တ︀ိမ︀ေႃတ︀ေ ႒ 4 - Khamti Shan

^1-2 မ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀် ꩫ︀င︀်ꩡ︀ဝ်ႛꩭူဝ်ၵ︀မ︀်းꩫ︀က︀ꩫ︀်ႈက︀ျွႃးပ︀ွက︀်ႉမ︀ႃးꩫ︀ႆ︀ႇ ၸ︀ူႛတ︀ႆ︀ၢႈၸ︀ူႛꩫ︀ိပ︀်တ︀င︀်းလ︀ုင︀်မ︀ႆ︀ႛ မ︀ꩫ︀်းꩡ︀ဝ်ႛတ︀ီပ︀ႅတ︀်ႉတ︀ြႃးꩫ︀မ︀်။ င︀ႆ︀းꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩭီတ︀်ဢ︀ၵ︀ႅက︀်ႉꩬ︀ီ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ု ꩬ︀ေႈꩡ︀ႃႉꩬ︀ီꩭူဝ်းတ︀ႃႉꩫ︀ꩬ︀ီ က︀ဝ်ႈမ︀ႂ်းမ︀ႆ︀ႛꩬ︀င︀်ꩫ︀ႃႚꩫ︀ႃႚမ︀ႃးယ︀ဝ်ႇ။ ꩫ︀ႃး၊ ၵ︀ဝ်ၵ︀ႂ်ႈထွမ︀်ပ︀တ︀ု မ︀ဝ်ၵ︀ႂ်ႈထွမ︀်ပ︀တ︀ု ꩭူဝ်းတ︀ႃႉ။ ဢ︀ꩫ︀်ႈၵ︀ဝ်ၸ︀ိတ︀်ꩫ︀ႆ︀ႇ ꩡ︀ီႇပ︀ျႃးတ︀ႃႉ။ က︀ူဝ်ႇဢ︀ꩫ︀်ႈဢ︀ပ︀ႅတ︀်ႉယ︀င︀်းမ︀ႆ︀ႛ ꩬ︀ုင︀်းမ︀ႃးတ︀ႃႉ။ ꩡ︀ႂ်ႈဢ︀ဝ်ႈယ︀ၢဝ်းꩰꩬ︀ီ ꩬ︀ွꩫ︀်ꩭႂ်ႛ၊ ထႅမ︀်ꩭႅင︀်းꩭႂ်ႛတ︀ႃႉ။

³ က︀ꩫ︀်ႛလ︀င︀်မ︀ႆ︀ႛယ︀ႃႇ က︀ူꩫ︀်းꩫ︀ႆ︀ႇၵ︀ဝ် ꩬ︀မ︀်မ︀ႃတ︀ြႃးမ︀ႆ︀ႛယ︀ႃႇ မ︀ဝ်ၵ︀ႂ်ႈထွမ︀်ꩬ︀ီ ဢ︀ꩫ︀်ႈၵ︀ဝ်ၵ︀ႂ်ႈꩫ︀ႆ︀ႛꩥ︀ိꩫ︀်းꩫ︀ႆ︀ၢႈꩬ︀င︀် တ︀ီထွမ︀်က︀ꩫ︀်ႈꩫ︀မ︀်။ ꩬ︀ြႃဢ︀ꩫ︀်ႈꩡ︀ွမ︀်းꩡ︀ႂ်ႈၵ︀ဝ်ꩬ︀ီ ꩭူဝ်းꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် တ︀ီၵ︀ႃမ︀ႃးက︀ꩫ︀်ႈꩫ︀မ︀်။

⁴ ၵ︀ဝ်ယ︀ႃႇ ꩬ︀မ︀်မ︀ႃတ︀ြႃးမ︀ႆ︀ႛယ︀ႃႇ မ︀ဝ်ၵ︀ႂ်ႈထွမ︀်ꩬ︀ီ ပ︀ုင︀်မ︀ၢက︀်မ︀ူဝ်ꩫ︀ႆ︀ႇၵ︀ဝ်မ︀ႆ︀ႛꩬ︀င︀် တ︀ီၵ︀ႂ်ႈထွမ︀်က︀ꩫ︀်ႈꩫ︀မ︀်။

⁵ ꩫ︀ႆ︀ႇꩫ︀က︀ေႃႇ မ︀ႂ်းယ︀ႃႇပ︀ီꩫ︀်ႈꩭိုဝ်မ︀ႃးꩫ︀က︀ေႃႇ ꩡ︀ႂ်ႈၸ︀ူႛꩡ︀ဝ်ႛမ︀ႆ︀ႛဢ︀ဝ်ႈပ︀ေႇတ︀ႃႉ။ ၻုက︀်ႉၵ︀ထိုင︀်မ︀ႃးꩫ︀က︀ေႃႇ ပ︀ီက︀ူဝ်ႈ။ လ︀ွင︀်ႈꩭူဝ်း ၵ︀ၢဝ်ႈၵ︀ၢမ︀်းꩫ︀ီႈမ︀ႆ︀ႛꩬ︀င︀် ꩬ︀ေႈꩡ︀ႃႉတ︀ႃႉ။ ဢ︀မ︀ူးဢ︀ꩫ︀်ႈက︀ႃႈꩡ︀ိုဝ်ႈ မ︀ႂ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛပ︀ူင︀်ႈꩭႂ်ႛꩫ︀ႆ︀ႇၵ︀ဝ် ꩭီတ︀်ဢ︀ဝ်ႈယ︀ဝ်ႇတ︀ႃႉ။

⁶ က︀ဝ်ႈယ︀ႃႇ ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛꩭီတ︀်ယ︀ဝ်ႇမ︀ႃးꩫ︀ႆ︀ႇꩬ︀ီ မ︀ဝ်ꩭိုင︀်က︀ꩬ︀င︀်မ︀ႆ︀ႛ ဢ︀ꩬ︀ၢက︀်ႉက︀ဝ်ႈ တ︀ီꩬ︀ိင︀်ႛꩬ︀ုတ︀်က︀ႃယ︀ဝ်ႇ။

⁷ ဢ︀ꩫ︀်ႈက︀ဝ်ႈဝႃႈတ︀ိက︀်တ︀ူဝ်းမ︀ႆ︀ႛ က︀ဝ်ႈတ︀ိက︀်တ︀ူဝ်းꩫ︀ီႈꩫ︀ီႈ မ︀ႃးယ︀ဝ်ႇ။ ꩡ︀ူဝ်ႈတ︀ၢင︀်းဢ︀ꩫ︀်ႈက︀ဝ်ႈဝႃႈလ︀ႅꩫ︀်ႈမ︀ႆ︀ႛ ဢ︀ဝ်ႈꩬ︀ုတ︀်တ︀ိက︀် လ︀ႅꩫ︀်ႈမ︀ႃးꩬ︀ီ ဢ︀ဝ်ႈထိုင︀်ပ︀ႆ︀ၢႈꩭၢင︀်လ︀ေႚလ︀ေႚ ꩬ︀ႅတ︀်ႉꩡ︀ႃယ︀င︀်းမ︀ႃးယ︀ဝ်ႇ။

⁸ င︀ႆ︀းꩫ︀ႆ︀ႇꩬ︀ီ ꩬ︀ူးပ︀ွင︀်းꩬ︀ႅင︀်ꩡ︀ႃႇက︀ဝ်ႈ ၸ︀ြႃးပ︀ီꩫ︀်ႈꩡ︀ဝ်ႛꩭႅမ︀်းဝႆ︀ႇယ︀ဝ်ႇꩰ။ ꩬ︀ူးဢ︀မ︀ႂ်းယ︀ႃႇ ꩡ︀ႃႇꩭၢင︀်းက︀ူꩫ︀်း ဢ︀ꩫ︀်ႈꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛထုက︀်ꩡ︀ႂ်ႈꩫ︀က︀ꩫ︀်ႈ ဢ︀ူမ︀ႃးꩫ︀ႆ︀ႇၵ︀ဝ်ꩫ︀မ︀်။ မ︀ိူဝ်ႈꩡ︀ဝ်ႛယ︀ေꩬ︀ု၊ ꩡ︀ဝ်ႛတ︀ြႃးဢ︀ꩫ︀်ႈꩬ︀ိုဝ်ႈတ︀ူဝ်က︀ျွႃးမ︀ႃးꩫ︀ႆ︀ႇ က︀ဝ်ႈမ︀ႆ︀ႛ ꩬ︀ူးဢ︀မ︀ႂ်း တ︀ီꩭႂ်ႛꩫ︀မ︀်။ က︀ူဝ်ႇဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ပ︀ႂ်ႇထႃႛင︀ွက︀်ႉꩰꩫ︀ႆ︀ႇၵ︀ဝ်တ︀င︀်းလ︀ုင︀်မ︀ႆ︀ႛက︀ေႃႇ ꩬ︀ူးဢ︀မ︀ႂ်းတ︀ီꩭႂ်ႛꩫ︀မ︀်။

ၵ︀ၢမ︀်းꩬ︀င︀်လ︀ွင︀်ႈပ︀ၢင︀်ႈ

⁹ ဢ︀ꩫ︀်ႈၵ︀ႂ်ႈꩬ︀င︀်ဢ︀ိက︀်ꩫ︀ႆ︀ႇယ︀ႃႇ မ︀ႂ်းꩭီတ︀်ꩡ︀ိဝ်းꩬ︀ီ က︀ဝ်ႈမ︀ႆ︀ႛမ︀ႃးတ︀ႃႉ။

¹⁰ တ︀ေမ︀က︀ူဝ်ႇလ︀ိူင︀်ႈယ︀ႃႇ ꩭွႆ︀ႛꩡ︀ႂ်ႈမ︀ိူင︀်းက︀ၢင︀်ႈꩫ︀ႆ︀ႇꩬ︀ီ က︀ဝ်ႈမ︀ႆ︀ႛ ၵ︀ွတ︀်က︀ႃꩬ︀ီ ဢ︀ွက︀်က︀ႃဝီင︀်းတ︀ႅတ︀်ꩬ︀ႃလ︀ေႃꩫ︀ိက︀်ယ︀ဝ်ႇ။ က︀လ︀ႅတ︀်က︀ေယ︀ႃႇ က︀ႃတ︀ိူင︀်းက︀လ︀ႃတ︀ိင︀ႆ︀း၊ တ︀ိတ︀ုယ︀ႃႇက︀ႃတ︀ိူင︀်းတ︀ႃလ︀မ︀ႃတ︀ိယ︀ဝ်ႇ။

¹¹ လ︀ုက︀ႃက︀ူဝ်ႇလ︀ိူင︀်ႈꩫ︀ႆ︀ၢႈꩫ︀မ︀် တ︀င︀်းက︀ဝ်ႈက︀ိူတ︀်ꩫ︀ႆ︀ႇ။ င︀ႆ︀းꩫ︀ႆ︀ႇꩬ︀ီ မ︀ႃက︀ုမ︀ႆ︀ႛက︀ေႃႇ ꩭွင︀်ႇမ︀ႃးတ︀ႃႉ။ မ︀ꩫ︀်းယ︀ႃႇ ဢ︀မ︀ူးက︀ဝ်ႈမ︀ႆ︀ႛꩡ︀ွႆ︀ႈပ︀ီꩫ︀်ႈဢ︀ူ။

¹² တ︀ုၵ︀ိက︀်မ︀ႆ︀ႛယ︀ႃႇ က︀ဝ်ႈꩡ︀ႂ်ႇꩭႂ်ႛက︀ႃ ဝီင︀်းဢ︀ေၸ︀ႅတ︀်ယ︀ဝ်ႇ။

¹³ မ︀ႂ်းမ︀ႃးက︀ီး ꩬ︀ိူဝ်ႛလ︀ူင︀်က︀ဝ်ႈင︀ႆ︀း ၸ︀ုꩫ︀်လ︀ိက︀်ႉဢ︀ꩫ︀်ႈဝီင︀်းတ︀ရ︀ေႃမ︀ႆ︀ႛ ꩫ︀ႂ်းမ︀ိုဝ်းက︀ႃပ︀ုမ︀ႆ︀ႛ က︀ဝ်ႈဢ︀ၢပ︀်ႉဝႆ︀ႇꩫ︀ႆ︀ႇင︀ႆ︀း လ︀ိူမ︀်တ︀ီꩫ︀ႆ︀ႇယ︀ႃႇ ၸ︀ုꩫ︀်လ︀ိက︀်ႉꩫ︀င︀်ꩫ︀ႆ︀ႇၵ︀ဝ်ဢ︀ဝ်ႈမ︀ႃးတ︀ႃႉ။

¹⁴ ဢ︀ႃလ︀ေꩡ︀ꩫ︀်တ︀ြိယ︀ ၸ︀ူႛပ︀ူဝ်ႇတ︀ွင︀်းꩫ︀ႆ︀ႇ က︀ဝ်ႈမ︀ႆ︀ႛꩭႂ်ႛၻုက︀်ႉၵ︀လ︀ူင︀်မ︀ႃးယ︀ဝ်ႇ။ မ︀ꩫ︀်းꩭီတ︀်င︀ႆ︀းမ︀ႃးꩫ︀ႆ︀ႇꩬ︀ီ မ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ူင︀်ႈတ︀ၢမ︀်ꩭႂ်ႛꩫ︀မ︀်။

¹⁵ မ︀ꩫ︀်းယ︀ႃႇ တ︀ြႃးဢ︀ꩫ︀်ႈတ︀ူႈꩭူဝ်းမ︀ႆ︀ႛ တ︀ိက︀်ပ︀ိꩫ︀်ႛလ︀ူင︀်ꩫ︀မ︀်။ မ︀ꩫ︀်းမ︀ႆ︀ႛၵ︀ႅတ︀်တ︀ႃႉ။

¹⁶ မ︀ိူဝ်ႈꩭႃပ︀ထမ︀ က︀ဝ်ႈပ︀ၢင︀်ႈတ︀ြႃးမ︀ႆ︀ႛ က︀ႃဝွꩫ︀်းၵ︀ႅꩫ︀်းꩫ︀ႆ︀ႇ ပ︀ႃႛက︀ဝ်ႈမ︀ႆ︀ႛၸ︀ႂ်က︀ေႃႇ ꩵ︀ႈꩡ︀ွႆ︀ႈတ︀ၢꩫ︀်ႛမ︀ႃး။ က︀ဝ်ႈမ︀ႆ︀ႛ တ︀င︀်းမ︀ိူင︀်းၵ︀ွတ︀်ပ︀ႆ︀ၢႈက︀ႃဢ︀ူ။ ဢ︀ꩫ︀်ႈၵ︀ဝ်ꩭီတ︀်င︀ႆ︀းမ︀ႃးꩫ︀ႆ︀ႇမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ၢမ︀်ဢ︀ပ︀ႅတ︀်ႉ ပ︀ီꩭႂ်ႛပ︀ူင︀်ႈတ︀ီၵ︀ႃႛက︀ႃတ︀ႃႉ။

¹⁷ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀င︀်းက︀ဝ်ႈၵ︀ိင︀်းလ︀ွေႛင︀ႆ︀း က︀ဝ်ႈမ︀ႆ︀ႛထႅမ︀်ꩭႅင︀်းꩭႂ်ႛမ︀ႃးꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀်မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈ ꩫ︀ႆ︀ႛꩭူဝ်းမ︀ူတ︀်ꩰမ︀ႃးယ︀ဝ်ႇ။ လ︀ုက︀်ႉတ︀ၢမ︀်တ︀ႆ︀ၢႈမ︀ႆ︀ႛတ︀မ︀ိူင︀်း မ︀ꩫ︀်းꩡ︀ဝ်ႛၵ︀ေꩬ︀ေꩭႂ်ႛမ︀ႃးယ︀ဝ်ႇ။

¹⁸ ꩫ︀ႆ︀ႇꩬ︀ေႇမ︀ဝ်က︀ႃး ၸ︀ြႃးပ︀ီꩫ︀်ႈꩡ︀ဝ်ႛ က︀ဝ်ႈမ︀ႆ︀ႛလ︀ုက︀်ႉၸ︀ေးတ︀င︀်းလ︀ုင︀်မ︀ႆ︀ႛ ၵ︀ေꩬ︀ေꩭႂ်ႛꩬ︀ီ မ︀ိူင︀်းက︀ၢင︀်ႈꩭၢဝ်မ︀ႆ︀ႛ တ︀ီꩬ︀ူင︀်ꩭႂ်ႛꩫ︀ီႈꩫ︀ီႈ ꩫ︀မ︀်။ မ︀ူꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ် မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩭႂ်ႛယ︀ူဝ်းယ︀ွင︀်ႛက︀ꩫ︀်ႈတ︀ီၵ︀ႃႛက︀ႃတ︀ႃႉ။ ꩬ︀ႃထု။

ၵ︀ၢမ︀်းလ︀ူပ︀်ꩬ︀င︀်

¹⁹ ပ︀ီတ︀်က︀ိလ︀ꩫ︀ၵ︀ႃ ဢ︀ႃက︀ုလ︀င︀ႆ︀း ꩡ︀ုမ︀်ႛꩭိူꩫ︀်းဢ︀ေႃꩫ︀ေတ︀ိၸ︀ေႃၵ︀ဝ်မ︀ႆ︀ႛ က︀ဝ်ႈထိုင︀်ꩡ︀ႂ်ႈဢ︀ူꩫ︀ꩬ︀ီ ဝႃႈꩭႂ်ႛမ︀ႃးတ︀ႃႉ။

²⁰ ဢ︀ေရ︀တ︀်တ︀ုယ︀ႃႇ ဝီင︀်းက︀ေႃရ︀ိꩫ︀်တ︀ုမ︀ႆ︀ႛꩫ︀မ︀်။ တ︀ရ︀ေႃၸ︀ိမ︀်ယ︀ႃႇၵ︀ႆ︀ႛꩬ︀ီ မ︀ꩫ︀်းမ︀ႆ︀ႛက︀ဝ်ႈဝီင︀်းမ︀ိလ︀ႅတ︀်မ︀ႆ︀ႛ ꩭႂ်ႛက︀ိူတ︀်ဝႆ︀ႇဢ︀ူ။

²¹ မ︀ိူဝ်ႈမ︀ိူဝ်ႈꩫ︀ၢဝ်ꩵ︀ႈပ︀ႆ︀ထိုင︀်ꩫ︀ႆ︀ႇ ꩬ︀ေႈꩡ︀ႃႉꩬ︀ီမ︀ႃးတ︀ႃႉ။ ဢ︀ုပ︀ုလ︀ု၊ ပ︀ုတ︀ေ၊ လ︀ိꩫ︀ု၊ က︀လ︀ေႃတ︀ိၵ︀ဝ်င︀ႆ︀း ပ︀ီႈꩫ︀ွင︀်ႇၸ︀ူႛယ︀ုမ︀်ယ︀မ︀်ႈဢ︀ꩫ︀်ႈမ︀ႆ︀ႛယ︀င︀်းꩫ︀ႆ︀ႇၵ︀ဝ်တ︀င︀်းလ︀ုင︀် မ︀ႂ်းမ︀ႆ︀ႛꩬ︀င︀်ၵ︀ၢမ︀်းက︀ꩫ︀်ႈဢ︀ူ။

²² ၸ︀ြႃးပ︀ီꩫ︀်ႈꩡ︀ဝ်ႛ တ︀င︀်းမ︀ႂ်းꩭႂ်ႛၵ︀ိင︀်းလ︀ွေႛက︀ႃတ︀ႃႉ။ ꩬ︀ူတ︀င︀်းလ︀ုင︀်မ︀ႆ︀ႛ က︀ျေးꩡ︀ူးမ︀ꩫ︀်းꩡ︀ဝ်ႛ ꩭႂ်ႛꩫ︀မ︀်လ︀ႆ︀ၢက︀ႃတ︀ႃႉ။