က︀ေႃရ︀ိꩫ︀်တ︀ု ႒ 4 - Khamti Shan

မ︀ူဝ်ႛꩫ︀ိꩫ︀်ႈဢ︀ꩫ︀်ႈꩬ︀ႅင︀်ၵ︀ွꩫ︀်ꩬ︀ႂ်ဝႆ︀ႇ

¹ င︀ႆ︀းꩫ︀ႆ︀ႇꩬ︀ီ လ︀ႆ︀ၢးပ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ တ︀ူႈမ︀ႆ︀ႛဢ︀ီꩫ︀ူႈင︀ႆ︀း ဢ︀မ︀ူးဢ︀ꩫ︀်ႈꩭူဝ်းလ︀ွင︀်ႈၵ︀ၢမ︀်းၵ︀တ︀်ႉမ︀ႂ်ꩫ︀ႆ︀ႇပ︀ူင︀်ႈꩭႂ်ႛꩫ︀ႆ︀ႇꩬ︀ီ တ︀ူႈယ︀ႃႇ မ︀ိူဝ်ႈလ︀ႂ်ႈက︀ေႃႇ ꩡ︀ႂ်ႈꩵ︀ႈၸ︀ေႛ။

² ဢ︀မ︀ူးဢ︀ꩫ︀်ႈၵ︀ိူင︀်ႈꩫ︀ီႈဢ︀ႆ︀ၢႈ ဢ︀ꩫ︀်ႈပ︀ႆ︀ၢႈမ︀ႅပ︀်ပ︀ႆ︀ၢႈꩬ︀ွꩫ︀်ႈꩬ︀ီꩭီတ︀်ꩫ︀ႆ︀ႇၵ︀ဝ် တ︀ူႈပ︀ႆ︀ၵ︀ွတ︀်မ︀ႃးဢ︀ူ။ ဢ︀ꩫ︀်ႈၸ︀ႅတ︀်ႉၸ︀ၢမ︀်းꩫ︀ႆ︀ႇၵ︀ဝ် တ︀ူႈꩵ︀ႈꩭီတ︀်ယ︀ဝ်ႇ။ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ တ︀ူႈလ︀ိက︀်ꩰင︀ွက︀်ꩰꩬ︀ီꩵ︀ႈꩭူဝ်း။ တ︀ူႈယ︀ႃႇ ပ︀ၢင︀်ႈꩫ︀ႃႛ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀မ︀်မ︀ႃတ︀ြႃးမ︀ꩫ︀်းꩡ︀ဝ်ႛ ꩬ︀ိုဝ်ႈꩰတ︀ူဝ်ꩰꩭူဝ်းꩫ︀ႆ︀ႇꩬ︀ီ တ︀ူႈပ︀ီꩫ︀်ႈက︀ူꩫ︀်းꩫ︀င︀်ꩭိုဝ်ꩫ︀ꩫ︀ႆ︀ႇ ပ︀ိူꩫ︀်ႈတ︀င︀်းမ︀ိူင︀်း တ︀ွင︀်းꩬ︀ိုဝ်ႈꩰဢ︀ူ။

³ ꩬ︀င︀်ဝႃႈၵ︀ၢဝ်ႈၵ︀ၢမ︀်းဢ︀ꩫ︀်ႈတ︀ူႈꩭူဝ်းꩫ︀ႆ︀ႇ တ︀ွပ︀်ႉဝႆ︀ႇꩫ︀က︀ꩫ︀်ႈပ︀ီꩫ︀်ႈꩬ︀ီ ပ︀ိူꩫ︀်ႈမ︀ဝ်ပ︀ွင︀်ꩡ︀ႂ်ႈက︀ီး ဢ︀ꩫ︀်ႈတ︀ွပ︀်ႉဝႆ︀ႇဢ︀မ︀ႂ်းယ︀ႃႇ က︀ူဝ်ႇဢ︀ꩫ︀်ႈလ︀ူႇꩬ︀ုမ︀်းဢ︀ူꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩫ︀မ︀် တ︀ွပ︀်ႉꩫ︀ႆ︀ႇ။

⁴ က︀ူꩫ︀်းဢ︀ꩫ︀်ႈလ︀ူႇꩬ︀ုမ︀်းဢ︀မ︀ႂ်းၵ︀ဝ်ယ︀ႃႇ ဢ︀ꩫ︀်ႈၵ︀ုꩫ︀်ꩬ︀ူင︀်ၸ︀ူႛဢ︀ꩫ︀်ႈင︀ႆ︀ႚ မ︀ိူင︀်းက︀ၢင︀်ႈမ︀ႆ︀ႛဢ︀ုပ︀်ပ︀ိုင︀်ꩫ︀ႆ︀ႇလ︀ၢပ︀်ႉတ︀ႃႈဢ︀ဝ်ႈꩫ︀မ︀်ႈꩬ︀ိင︀်ၵ︀ွꩫ︀်ဝႆ︀ႇꩬ︀ီ ၵ︀ၢဝ်ႈၵ︀ၢမ︀်းꩫ︀ီႈမ︀ႆ︀ႛ မ︀ဝ်ယ︀ုမ︀်ꩫ︀ႆ︀ႇၵ︀ဝ်ꩫ︀မ︀်။ င︀ႆ︀းꩬ︀ီၵ︀ဝ်ယ︀ႃႇ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ပ︀ွင︀်ꩡ︀ႂ်ႈမ︀ဝ်ꩫ︀ႆ︀ႛꩫ︀မ︀်။ ꩡ︀ဝ်ႛယ︀ေꩬ︀ုယ︀ႃႇ ပ︀ီꩫ︀်ႈမ︀ူꩫ︀်ႈင︀ဝ်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛ ꩭꩫ︀်က︀ီးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭꩫ︀်ꩫ︀က︀ꩫ︀်ႈꩫ︀မ︀်။

⁵ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ၢဝ်ႈၵ︀ၢမ︀်းဢ︀ꩫ︀်ႈတ︀ူႈꩭူဝ်းꩫ︀ႆ︀ႇယ︀ႃႇ လ︀ွင︀်ႈတ︀ူႈၸ︀ူႛꩡ︀ဝ်ႛꩵ︀ႈꩡ︀ႂ်ႈ။ လ︀ွင︀်ႈဢ︀ꩫ︀်ႈꩡ︀ဝ်ႛယ︀ေꩬ︀ု ပ︀ီꩫ︀်ႈꩡ︀ဝ်ႛꩫ︀ိူဝ်ꩭူဝ်တ︀င︀်းမ︀ိူင︀်းꩫ︀ႆ︀ႇꩫ︀မ︀်။ တ︀ူႈၸ︀ူႛꩡ︀ဝ်ႛယ︀ႃႇ ၸ︀ူႛꩡ︀ႂ်ႇꩬ︀ူ ဢ︀ꩫ︀်ႈဢ︀ဝ်ႈတ︀ီမ︀်ႈက︀ုမ︀်ဢ︀မ︀ိင︀်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်။

⁶ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ ၸ︀ၢꩫ︀်ႈꩬ︀ၢင︀်းမ︀ိူင︀်းက︀ၢင︀်ႈꩫ︀ႆ︀ႇ ဢ︀ꩫ︀်ႈꩫ︀မ︀်ႈꩬ︀ိင︀်ꩭႆ︀ၢꩬ︀ီ ꩭႂ်ႛလ︀ႅင︀်းက︀တ︀ႃႉ ꩫ︀ꩬ︀ီမ︀ꩫ︀်းꩡ︀ဝ်ႛဝႃႈမ︀ႃးဢ︀ူ။ ၸ︀ြႃးပ︀ီꩫ︀်ႈꩡ︀ဝ်ႛဢ︀မ︀ႂ်းꩫ︀မ︀် ꩭူဝ်ꩡ︀ႂ်ႈတ︀ူႈမ︀ႆ︀ႛ ဢ︀ꩫ︀်ႈလ︀ႅင︀်းတ︀ွင︀်လ︀ႅင︀်းꩭႂ်ႛꩬ︀ီ မ︀ူꩫ︀်ႈင︀ဝ်းမ︀ꩫ︀်းꩡ︀ဝ်ႛ ဢ︀ꩫ︀်ႈꩫ︀ႃႛꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ တ︀ွင︀်လ︀ႅင︀်းမ︀ႃးဢ︀မ︀ႂ်း တ︀ူႈမ︀ႆ︀ႛပ︀ုတ︀်ပ︀ျႃးꩭႂ်ႛမ︀ႃးꩫ︀ႆ︀ႇ။

⁷ ꩫ︀ႆ︀ႇꩫ︀က︀ေႃႇ တ︀ꩫ︀်းၵ︀ူဝ်းလ︀ူင︀်ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈလ︀ုက︀်ႉတ︀ူႈမ︀ႆ︀ႛမ︀ႃးꩵ︀ႈꩡ︀ႂ်ႈ။ ဢ︀ꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ႃးꩫ︀မ︀်ꩫ︀ꩫ︀ႆ︀ႇ ꩭႂ်ႛပ︀ူဝ်းပ︀ျႃးꩫ︀ႆ︀ႇ တ︀ူႈယ︀ႃႇ ꩫ︀င︀်မ︀ူဝ်ႛꩫ︀ိꩫ︀်ႈဢ︀ꩫ︀်ႈꩬ︀ႂ်ꩬ︀ႅင︀်ၵ︀ွꩫ︀်ဝႆ︀ႇꩫ︀က︀ꩫ︀်ႈꩫ︀ႆ︀ၢႈꩫ︀မ︀်။

⁸ င︀ႆ︀းꩬ︀ီတ︀ူႈꩫ︀ႆ︀ႛၵ︀ၢမ︀်တ︀ုက︀်ႉꩰပ︀ူဝ်ႇꩰꩫ︀က︀ေႃႇ တ︀ူႈꩵ︀ႈလ︀ူႇတ︀ႆ︀ၢႈ။ တ︀ူဝ်ပ︀ူဝ်းꩬ︀ၢင︀်မ︀ဝ်ꩡ︀ၢင︀်ႈတ︀မ︀ိူင︀်းပ︀ီꩫ︀်ႈၵ︀ႂ်ႈလ︀ႂ်ႈꩫ︀က︀ေႃႇ တ︀ူႈမ︀ိူဝ်ႈလ︀ႂ်ႈက︀ေႃႇ ꩡ︀ႂ်ႈꩵ︀ႈၸ︀ေႛ။

⁹ တ︀ူႈမ︀ႆ︀ႛလ︀ꩫ︀်ꩬ︀ူꩫ︀ႆ︀ႇၵ︀ဝ် ၵ︀ႂ်ႈလ︀ႂ်ႈꩫ︀မ︀်ꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ူႈမ︀ႆ︀ႛꩵ︀ႈၵ︀ွတ︀်ဝႆ︀ႇ။ တ︀ူႈမ︀ႆ︀ႛပ︀ိူꩫ︀်ႈၵ︀ႂ်ႈလ︀ႂ်ႈ တ︀ုက︀်ႉပ︀ူဝ်ႇမ︀ႃးꩫ︀က︀ေႃႇ တ︀ူႈꩵ︀ႈလ︀ူႇတ︀ႆ︀ၢႈမ︀ႃး။

¹⁰ တ︀ူဝ်ႈတ︀ူႈမ︀ႆ︀ႛ ꩡ︀ဝ်ႛယ︀ေꩬ︀ု ဢ︀ꩬ︀ၢက︀်ႉꩫ︀ိပ︀်ဢ︀ူꩫ︀မ︀်ꩫ︀ꩫ︀ႆ︀ႇ ꩭႂ်ႛပ︀ူဝ်းပ︀ိူꩫ︀်ႈꩭꩫ︀်ꩫ︀ႆ︀ႇ တ︀ူႈယ︀ႃႇ ꩫ︀င︀်ꩡ︀ဝ်ႛယ︀ေꩬ︀ုꩫ︀ႆ︀ႛတ︀ႆ︀ၢႈမ︀ႃးꩫ︀က︀ꩫ︀်ႈ တ︀ၢင︀်းဢ︀ꩫ︀်ႈပ︀ိူꩫ︀်ႈက︀ႅမ︀်တ︀ႆ︀ၢႈမ︀ႆ︀ႛ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ၸ︀င︀်ႈက︀ႃဢ︀ူꩫ︀မ︀်။

¹¹ တ︀ူႈꩭီတ︀်ဢ︀မ︀ူး ꩡ︀ဝ်ႛယ︀ေꩬ︀ုꩫ︀ႆ︀ႇꩬ︀ီ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ တ︀ၢင︀်းဢ︀ꩫ︀်ႈၸ︀ေးတ︀ႆ︀ၢႈယ︀င︀်းမ︀ႆ︀ႛ ꩫ︀ႆ︀ႛက︀ႃဢ︀ူꩫ︀မ︀်။ င︀ႆ︀းꩫ︀က︀ေႃႇ တ︀ူႈမ︀ဝ်တ︀ႆ︀ၢႈꩡ︀ၢင︀်ႈꩫ︀ႆ︀ႇယ︀ႃႇ ꩡ︀ဝ်ႛယ︀ေꩬ︀ု ဢ︀ꩬ︀ၢက︀်ႉꩫ︀ိပ︀်ဢ︀ူꩫ︀မ︀်ꩫ︀ꩫ︀ႆ︀ႇ တ︀ူဝ်ႈတ︀ူႈဢ︀ꩫ︀်ႈတ︀ႆ︀ၢႈꩡ︀ၢင︀်ႈမ︀ႆ︀ႛ ပ︀ျႃးဢ︀ူꩫ︀မ︀်။

¹² င︀ႆ︀းꩬ︀ီတ︀ူႈ တ︀ၢင︀်းဢ︀ꩫ︀်ႈၸ︀ေးတ︀ႆ︀ၢႈယ︀င︀်းမ︀ႆ︀ႛ ၸ︀ႆ︀ၢႛဢ︀ူꩫ︀ႆ︀ႇꩬ︀ီ ꩬ︀ူယ︀ႃႇ တ︀ၢင︀်းဢ︀ꩫ︀်ႈဢ︀ꩬ︀ၢက︀်ႉထႃဝရ︀ယ︀င︀်းမ︀ႆ︀ႛ ꩫ︀ႆ︀ႛၸ︀ႆ︀ၢႛဢ︀ူꩫ︀မ︀်။

¹³ က︀ျမ︀်းလ︀ိက︀်ႉမ︀ႆ︀ႛ “က︀ဝ်ႈယ︀ုမ︀်ယ︀မ︀်ႈꩫ︀ႆ︀ႇꩬ︀ီ ဝႃႈꩫ︀မ︀်” ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ တ︀ူႈက︀ေႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ယ︀ုမ︀်ယ︀မ︀်ႈꩫ︀ႆ︀ႇꩬ︀ီ ဝႃႈꩫ︀မ︀်။

¹⁴ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛယ︀ေꩬ︀ုမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀် ဢ︀ဝ်ႈꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇꩫ︀ꩫ︀ႆ︀ႇ တ︀ူႈတ︀ွင︀်းဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ မ︀ꩫ︀်းꩡ︀ဝ်ႛꩫ︀မ︀် ꩭဝ်းမ︀ႆ︀ႛက︀ေႃႇ တ︀င︀်းꩡ︀ဝ်ႛယ︀ေꩬ︀ု ဢ︀ဝ်ႈꩫ︀ိပ︀်ပ︀ွက︀်ႉꩬ︀ီ ပ︀ၢင︀်ႈꩫ︀ႃႛမ︀ꩫ︀်းꩡ︀ဝ်ႛမ︀ႆ︀ႛ တ︀င︀်းꩬ︀ူတ︀ီဢ︀ဝ်ႈထိုင︀်ꩫ︀ႆ︀ႇꩫ︀ꩫ︀ႆ︀ႇ တ︀ူႈတ︀ွင︀်းဢ︀ူ။

¹⁵ လ︀ွင︀်ႈꩫ︀ႆ︀ႇၵ︀ဝ်တ︀င︀်းလ︀ုင︀် ပ︀ီꩫ︀်ႈမ︀ႃးꩫ︀ႆ︀ႇယ︀ႃႇ ꩡ︀ႃႇဢ︀က︀ိဝ်းꩬ︀ူꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈပ︀ီꩫ︀်ႈင︀ႆ︀းꩫ︀ႆ︀ႇယ︀ႃႇ မ︀ꩫ︀်းꩡ︀ဝ်ႛ က︀ူꩫ︀်းꩭဝ်းမ︀ႆ︀ႛ ၵ︀ႂ်ႈလ︀ႂ်ႈဢ︀ီꩫ︀ူႈꩭၢက︀်ႉꩭွမ︀်ꩫ︀ꩫ︀ႆ︀ႇ က︀ူꩫ︀်းꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် တ︀ွင︀်းမ︀ႃးꩬ︀ီ ꩭႂ်ႛပ︀ူဝ်းမ︀ူꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ဢ︀ေႈၵ︀ႅꩫ︀်းတ︀ၢင︀်က︀ျေးꩡ︀ူးက︀ꩫ︀်ႈ၊ ယ︀ူဝ်းယ︀ွင︀်ႛက︀ꩫ︀်ႈꩫ︀ႆ︀ႇꩫ︀မ︀်။

¹⁶ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩭဝ်းယ︀ႃႇ မ︀ိူဝ်ႈလ︀ႂ်ႈက︀ေႃႇ ꩡ︀ႂ်ႈꩵ︀ႈၸ︀ေႛ။ တ︀ူဝ်ႈꩭၢင︀်ႈꩭဝ်းꩫ︀ႆ︀ႇ ဝꩫ︀်းလ︀ိူင︀်ႈယ︀ဝ်ႇဝꩫ︀်းလ︀ိူင︀်ႈ က︀ႃက︀ꩫ︀်ႛဢ︀ꩫ︀်ႈလ︀ူႇတ︀ႆ︀ၢႈက︀ႃၵ︀ႂ်ႈလ︀ႂ်ႈꩫ︀က︀ေႃႇ ၵ︀ွꩫ︀်ꩭဝ်းယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ မ︀ေးထႅမ︀်ဢ︀ဝ်ႈတ︀ီမ︀်ႈက︀ုမ︀်ꩭႂ်ႛꩬ︀ီ ဝꩫ︀်းလ︀ိူင︀်ႈယ︀ဝ်ႇဝꩫ︀်းလ︀ိူင︀်ႈ ပ︀ီꩫ︀်ႈဢ︀ꩫ︀်ႈမ︀ႂ်မ︀ႃးက︀ꩫ︀်ႈꩫ︀မ︀်။

¹⁷ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၻုက︀်ႉၵ︀ ဢ︀ꩫ︀်ႈင︀ႆ︀ႚꩭဝ်းၵ︀ၢမ︀်ꩫ︀ႆ︀ႇၵ︀ဝ်ယ︀ႃႇ ယ︀ႂ်လ︀ူင︀် ꩭိုင︀်လ︀ူင︀်ꩵ︀ႈꩡ︀ႂ်ႈ။ ꩫ︀ႆ︀ႇꩫ︀က︀ေႃႇ လ︀ႆ︀ၢးပ︀ိူဝ်ႈဢ︀မ︀ႂ်းၵ︀ဝ်ꩬ︀ီ မ︀ူꩫ︀်ႈင︀ဝ်းလ︀ူင︀်ထႃဝရ︀ ဢ︀ꩫ︀်ႈၻုက︀်ႉၵ︀ꩭဝ်းမ︀ႆ︀ႛ ယ︀ႂ်ပ︀ူꩫ︀်ႇꩬ︀ႃꩫ︀ႆ︀ႇ ꩭဝ်းတ︀ီꩫ︀ႆ︀ႛꩭၢပ︀်ႉဢ︀ဝ်ႈꩫ︀မ︀်။

¹⁸ င︀ႆ︀းꩫ︀ႆ︀ႇꩬ︀ီ ꩭဝ်းယ︀ႃႇ ဢ︀ꩫ︀်ႈꩭဝ်းꩭꩫ︀်ꩫ︀ႆ︀ႛꩫ︀ႆ︀ႇၵ︀ဝ်မ︀ႆ︀ႛ မ︀ဝ်ꩫ︀ူႈꩬ︀ီ ဢ︀ꩫ︀်ႈꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ꩡ︀ိက︀်ꩫ︀ူႈဢ︀ူꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈꩭꩫ︀်ꩫ︀ႆ︀ႛꩫ︀ႆ︀ႇၵ︀ဝ်ယ︀ႃႇ က︀ိုမ︀်ႇလ︀ိူင︀်ႈꩫ︀ႆ︀ၢႈယ︀င︀်းꩬ︀ီ ဢ︀ꩫ︀်ႈꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇၵ︀ဝ်ယ︀ႃႇ ထႃဝရ︀တ︀ီမ︀ꩫ︀်ႛတ︀ိူင︀်ႈက︀ႃꩫ︀မ︀်။