တ︀ိမ︀ေႃတ︀ေ ႒ 3 - Khamti Shan

လ︀ွင︀်ႈက︀ၢပ︀်ႉပ︀ႆ︀ၢႈꩭၢင︀်

¹ က︀ၢပ︀်ႉပ︀ႆ︀ၢႈꩭၢင︀်မ︀ႆ︀ႛယ︀ႃႇ ၸ︀ွင︀်းမ︀ိူဝ်ႈယ︀ပ︀်ယ︀ၢက︀်ႉလ︀ူင︀်ꩫ︀ႆ︀ႇၵ︀ဝ် တ︀ီယ︀င︀်းမ︀ႃးꩫ︀မ︀်ꩫ︀ꩫ︀ႆ︀ႇ မ︀တ︀်ႉဝႆ︀ႇတ︀ႃႉ။

² မ︀ိူဝ်ႈဢ︀မ︀ႂ်း က︀ူꩫ︀်းꩫ︀ႆ︀ႇၵ︀ဝ် ꩡ︀ႂ်ႈတ︀ိင︀်ႈက︀ုပ︀်၊ ꩡ︀ႂ်ႈလ︀ေႃးၸ︀ႃး၊ ဢ︀ꩫ︀်ႈက︀မ︀်ႇလ︀ွင︀်ႛ၊ ဢ︀ꩫ︀်ႈဢ︀လ︀ွေႛပ︀ိူꩫ︀်ႈꩫ︀ႆ︀ႇၵ︀ဝ်ယ︀င︀်းမ︀ႃးꩬ︀ီ ဢ︀ꩫ︀်ႈတ︀ၢꩫ︀်ႛꩭတ︀်တ︀ၢꩫ︀်ႛꩡ︀ꩫ︀်း၊ ဢ︀ꩫ︀်ႈၵ︀ၢမ︀်းပ︀ူဝ်မ︀ေမ︀ဝ်ထွမ︀်၊ ဢ︀ꩫ︀်ႈက︀ျေးꩡ︀ူးမ︀ဝ်တ︀ွင︀်း၊ ဢ︀ꩫ︀်ႈၸ︀ြႃးတ︀ြႃးမ︀ဝ်ယ︀င︀်းꩫ︀ႆ︀ႇၵ︀ဝ် တ︀ီပ︀ီꩫ︀်ႈမ︀ႃးꩫ︀မ︀်။

³ ဢ︀ꩫ︀်ႈက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ၵ︀ီꩫ︀်က︀ꩫ︀်ႈ၊ ဢ︀ꩫ︀်ႈမ︀ဝ်ပ︀ွႆ︀ဢ︀ပ︀ႅတ︀်ႉက︀ꩫ︀်ႈ၊ ဝႃႈတ︀ႂ်ႛဝႃႈꩫ︀ိူဝ်က︀ꩫ︀်ႈ၊ ꩭီတ︀်ꩭႆ︀ၢႇꩭီတ︀်ꩡ︀ႃႇက︀ꩫ︀်ႈ၊ တ︀ေႃးꩬ︀ႃးꩭႅင︀်းက︀ꩫ︀်ႈင︀ႆ︀း ဢ︀ꩫ︀်ႈလ︀ွင︀်ႈꩫ︀ီႈမ︀ႆ︀ႛ မ︀ဝ်ထုက︀်ꩡ︀ႂ်ႈ၊

⁴ ဢ︀ꩫ︀်ႈၸ︀ုꩫ︀်ႇꩬ︀ႅတ︀်ႉꩡ︀ႃက︀ꩫ︀်ႈ၊ ဢ︀ꩫ︀်ႈꩭီတ︀်ဝၢင︀်ꩭီတ︀်ဝူꩫ︀်း၊ မ︀ႃꩫ︀ထူမ︀်ႛတ︀ူဝ်ႈက︀ꩫ︀်ႈင︀ႆ︀း ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛပ︀ႆ︀ၵ︀ွတ︀်ꩬ︀ီ ၵ︀ႃတ︀ၢင︀်းပ︀ိဝ်က︀ꩫ︀်ႈꩫ︀ႆ︀ႇၵ︀ဝ် တ︀ီပ︀ီꩫ︀်ႈမ︀ႃးꩫ︀မ︀်။

⁵ ၵ︀ဝ်ယ︀ႃႇ ဢ︀ဝ်ႈꩬ︀ူပ︀်ꩫ︀ႆ︀ၢႈ ၸ︀ြႃးၸ︀ြႃးꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ႃႇ ꩵ︀ႈယ︀ုမ︀်ယ︀မ︀်ႈတ︀ေႇတ︀ေႇ။ က︀ူꩫ︀်းၸ︀ꩫ︀်းဢ︀မ︀ႂ်းၵ︀ဝ်မ︀ႆ︀ႛ င︀ိူင︀်ႇတ︀ႃႉ။

⁶ ၵ︀ဝ်က︀မ︀်ႈၸ︀ွင︀်းယ︀ႃႇ ꩭွင︀်ႛꩭိူꩫ︀်ႈပ︀ိူꩫ︀်ႈမ︀ႆ︀ႛလ︀ုပ︀်ႉꩰလ︀ဝ်ꩰꩬ︀ီ ၸ︀ူႛယ︀ိင︀်းဢ︀ꩫ︀်ႈꩥ︀ၢꩫ︀်မ︀ဝ်ယ︀င︀်းꩫ︀ႆ︀ႇၵ︀ဝ်မ︀ႆ︀ႛ ၸ︀ၢမ︀်းꩬ︀ီꩡ︀ေယ︀ၢင︀်ဢ︀ူ။ ၸ︀ူႛယ︀ိင︀်းဢ︀မ︀ႂ်းၵ︀ဝ်ယ︀ႃႇ ဢ︀ꩫ︀်ႈလ︀ႆ︀ၢးပ︀ိူဝ်ႈဢ︀ပ︀ႅတ︀်ႉၸ︀ူႛꩡ︀ဝ်ႛꩬ︀ီ ပ︀ၢက︀်ႉယ︀ၢက︀်ႉင︀ႆ︀း က︀ꩫ︀်ႛꩫ︀ႂ်းတ︀ꩫ︀်ꩫ︀ႃက︀ူႈၸ︀ꩫ︀်းမ︀ႆ︀ႛ ꩡ︀ုပ︀်ႉꩰꩡ︀ေႈꩰꩬ︀ီဢ︀ူꩫ︀ႆ︀ႇၵ︀ဝ်ꩫ︀မ︀်။

⁷ ၸ︀ူႛယ︀ိင︀်းဢ︀မ︀ႂ်းၵ︀ဝ်ယ︀ႃႇ ၵ︀ႂ်ႈလ︀ႂ်ႈꩬ︀ေႈꩡ︀ႃႉꩬ︀ီ ထွမ︀်တ︀ြႃးꩫ︀က︀ေႃႇ မ︀ိူဝ်ႈလ︀ႂ်ႈက︀ေႃႇ ꩬ︀မ︀်မ︀ႃတ︀ြႃးမ︀ႆ︀ႛ ဢ︀ဝ်ႈပ︀ွင︀်ꩡ︀ႂ်ႈꩵ︀ႈꩫ︀ႆ︀ႛ။

⁸ မ︀ေႃꩬ︀ေမ︀ႆ︀ႛ ယ︀ꩫ︀်ꩫ︀ေꩫ︀ၵ︀ႃယ︀ꩫ︀်ပ︀ေ ꩬ︀ၢꩫ︀်တ︀ၢꩫ︀်းမ︀ႃးꩫ︀က︀ꩫ︀်ႈ ၵ︀ဝ်က︀ေႃႇ ꩬ︀မ︀်မ︀ႃတ︀ြႃးမ︀ႆ︀ႛꩬ︀ၢꩫ︀်တ︀ၢꩫ︀်းꩬ︀ီဢ︀ူꩫ︀မ︀်။ ၵ︀ဝ်ယ︀ႃႇ ꩡ︀ႂ်ႈလ︀ူႇက︀ႃလ︀ေႚလ︀ေႚꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩵ︀ႈယ︀ုမ︀်ယ︀မ︀်ႈတ︀ေႇတ︀ေႇယ︀ဝ်ႇ။

⁹ ꩫ︀ႆ︀ႇꩫ︀က︀ေႃႇ ၵ︀ဝ်ၵ︀ႂ်ႈလ︀ႂ်ႈက︀ေႃႇ တ︀ီၵ︀ိုꩫ︀်ႛၵ︀ၢင︀်ꩵ︀ႈꩡ︀ႂ်ႈ။ ဝꩫ︀်းလ︀ိူင︀်ႈယ︀ႃႇ ꩫ︀င︀်ယ︀ꩫ︀်ꩫ︀ေꩫ︀ၵ︀ႃယ︀ꩫ︀်ပ︀ေမ︀ႆ︀ႛပ︀ီꩫ︀်ႈက︀ႃꩫ︀က︀ꩫ︀်ႈ ၵ︀ဝ်ၵ︀ႂ်ႈလ︀ႂ်ႈမ︀ိူက︀်ႉꩫ︀ꩫ︀ႆ︀ႇ ပ︀ိူꩫ︀်ႈတ︀င︀်းမ︀ိူင︀်းတ︀ီꩭꩫ︀်က︀ႃꩫ︀မ︀်။

ၵ︀ူဝ်ႛꩬ︀င︀်ပ︀ႆ︀ၢႈꩭၢင︀်

^10-11 ꩫ︀ႆ︀ႇꩫ︀က︀ေႃႇ မ︀ႂ်းယ︀ႃႇဢ︀ꩫ︀်ႈက︀ဝ်ႈꩬ︀င︀်ꩬ︀ွꩫ︀်၊ ဢ︀ꩫ︀်ႈက︀ဝ်ႈꩭီတ︀်၊ ꩡ︀ူဝ်ႈတ︀ႃႈဢ︀ꩬ︀ၢက︀်ႉဢ︀ꩫ︀်ႈက︀ဝ်ႈꩫ︀တ︀်ꩫ︀ႆ︀ႇၵ︀ဝ်မ︀ႆ︀ႛ ꩡ︀ွမ︀်းမ︀ႃးယ︀ဝ်ႇ။ ဢ︀ꩫ︀်ႈက︀ဝ်ႈယ︀ုမ︀်ယ︀မ︀်ႈ၊ ဢ︀ꩫ︀်ႈက︀ဝ်ႈꩡ︀ႂ်ႈယ︀ၢဝ်း၊ ဢ︀ꩫ︀်ႈက︀ဝ်ႈပ︀ိူꩫ︀်ႈမ︀ႆ︀ႛꩭၢက︀်ႉꩭွမ︀်၊ ဢ︀ꩫ︀်ႈက︀ဝ်ႈက︀ꩫ︀်ႛပ︀ီꩫ︀်ႈ၊ ဢ︀ꩫ︀်ႈက︀ဝ်ႈမ︀ႆ︀ႛပ︀ိူꩫ︀်ႈꩫ︀ိက︀်ႉꩬ︀ၢက︀်ႉမ︀ႃး၊ ဢ︀ꩫ︀်ႈက︀ဝ်ႈꩡ︀မ︀်ႈꩡ︀ႂ်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛ မ︀ႂ်းတ︀ွင︀်းဢ︀ူ။ ဢ︀ꩫ︀်ႈဝီင︀်းဢ︀ꩫ︀်တ︀ိဢ︀ုက︀်၊ ဝီင︀်းဢ︀ိက︀ေႃꩫ︀ိင︀ႆ︀း ဝီင︀်းလ︀ုတ︀်တ︀ရ︀ꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈမ︀ႆ︀ႛပ︀ိူꩫ︀်ႈၵ︀ႂ်ႈလ︀ႂ်ႈꩫ︀ိက︀်ႉꩬ︀ၢက︀်ႉမ︀ႃးꩫ︀ꩫ︀ႆ︀ႇၵ︀ဝ်က︀ေႃႇ မ︀ႂ်းတ︀ွင︀်းဢ︀ူ။ ꩫ︀ႆ︀ႇꩫ︀က︀ေႃႇ က︀ဝ်ႈမ︀ႆ︀ႛ လ︀ုက︀်ႉၸ︀ေးꩫ︀ႆ︀ႇၵ︀ဝ်တ︀င︀်းလ︀ုင︀်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛမ︀ႃးယ︀ဝ်ႇ။

¹² က︀ူဝ်ႇဢ︀ꩫ︀်ႈဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ီ ၵ︀ႂ်ႈꩡ︀ွမ︀်းဢ︀လ︀ၢင︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛယ︀ႃႇ က︀ူႈက︀ူဝ်ႇမ︀ႆ︀ႛ ပ︀ိူꩫ︀်ႈတ︀ီꩫ︀ိက︀်ႉꩬ︀ၢက︀်ႉတ︀ေႇတ︀ေႇꩫ︀မ︀်။

¹³ က︀ူꩫ︀်းꩭင︀်ႛဢ︀ꩫ︀်ႈၸ︀ၢမ︀်းပ︀ိူꩫ︀်ႈꩫ︀ႆ︀ႇၵ︀ဝ်ယ︀ႃႇ ဢ︀ေႈၵ︀ႅꩫ︀်းတ︀ီꩡ︀ႃႇက︀ႃꩫ︀မ︀်။ ပ︀ိူꩫ︀်ႈမ︀ႆ︀ႛၵ︀ဝ်ၸ︀ၢမ︀်းꩫ︀က︀ꩫ︀်ႈ ၵ︀ဝ်မ︀ႆ︀ႛက︀ေႃႇ ပ︀ိူꩫ︀်ႈတ︀ီၸ︀ၢမ︀်းꩫ︀မ︀်။

¹⁴ ꩫ︀ႆ︀ႇꩫ︀က︀ေႃႇ မ︀ႂ်းယ︀ႃႇဢ︀ꩫ︀်ႈမ︀ႂ်းꩬ︀ွꩫ︀်ဢ︀ဝ်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛ မ︀ႂ်းၸ︀ူႛꩡ︀ဝ်ႛယ︀ုမ︀်ယ︀မ︀်ႈꩫ︀ီႈꩫ︀ီႈ ꩫ︀က︀ꩫ︀်ႈ ꩬ︀မ︀်မ︀ႃတ︀ြႃးမ︀ႆ︀ႛ ꩬ︀ႅတ︀်ႉꩡ︀ႃယ︀င︀်းတ︀ႃႉ။ က︀ူဝ်ႇဢ︀ꩫ︀်ႈမ︀ႂ်းမ︀ႆ︀ႛ ꩬ︀ွꩫ︀်ꩭႂ်ႛမ︀ႃးꩫ︀ႆ︀ႇၵ︀ဝ်ယ︀ႃႇ ၵ︀ိူင︀်ႈꩫ︀ီႈဢ︀က︀မ︀်ဢ︀ူꩫ︀ꩫ︀ႆ︀ႇမ︀ႂ်းတ︀ွင︀်းဢ︀ူ။

¹⁵ မ︀ႂ်းလ︀ုက︀်ႉမ︀ိူဝ်ႈဢ︀ွꩫ︀်ပ︀ုꩫ︀်ႛ က︀ျမ︀်းလ︀ိက︀်ႉꩬ︀ွꩫ︀်မ︀ႃးယ︀ဝ်ႇ။ က︀ျမ︀်းလ︀ိက︀်ႉယ︀ႃႇ တ︀ၢင︀်းꩡ︀ၢင︀်ႈဢ︀ꩫ︀်ႈꩭဝ်း ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛယ︀ုမ︀်ယ︀မ︀်ႈꩬ︀ီ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေꩭႂ်ႛမ︀ႆ︀ႛꩭၢပ︀်ႉဢ︀ဝ်ႈꩫ︀ႆ︀ႛꩫ︀ႆ︀ႇ ꩬ︀ွꩫ︀်ꩭႂ်ႛဢ︀ူ။

¹⁶ က︀ျမ︀်းလ︀ိက︀်ႉတ︀င︀်းမ︀ိူင︀်းယ︀ႃႇလ︀ုက︀်ႉ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩫ︀မ︀်မ︀ႃးꩫ︀ႆ︀ႇ။ င︀ႆ︀းꩫ︀ႆ︀ႇꩬ︀ီ က︀ျမ︀်းလ︀ိက︀်ႉယ︀ႃႇ ꩡ︀ႃႇꩭဝ်းမ︀ႆ︀ႛ ꩬ︀ွꩫ︀်လ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛꩬ︀ိုဝ်ႈꩰလ︀ႅင︀်းꩰ၊ ꩡ︀ႃႇက︀ူꩫ︀်းဢ︀ꩫ︀်ႈၸ︀ိတ︀်ꩫ︀ႆ︀ႇၵ︀ဝ်မ︀ႆ︀ႛ ꩬ︀ုင︀်းမ︀ႃး၊ ꩡ︀ႃႇက︀ူꩫ︀်းဢ︀ꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၸ︀ႆ︀က︀ႃꩫ︀ႆ︀ႇၵ︀ဝ်မ︀ႆ︀ႛ ꩡ︀ီႇလ︀ွင︀်ႈပ︀ျႃးတ︀ၢင︀်းင︀ႆ︀း ꩡ︀ႃႇက︀ူꩫ︀်းꩭဝ်းမ︀ႆ︀ႛ ꩫ︀ေတ︀ၢင︀်းꩡ︀ူဝ်ႈတ︀ႃႈဢ︀ꩬ︀ၢက︀်ႉꩫ︀ႆ︀ႇၵ︀ဝ် ꩫ︀ီႈလ︀ူင︀်ꩫ︀မ︀်။

¹⁷ င︀ႆ︀းꩫ︀ႆ︀ႇꩬ︀ီ က︀ျမ︀်းလ︀ိက︀်ႉယ︀ႃႇ ꩭႂ်ႛပ︀ူဝ်းꩭဝ်း လ︀ွင︀်ႈꩫ︀ီႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛထုက︀်ꩡ︀ႂ်ႈꩫ︀ႆ︀ႇၵ︀ဝ်တ︀င︀်းမ︀ိူင︀်းꩭီတ︀်ပ︀ီꩫ︀်ႈꩫ︀ႆ︀ႇ ထိꩫ︀်ꩭႂ်ႛမ︀ေးꩭႅမ︀်းꩭႂ်ႛဢ︀ူ။