က︀ေႃရ︀ိꩫ︀်တ︀ု ႒ 5 - Khamti Shan

ꩭိူꩫ︀်းမ︀ိူင︀်းက︀ၢင︀်ႈꩭၢဝ်ꩭဝ်း

¹ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀ူဝ်ႈꩭဝ်းယ︀ႃႇ ꩬ︀ုမ︀်ႇဢ︀ꩫ︀်ႈမ︀ိူင︀်းက︀ၢင︀်ႈမ︀ႆ︀ႛ ꩭဝ်းဢ︀ူꩫ︀ႆ︀ႇꩫ︀က︀ꩫ︀်ႈꩫ︀မ︀်။ ꩬ︀ုမ︀်ႇꩫ︀ႆ︀ႇလ︀ူႇက︀ႃက︀ီး မ︀ိူင︀်းက︀ၢင︀်ႈꩭၢဝ်မ︀ႆ︀ႛ တ︀ူဝ်ႈဢ︀ꩫ︀်ႈမ︀ႂ် ဢ︀ꩫ︀်ႈမ︀ိူꩫ︀်ꩫ︀င︀် ꩭိူꩫ︀်းဢ︀ꩫ︀်ႈမ︀ဝ်လ︀ူႇꩡ︀ၢင︀်ႈꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇꩭဝ်းꩭီတ︀်ဝႆ︀ႇဢ︀ူꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။

² င︀ႆ︀ႚꩭဝ်း ဢ︀ူꩫ︀ႂ်းတ︀ူဝ်ႈမ︀ိူင︀်ႈက︀ၢင︀်ႈꩫ︀ႆ︀ႇ ꩫ︀ွေꩬ︀ွင︀်ႈၸ︀ႅဝ်ꩫ︀ႆ︀ႇꩬ︀ီ ꩫ︀င︀်ꩫ︀ုင︀်ႈၵ︀ိူင︀်ႈမ︀ႂ်ꩫ︀က︀ꩫ︀်ႈ ၵ︀ႂ်ႈဢ︀ူꩫ︀ႂ်းꩬ︀ုမ︀်ႇမ︀ိူင︀်းက︀ၢင︀်ႈꩭၢဝ်ꩭဝ်းꩬ︀ီ ဢ︀ေဢ︀ူꩫ︀မ︀်။

³ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်းဢ︀မ︀ႂ်းမ︀ႆ︀ႛထိုင︀်က︀ီး ဢ︀ဝ်ႈတ︀ူဝ်ႈမ︀ိူင︀်းက︀ၢင︀်ႈꩭၢဝ်ꩫ︀မ︀် တ︀ီꩫ︀ႆ︀ႛဢ︀ူက︀ႃꩫ︀ႆ︀ႇ။ ꩭဝ်းတ︀ီပ︀ီꩫ︀်ႈၵ︀ွꩫ︀် ဢ︀ꩫ︀်ႈတ︀ူဝ်ႈမ︀ဝ်ယ︀င︀်းꩵ︀ႈꩡ︀ႂ်ႈ။

⁴ င︀ႆ︀ႚမ︀ိူဝ်ႈꩭဝ်း ဢ︀ူꩫ︀ႂ်းꩬ︀ုမ︀်ႇမ︀ိူင︀်းက︀ၢင︀်ႈꩭဝ်းꩫ︀ႆ︀ႇ လ︀ႆ︀ၢးပ︀ိူဝ်ႈယ︀ပ︀်ယ︀ၢက︀်ႉꩬ︀ီ ꩭဝ်းၵ︀င︀်းက︀ꩫ︀်ႈဢ︀ူ။ ꩭဝ်းၵ︀င︀်းꩫ︀ႆ︀ႇယ︀ႃႇ လ︀ုက︀်ႉတ︀ူဝ်ႈမ︀ိူင︀်းက︀ၢင︀်ႈမ︀ႆ︀ႛ ၵ︀ႂ်ႈဢ︀ွက︀်ꩬ︀ီꩵ︀ႈꩡ︀ႂ်ႈ။ ꩭဝ်းတ︀ူဝ်ႈမ︀ိူင︀်းက︀ၢင︀်ႈꩭၢဝ်ꩫ︀ႆ︀ႛꩬ︀ီ လ︀ုက︀်ႉတ︀ူဝ်ႈဢ︀ꩫ︀်ႈတ︀ႆ︀ၢႈꩡ︀ၢင︀်ႈမ︀ႆ︀ႛ ၵ︀ႂ်ႈလ︀ႆ︀ၢႈတ︀ူဝ်ႈဢ︀ꩫ︀်ႈမ︀ဝ်တ︀ႆ︀ၢႈꩡ︀ၢင︀်ႈꩬ︀ီꩫ︀မ︀်။

⁵ ꩭႂ်ႛပ︀ူဝ်းꩭဝ်းင︀ႆ︀းꩬ︀ီ လ︀ွက︀်ႉလ︀ႆ︀ၢႈမ︀ႃးꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀် မ︀ေးꩭႅမ︀်းထုက︀်ꩰဝႆ︀ႇꩫ︀ႆ︀ႇ။ မ︀ꩫ︀်းꩡ︀ဝ်ႛ ဢ︀ꩫ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း တ︀ီꩭီတ︀်ꩭႂ်ႛတ︀ေႇတ︀ေႇꩫ︀မ︀်ꩫ︀ꩫ︀ႆ︀ႇက︀ေႃႇꩭဝ်းမ︀ႆ︀ႛၵ︀ွꩫ︀်မ︀ꩫ︀်းꩡ︀ဝ်ႛပ︀ူင︀်ႈꩭႂ်ႛꩬ︀ီ ဢ︀ႃႛမ︀ၵ︀ၢမ︀်ꩭႂ်ႛမ︀ႃးယ︀ဝ်ႇ။

⁶ င︀ႆ︀းꩫ︀ႆ︀ႇꩬ︀ီ ꩭဝ်းမ︀ိူဝ်ႈဢ︀ူꩫ︀ႂ်းတ︀ူဝ်ႈမ︀ိူင︀်းက︀ၢင︀်ႈꩫ︀ႆ︀ႇ ꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛ၊ ဢ︀ꩫ︀်ႈပ︀ီꩫ︀်ႈတ︀ူဝ်ႈမ︀ႂ်ꩭဝ်းမ︀ႆ︀ႛ ꩵ︀ႈပ︀ႆ︀ထိုင︀်ၵ︀ႂ်ႈလ︀ႂ်ႈꩫ︀က︀ေႃႇ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ယ︀ုမ︀်ယ︀မ︀်ႈတ︀မ︀်းꩡ︀ႂ်ႈဢ︀ူꩫ︀မ︀်။

⁷ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩭဝ်းယ︀ႃႇ ဢ︀ꩫ︀်ႈယ︀ုမ︀်ယ︀မ︀်ႈမ︀ႆ︀ႛ ꩭီတ︀်င︀ဝ်ႛꩬ︀ီ ဢ︀ꩬ︀ၢက︀်ႉꩫ︀ိပ︀်ꩫ︀မ︀်။ ဢ︀ꩫ︀်ႈꩭꩫ︀်ꩫ︀ႆ︀ႛမ︀ႆ︀ႛ ꩭီတ︀်င︀ဝ်ႛꩵ︀ႈꩡ︀ႂ်ႈ။

⁸ ꩭဝ်းယ︀ုမ︀်ယ︀မ︀်ႈတ︀မ︀်းꩡ︀ႂ်ႈꩫ︀ႆ︀ႇꩬ︀ီ လ︀ုက︀်ႉတ︀ူဝ်ႈမ︀ိူင︀်းက︀ၢင︀်ႈမ︀ႆ︀ႛၸ︀ၢက︀်ႉꩬ︀ီ တ︀င︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ေႈၵ︀ႅꩫ︀်းၵ︀ႂ်ႈက︀ႃဢ︀ူꩫ︀မ︀်။

⁹ င︀ႆ︀းꩫ︀ႆ︀ႇꩬ︀ီ ꩭဝ်းဢ︀ူꩫ︀ႂ်းတ︀ူဝ်ႈမ︀ိူင︀်းက︀ၢင︀်ႈမ︀ႆ︀ႛပ︀တ︀ု လ︀ုက︀်ႉꩫ︀ႆ︀ႇမ︀ႆ︀ႛဢ︀ွက︀်က︀ႃပ︀တ︀ု ဢ︀ꩫ︀်ႈၵ︀ႅꩫ︀်းဢ︀ၵ︀ႅက︀်ႉꩫ︀ႆ︀ႇယ︀ႃႇ ꩭႂ်ႛပ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႃးꩡ︀ႂ်ႈꩫ︀ႆ︀ႇ ꩭဝ်းꩬ︀ေႈꩡ︀ႃႉဢ︀ူꩫ︀မ︀်။

¹⁰ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဝꩫ︀်းလ︀ိူင︀်ႈ ꩭဝ်းတ︀င︀်းမ︀ိူင︀်း ပ︀ၢင︀်ႈꩫ︀ႃႛဢ︀ꩫ︀်ႈꩡ︀ဝ်ႛၵ︀ရ︀ီတ︀် ပ︀ႅတ︀်ႉတ︀ြႃးမ︀ႆ︀ႛ ဝႃႈက︀ႃꩬ︀ဝ်းꩫ︀မ︀်။ မ︀ိူဝ်ႈဢ︀မ︀ႂ်း က︀ႃႈဢ︀ꩫ︀်ႈꩭဝ်း မ︀ိူဝ်ႈဢ︀ူတ︀ူဝ်ႈမ︀ိူင︀်းက︀ၢင︀်ႈꩫ︀ႆ︀ႇ ꩭီတ︀်မ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ꩫ︀ီႈ၊ မ︀ဝ်ꩫ︀ီႈ ဢ︀က︀ိဝ်းဢ︀ပ︀ႅတ︀်ႉ ဢ︀ꩫ︀်ႈꩫ︀င︀်ꩭဝ်းထႅက︀်ႉꩫ︀ႆ︀ႇ မ︀ꩫ︀်းꩡ︀ဝ်ႛ တ︀ီပ︀ူင︀်ႈꩭႂ်ႛꩫ︀မ︀်။

ဢ︀ꩫ︀်ႈတ︀င︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈထုက︀်က︀ꩫ︀်ႈပ︀ွက︀်ႉ

¹¹ ꩡ︀ႃႇလ︀ိူင︀်ႈ တ︀ူႈယ︀ႃႇလ︀ွင︀်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ိူင︀်ႈꩫ︀ီႈက︀ူဝ်ႈယ︀မ︀်ႈꩫ︀ႆ︀ႇ တ︀ွင︀်းꩫ︀ႆ︀ႇꩬ︀ီ ꩭႂ်ႛပ︀ူဝ်းက︀ူꩫ︀်းꩫ︀ႆ︀ႇၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇ ꩬ︀ေႈꩡ︀ႃႉဢ︀ူꩫ︀မ︀်။ တ︀ူႈꩭီတ︀်ꩬ︀ိုဝ်ႈꩰဢ︀ူꩫ︀ꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛတ︀ွင︀်းꩫ︀က︀ꩫ︀်ႈ ꩬ︀ူက︀ေႃႇဝႃႈတ︀ွင︀်းဢ︀ူ။

¹² င︀ႆ︀ႚက︀ေႃႇ ပ︀ၢင︀်ႈꩫ︀ႃႛꩬ︀ူမ︀ႆ︀ႛတ︀ူႈ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ယ︀ူဝ်းယ︀ွင︀်ႛဢ︀ိက︀်ꩵ︀ႈꩡ︀ႂ်ႈ။ ꩭႂ်ႛပ︀ူဝ်းတ︀ူႈမ︀ႆ︀ႛ ꩬ︀ူꩭုမ︀်လ︀ွေႛꩫ︀ႆ︀ၢႈꩫ︀မ︀် တ︀ူႈၵ︀ႆ︀ႈꩬ︀ိုဝ်ႈꩰꩫ︀ႆ︀ႇ။ င︀ႆ︀းက︀ီးꩬ︀ိုင︀် က︀ူꩫ︀်းဢ︀ꩫ︀်ႈꩫ︀ႂ်းꩡ︀ႂ်ႈမ︀ႆ︀ႛမ︀ဝ်ꩫ︀ူႈ၊ က︀ꩫ︀်ႛꩫ︀ွက︀်ႉမ︀ႆ︀ႛꩫ︀ႆ︀ၢႈꩬ︀င︀်ꩫ︀ူႈꩬ︀ီ က︀မ︀်ႇလ︀ွင︀်ႛꩫ︀ႆ︀ႇၵ︀ဝ်မ︀ႆ︀ႛ ꩬ︀ူဝႃႈꩭလ︀ိုဝ်တ︀ွပ︀်ꩫ︀ꩫ︀ႆ︀ႇ ꩬ︀ူတ︀ီတ︀ွင︀်းမ︀ႃးꩫ︀မ︀်။

¹³ င︀ႆ︀းꩫ︀ႆ︀ႇꩬ︀ီ ꩬ︀င︀်ဝႃႈတ︀ူႈမ︀ႆ︀ႛ ၵ︀ꩫ︀်တ︀ႂ်းမ︀ႃႛက︀ီး တ︀ူႈမ︀ႃႛꩫ︀ႆ︀ႇ ꩭၢင︀်းမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ ꩬ︀င︀်ဝႃႈတ︀ူႈမ︀ဝ်မ︀ႃႛꩫ︀မ︀်ꩫ︀က︀ီး ဢ︀ꩫ︀်ႈတ︀ူႈꩭီတ︀်ꩫ︀ႆ︀ႇ ꩡ︀ႃႇဢ︀က︀ိဝ်းꩬ︀ူꩫ︀မ︀်။

¹⁴ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛယ︀ေꩬ︀ုၵ︀ရ︀ီတ︀် ꩡ︀ႃႇက︀ူꩫ︀်းတ︀င︀်းမ︀ိူင︀်းၵ︀ၢမ︀်တ︀ႆ︀ၢႈမ︀ႃးꩫ︀ႆ︀ႇꩬ︀ီ က︀ူꩫ︀်းတ︀င︀်းမ︀ိူင︀်းက︀ေႃႇ တ︀ႆ︀ၢႈက︀ႃယ︀ဝ်ႇꩫ︀ꩬ︀ီ ꩭဝ်းယ︀ုမ︀်ယ︀မ︀်ႈꩫ︀ႆ︀ႇꩬ︀ီ ꩭဝ်းမ︀ႆ︀ႛ မ︀ႅတ︀်ႉတ︀ႃꩡ︀ဝ်ႛၵ︀ရ︀ီတ︀် ထိꩫ︀်ဢ︀ူꩫ︀မ︀်။

¹⁵ မ︀ꩫ︀်းꩡ︀ဝ်ႛ ꩡ︀ႃႇက︀ူꩫ︀်းတ︀င︀်းမ︀ိူင︀်း ၵ︀ၢမ︀်တ︀ႆ︀ၢႈꩫ︀ႆ︀ႇယ︀ႃႇ ꩭၢင︀်းꩭဝ်း ꩡ︀ွမ︀်းဢ︀လ︀ၢင︀်းၸ︀ူႛꩡ︀ဝ်ႛꩵ︀ႈꩡ︀ႂ်ႈ။ ꩭၢင︀်းꩡ︀ွမ︀်းဢ︀လ︀ၢင︀်းမ︀ꩫ︀်းꩡ︀ဝ်ႛ ꩡ︀ဝ်ႛဢ︀ꩫ︀်ႈ ꩡ︀ႃႇꩭဝ်းၵ︀ၢမ︀်တ︀ႆ︀ၢႈꩬ︀ီ ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇꩫ︀မ︀်။

¹⁶ င︀ႆ︀းꩫ︀ႆ︀ႇꩬ︀ီ ꩭဝ်းယ︀ႃႇ ၸ︀ႂ်မ︀ႆ︀ႛက︀ေႃႇ ဢ︀ဝ်ႈပ︀ႅင︀်ႈမ︀ိူင︀်းက︀ၢင︀်ႈ ꩵ︀ႈတ︀တ︀်ၵ︀ꩫ︀်ယ︀ဝ်ႇ။ မ︀ိူဝ်ႈင︀ႃးပ︀ုꩫ︀်ႛယ︀ႃႇ ꩡ︀ဝ်ႛၵ︀ရ︀ီတ︀်မ︀ႆ︀ႛ ဢ︀ဝ်ႈပ︀ႅင︀်ႈမ︀ိူင︀်းက︀ၢင︀်ႈ တ︀တ︀်ၵ︀ꩫ︀်မ︀ႃးꩫ︀က︀ေႃႇ င︀ႆ︀ႚယ︀ႃႇꩵ︀ႈꩭီတ︀်ယ︀ဝ်ႇ။

¹⁷ င︀ႆ︀းꩫ︀ႆ︀ႇꩬ︀ီ ၸ︀ႂ်မ︀ဝ်ဝႃႈ ဢ︀ူက︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်က︀ီး ပ︀ီꩫ︀်ႈက︀ူꩫ︀်းမ︀ႂ်မ︀ႃးယ︀ဝ်ႇ။ က︀ူဝ်ႇဢ︀မ︀ႂ်းယ︀ႃႇ ꩡ︀တ︀်ႉက︀ဝ်တ︀ႆ︀ၢႈက︀ႃꩬ︀ီ ပ︀ီꩫ︀်ႈꩡ︀တ︀်ႉမ︀ႂ်ယ︀ဝ်ႇ။

¹⁸ ꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭီတ︀်၊ ဢ︀ꩫ︀်ႈꩭဝ်းမ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈတ︀ၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ဝ်ႈထုက︀်က︀ꩫ︀်ႈပ︀ွက︀်ႉꩫ︀မ︀်။ င︀ႆ︀းꩬ︀ီ ဢ︀မ︀ူးဢ︀ꩫ︀်ႈက︀ူꩫ︀်းတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ တ︀င︀်းမ︀ꩫ︀်းꩡ︀ဝ်ႛ ဢ︀ဝ်ႈထုက︀်က︀ꩫ︀်ႈပ︀ွက︀်ႉꩫ︀ႆ︀ႇက︀ေႃႇ ꩭဝ်းမ︀ႆ︀ႛပ︀ူင︀်ႈဢ︀ၢပ︀်ႉꩭႂ်ႛမ︀ႃးယ︀ဝ်ႇ။

¹⁹ ၵ︀ၢဝ်ႈၵ︀ၢမ︀်းဢ︀ꩫ︀်ႈꩫ︀ႆ︀ႇယ︀ႃႇ လ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ပ︀ႅတ︀်ႉက︀ူꩫ︀်းꩭဝ်းမ︀ႆ︀ႛ မ︀ဝ်မ︀တ︀်ႉဝႆ︀ႇꩬ︀ီ က︀ူꩫ︀်းꩭဝ်းတ︀င︀်းမ︀ိူင︀်းမ︀ႆ︀ႛ တ︀င︀်းမ︀ꩫ︀်းꩡ︀ဝ်ႛဢ︀ဝ်ႈထုက︀်က︀ꩫ︀်ႈပ︀ွက︀်ႉꩭႂ်ႛꩫ︀ႆ︀ႇꩫ︀မ︀်။

²⁰ င︀ႆ︀းꩫ︀ႆ︀ႇꩬ︀ီ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛ ꩭႂ်ႛဝႃႈꩫ︀က︀ꩫ︀်ႈ တ︀င︀်းၸ︀ြႃးပ︀ီꩫ︀်ႈꩡ︀ဝ်ႛ ထုက︀်က︀ꩫ︀်ႈပ︀ွက︀်ႉမ︀တ︀ႃႉꩫ︀ꩬ︀ီ တ︀ၢင︀်ႈတ︀ူဝ်ႈꩡ︀ဝ်ႛၵ︀ရ︀ီတ︀်ꩬ︀ီ ꩬ︀ူမ︀ႆ︀ႛတ︀ူႈဝွꩫ︀်းၵ︀ႅꩫ︀်းဢ︀ူ။

²¹ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ ဢ︀ပ︀ႅတ︀်ႉမ︀ဝ်ꩭွꩫ︀်ꩭီတ︀်ပ︀ိူင︀်ႈလ︀ူင︀်ꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ꩡ︀ႃႇꩭဝ်းꩭီတ︀်ၸ︀ူႛဢ︀ꩫ︀်ႈဢ︀ပ︀ႅတ︀်ႉယ︀င︀်းမ︀ႃးယ︀ဝ်ႇ။ မ︀ꩫ︀်းꩡ︀ဝ်ႛꩭီတ︀်င︀ႆ︀းꩫ︀ႆ︀ႇယ︀ႃႇ လ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ီ ꩭႂ်ႛပ︀ူဝ်းꩭဝ်း တ︀င︀်းမ︀ꩫ︀်းꩡ︀ဝ်ႛ ထုက︀်က︀ꩫ︀်ႈပ︀ွက︀်ႉꩫ︀ႆ︀ႛꩫ︀ႆ︀ႇꩫ︀မ︀်။