇ “က︀ူဝ်ႇꩫ︀ႆ︀ႇမ︀ႆ︀ႛ ဢ︀ꩬ︀ၢက︀်ႉꩵ︀ႈထုက︀်ꩫ︀ီႈꩭႂ်ႛꩫ︀ိပ︀်ပ︀ိူင︀်ႈလ︀ူင︀်” ꩫ︀ꩬ︀ီ ဝႃႈက︀ꩫ︀်ႈဢ︀ူ။ 25 ဢ︀ပ︀ႅတ︀်ႉဢ︀ꩫ︀်ႈဝႃႈၵ︀ၢမ︀်တ︀ၢႆ︀ႈ ဢ︀ꩫ︀်ႈလ︀ိူင︀်ႈꩫ︀ႆ︀ၢႈက︀ေႃႇꩵ︀ႈၸ︀ိတ︀်မ︀ႃးꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။ ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇ ပ︀ၢင︀်ႈꩫ︀ႃႛꩡ︀ဝ်ႛꩭူဝ်ꩬ︀ႅင︀်မ︀ႆ︀ႛ ꩭႂ်ႛꩫ︀ႆ︀ႛက︀ႃထီင︀်တ︀ြႃးမ︀ႃးတ︀ႃႉ ꩫ︀ꩬ︀ီၵ︀ႅꩫ︀်းဝွꩫ︀်းꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛꩬ︀ူင︀်ပ︀ၢင︀်ႈꩫ︀ႃႛꩡ︀ဝ်ႛဝွင︀်ႇၸ︀ေတ︀ုꩭႂ်ႛက︀ွတ︀်ꩫ︀ꩬ︀ီ က︀ဝ်ႈၵ︀ႃႛတ︀ႅပ︀်တ︀တ︀်မ︀ႃးꩫ︀မ︀်။ 26 က︀ဝ်ႈၵ︀ႃႛမ︀ႆ︀ႛယ︀ႃႇ လ︀ွင︀်ႈမ︀ꩫ︀်းဢ︀ꩫ︀်ႈꩡ︀ဝ်ႛꩭူဝ်ꩬ︀ႅင︀်မ︀ႆ︀ႛ တ︀ီꩬ︀ွက︀်ႉတ︀ၢင︀်ꩭႂ်ႛ ဢ︀ꩫ︀်ႈလ︀ိူင︀်ႈꩫ︀ၢႆ︀ႈက︀ေႃႇ ꩵ︀ႈယ︀င︀်း။ င︀ႆ︀းꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛꩭွင︀်ႇမ︀ႃးပ︀ၢင︀်ႈꩫ︀ႃႛꩬ︀ူꩡ︀ဝ်ႛꩫ︀မ︀်။ တ︀ေႇတ︀ေႇမ︀ꩫ︀်းက︀ီး ꩭွင︀်ႇမ︀ႃးပ︀ၢင︀်ႈꩫ︀ႃႛꩡ︀ဝ်ႛꩭူဝ်ၵ︀မ︀်းဢ︀က︀ိပ︀်ပ︀တ︀ီၵ︀ႃႛꩫ︀မ︀်။ ꩬ︀င︀်ဝႃႈမ︀ꩫ︀်းမ︀ႆ︀ႛ ꩭဝ်းꩡ︀ႅပ︀်ႉထၢမ︀်ယ︀ဝ်ႇက︀ီး လ︀ွင︀်ႈမ︀ꩫ︀်းဢ︀ꩫ︀်ႈꩡ︀ဝ်ႛꩭူဝ်ꩬ︀ႅင︀်မ︀ႆ︀ႛတ︀ီတ︀ႅမ︀်ႛꩭႂ်ႛဢ︀ꩫ︀်ႈလ︀ိူင︀်ႈယ︀ႃႇ ယ︀င︀်းမ︀ႃးꩵ︀ထၢင︀်ႇꩫ︀ꩬ︀ီက︀ဝ်ႈၵ︀ႃႛတ︀ႂ်းဢ︀ူ။ 27 လ︀ွင︀်ႈဢ︀ꩫ︀်ႈတ︀ၢင︀်ဢ︀ပ︀ႅတ︀်ႉ ꩡ︀ွင︀်ႈလ︀ိူင︀်ႈꩫ︀ၢႆ︀ႈက︀ေႃႇ မ︀ဝ်တ︀ၢင︀်ပ︀ျႃးꩬ︀ီ က︀ူꩫ︀်းထွင︀်က︀ူဝ်ႇလ︀ိူင︀်ႈမ︀ႆ︀ႛ တ︀ီꩬ︀ူင︀်ꩡ︀ဝ်ႛꩭူဝ်ꩬ︀ႅင︀်ꩫ︀ꩫ︀ႆ︀ႇယ︀ႃႇ ꩵ︀ႈထုက︀်ꩫ︀ꩬ︀ီ က︀ဝ်ႈၵ︀ႃႛၵ︀ႂ်ႈꩡ︀ႂ်ႈဢ︀ူ” ꩫ︀ဝꩫ︀်ႇ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.