ထဝ်ꩡ︀တ︀်ႉၵ︀ဝ် 22 - Khamti Shan

¹ “ပ︀ူဝ်မ︀ေပ︀ီႈꩫ︀ွင︀်ႇၵ︀ဝ်ꩴ︀း ၵ︀ၢမ︀်းဢ︀ꩫ︀်ႈက︀ဝ်ႈၵ︀ႃႛ တ︀ီက︀ေႛတ︀ွပ︀်ꩫ︀ႆ︀ႇမ︀ႆ︀ႛ ထွမ︀်က︀ꩫ︀်ႈတ︀ီၵ︀ႃႛမ︀ႃးတ︀ႃႉ” ꩫ︀ဝꩫ︀်ႇ။

² မ︀ꩫ︀်းဢ︀ဝ်ႈၵ︀ၢမ︀်းꩭေပ︀ရ︀ူးဝႃႈꩫ︀ႆ︀ႇမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ်ꩫ︀ႆ︀ႛꩥ︀ိꩫ︀်းက︀ီး ဢ︀ေႈၵ︀ႅꩫ︀်းတ︀ီတ︀်ꩡ︀ိပ︀်ႉꩰက︀ꩫ︀်ႈဢ︀ူ။

³ ပ︀ေႃလ︀ုယ︀ႃႇ က︀ၢပ︀်ꩬ︀ီ “က︀ဝ်ႈၵ︀ႃႛယ︀ႃႇက︀ျူး ဢ︀ꩫ︀်ႈမ︀ိူင︀်းက︀ိလ︀ိက︀ိ ဝီင︀်းတ︀ႃꩬ︀ုမ︀ႆ︀ႛယ︀င︀်းတ︀ီၵ︀ႃႛꩫ︀မ︀်။ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ယ︀ႂ်မ︀ႃးꩬ︀ီ က︀ျမ︀်းꩬ︀ိꩫ︀်မ︀ေႃꩬ︀ေဢ︀ꩫ︀်ႈပ︀ူလ︀ီꩫ︀်ၵ︀ဝ် က︀မ︀်ႈက︀ႅင︀်းမ︀ႃးꩫ︀ႆ︀ႇ လ︀ုက︀်ႉꩬ︀ြႃလ︀ူင︀်က︀ႃမ︀လ︀ျေလ︀မ︀ႆ︀ႛ ꩬ︀ွꩫ︀်ဢ︀ဝ်ႈထက︀်ꩰမ︀ႃးမ︀ꩫ︀မ︀်။ င︀ႆ︀ႚ ꩫ︀င︀်ꩬ︀ူꩡ︀ဝ်ႛ ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ႂ်ႈလ︀ွေႛꩭႅင︀်းꩫ︀က︀ꩫ︀်ႈ က︀ဝ်ႈၵ︀ႃႛက︀ေႃႇ ꩡ︀ႂ်ႈလ︀ွေႛꩭႅင︀်းမ︀ႃးတ︀ီၵ︀ႃႛဢ︀ူ။

⁴ က︀ဝ်ႈၵ︀ႃႛယ︀ႃႇ က︀ူꩫ︀်းဢ︀ꩫ︀်ႈꩡ︀ွမ︀်းတ︀ၢင︀်းꩡ︀ဝ်ႛယ︀ေꩬ︀ုꩫ︀ႆ︀ႇၵ︀ဝ်မ︀ႆ︀ႛ တ︀ူဝ်ထိုင︀်ဢ︀ဝ်ႈတ︀ၢႆ︀ႈပ︀ုꩫ︀်ႛꩫ︀မ︀် ꩫ︀ိက︀်ႉꩬ︀ၢက︀်ႉမ︀ႃးꩫ︀ႆ︀ႇ။ ၸ︀ူႛꩡ︀ၢႆ︀း၊ ၸ︀ူႛယ︀ိင︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀ႅဝ်ႛꩬ︀ီꩬ︀ႂ်ထွင︀်မ︀ႃးဢ︀ူ။

⁵ ဢ︀ꩫ︀်ႈက︀ဝ်ႈၵ︀ႃႛဝႃႈꩫ︀ႆ︀ႇ ꩡ︀ႂ်ႈဢ︀ူꩫ︀ꩫ︀ႆ︀ႇ ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉတ︀မ︀ိူင︀်း၊ ꩡ︀ဝ်ႛက︀ုမ︀်ႛတ︀ြႃးက︀ျူးတ︀င︀်းမ︀ိူင︀်းတ︀မ︀ိူင︀်း ꩭီတ︀်ꩬ︀ၢက︀်ႉꩬ︀ေꩫ︀ႆ︀ႛတ︀ီၵ︀ႃႛဢ︀ူ။ က︀ဝ်ႈၵ︀ႃႛ လ︀ုက︀်ႉၵ︀ဝ်မ︀ႆ︀ႛ လ︀ိက︀်ႉဢ︀ꩫ︀်ႈပ︀ီႈꩫ︀ွင︀်ႇဝီင︀်းတ︀မ︀ႃတ︀ႅတ︀်ꩫ︀ႆ︀ႇၵ︀ဝ်မ︀ႆ︀ႛတ︀ႅမ︀်ႛꩬ︀ီꩬ︀င︀်ၵ︀ၢမ︀်းꩫ︀ႆ︀ႇ ဢ︀ဝ်ႈမ︀ႃးဢ︀ူ။ ယ︀ဝ်ႇက︀ီး က︀ူꩫ︀်းဢ︀ꩫ︀်ႈယ︀ုမ︀်ယ︀မ︀်ႈꩡ︀ဝ်ႛယ︀ေꩬ︀ုꩫ︀ႆ︀ႇၵ︀ဝ်မ︀ႆ︀ႛ ꩬ︀ႅဝ်ႛၸ︀ုက︀်ꩬ︀ီဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ဢ︀ဝ်ႈမ︀ႃးင︀ႆ︀း ꩭႂ်ႛတ︀ၢမ︀်ဢ︀ပ︀ႅတ︀်ႉက︀ွတ︀်ꩫ︀ꩬ︀ီ က︀ဝ်ႈၵ︀ႃႛက︀ႃဝီင︀်းတ︀မ︀ႃတ︀ႅတ︀်မ︀ႃးဢ︀ူ။

လ︀ွင︀်ႈပ︀ေႃလ︀ုၵ︀ႆ︀ႈထဝ်ဢ︀ꩫ︀်ႈမ︀ꩫ︀်းပ︀ီꩫ︀်ႈၸ︀ူႛယ︀ုမ︀်ယ︀မ︀်ႈမ︀ႃး

⁶ မ︀ိူဝ်ႈတ︀ူႈၵ︀ႃႛဢ︀ွက︀်တ︀ၢင︀်းꩬ︀ီ ဝီင︀်းတ︀မ︀ႃတ︀ႅတ︀်မ︀ႆ︀ႛတ︀ီထိုင︀်ꩫ︀ႆ︀ႇ မ︀ိူဝ်ႈက︀ၢင︀်ႈဝꩫ︀်းတ︀ီင︀်ႈꩫ︀ႆ︀ႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛ ꩬ︀ၢႆ︀လ︀ႅင︀်းလ︀ူင︀်ဢ︀ꩫ︀်ႈလ︀ိူင︀်ႈ ꩡ︀ွက︀်ႉက︀ဝ်ႈမ︀ႆ︀ႛ က︀တ︀ိက︀်က︀တ︀ၢင︀်းꩭုင︀်ႈလ︀ႅင︀်းမ︀ႃးဢ︀ူ။

⁷ က︀ဝ်ႈၵ︀ႃႛလ︀ူမ︀်ႇက︀ႃက︀ီး “ꩭိူဝ်း ꩬ︀ေႃလ︀ုꩭီတ︀်က︀ꩬ︀င︀်ꩫ︀ႆ︀ မ︀ႂ်းက︀ဝ်ႈမ︀ႆ︀ႛꩫ︀ိက︀်ႉꩬ︀ၢက︀်ႉꩫ︀ႆ︀ႇ” ꩫ︀ꩬ︀ီꩬ︀ီင︀်ထၢမ︀်ꩫ︀ႆ︀ႛꩥ︀ိꩫ︀်းဢ︀ူ။

⁸ က︀ဝ်ႈၵ︀ႃႛယ︀ႃႇ “ꩡ︀ဝ်ႛꩴ︀း မ︀ႂ်းꩡ︀ဝ်ႛယ︀ႃႇၸ︀ႂ်တ︀ီၵ︀ႃႛꩫ︀ႆ︀” ꩫ︀ꩬ︀ီထၢမ︀်က︀ီး ꩬ︀ီင︀်ဢ︀မ︀ႂ်းယ︀ႃႇ “က︀ဝ်ႈယ︀ႃႇ ꩡ︀ဝ်ႛယ︀ေꩬ︀ု က︀ူꩫ︀်းဝီင︀်းꩫ︀ႃꩡ︀ရ︀ႅတ︀် ဢ︀ꩫ︀်ႈမ︀ႂ်းꩫ︀ိက︀်ႉꩬ︀ၢက︀်ႉꩫ︀ႆ︀ႇꩫ︀မ︀်” ꩫ︀ဝꩫ︀်ႇ။

⁹ က︀ူꩫ︀်းဢ︀ꩫ︀်ႈတ︀င︀်းက︀ဝ်ႈၵ︀ႃႛလ︀ွေႛꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈလ︀ႅင︀်းဢ︀မ︀ႂ်းမ︀ႆ︀ႛꩭꩫ︀်ꩫ︀က︀ေႃႇ ꩬ︀ီင︀်ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛတ︀ၢꩫ︀်ႛꩫ︀ႆ︀ႇမ︀ႆ︀ႛယ︀ႃႇ ၸ︀ႂ်က︀ေႃႇꩵ︀ႈꩫ︀ႆ︀ႛꩥ︀ိꩫ︀်း။

¹⁰ ꩫ︀ႆ︀ႇမ︀ႆ︀ႛ က︀ဝ်ႈၵ︀ႃႛယ︀ႃႇ “ꩡ︀ဝ်ႛꩴ︀း က︀ဝ်ႈၵ︀ႃႛဝႃႈꩭီတ︀်က︀ꩬ︀င︀်တ︀ီၵ︀ႃႛꩫ︀ႆ︀” ꩫ︀ꩬ︀ီထၢမ︀်က︀ီး မ︀ꩫ︀်းꩡ︀ဝ်ႛယ︀ႃႇ “လ︀ုက︀်ႉꩬ︀ီဝီင︀်းတ︀မ︀ႃတ︀ႅတ︀်မ︀ႆ︀ႛက︀ႃတ︀ႃႉ။ ဢ︀မ︀ႂ်းမ︀ႆ︀ႛထိုင︀်က︀ီး ဢ︀မ︀ူးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇမ︀ႂ်းꩡ︀ွင︀်ဝႆ︀ႇꩫ︀ႆ︀ႇၵ︀ဝ် တ︀င︀်းမ︀ိူင︀်းၵ︀ႆ︀ႈက︀ွက︀်” ꩫ︀ဝꩫ︀်ႇ။

¹¹ က︀ဝ်ႈၵ︀ႃႛယ︀ႃႇ လ︀ၢႆ︀းပ︀ိူဝ်ႈဢ︀ꩫ︀်ႈလ︀ႅင︀်းဢ︀မ︀ႂ်းတ︀ွင︀်ꩭႅင︀်းꩫ︀ႆ︀ႇꩬ︀ီ တ︀ႃႈမ︀ွတ︀်က︀ႃဢ︀ူ။ င︀ႆ︀းꩬ︀ီ က︀ူꩫ︀်းဢ︀ꩫ︀်ႈတ︀င︀်းက︀ဝ်ႈၵ︀ႃႛလ︀ွေႛꩫ︀ႆ︀ႇၵ︀ဝ်ꩬ︀ိုင︀် မ︀ိုဝ်းက︀ဝ်ႈမ︀ႆ︀ႛꩡ︀ုင︀်ႈꩬ︀ီ ဝီင︀်းတ︀မ︀ႃတ︀ႅတ︀်မ︀ႆ︀ႛꩬ︀ူင︀်ꩭႂ်ႛဢ︀ူ။

¹² ဝီင︀်းဢ︀မ︀ႂ်းမ︀ႆ︀ႛ ဢ︀ႃꩫ︀ꩫ︀ိꩫ︀ꩫ︀ႆ︀ႇ က︀ူꩫ︀်းဢ︀ꩫ︀်ႈ က︀ျမ︀်းꩬ︀ိꩫ︀်မ︀ေႃꩬ︀ေꩡ︀ွမ︀်းꩬ︀ီ ꩡ︀ႂ်ႈၸ︀ြႃးတ︀ြႃးယ︀င︀်းꩫ︀ႆ︀ႇ က︀ူဝ်ႇလ︀ိူင︀်ႈယ︀င︀်းဢ︀ူ။ က︀ျူးဢ︀ꩫ︀်ႈဢ︀မ︀ႂ်းမ︀ႆ︀ႛဢ︀ူꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛꩫ︀ၢပ︀်ႉယ︀မ︀်ႈလ︀ူင︀်ꩫ︀မ︀်။

¹³ မ︀ꩫ︀်းယ︀ႃႇ က︀ဝ်ႈၵ︀ႃႛမ︀ႆ︀ႛမ︀ႃးꩬ︀ီ တ︀ၢႆ︀ႛက︀ဝ်ႈၵ︀ႃႛမ︀ႆ︀ႛꩬ︀ဝ်းင︀ႆ︀း “ꩫ︀ွင︀်ႇက︀ဝ်ႈ ꩬ︀ေႃလ︀ု၊ တ︀ႃႈမ︀ႂ်းꩭႂ်ႛꩭꩫ︀်က︀ႃတ︀ႃႉ” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛၵ︀တ︀်ႉၵ︀ႅင︀်း က︀ဝ်ႈၵ︀ႃႛတ︀ႃႈꩭꩫ︀်ပ︀ွက︀်ႉꩬ︀ီ မ︀ꩫ︀်းမ︀ႆ︀ႛꩫ︀ူႈက︀ီး

¹⁴ “ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ်ပ︀ႆ︀ၢႛဝႆ︀ႈမ︀ႃးꩫ︀ႆ︀ႇယ︀ႃႇ ꩭႂ်ႛပ︀ူဝ်းမ︀ႂ်း ဢ︀လ︀ၢင︀်းမ︀ꩫ︀်းꩡ︀ဝ်ႛမ︀ႆ︀ႛ တ︀ွင︀်းꩫ︀ႆ︀ႇလ︀ိူင︀်ႈ၊ ၸ︀ူႛꩡ︀ႂ်ႇမ︀ꩫ︀်းꩡ︀ဝ်ႛဢ︀ꩫ︀်ႈꩬ︀ိုဝ်ႈတ︀ူဝ်မ︀ႆ︀ႛတ︀ွင︀်းꩬ︀ီ ꩬ︀ီင︀်မ︀ꩫ︀်းꩡ︀ဝ်ႛမ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛꩥ︀ိꩫ︀်းꩫ︀ႆ︀ႇလ︀ိူင︀်ႈ မ︀ႂ်းမ︀ႆ︀ႛလ︀ိူက︀်ႉဝႆ︀ႇယ︀ဝ်ႇ။

¹⁵ မ︀ႂ်းယ︀ႃႇ တ︀ီပ︀ီꩫ︀်ႈꩬ︀ၢက︀်ႉꩬ︀ေမ︀ꩫ︀်းꩡ︀ဝ်ႛꩫ︀မ︀်။ ဢ︀ꩫ︀်ႈမ︀ႂ်းꩭꩫ︀်မ︀ႃး ꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ႇၵ︀ဝ် ပ︀ိူꩫ︀်ႈက︀ူႈက︀ူဝ်ႇမ︀ႆ︀ႛ ဝႃႈၵ︀ႆ︀ႈဢ︀ူ။

¹⁶ င︀ႆ︀းꩫ︀ႆ︀ႇꩬ︀ီ င︀ႆ︀ႚဢ︀ဝ်ႈက︀ႅင︀်လ︀ုက︀်ႉꩬ︀ီ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈတ︀ႃႉ။ ဢ︀ပ︀ႅတ︀်ႉမ︀ႂ်းꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛꩬ︀ုက︀်ႉꩬ︀ေၸ︀ေလ︀ွႆ︀းꩭႂ်ႛꩫ︀ႆ︀ႇ ယ︀ွꩫ︀်းꩬ︀ူးတ︀ႃႉ” ꩫ︀ဝꩫ︀်ႇ။

လ︀ွင︀်ႈပ︀ေႃလ︀ုမ︀ႆ︀ႛပ︀ွႆ︀ꩡ︀ႂ်ႇ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛက︀ႃꩭူဝ်းၵ︀ၢဝ်ႈၵ︀ၢမ︀်းꩫ︀ီႈ

¹⁷ မ︀ိူဝ်ႈက︀ဝ်ႈၵ︀ႃႛ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ထိုင︀်ပ︀ွက︀်ႉꩬ︀ီ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ယ︀ွꩫ︀်းꩬ︀ူးꩬ︀ီဢ︀ူꩫ︀ႆ︀ႇ ꩡ︀ဝ်ႛယ︀ေꩬ︀ုꩭႂ်ႛၿျႃၻိက︀်ႉဢ︀ူ။

¹⁸ ꩡ︀ဝ်ႛယ︀ေꩬ︀ု က︀ဝ်ႈၵ︀ႃႛမ︀ႆ︀ႛပ︀ျႃးတ︀ူဝ်ႈꩬ︀ီ “မ︀ႂ်းလ︀ုက︀်ႉယ︀ေရ︀ုꩬ︀လ︀ိမ︀်မ︀ႆ︀ႛ ဢ︀ဝ်ႈက︀ႅင︀်ဢ︀ွက︀်က︀ႃတ︀ႃႉ။ က︀ူꩫ︀်းဢ︀ꩫ︀်ႈဢ︀ူမ︀ႆ︀ႛꩫ︀ႆ︀ႇၵ︀ဝ်ယ︀ႃႇ မ︀ႂ်းလ︀ွင︀်ႈက︀ဝ်ႈၵ︀ႂ်ႈလ︀ႂ်ႈပ︀ျႃးꩬ︀ၢက︀်ႉꩬ︀ေꩫ︀က︀ေႃႇ ၵ︀ၢမ︀်းမ︀ႂ်းမ︀ႆ︀ႛတ︀ီꩭၢပ︀်ႉꩵ︀ႈꩡ︀ႂ်ႈ” ꩫ︀ဝꩫ︀်ႇ။

¹⁹ င︀ႆ︀းက︀ီး က︀ဝ်ႈၵ︀ႃႛယ︀ႃႇ “ꩡ︀ဝ်ႛꩴ︀း ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈၵ︀ႃႛက︀ႃꩬ︀ီ ၸ︀ူႛဢ︀ꩫ︀်ႈမ︀ႂ်းꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ꩬ︀ႅဝ်ႛꩬ︀ီတ︀ုက︀်ႉꩰပ︀ူဝ်ႇꩰမ︀ႃးꩫ︀ႆ︀ႇ ၵ︀ဝ်တ︀ွင︀်းꩫ︀ီႈꩫ︀ီႈ တ︀ီၵ︀ႃႛဢ︀ူ။

²⁰ မ︀ိူဝ်ႈၸ︀ူႛꩬ︀ၢက︀်ႉꩬ︀ေမ︀ႂ်းꩡ︀ဝ်ႛ ꩬ︀တ︀ေၸ︀ꩫ︀်မ︀ႆ︀ႛ ပ︀ိူꩫ︀်ႈဢ︀ဝ်ႈတ︀ၢႆ︀ႈꩫ︀ႆ︀ႇက︀ေႃႇ က︀ဝ်ႈၵ︀ႃႛတ︀ၢႆ︀ႛဢ︀မ︀ႂ်းမ︀ႆ︀ႛꩬ︀ဝ်းင︀ႆ︀း ၵ︀ိူင︀်ႈၸ︀ူႛဢ︀ဝ်ႈတ︀ၢႆ︀ႈမ︀ꩫ︀်းꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈၵ︀ႃႛပ︀ႂ်ႇꩭႂ်ႛꩬ︀ီ ၵ︀ဝ်မ︀ႆ︀ႛ လ︀ွမ︀်ႈလ︀ွေႛမ︀ႃးတ︀ီၵ︀ႃႛဢ︀ူ” ꩫ︀ꩬ︀ီ ဝႃႈပ︀ွက︀်ႉဢ︀ူ။

²¹ င︀ႆ︀းက︀ီး ꩡ︀ဝ်ႛယ︀ေꩬ︀ုယ︀ႃႇ “က︀ႃတ︀ႃႉ။ က︀ဝ်ႈမ︀ႂ်းမ︀ႆ︀ႛ တ︀ီႈက︀ႆ︀ႈ ပ︀ႃႛဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ပ︀ွႆ︀ꩡ︀ႂ်ႇက︀ွတ︀်” ꩫ︀ဝꩫ︀်ႇ”။

²² က︀ူꩫ︀်းꩫ︀ႆ︀ႇၵ︀ဝ်ယ︀ႃႇ ဢ︀ဝ်ႈထိုင︀်ꩫ︀ႆ︀ႇ တ︀ိင︀်ꩬ︀ီထွမ︀်က︀ꩫ︀်ႈယ︀ဝ်ႇက︀ီး “မ︀ꩫ︀်းမ︀ႆ︀ႛ ၵ︀ွတ︀်တ︀ႃႉ။ ဢ︀ဝ်ႈတ︀ၢႆ︀ႈတ︀ႃႉ။ မ︀ꩫ︀်းယ︀ႃႇ ဢ︀ူမ︀ိူင︀်းက︀ၢင︀်ႈꩵ︀ႈထႅက︀်ႉ” ꩫ︀ꩬ︀ီ တ︀င︀်းမ︀ိူင︀်းဢ︀ိဝ်ꩬ︀ႅꩫ︀်က︀ꩫ︀်ႈဢ︀ူ။

²³ ၵ︀ဝ်ယ︀ႃႇ ꩬ︀ိူဝ်ႛထမ︀ူင︀်ႇၵ︀ဝ်ဝိူက︀်ႉယ︀ၢင︀်င︀ႆ︀း က︀ၢင︀်ႈꩭၢဝ်မ︀ႆ︀ႛၸ︀ွင︀်ꩫ︀ိꩫ︀်ႈꩫ︀ႆ︀ႇၵ︀ဝ်ပ︀ိုဝ်ၵ︀ွတ︀်င︀ႆ︀းꩬ︀ီ ဢ︀ိဝ်က︀ꩫ︀်ႈဢ︀ူ။

²⁴ ꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ꩬ︀ိူက︀်ရ︀ေႃမ︀ꩫ︀ႆ︀ႇ ဢ︀မ︀ိင︀်းꩭႂ်ႛꩬ︀ီ ပ︀ေႃလ︀ုမ︀ႆ︀ႛꩭႂ်ႛꩭွင︀်ႇက︀ႃက︀ꩫ︀်ႛꩫ︀ႂ်းတ︀ၢပ︀်ႉꩬ︀ိူက︀်င︀ႆ︀း လ︀ၢႆ︀းပ︀ိူဝ်ႈက︀ꩬ︀င︀် က︀ူꩫ︀်းꩫ︀ႆ︀ႇၵ︀ဝ်ဢ︀ုက︀်ဢ︀ဝ်က︀ꩫ︀်ႈꩫ︀ႆ︀ႇꩫ︀ꩫ︀ႆ︀ႇ ꩭႂ်ႛတ︀ုက︀်ႉꩬ︀ီꩡ︀ႅပ︀်ႉဢ︀ူ။

²⁵ မ︀ိူဝ်ႈမ︀ꩫ︀်းမ︀ႆ︀ႛ တ︀ုက︀်ႉက︀ွတ︀်ꩫ︀ꩬ︀ီ ဢ︀ဝ်ႈꩬ︀ၢႆ︀ၸ︀ုက︀်က︀ꩫ︀်ႈꩫ︀ႆ︀ႇ ပ︀ေႃလ︀ုယ︀ႃႇ ꩡ︀ဝ်ႛꩭူဝ်ꩬ︀ိူက︀်ဢ︀ွꩫ︀် ဢ︀ꩫ︀်ႈတ︀ၢႆ︀ႛမ︀ꩫ︀်းမ︀ႆ︀ႛ ꩬ︀ဝ်းꩬ︀ီဢ︀ူꩫ︀ႆ︀ႇမ︀ႆ︀ႛ “က︀ဝ်ႈၸ︀ူႛပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀မ︀ႆ︀ႛ ပ︀ၢင︀်ႈတ︀ြႃးမ︀ႆ︀ႛမ︀ဝ်ꩡ︀ႅပ︀်ႉဢ︀ွꩫ︀်ႈꩬ︀ီ တ︀ုက︀်ႉꩫ︀ႆ︀ႇ ꩥ︀ႃးပ︀ိူင︀်ႈဢ︀ေႃး” ꩫ︀ꩬ︀ီထၢမ︀်ဢ︀ူ။

²⁶ ၵ︀ၢမ︀်းꩫ︀ႆ︀ႇမ︀ႆ︀ႛꩫ︀ႆ︀ႛꩥ︀ိꩫ︀်းက︀ီး ꩡ︀ဝ်ႛꩭူဝ်ꩬ︀ိူက︀်ဢ︀ွꩫ︀်ꩫ︀ႆ︀ႇ ꩡ︀ဝ်ႛꩭူဝ်ꩬ︀ိူက︀်မ︀ႆ︀ႛက︀ႃꩬ︀ီ “ꩡ︀ဝ်ꩴ︀း ꩭလ︀ိုဝ်ꩫ︀ႆ︀ꩭီတ︀်င︀ႆ︀းတ︀ီၵ︀ႃႛꩫ︀ႆ︀ႇ။ မ︀ꩫ︀်းယ︀ႃႇ က︀ူꩫ︀်းမ︀ိူင︀်းရ︀ေႃမ︀ꩬ︀ိုင︀်ꩡ︀ႂ်ႈက︀ေႃႇ” ꩫ︀ဢ︀ူ။

²⁷ ꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ꩬ︀ိူက︀်ꩫ︀ႆ︀ႇ ပ︀ေႃလ︀ုမ︀ႆ︀ႛမ︀ႃးꩬ︀ီ “မ︀ႂ်းက︀ူꩫ︀်းမ︀ိူင︀်းရ︀ေႃမ︀က︀ျႃး” ꩫ︀ꩬ︀ီထၢမ︀်ဢ︀ူ။ ပ︀ေႃလ︀ုက︀ေႃႇ “ꩡ︀ႂ်ႈဢ︀ူ” ꩫ︀ဝꩫ︀်ႇ။

²⁸ ꩡ︀ဝ်ႛꩭူဝ်ꩬ︀ိူက︀်ယ︀ႃႇ “က︀ဝ်ႈယ︀ႃႇင︀ိူꩫ︀်းဢ︀ၢꩫ︀်တ︀ၢꩫ︀်ꩭႂ်ႛꩬ︀ီꩬ︀ိုင︀် ပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀မ︀ႃးက︀ေႃႇ” ꩫ︀က︀ီး ပ︀ေႃလ︀ုယ︀ႃႇ “က︀ဝ်ႈယ︀ႃႇမ︀ိူင︀်းရ︀ေႃမ︀မ︀ႆ︀ႛယ︀င︀်းꩬ︀ီ ပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀မ︀ႃးꩫ︀မ︀်” ꩫ︀ဝꩫ︀်ႇ။

²⁹ င︀ႆ︀းက︀ီး က︀ူꩫ︀်းဢ︀ꩫ︀်ႈပ︀ေႃလ︀ုမ︀ႆ︀ႛ တ︀ီတ︀ုက︀်ႉꩬ︀ီꩡ︀ႅပ︀်ႉꩫ︀ႆ︀ႇၵ︀ဝ်က︀ေႃႇ က︀ꩡ︀ူးꩭူꩫ︀်က︀လ︀င︀်က︀ႃမ︀ူတ︀်ဢ︀ူ။ ꩡ︀ဝ်ႛꩭူဝ်ꩬ︀ိူက︀်ယ︀ႃႇ ပ︀ေႃလ︀ုပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀ꩫ︀မ︀်ꩫ︀ꩫ︀ႆ︀ႇမ︀ႆ︀ႛ တ︀ွင︀်းက︀ႃꩫ︀ႆ︀ႇလ︀ိူင︀်ႈ က︀ွပ︀်ႉပ︀ိူဝ်ႈပ︀ေႃလ︀ုမ︀ႆ︀ႛ မ︀ꩫ︀်းꩬ︀ၢႆ︀ၸ︀ုက︀်ဝႆ︀ႇꩫ︀ႆ︀ႇလ︀ိူင︀်ႈ ဢ︀ၢꩫ︀်တ︀ၢꩫ︀်က︀ူဝ်ႈက︀ႃဢ︀ူ။

လ︀ွင︀်ႈပ︀ေႃလ︀ုထိုင︀်က︀ႃ က︀ုမ︀်ႛꩡ︀ဝ်ႛတ︀ြႃးက︀ျူးꩫ︀ႆ︀ႇၵ︀ဝ်

³⁰ ꩡ︀ဝ်ႛꩭူဝ်ꩬ︀ိူက︀်ယ︀ႃႇ ပ︀ေႃလ︀ုမ︀ႆ︀ႛ က︀ျူးꩫ︀ႆ︀ႇၵ︀ဝ် ဢ︀ပ︀ႅတ︀်ႉက︀ꩬ︀င︀်ꩡ︀ိုဝ်ꩫ︀ႆ︀ႇꩫ︀ꩫ︀ႆ︀ႇ ၵ︀ႂ်ႈတ︀ွင︀်းꩫ︀ီႈꩫ︀ီႈဢ︀ူ။ င︀ႆ︀းꩬ︀ီ ꩫ︀င︀်မ︀ိူဝ်ႈꩭုက︀်ႉ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်င︀ႆ︀း က︀ုမ︀်ႛꩡ︀ဝ်ႛတ︀ြႃးက︀ျူးꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛတ︀ုမ︀်ႈက︀ꩫ︀်ႈဝႆ︀ႇဢ︀ူ။ ꩬ︀ၢႆ︀ဢ︀ꩫ︀်ႈပ︀ေႃလ︀ုမ︀ႆ︀ႛၸ︀ုက︀်ဝႆ︀ႇꩫ︀ႆ︀ႇက︀ေႃႇꩭႂ်ႛက︀ေႛꩬ︀ီ မ︀ꩫ︀်းမ︀ႆ︀ႛက︀ꩫ︀်ႛꩫ︀ႃႛၵ︀ဝ်မ︀ႆ︀ႛ ꩭႂ်ႛမ︀ႃးꩬ︀ဝ်းဢ︀ူ။