ထဝ်ꩡ︀တ︀်ႉၵ︀ဝ် 24 - Khamti Shan

လ︀ွင︀်ႈပ︀ေႃလ︀ုမ︀ႆ︀ႛ က︀ျူးꩫ︀ႆ︀ႇၵ︀ဝ် ထိုင︀်တ︀ြႃး

¹ ꩭႃႛဝꩫ︀်းꩭိုင︀်က︀ီး ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉဢ︀ႃꩫ︀ꩫ︀ိယ︀ႃႇ တ︀င︀်းꩭူဝ်က︀ေၸ︀ႃꩬ︀ႃက︀မ︀်ႈၸ︀ွင︀်း င︀ႆ︀းတ︀င︀်းၸ︀ူႛတ︀ၢင︀်ႈꩫ︀ႃႛတ︀ေရ︀တ︀ုရ︀ုꩫ︀ꩫ︀ႆ︀ႇ ဝီင︀်းက︀ႄတ︀ရ︀ိမ︀ႆ︀ႛထိုင︀်မ︀ႃးဢ︀ူ။ ၵ︀ဝ်ယ︀ႃႇ ပ︀ၢင︀်ႈꩫ︀ႃႛꩡ︀ဝ်ႛက︀ႅမ︀်ႈဝွင︀်ႇၸ︀ေလ︀ီတ︀်မ︀ႆ︀ႛ ၵ︀ဝ်ႛꩬ︀ီပ︀ေႃလ︀ုမ︀ႆ︀ႛထိုင︀်တ︀ြႃးဢ︀ူ။

² ꩡ︀ဝ်ႛက︀ႅမ︀်ႈဝွင︀်ႇယ︀ႃႇ ပ︀ေႃလ︀ုမ︀ႆ︀ႛပ︀ၢင︀်ႈꩫ︀ႃႛမ︀ꩫ︀်းမ︀ႆ︀ႛ ꩭွင︀်ႇယ︀ဝ်ႇက︀ီး ၸ︀ူႛတ︀ၢင︀်ႈꩫ︀ႃႛတ︀ေရ︀တ︀ုရ︀ုယ︀ႃႇ “ꩡ︀ဝ်ႛက︀ႅမ︀်ႈဝွင︀်ႇတ︀ီၵ︀ႃႛ က︀ွပ︀်ႉပ︀ိူဝ်ႈမ︀ႂ်းꩡ︀ဝ်ႛ ပ︀ိင︀်ꩥ︀ႃꩬ︀တ︀ိယ︀ႂ်ꩫ︀ႆ︀ႇꩬ︀ီ တ︀ူႈၵ︀ႃႛက︀ူꩫ︀်းမ︀ိူင︀်းꩫ︀ႆ︀ႇၵ︀ဝ် ꩫ︀ႆ︀ႛက︀ိꩫ︀်ႈꩫ︀ႆ︀ႛဢ︀ူꩫ︀ီႈꩫ︀ီႈ တ︀ီၵ︀ႃႛꩫ︀မ︀်။ မ︀ႂ်းꩡ︀ဝ်ႛယ︀ႃႇ လ︀ွင︀်ႈဢ︀ꩫ︀်ႈမ︀ၢꩫ︀်ႛမ︀ိူင︀်းၵ︀ိုꩫ︀်ႛယ︀ႂ်မ︀ႂ်ꩬ︀ုင︀်ꩫ︀ႆ︀ႇ ဢ︀ꩫ︀်ႈမ︀ႂ်ဢ︀ꩫ︀်ႈလ︀ၢက︀် ဢ︀ꩫ︀်ႈꩫ︀င︀်ꩭၢင︀်ႇꩫ︀ႆ︀ႇၵ︀ဝ် ꩭီတ︀်ꩬ︀ီဢ︀ူတ︀ီၵ︀ႃႛꩫ︀မ︀်။

³ လ︀ွင︀်ႈဢ︀ꩫ︀်ႈမ︀ႂ်းꩡ︀ဝ်ႛ င︀ႆ︀းꩬ︀ီꩭီတ︀်လ︀ွင︀်ႈꩬ︀ိင︀်လ︀ွင︀်ႈမ︀ိူင︀်းꩫ︀ႆ︀ႇၵ︀ဝ် တ︀ူႈၵ︀ႃႛယ︀ႃႇ ပ︀ေႇꩡ︀ူမ︀်းꩭုမ︀်ယ︀ႂ်ꩬ︀ီ ꩭၢပ︀်ႉတ︀ုင︀်းက︀ꩫ︀်ႈꩬ︀ီဢ︀ူတ︀ီၵ︀ႃႛꩫ︀မ︀်။

⁴ င︀ႆ︀းꩫ︀ႆ︀ႇꩬ︀ီ တ︀ူႈၵ︀ႃႛယ︀ၢမ︀်းမ︀ႂ်းꩡ︀ဝ်ႛမ︀ႆ︀ႛ ၵ︀ၢꩫ︀်ႇꩭႂ်ႛꩭၢမ︀်းတ︀ီၵ︀ႃႛဢ︀ူ။ တ︀ူႈၵ︀ႃႛဢ︀ဝ်ႈပ︀ွတ︀်ꩰꩭႂ်ႛꩫ︀ႆ︀ႛလ︀ဝ်ႈတ︀ၢင︀်တ︀ီၵ︀ႃႛမ︀ႃးတ︀ႃႉ။ ၵ︀ႅꩫ︀်းꩫ︀က︀ွတ︀် ထွမ︀်ꩭႂ်ႛတ︀ီၵ︀ႃႛမ︀ႃးတ︀ႃႉ။

⁵ က︀ူဝ်ႇꩫ︀ႆ︀ႇယ︀ႃႇ က︀ူꩫ︀်းဢ︀ꩫ︀်ႈပ︀ိူꩫ︀်ႈမ︀ႆ︀ႛ ဢ︀ဝ်ႈယ︀ပ︀်ယ︀ၢက︀်ႉလ︀ူင︀်ꩫ︀မ︀်။ က︀ူꩫ︀်းဢ︀ꩫ︀်ႈမ︀ၢꩫ︀်ႛမ︀ိူင︀်းမ︀ႆ︀ႛ ꩡ︀ၢင︀်ႈꩭီတ︀်ၸ︀ေးꩫ︀မ︀်ꩫ︀ꩫ︀ႆ︀ႇ တ︀ူႈၵ︀ႃႛꩭꩫ︀်တ︀ီၵ︀ႃႛဢ︀ူ။ က︀ျူးꩫ︀ႆ︀ႇၵ︀ဝ်မ︀ႆ︀ႛ တ︀င︀်းက︀မ︀်ၸ︀ႃက︀ူႈတ︀ီႈမ︀ႆ︀ႛ မ︀ꩫ︀်းဢ︀ဝ်ႈယ︀ုင︀်ႛဢ︀ဝ်ႈဢ︀ုက︀်မ︀ႃးတ︀ီၵ︀ႃႛဢ︀ူ။ မ︀ꩫ︀်းယ︀ႃႇ ꩭူဝ်က︀ေက︀ုမ︀်ႛꩫ︀ႃꩡ︀ရ︀ႅတ︀်တ︀ီၵ︀ႃႛꩫ︀မ︀်။

⁶ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛက︀ေႃႇ မ︀ꩫ︀်းဢ︀ဝ်ႈယ︀ုက︀်ႉꩭင︀်ႛꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛတ︀ူႈၵ︀ႃႛꩬ︀ႅဝ်ႛမ︀ႃးတ︀ီၵ︀ႃႛꩫ︀မ︀်။ မ︀ꩫ︀်းမ︀ႆ︀ႛတ︀ူႈၵ︀ႃႛ ဢ︀ဝ်ႈ က︀ျမ︀်းꩬ︀ိꩫ︀်မ︀ေႃးꩬ︀ေ ၵ︀ႂ်ႈꩡ︀ႅပ︀်ႉၵ︀ႂ်ႈပ︀ႅတ︀်ႉတ︀ြႃးꩫ︀က︀ေႃႇ

⁷ ꩡ︀ဝ်ႛꩭူဝ်ꩬ︀ိူက︀်လ︀ုတ︀ိမ︀ႃးꩬ︀ီ လ︀ုက︀်ႉမ︀ိုဝ်းတ︀ူႈၵ︀ႃႛမ︀ႆ︀ႛ ꩭိမ︀်က︀ႃတ︀ီၵ︀ႃႛဢ︀ူ။

⁸ က︀ူꩫ︀်းဢ︀ꩫ︀်ႈမ︀ꩫ︀်းမ︀ႆ︀ႛ ပ︀ိꩫ︀်ႇဢ︀ပ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛက︀ေႃႇ ပ︀ၢင︀်ႈꩫ︀ႃႛမ︀ႂ်းꩡ︀ဝ်ႛမ︀ႆ︀ႛꩭႂ်ႛမ︀ႃးတ︀ီၵ︀ႃႛယ︀ဝ်ႇ။ မ︀ႂ်းꩡ︀ဝ်ႛမ︀ꩫ︀်းမ︀ႆ︀ႛ ထၢမ︀်လ︀ႅမ︀်းက︀ီး ဢ︀ꩫ︀်ႈတ︀ူႈၵ︀ႃႛမ︀ꩫ︀်းမ︀ႆ︀ႛပ︀ိꩫ︀်ႇꩫ︀ႆ︀ႇၵ︀ဝ်တ︀င︀်းမ︀ိူင︀်း တ︀ွင︀်းမ︀ႃးတ︀ီၵ︀ႃႛဢ︀ူ” ꩫ︀ꩬ︀ီꩬ︀ွက︀်ႉဢ︀ူ။

⁹ က︀ျူးꩫ︀ႆ︀ႇၵ︀ဝ်က︀ေႃႇ “ၵ︀ၢမ︀်းꩫ︀ႆ︀ႇၵ︀ဝ်ꩡ︀ႂ်ႈတ︀ီၵ︀ႃႛဢ︀ူ” ꩫ︀ꩬ︀ီပ︀ေႃလ︀ုမ︀ႆ︀ႛ လ︀ုပ︀်က︀ꩫ︀်ႈꩬ︀ီ ပ︀ိꩫ︀်ႇဢ︀ပ︀ႅတ︀်ႉက︀ꩫ︀်ႈဢ︀ူ။

လ︀ွင︀်ႈပ︀ေႃလ︀ု ပ︀ၢင︀်ႈꩫ︀ႃႛꩡ︀ဝ်ႛက︀ႅမ︀်ႈဝွင︀်ႇၸ︀ေလ︀ီတ︀်မ︀ႆ︀ႛ က︀ေႛꩬ︀ွက︀်ႉပ︀ွက︀်ႉ

¹⁰ ꩡ︀ဝ်ႛက︀ႅမ︀်ႈဝွင︀်ႇၸ︀ေလ︀ီတ︀်ယ︀ႃႇ မ︀ိုဝ်းပ︀ျႃးꩬ︀ီ ပ︀ေႃလ︀ုမ︀ႆ︀ႛ ꩭႂ်ႛလ︀ဝ်ႈတ︀ၢင︀်က︀ီး မ︀ꩫ︀်းယ︀ႃႇ “မ︀ႂ်းꩡ︀ဝ်ယ︀ႃႇ က︀ꩫ︀်ႛꩫ︀ိူဝ်ၸ︀ꩫ︀်းတ︀ူႈၵ︀ႃႛမ︀ႆ︀ႛ က︀ီလ︀ၢႆ︀ပ︀ီႈပ︀ႅတ︀်ႉတ︀ြႃးမ︀ႃးယ︀ဝ်ႇꩫ︀ꩫ︀ႆ︀ႇ က︀ဝ်ႈၵ︀ႃႛတ︀ွင︀်းတ︀ီၵ︀ႃႛဢ︀ူ။ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ဢ︀မ︀ူးꩫ︀ႆ︀ႇမ︀ႆ︀ႛ လ︀ွင︀်ႈဢ︀ꩫ︀်ႈက︀ဝ်ႈၵ︀ႃႛဢ︀ပ︀ႅတ︀်ႉက︀ၢင︀်းꩫ︀ႆ︀ႇ ꩫ︀ႆ︀ႛလ︀ဝ်ႈတ︀ၢင︀်ꩬ︀ီ က︀ဝ်ႈၵ︀ႃႛ ပ︀ေႇꩡ︀ူမ︀်းꩭုမ︀်ယ︀ႂ်တ︀ီၵ︀ႃႛဢ︀ူ။

¹¹ က︀ဝ်ႈၵ︀ႃႛ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ က︀ႃပ︀ၢႆ︀ႛၸ︀ြႃးမ︀ႃးꩫ︀ႆ︀ႇ ꩬ︀င︀်က︀ူဝ်ꩬ︀ိပ︀်ꩬ︀ွင︀်ဝꩫ︀်းꩫ︀ႆ︀ၢႈတ︀ီၵ︀ႃႛꩫ︀မ︀်။ လ︀ွင︀်ႈꩫ︀ႆ︀ႇ မ︀ႂ်းꩡ︀ဝ်ႛꩡ︀ွပ︀်ထၢမ︀်ꩫ︀ႆ︀ႛတ︀ီၵ︀ႃႛဢ︀ူ။

¹² ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛပ︀တ︀ု ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛပ︀တ︀ု က︀ꩫ︀်ႛꩫ︀ႂ်းဝီင︀်းမ︀ႆ︀ႛပ︀တ︀ု က︀ဝ်ႈၵ︀ႃႛတ︀င︀်းပ︀ိူꩫ︀်ႈꩵ︀ႈထီင︀်က︀ꩫ︀်ႈမ︀ႃး။ ဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈယ︀ုင︀်ႛ၊ ဢ︀ဝ်ႈဢ︀ုက︀်က︀ေႃႇ က︀ဝ်ႈၵ︀ႃႛꩵ︀ႈꩭီတ︀်မ︀ႃးတ︀ီၵ︀ႃႛ။ ဢ︀ꩫ︀်ႈက︀ဝ်ႈၵ︀ႃႛꩭီတ︀်င︀ႆ︀းမ︀ႆ︀ႛက︀ေႃႇ ပ︀ီႈꩫ︀ွင︀်ႇက︀ျူးꩫ︀ႆ︀ႇၵ︀ဝ် ၸ︀ႂ်က︀ေႃႇꩵ︀ႈꩭꩫ︀်မ︀ႃးတ︀ီၵ︀ႃႛ။

¹³ ဢ︀ပ︀ႅတ︀်ႉဢ︀ꩫ︀်ႈင︀ႆ︀ႚ ၵ︀ဝ်ပ︀ိꩫ︀်ႇꩫ︀ႆ︀ႇၵ︀ဝ်မ︀ႆ︀ႛ ၵ︀ဝ်ꩬ︀ၢက︀်ႉꩬ︀ေပ︀ျႃးꩵ︀ႈꩫ︀ႆ︀ႛတ︀ီၵ︀ႃႛ။

¹⁴ ꩫ︀ႆ︀ႇꩫ︀က︀ေႃႇ တ︀ၢင︀်းဢ︀ꩫ︀်ႈက︀ဝ်ႈၵ︀ႃႛ ၸ︀ြႃးပ︀ူလ︀ီꩫ︀်တ︀ူႈၵ︀ႃႛၵ︀ဝ်မ︀ႆ︀ႛ ပ︀ၢႆ︀ႛꩫ︀ႆ︀ႇယ︀ႃႇ တ︀င︀်းၵ︀ဝ်ꩵ︀ႈမ︀ိူꩫ︀်က︀ꩫ︀်ႈတ︀ီၵ︀ႃႛ။ တ︀ၢင︀်းဢ︀ꩫ︀်ႈက︀ဝ်ႈၵ︀ႃႛယ︀ုမ︀်ꩫ︀ႆ︀ႇမ︀ႆ︀ႛ ၵ︀ဝ်ယ︀ႃႇ တ︀ၢင︀်းယ︀ုမ︀်ၸ︀ိတ︀်ꩫ︀ꩬ︀ီ ဝႃႈက︀ꩫ︀်ႈတ︀ီၵ︀ႃႛဢ︀ူ။ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈက︀ျမ︀်းꩬ︀ိꩫ︀်မ︀ေႃꩬ︀ေ ꩫ︀ၵ︀ႃက︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛ လ︀ွေႛꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ က︀ဝ်ႈၵ︀ႃႛက︀ေႃႇ ယ︀ုမ︀်တ︀ီၵ︀ႃႛဢ︀ူ။

¹⁵ က︀ဝ်ႈၵ︀ႃႛက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈတ︀ီၵ︀ႃႛဢ︀ူ။ က︀ူꩫ︀်းꩫ︀ီႈက︀ူꩫ︀်းꩭႆ︀ၢႇတ︀င︀်းလ︀ုင︀် လ︀ုက︀်ႉတ︀ၢင︀်းတ︀ၢႆ︀ႈမ︀ႆ︀ႛ တ︀ီꩫ︀ိပ︀်ပ︀ွက︀်ႉမ︀ႃးꩫ︀မ︀်ꩫ︀ꩫ︀ႆ︀ႇက︀ေႃႇ က︀ဝ်ႈၵ︀ႃႛꩫ︀င︀်ၵ︀ဝ်ꩫ︀က︀ꩫ︀်ႈတ︀ႂ်းထႃႛတ︀ီၵ︀ႃႛဢ︀ူ။

¹⁶ ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈက︀ဝ်ႈၵ︀ႃႛယ︀ုမ︀်ꩫ︀ႆ︀ႇ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀မ︀ိူင︀်း က︀ꩫ︀်ႛꩫ︀ႃႛက︀ူꩫ︀်းမ︀ႆ︀ႛတ︀မ︀ိူင︀်း ꩬ︀ိုဝ်ႈဢ︀ူꩫ︀ꩬ︀ီ က︀ဝ်ႈၵ︀ႃႛ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩬ︀ေႈꩡ︀ႃႉꩬ︀ီဢ︀ူꩫ︀ႆ︀ႇတ︀ီၵ︀ႃႛꩫ︀မ︀်။

¹⁷ က︀ဝ်ႈၵ︀ႃႛလ︀ုက︀်ႉဝီင︀်းယ︀ေယ︀ုꩬ︀လ︀ီမ︀်မ︀ႆ︀ႛဢ︀ွက︀်မ︀ႃးꩬ︀ီ ꩬ︀ွင︀်ꩬ︀ၢမ︀်ပ︀ီႈꩭိုင︀်မ︀ႃးက︀ီး ꩡ︀ႃႇꩬ︀ူင︀်င︀ိူꩫ︀်း ပ︀ီႈꩫ︀ွင︀်ႇၸ︀ူႛၸ︀ၢꩫ︀်ꩫ︀ႆ︀ႇၵ︀ဝ်င︀ႆ︀း ꩡ︀ႃႇၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ႃပ︀ုက︀်ႉꩡ︀ူဝ်ၵ︀ွင︀်လ︀ူꩫ︀ႆ︀ႇဝီင︀်းဢ︀မ︀ႂ်းမ︀ႆ︀ႛ ပ︀ွက︀်ႉက︀ႃဢ︀ူ။

¹⁸ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ꩭီတ︀်မ︀ၢင︀်က︀လ︀ႃမ︀ူတ︀်ꩡ︀ၢင︀်ယ︀ဝ်ႇက︀ီး မ︀ိူဝ်ႈပ︀ုက︀်ႉꩡ︀ူဝ်ၵ︀ွင︀်လ︀ူꩫ︀ႆ︀ႇ က︀ဝ်ႈၵ︀ႃႛမ︀ႆ︀ႛ ၵ︀ဝ်ꩭꩫ︀်တ︀ီၵ︀ႃႛဢ︀ူ။ မ︀ိူဝ်ႈဢ︀မ︀ႂ်း ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ်ꩵ︀ႈယ︀င︀်း။ ဢ︀ꩫ︀်ႈယ︀ုင︀်ႛဢ︀ꩫ︀်ႈဢ︀ုက︀်က︀ေႃႇ ꩵ︀ႈပ︀ီꩫ︀်ႈမ︀ႃးတ︀ီၵ︀ႃႛ။

¹⁹ ꩫ︀ႆ︀ႇꩫ︀က︀ေႃႇ မ︀ိူဝ်ႈဢ︀မ︀ႂ်း ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ က︀ျူးဢ︀ꩫ︀်ႈလ︀ုက︀်ႉဢ︀ႃꩬ︀ျမ︀ႆ︀ႛ မ︀ႃးက︀မ︀်ႈၸ︀ွင︀်းယ︀င︀်းတ︀ီၵ︀ႃႛဢ︀ူ။ ꩬ︀င︀်ဝႃႈက︀ဝ်ႈၵ︀ႃႛမ︀ႆ︀ႛ ၵ︀ႂ်ႈထိုင︀်တ︀ြႃးက︀ီး ၵ︀ဝ်ၸ︀ူႛꩡ︀ဝ်ႛ မ︀ႆ︀ႛမ︀ႃးꩬ︀ီ ဢ︀ꩫ︀်ႈက︀ဝ်ႈၵ︀ႃႛၸ︀ိတ︀်ꩫ︀ႆ︀ႇၵ︀ဝ် ပ︀ၢင︀်ႈꩫ︀ႃႛမ︀ႂ်းꩡ︀ဝ်ႛမ︀ႆ︀ႛ ထိုင︀်တ︀ြႃးꩫ︀ႆ︀ႛတ︀ီၵ︀ႃႛဢ︀ူ။

²⁰ ꩫ︀ႆ︀ႇမ︀ဝ်ꩡ︀ႂ်ႈက︀ီး က︀ူꩫ︀်းဢ︀ꩫ︀်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ်က︀ေႃႇ မ︀ိူဝ်ႈက︀ဝ်ႈၵ︀ႃႛမ︀ႆ︀ႛ ပ︀ၢင︀်ႈꩫ︀ႃႛက︀ုမ︀်ႛꩡ︀ဝ်ႛတ︀ြႃးမ︀ႆ︀ႛ ထိုင︀်တ︀ြႃးမ︀ႃးꩫ︀ႆ︀ႇ ဢ︀ပ︀ႅတ︀်ႉက︀ဝ်ႈၵ︀ႃႛမ︀ႆ︀ႛ ꩭꩫ︀်မ︀ႃးက︀ီး င︀ႆ︀ႚ ပ︀ျႃးꩬ︀ၢက︀်ႉꩬ︀ေꩫ︀ႆ︀ႛတ︀ီၵ︀ႃႛဢ︀ူ။

²¹ ပ︀ၢင︀်ႈတ︀ြႃးမ︀ႆ︀ႛ မ︀ိူဝ်ႈက︀ေႛꩬ︀ွက︀်ႉပ︀ွက︀်ႉꩫ︀ႆ︀ႇ “င︀ႆ︀ႚက︀ဝ်ႈၵ︀ႃႛမ︀ႆ︀ႛ ꩬ︀ူꩡ︀ဝ်ႛထိုင︀်တ︀ြႃးꩫ︀ႆ︀ႇ လ︀ၢႆ︀းပ︀ိူဝ်ႈက︀ဝ်ႈၵ︀ႃႛ ၸ︀ူႛတ︀ႆ︀ၢႈꩫ︀ႆ︀ႇၵ︀ဝ်တ︀ီꩫ︀ိပ︀်ပ︀ွက︀်ႉꩫ︀မ︀် ꩫ︀ꩫ︀ႆ︀ႇမ︀ႆ︀ႛတ︀ႂ်းထႃႛꩫ︀ႆ︀ႇꩬ︀ီꩫ︀မ︀်” ꩫ︀ꩬ︀ီက︀ဝ်ႈၵ︀ႃႛ ဢ︀ိဝ်မ︀ႃးတ︀ီၵ︀ႃႛဢ︀ူ။ က︀ဝ်ႈၵ︀ႃႛမ︀ႆ︀ႛ ၵ︀ဝ်တ︀ၢင︀်ဢ︀ပ︀ႅတ︀်ႉꩫ︀ႆ︀ႇ က︀ွပ︀်ႉပ︀ိူဝ်ႈၵ︀ၢမ︀်းဢ︀မ︀ႂ်းꩬ︀ီတ︀ီၵ︀ႃႛꩵ︀ထၢင︀်ႇ” ꩫ︀ꩬ︀ီꩬ︀ွက︀်ႉပ︀ွက︀်ႉ ဢ︀ူ။

²² ꩡ︀ဝ်ႛက︀ႅမ︀်ႈဝွင︀်ႇၸ︀ေလ︀ီတ︀်ယ︀ႃႇ လ︀ွင︀်းတ︀ၢင︀်းꩡ︀ဝ်ႛယ︀ေꩬ︀ုꩫ︀ႆ︀ႇ တ︀ွင︀်းꩫ︀ီႈꩫ︀ီႈ ဝႆ︀ႇꩫ︀ႆ︀ႇꩬ︀ီ ဢ︀ꩫ︀်ႈꩡ︀ႅပ︀်ႉတ︀ြႃးꩫ︀ႆ︀ႇ ဢ︀မ︀ႂ်းမ︀ႆ︀ႛဢ︀ဝ်ႈꩫ︀ႂ်ဝႆ︀ႇဢ︀ူ။ မ︀ꩫ︀်းယ︀ႃႇ “မ︀ိူဝ်ႈꩡ︀ဝ်ႛꩭူဝ်ꩬ︀ိူက︀်လ︀ုတ︀ိထိုင︀်မ︀ႃးꩫ︀ႆ︀ႇꩬ︀ိုင︀် ဢ︀မ︀ူးꩬ︀ူမ︀ႆ︀ႛ ပ︀ႅတ︀်ႉတ︀ြႃးꩭႂ်ႛက︀ွတ︀်” ꩫ︀ဝꩫ︀်ႇ။

²³ ယ︀ဝ်ႇက︀ီး ꩡ︀ဝ်ႛꩭူဝ်ꩬ︀ိူက︀်ဢ︀ွꩫ︀်ဢ︀ꩫ︀်ႈပ︀ႂ်ႇပ︀ေႃလ︀ုမ︀ႆ︀ႛ ဢ︀မ︀ိင︀်းꩭႂ်ႛꩬ︀ီပ︀ေႃလ︀ုမ︀ႆ︀ႛ ꩭႂ်ႛပ︀ႂ်ႇꩫ︀ီႈꩫ︀ီႈ ဢ︀ူ။ တ︀ႆ︀းက︀ူဝ်ႇဢ︀ꩫ︀်ႈပ︀ေႃလ︀ုမ︀ႆ︀ႛမ︀ိုင︀်ႇꩫ︀ႆ︀ႇၵ︀ဝ်မ︀ႆ︀ႛက︀ေႃႇ ဢ︀ၵ︀ၢင︀်းဢ︀ꩫ︀်ႈမ︀ိုင︀်ႇꩭႂ်ႛဝႆ︀ႇဢ︀ူ။

ꩡ︀ဝ်ႛက︀ႅမ︀်ႈဝွင︀်ႇꩫ︀ၵ︀ႃ ၸ︀ူႛမ︀ေးမ︀ꩫ︀်းမ︀ႆ︀ႛ ပ︀ေႃလ︀ုပ︀ျႃးꩬ︀ၢက︀်ႉꩬ︀ေ

²⁴ ꩬ︀ွင︀်ꩬ︀ၢမ︀်ဝꩫ︀်းလ︀ိူင︀်ႈꩭိုင︀်က︀ီး ꩡ︀ဝ်ႛက︀ႅမ︀်ႈဝွင︀်ႇၸ︀ေလ︀ီတ︀်ꩫ︀ၵ︀ႃ ၸ︀ူႛမ︀ေးမ︀ꩫ︀်းတ︀ရ︀ုတ︀ိလ︀ေၵ︀ဝ်ထိုင︀်မ︀ႃးဢ︀ူ။ ၸ︀ူႛမ︀ေးမ︀ꩫ︀်းယ︀ႃႇ က︀ျူးꩫ︀မ︀်။ ꩡ︀ဝ်ႛက︀ႅမ︀်ႈဝွင︀်ႇယ︀ႃႇ ပ︀ေႃလ︀ုမ︀ႆ︀ႛꩭႂ်ႛꩭွင︀်ႇမ︀ႃးꩬ︀ီ လ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇ လ︀ုက︀်ႉပ︀ေႃလ︀ုမ︀ႆ︀ႛထွမ︀်ဢ︀ူ။

²⁵ ꩫ︀ႆ︀ႇꩫ︀က︀ေႃႇ ပ︀ေႃလ︀ုယ︀ႃႇ လ︀ွင︀်ႈꩬ︀ိုဝ်ႈတ︀ူဝ်၊ လ︀ွင︀်ႈက︀ꩫ︀်ႛက︀ႃမ︀က︀ုင︀်ꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛတ︀ီပ︀ႅတ︀်ႉတ︀ြႃးꩫ︀ႆ︀ႇၵ︀ဝ်ꩭူဝ်းက︀ီး ꩡ︀ဝ်ႛက︀ႅမ︀်ႈဝွင︀်ႇꩫ︀ႆ︀ႇက︀ူဝ်ႈꩬ︀ီ “တ︀ေႃႉ င︀ႆ︀ႚမ︀ႂ်းက︀ႃꩫ︀ႆ︀ႛယ︀ဝ်ႇ၊ က︀ꩫ︀်ႛလ︀င︀်မ︀ႆ︀ႛ မ︀ိူဝ်ႈတ︀ၢင︀်းတ︀ူဝ်ꩫ︀ႆ︀ႇပ︀ၢꩫ︀်ႈလ︀ိူင︀်ႈꩭွင︀်ႇပ︀ွက︀်ႉက︀ွတ︀်” ꩫ︀ဝꩫ︀်ႇ။

²⁶ ꩡ︀ဝ်ႛက︀ႅမ︀်ႈဝွင︀်ႇယ︀ႃႇ မ︀ꩫ︀်းမ︀ႆ︀ႛၵ︀ꩫ︀်တ︀ႂ်းပ︀ေႃလ︀ု တ︀ီꩫ︀ႅပ︀်ႉင︀ိူꩫ︀်းꩬ︀ီ မ︀ꩫ︀်းမ︀ႆ︀ႛမ︀ဝ်ယ︀ၢꩫ︀်မ︀ဝ်ယ︀ၢꩫ︀်ꩭွင︀်ႇꩬ︀ီ တ︀ၢꩫ︀်ႛၵ︀ၢမ︀်းဢ︀ူ။

²⁷ ၵ︀ꩫ︀်ꩬ︀ွင︀်ပ︀ီႈꩭိုင︀်က︀ီး ပ︀ေႃက︀ိၸ︀ေတ︀ုယ︀ႃႇ လ︀ုက︀်ႉၸ︀ေလ︀ီတ︀်မ︀ႆ︀ႛ ဢ︀ယ︀ႃꩡ︀ဝ်ႛက︀ႅမ︀်ႈဝွင︀်ႇꩬ︀ုပ︀်ႉဢ︀ဝ်ႈဢ︀ူ။ ꩡ︀ဝ်ႛက︀ႅမ︀်ႈဝွင︀်ႇက︀ဝ်ၸ︀ေလ︀ီတ︀်ယ︀ႃႇ ꩭႂ်ႛပ︀ူဝ်းက︀ꩫ︀်ႛꩫ︀ႃႛက︀ျူးꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩫ︀ႆ︀ႛꩫ︀ႃႛဢ︀ိက︀်ꩫ︀ႆ︀ႇ ပ︀ေႃလ︀ုမ︀ႆ︀ႛက︀ၢပ︀်ꩬ︀ီ ၵ︀င︀်ဝႆ︀ႇဢ︀ူ။