တ︀ိမ︀ေႃတ︀ေ ႑ 3 - Khamti Shan

လ︀ွင︀်ႈၸ︀ူႛင︀မ︀်းꩡ︀ိူဝ်းꩫ︀ႆ︀ႇၵ︀ဝ်

¹ က︀ူꩫ︀်းဢ︀ꩫ︀်ႈၵ︀ႂ်ႈပ︀ီꩫ︀်ႈၸ︀ူႛင︀မ︀်းꩡ︀ိူဝ်းꩫ︀ႆ︀ႇ ဢ︀ꩫ︀်ႈၵ︀ႂ်ႈꩭီတ︀်ဢ︀မ︀ူးဢ︀ꩫ︀်ႈမ︀ႅတ︀်ႉလ︀ူင︀်ꩫ︀မ︀်ꩫ︀ꩫ︀ႆ︀ႇ ꩡ︀ႂ်ႈတ︀ေႇတ︀ေႇဢ︀ူ။

² င︀ႆ︀းꩫ︀ႆ︀ႇꩬ︀ီ ၸ︀ူႛင︀မ︀်းꩡ︀ိူဝ်းꩫ︀ꩫ︀ႆ︀ႇယ︀ႃႇ ဝႃႈပ︀ီꩫ︀်ႈက︀ူဝ်ႇ ဢ︀ꩫ︀်ႈပ︀ိူꩫ︀်ႈတ︀ီတ︀ၢင︀်ဢ︀ပ︀ႅတ︀်ႉမ︀ဝ်ယ︀င︀်းꩫ︀မ︀်။ ဝႃႈပ︀ီꩫ︀်ႈက︀ူဝ်ႇဢ︀ꩫ︀်ႈ မ︀ေးက︀ူဝ်ႇလ︀ိူင︀်ႈꩫ︀ႆ︀ၢႈယ︀င︀်းꩫ︀မ︀်။ မ︀ꩫ︀်းယ︀ႃႇ ꩬ︀တ︀ိယ︀င︀်းꩬ︀ီ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ဝႃႈထိꩫ︀်ပ︀ေႇꩫ︀မ︀်။ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ ဢ︀ိင︀်တ︀ြေꩬ︀လ︀ေက︀ေႃႇ ဝႃႈယ︀င︀်းꩫ︀မ︀်။ ပ︀ီႈꩫ︀ွင︀်ႇမ︀ႆ︀ႛက︀ေႃႇ ဝႃႈꩭၢပ︀်ႉလ︀ီင︀်ႇꩡ︀ၢင︀်ႈ၊ ꩡ︀ွႆ︀ႈꩡ︀ၢင︀်ႈꩫ︀မ︀်။ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ပ︀ိူꩫ︀်ႈမ︀ႆ︀ႛဝႃႈꩬ︀ွꩫ︀်ꩡ︀ၢင︀်ႈꩫ︀ီႈꩫ︀ီႈ ꩫ︀မ︀်။

³ ꩫ︀ႆ︀ႇꩬ︀ေႇမ︀ဝ်က︀ႃး ၸ︀ူႛင︀မ︀်းꩡ︀ိူဝ်းယ︀ႃႇ တ︀ၢင︀်းက︀ႅင︀်းဢ︀ꩫ︀်ႈက︀ိꩫ︀်ႈလ︀ဝ်ႛမ︀ဝ်ႇက︀မ︀်ႈ၊ ဢ︀ꩫ︀်ႈတ︀ုက︀်ႉက︀ꩫ︀်ႈပ︀ူဝ်ႇက︀ꩫ︀်ႈꩫ︀ႆ︀ႇၵ︀ဝ်ꩵ︀ႈဝႃႈꩭီတ︀်။ ဢ︀ꩫ︀်ႈၵ︀ၢမ︀်းꩫ︀မ︀်က︀ꩫ︀်ႈင︀ႆ︀း ꩡ︀ႂ်ႈဢ︀ꩫ︀်ႈလ︀ေႃးၸ︀ႃးင︀ိူꩫ︀်းၵ︀မ︀်းꩫ︀ႆ︀ႇၵ︀ဝ်က︀ေႃႇ ꩵ︀ႈထုက︀်ယ︀င︀်း။

⁴ မ︀ꩫ︀်းယ︀ႃႇ ꩭွင︀်ႛꩭိူꩫ︀်းၸ︀ူႛꩡ︀ဝ်ႛမ︀ႆ︀ႛက︀ေႃႇ ဝႃႈင︀မ︀်းꩡ︀ၢင︀်ႈꩫ︀မ︀်။ လ︀ုက︀်ႉမ︀ꩫ︀်းၵ︀ဝ်က︀ေႃႇ မ︀ꩫ︀်းမ︀ႆ︀ႛ ꩫ︀ၢပ︀်ႉယ︀မ︀်ႈꩬ︀ီ ၵ︀ၢမ︀်းမ︀ꩫ︀်းဝႃႈထွမ︀်ꩫ︀ီႈꩫ︀ီႈက︀ꩫ︀်ႈꩫ︀မ︀်။

⁵ ꩭွင︀်ႛꩭိူꩫ︀်းၸ︀ူႛꩡ︀ဝ်ႛမ︀ႆ︀ႛ ဢ︀ွꩫ︀်ႈꩫ︀ီႈꩫ︀ီႈ မ︀ဝ်ꩫ︀ႆ︀ႛက︀ီး ꩡ︀ိူဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭိုဝ်လ︀ိုဝ်က︀ေႃႇဢ︀ွꩫ︀်ႈꩫ︀ီႈꩫ︀ီႈ ꩵ︀ႈꩫ︀ႆ︀ႛ။

⁶ ꩡ︀ႃႇလ︀ိူင︀်ႈ ၸ︀ူႛင︀မ︀်းꩡ︀ိူဝ်းယ︀ႃႇ ဝႃႈပ︀ီꩫ︀်ႈၸ︀ူႛယ︀ုမ︀်ယ︀မ︀်ႈ ဢ︀ꩫ︀်ႈက︀ေၵ︀ိူင︀်ꩫ︀မ︀်။ ꩫ︀ႆ︀ႇမ︀ဝ်ꩡ︀ႂ်ႈက︀ီး မ︀ႃꩫ︀ယ︀ႂ်မ︀ႃးꩬ︀ီ ꩫ︀င︀်ၵ︀ုꩫ︀်ꩬ︀ူင︀်မ︀ႆ︀ႛꩫ︀က︀ꩫ︀်ႈ မ︀ꩫ︀်းမ︀ႆ︀ႛက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ၢင︀်ႈပ︀ူင︀်ႈတ︀ၢမ︀်ဢ︀ူ။

⁷ င︀ႆ︀းꩫ︀ႆ︀ႇꩬ︀ီ ၸ︀ူႛင︀မ︀်းꩡ︀ိူဝ်းယ︀ႃႇ ဝႃႈပ︀ီꩫ︀်ႈက︀ူဝ်ႈဢ︀ꩫ︀်ႈပ︀ိူꩫ︀်ႈꩫ︀ၢပ︀်ႉယ︀မ︀်ႈꩫ︀မ︀်။ ꩫ︀ႆ︀ႇမ︀ဝ်ꩡ︀ႂ်ႈက︀ီး မ︀ꩫ︀်းမ︀ႆ︀ႛပ︀ိူꩫ︀်ႈတ︀ၢင︀်ဢ︀ပ︀ႅတ︀်ႉꩬ︀ီ ꩡ︀ၢင︀်ႈထုက︀်ꩭိဝ်ႇၵ︀ုꩫ︀်ꩬ︀ူင︀်ဢ︀ူ။

လ︀ွင︀်ႈၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်

⁸ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်က︀ေႃႇ တ︀ၢင︀်ႈက︀ႅင︀်းဝႃႈꩫ︀ီႈ၊ ဝႃႈတ︀ၢꩫ︀်ႛꩬ︀ိုဝ်ႈꩰ၊ မ︀ဝ်ဝႃႈပ︀ီꩫ︀်ႈယ︀ႃလ︀ဝ်ႛ၊ ပ︀ွင︀်ႛင︀ိူꩫ︀်းၵ︀မ︀်းမ︀ႆ︀ႛ ꩡ︀ႂ်ႈမ︀ဝ်ဝႃႈင︀ွက︀်ꩫ︀မ︀်။

⁹ ၵ︀ဝ်ယ︀ႃႇ ꩬ︀မ︀်မ︀ႃတ︀ြႃးၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈလ︀ိူက︀်ႉလ︀မ︀်ꩫ︀ီႈမ︀ျတ︀်ႉꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩡ︀ႂ်ႈက︀ꩫ︀်ႛꩫ︀ႂ်းꩡ︀ုꩫ︀်ႈꩰလ︀ႅင︀်းꩰꩬ︀ီ ဝႃႈꩭၢပ︀်ႉꩡ︀ွမ︀်းꩫ︀မ︀်။

¹⁰ င︀ႆ︀းꩫ︀ႆ︀ႇꩬ︀ီ မ︀ိူဝ်ႈတ︀ီလ︀ိူက︀်ႉတ︀ၢင︀်ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇ ၵ︀ဝ်မ︀ႆ︀ႛဝႃႈꩡ︀ႅပ︀်ႉꩫ︀ီႈꩫ︀ီႈ ꩡ︀ၢမ︀်းꩫ︀ီႈꩫ︀ီႈ ဢ︀ွꩫ︀်ႈꩫ︀မ︀်။ ꩡ︀ႅပ︀်ႉယ︀ဝ်ႇꩬ︀ီ လ︀ွင︀်ႈဢ︀ꩫ︀်ႈတ︀ီတ︀ၢင︀်ဢ︀ပ︀ႅတ︀်ႉ မ︀ဝ်ယ︀င︀်းက︀ႃꩫ︀ႆ︀ႇꩬ︀ိုင︀် ၵ︀ဝ်မ︀ႆ︀ႛဝႃႈလ︀ိူက︀်ႉတ︀ၢင︀်ꩫ︀မ︀်။

¹¹ ၸ︀ူႛမ︀ေးၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်က︀ေႃႇ တ︀ၢင︀်းက︀ႅင︀်းဝႃႈꩫ︀ီႈ၊ မ︀ဝ်ဝႃႈၵ︀ႃႇပ︀ိူꩫ︀်ႈ၊ ဢ︀ိင︀်တ︀လ︀ေꩬ︀လ︀ေဝႃႈယ︀င︀်း၊ ꩬ︀တ︀ိယ︀င︀်းꩬ︀ီ က︀ူႈꩡ︀ွင︀်ႈက︀ူႈလ︀ွင︀်ႈမ︀ႆ︀ႛ ꩭူဝ်ꩡ︀ႂ်ႈဝႃႈꩬ︀ိုဝ်ႈꩫ︀ꩫ︀်ႈꩫ︀မ︀်။

¹² ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်ယ︀ႃႇ ဝႃႈပ︀ီꩫ︀်ႈက︀ူဝ်ႇဢ︀ꩫ︀်ႈဢ︀ဝ်ႈမ︀ေးလ︀ိဝ်ႈꩬ︀ီ ꩭွင︀်ႛꩭိူꩫ︀်းၸ︀ူႛꩡ︀ဝ်ႛမ︀ႆ︀ႛက︀ေႃႇ ဝႃႈင︀မ︀်းပ︀ေႇꩫ︀ီႈꩫ︀ီႈꩫ︀မ︀်။

¹³ ၸ︀ူႛမ︀ိုင︀်ႇꩡ︀ိူဝ်း ဢ︀ꩫ︀်ႈမ︀ိုင︀်ႇꩡ︀ိူဝ်းꩫ︀ီႈꩫ︀ီႈ ꩫ︀ႆ︀ႇၵ︀ဝ်ယ︀ႃႇ မ︀ူꩫ︀်ႈꩬ︀ုင︀်ꩬ︀ီ လ︀ွင︀်ႈယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩡ︀ဝ်ႛယ︀ေꩬ︀ုက︀ေႃႇ ပ︀ိူꩫ︀်ႈမ︀ႆ︀ႛꩬ︀ွꩫ︀်ꩭႂ်ႛꩫ︀ီႈꩫ︀ီႈ ပ︀ီꩫ︀်ႈဢ︀ူ။

လ︀ွင︀်ႈဢ︀ꩫ︀်ႈလ︀ိူက︀်ႉလ︀မ︀်လ︀ူင︀်

^14-15 တ︀ိမ︀ေႃတ︀ေꩴ︀း မ︀ဝ်ꩭိုင︀်က︀ꩬ︀င︀် မ︀ႂ်းမ︀ႆ︀ႛ က︀ဝ်ႈꩬ︀ၢင︀်မ︀ႃးလ︀ေဢ︀ူ။ ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈ က︀ဝ်ႈꩡ︀ိဝ်းꩰမ︀ဝ်ထိုင︀်မ︀ႃးက︀ီး ပ︀ီႈꩫ︀ွင︀်ႇ က︀ူꩫ︀်းꩡ︀ိူဝ်းဢ︀ꩫ︀်ႈပ︀ီꩫ︀်ႈ ꩡ︀ုမ︀်ႛꩭိူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်ꩫ︀ႆ︀ႇၵ︀ဝ် ꩭိုဝ်လ︀ိုဝ်ဝႃႈက︀မ︀်ႈက︀ႅင︀်းꩫ︀ꩫ︀ႆ︀ႇ မ︀ႂ်းꩭႂ်ႛတ︀ွင︀်းက︀ွတ︀်ꩫ︀ꩬ︀ီ လ︀ိက︀်ႉꩫ︀ႆ︀ႇတ︀ႅမ︀်ႛမ︀ႃးꩫ︀မ︀်။ ꩡ︀ိူဝ်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ဝ်ဢ︀ꩫ︀်ႈက︀မ︀်ႇꩬ︀မ︀်မ︀ႃတ︀ြႃးꩫ︀က︀ꩫ︀်ႈꩫ︀မ︀်။

¹⁶ လ︀ွင︀်ႈꩬ︀မ︀်မ︀ႃတ︀ြႃးဢ︀ꩫ︀်ႈꩭဝ်းယ︀ုမ︀်ယ︀မ︀်ႈꩫ︀ႆ︀ႇ လ︀ိူက︀်ႉလ︀မ︀် ꩬ︀ိုဝ်ႈꩡ︀ႂ်ႈလ︀ူင︀်တ︀ေႇတ︀ေႇꩫ︀မ︀်။ လ︀ွင︀်ႈဢ︀ꩫ︀်ႈလ︀ိူက︀်ႉလ︀မ︀်ဢ︀မ︀ႂ်းယ︀ႃႇ ꩡ︀ဝ်ႛယ︀ေꩬ︀ုၵ︀ရ︀ီတ︀် က︀ျွႃးလ︀ူင︀်းပ︀ီꩫ︀်ႈက︀ူꩫ︀်းမ︀ႃးꩬ︀ီ လ︀ွင︀်ႈꩫ︀ႆ︀ႇꩡ︀ႂ်ႈဢ︀ူꩫ︀ꩫ︀ႆ︀ႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ꩭီတ︀်ꩬ︀ၢက︀်ႉꩬ︀ေမ︀ႃးင︀ႆ︀း ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ꩫ︀ႆ︀ႛꩭꩫ︀်မ︀ႃးယ︀ဝ်ႇ။ က︀ူꩫ︀်းက︀ူႈၸ︀ꩫ︀်းက︀ေႃႇ ၵ︀ၢဝ်ႈၵ︀ၢမ︀်းꩫ︀ီႈမ︀ꩫ︀်းꩡ︀ဝ်ႛ ꩫ︀ႆ︀ႛꩥ︀ိꩫ︀်းꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ က︀မ︀်ၸ︀ႃတ︀င︀်းꩡ︀ꩫ︀်ႇ ယ︀ုမ︀်ယ︀မ︀်ႈမ︀ႃးက︀ꩫ︀်ႈယ︀ဝ်ႇ။ မ︀ꩫ︀်းꩡ︀ဝ်ႛမ︀ႆ︀ႛယ︀ႃႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ꩭၢပ︀်ႉꩬ︀ီဢ︀ဝ်ႈၵ︀ိုꩫ︀်ႛက︀ႃ မ︀ိူင︀်းက︀ၢင︀်ႈꩭၢဝ်ပ︀ွက︀်ႉယ︀ဝ်ႇ။