တ︀ိမ︀ေႃတ︀ေ ႑ 1 - Khamti Shan

^1-2 တ︀ိမ︀ေႃတ︀ေꩴ︀း မ︀ႂ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ မ︀ႂ်းမ︀ႆ︀ႛ ꩫ︀င︀်လ︀ုက︀်ႉက︀ဝ်ႈꩡ︀ဝ်ႛꩫ︀က︀ꩫ︀်ႈမ︀တ︀်ႉꩬ︀ီ က︀ဝ်ႈပ︀ေႃလ︀ုတ︀မ︀ၢꩫ︀်ꩡ︀ဝ်ႛꩡ︀ဝ်ႛယ︀ေꩬ︀ုၵ︀ရ︀ီတ︀် လ︀ိက︀်ႉတ︀ႅမ︀်ႛမ︀ႃးယ︀ဝ်ႇ။ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛၵ︀ေꩬ︀ေꩭဝ်း ꩫ︀ၵ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀်ဢ︀ꩫ︀်ႈꩭဝ်းတ︀ႂ်းထႃႛꩫ︀ႆ︀ႇ မ︀ႂ်းမ︀ႆ︀ႛ ဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ႅမ︀်းꩬ︀ႃက︀ႃတ︀ႃႉ။

လ︀ွင︀်ႈပ︀ꩫ︀်ႈꩬ︀တ︀ိဢ︀ꩫ︀်ႈယ︀ုမ︀်ၸ︀ိတ︀်ꩫ︀ႆ︀ႇၵ︀ဝ်

³ မ︀ိူဝ်ႈက︀ဝ်ႈ က︀ႃတ︀ိူင︀်းမ︀ႃက︀ေတ︀ေႃꩫ︀ိꩫ︀ႆ︀ႇ မ︀ႂ်းမ︀ႆ︀ႛက︀ဝ်ႈꩬ︀င︀်ဝႆ︀ႇꩫ︀ႆ︀ႇꩫ︀က︀ꩫ︀်ႈ ဝီင︀်းဢ︀ေၸ︀ႅတ︀်မ︀ႆ︀ႛ ဢ︀ူဢ︀ိက︀်ꩬ︀ီ ꩬ︀ြႃဢ︀ꩫ︀်ႈꩬ︀မ︀်မ︀ႃတ︀ြႃးမ︀ႆ︀ႛ ဢ︀ဝ်ႈၸ︀ႆ︀ꩬ︀ီꩬ︀ွꩫ︀်ꩫ︀ႆ︀ႇၵ︀ဝ်မ︀ႆ︀ႛ ꩡ︀တ︀်တ︀ႃႉ။

⁴ ၵ︀ဝ်ယ︀ႃႇ ပ︀ုင︀်ဢ︀ꩫ︀်ႈပ︀ူလ︀ီင︀်ယ︀ႃႈမ︀ွꩫ︀်ၵ︀ဝ် မ︀ႃႚမ︀ူဝ်မ︀ႃးꩫ︀ႆ︀ႇၵ︀ဝ်၊ ထဝ်ꩡ︀ိူဝ်ႇထဝ်ၸ︀ꩫ︀်း ဢ︀ꩫ︀်ႈꩬ︀ုတ︀်ꩰမ︀ဝ်ꩡ︀ၢင︀်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ၵ︀ႅက︀်ႉဢ︀ၵ︀ျႃၵ︀ူꩫ︀်ႇၵ︀ႃꩬ︀ီ ထီင︀်က︀ꩫ︀်ႈထႅင︀်းက︀ꩫ︀်ႈဢ︀ူ။ င︀ႆ︀း ပ︀ီꩭႂ်ႛꩭီတ︀်။ ဢ︀မ︀ႂ်းၵ︀ဝ်ယ︀ႃႇ ဢ︀ꩫ︀်ႈꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛꩵ︀ႈꩡ︀ႂ်ႈ။ ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈက︀ီးꩬ︀ိုင︀် တ︀ွင︀်းꩫ︀ႆ︀ႛꩫ︀မ︀်။

⁵ က︀ဝ်ႈဝႃႈင︀ႆ︀းꩫ︀ႆ︀ႇယ︀ႃႇ ꩭႂ်ႛပ︀ူဝ်းꩬ︀ူမ︀ႆ︀ႛ မ︀ႅတ︀်ႉတ︀ႃဢ︀ꩫ︀်ႈမ︀ူတ︀်ꩡ︀ၢင︀်၊ ꩡ︀ႂ်ႈက︀ꩫ︀်ႛꩫ︀ႂ်းဢ︀ꩫ︀်ႈꩡ︀ုꩫ︀်ႈꩡ︀ၢင︀်င︀ႆ︀း ꩡ︀ႂ်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈတ︀ေႇတ︀ေႇꩫ︀ႆ︀ႇၵ︀ဝ် မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇယ︀င︀်းꩬ︀ီဢ︀ူꩫ︀ႆ︀ႇꩫ︀မ︀်။

⁶ ꩬ︀ြႃမ︀ၢင︀်ႈၸ︀ွင︀်းယ︀ႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ မ︀ဝ်က︀မ︀်ႈက︀ႅင︀်းꩬ︀ီ ၵ︀ၢမ︀်းဢ︀ꩫ︀်ႈဢ︀က︀ိဝ်းမ︀ဝ်ယ︀င︀်းꩫ︀ႆ︀ႇၵ︀ဝ်ꩫ︀ႆ︀ၢႈꩬ︀ိုင︀် ဝႃႈက︀ꩫ︀်ႈင︀ႆ︀းꩬ︀ီ ပ︀ႅက︀်တ︀ၢင︀်းက︀ႃမ︀ူတ︀်ယ︀ဝ်ႇ။

⁷ ၵ︀ဝ်ယ︀ႃႇၵ︀ႂ်ႈꩭီတ︀်ꩬ︀ြႃဢ︀ꩫ︀်ႈꩬ︀ွꩫ︀်တ︀ြႃးၸ︀ြႃးပ︀ီꩫ︀်ႈꩡ︀ဝ်ႛꩫ︀က︀ေႃႇဢ︀ꩫ︀်ႈၵ︀ဝ်ၸ︀ူႛꩡ︀ဝ်ႛဢ︀က︀မ︀်ထက︀်ꩰꩬ︀ီ ပ︀ိူꩫ︀်ႈမ︀ႆ︀ႛꩬ︀ွꩫ︀်ꩭႂ်ႛꩫ︀ႆ︀ႇ ၵ︀ဝ်ၸ︀ူႛꩡ︀ဝ်ႛꩫ︀ႆ︀ၢႈက︀ေႃႇꩵ︀ႈတ︀ွင︀်း။

⁸ တ︀ြႃးၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀င︀်ဢ︀ꩫ︀်ႈထုက︀်ꩡ︀ွမ︀်းꩫ︀က︀ꩫ︀်ႈꩡ︀ွမ︀်းက︀ီး ꩫ︀ီႈမ︀ႅတ︀်ႉဢ︀ူꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။

^9-10 ၸ︀ြႃးပ︀ီꩫ︀်ႈꩡ︀ဝ်ႛ တ︀ြႃးꩭႂ်ႛဝႆ︀ႇꩫ︀ႆ︀ႇ ꩡ︀ႃႇက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇၵ︀ဝ်ꩵ︀ႈꩡ︀ႂ်ႈ။ ꩡ︀ႃႇက︀ူꩫ︀်းဢ︀ꩫ︀်ႈꩬ︀ိꩫ︀်ထမ︀်းမ︀ဝ်ယ︀င︀်း၊ ဢ︀ꩫ︀်ႈၸ︀ိတ︀်ပ︀ိူင︀်ႈ၊ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်က︀ူဝ်ႈယ︀မ︀်ႈ၊ ဢ︀ꩫ︀်ႈꩭီတ︀်ဢ︀ပ︀ႅတ︀်ႉ၊ က︀ူꩫ︀်းꩭင︀်ႛက︀ူꩫ︀်းꩭိုက︀်၊ က︀ူꩫ︀်းဢ︀ꩫ︀်ႈတ︀ြႃးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ဝ်ꩡ︀ွမ︀်း၊ ဢ︀ꩫ︀်ႈဢ︀ဝ်ႈတ︀ႆ︀ၢႈပ︀ူဝ်မ︀ေ၊ ဢ︀ꩫ︀်ႈဢ︀ဝ်ႈတ︀ႆ︀ၢႈပ︀ိူꩫ︀်ႈ၊ ဢ︀ꩫ︀်ႈတ︀ၢင︀်းက︀ႅင︀်းၸ︀ေႛ၊ ဢ︀ꩫ︀်ႈၸ︀ူႛꩡ︀ႆ︀ၢးꩫ︀ႆ︀ၢႈၸ︀ူႛꩡ︀ႆ︀ၢး ၸ︀ူႛယ︀ိင︀်းꩫ︀ႆ︀ၢႈၸ︀ူႛယ︀ိင︀်း ꩭီတ︀်ၸ︀ူဝ်မ︀ေးက︀ꩫ︀်ႈ၊ ဢ︀ꩫ︀်ႈၵ︀ႆ︀ၢက︀ူꩫ︀်း၊ ဢ︀ꩫ︀်ႈꩭီတ︀်ꩬ︀ၢက︀်ႉꩬ︀ေၸ︀ိတ︀်၊ ဢ︀ꩫ︀်ႈၸ︀ႅတ︀်ႉပ︀ိူꩫ︀်ႈင︀ႆ︀း ꩡ︀ႃႇက︀ူꩫ︀်းဢ︀ꩫ︀်ႈၸ︀ႆ︀ꩬ︀မ︀်မ︀ႃတ︀ြႃးꩫ︀ႆ︀ႇၵ︀ဝ်ꩫ︀မ︀်ꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။

¹¹ တ︀ြႃးꩫ︀ႆ︀ႇယ︀ႃႇ ဢ︀ꩫ︀်ႈၵ︀ၢဝ်ႈၵ︀ၢမ︀်းꩫ︀ီႈ လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛယ︀င︀်း ဢ︀ꩫ︀်ႈက︀ဝ်ႈမ︀ႆ︀ႛ ၸ︀ြႃးဢ︀ꩫ︀်ႈမ︀ူꩫ︀်ႈၸ︀ုင︀်းယ︀ႂ်ပ︀ူင︀်ႈဢ︀ၢပ︀်ႉꩬ︀ီ ꩭႂ်ႛꩭူဝ်းမ︀ႃးꩫ︀ႆ︀ႇꩫ︀မ︀်။

လ︀ွင︀်ႈပ︀ေႃလ︀ုယ︀ူဝ်းယ︀ွင︀်ႛမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ

¹² ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်း ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛဢ︀မ︀ူးမ︀ꩫ︀်းꩡ︀ဝ်ႛက︀ဝ်ႈꩭီတ︀်ထႅက︀်ႉဢ︀ူꩫ︀ꩬ︀ီ ပ︀ူင︀်ႈဢ︀ၢပ︀်ႉꩭႂ်ႛမ︀ႃးင︀ႆ︀း ꩭႂ်ႛပ︀ူဝ်းက︀ဝ်ႈꩭီတ︀်ꩫ︀ႆ︀ႇက︀ေႃႇ ꩭႅင︀်းထႅမ︀်ꩭႂ်ႛမ︀ႆ︀ႛက︀ဝ်ႈယ︀ူဝ်းယ︀ွင︀်ႛလ︀ူင︀်ꩫ︀မ︀်။

¹³ မ︀ိူဝ်ႈင︀ႃးက︀ꩫ︀်ႛꩫ︀ႃႛမ︀ႆ︀ႛယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ က︀ဝ်ႈၸ︀ိတ︀်ꩬ︀ူပ︀်ၸ︀ိတ︀်ၵ︀ၢမ︀်းမ︀ႃးဢ︀ူ။ ꩡ︀ိူဝ်းမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ꩫ︀ိက︀်ႉꩬ︀ၢက︀်ႉမ︀ႃး၊ ꩡ︀ူဝ်က︀ႃးမ︀ႃးဢ︀ူ။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ က︀ဝ်ႈၸ︀ိတ︀်မ︀ႃးꩫ︀ႆ︀ႇ က︀ွပ︀်ႉပ︀ိူဝ်ႈ မ︀ꩫ︀်းꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈမ︀ႃးꩫ︀ႆ︀ႇꩬ︀ီ က︀ဝ်ႈက︀ꩬ︀င︀်ꩭီတ︀်ꩫ︀ꩫ︀ႆ︀ႇမ︀ဝ်တ︀ွင︀်းမ︀ႃးꩬ︀ီꩫ︀မ︀်။ င︀ႆ︀းꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛက︀ဝ်ႈမ︀ႆ︀ႛ ဢ︀ီꩫ︀ူႈꩭႂ်ႛမ︀ႃးဢ︀ူ။

¹⁴ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ က︀ဝ်ႈမ︀ႆ︀ႛꩭၢက︀်ႉꩭွမ︀်ဢ︀ီꩫ︀ူႈလ︀ူင︀်မ︀ႃးꩫ︀မ︀်။ က︀ဝ်ႈယ︀ႃႇဢ︀ူက︀ꩫ︀်ႛꩫ︀ႂ်းမ︀ꩫ︀်းꩡ︀ဝ်ႛꩫ︀ႆ︀ႇꩬ︀ီ ꩭႂ်ႛပ︀ူဝ်း မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီ ပ︀ိူꩫ︀်ႈမ︀ႆ︀ႛက︀ေႃႇꩭၢက︀်ႉꩭွမ︀်ပ︀ီꩫ︀်ႈꩫ︀ႆ︀ႇ မ︀ꩫ︀်းꩡ︀ဝ်ႛက︀ဝ်ႈမ︀ႆ︀ႛꩡ︀ွႆ︀ႈꩭႂ်ႛမ︀ႃးယ︀ဝ်ႇ။

¹⁵ မ︀ိူင︀်းက︀ၢင︀်ႈꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်က︀ျွႃးမ︀ႃးꩫ︀ႆ︀ႇ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛလ︀ုက︀်ႉဢ︀ပ︀ႅတ︀်ႉၵ︀ဝ်မ︀ႆ︀ႛ မ︀ႃးၵ︀ေꩬ︀ေꩭႂ်ႛꩫ︀မ︀်ꩫ︀ꩫ︀ႆ︀ႇ ၵ︀ၢမ︀်းꩬ︀ႅတ︀်ႉꩡ︀ႃ ဢ︀ꩫ︀်ႈဝႃႈယ︀ုမ︀်ယ︀မ︀်ႈမ︀ဝ်ပ︀ိတ︀်ႉꩫ︀မ︀်။ က︀ဝ်ႈယ︀ႃႇ ꩫ︀ႂ်းက︀ူꩫ︀်းတ︀င︀်းမ︀ိူင︀်းမ︀ႆ︀ႛ ဢ︀ꩫ︀်ႈၵ︀ႅꩫ︀်းဢ︀ပ︀ႅတ︀်ႉꩫ︀ႃꩫ︀မ︀်။

¹⁶ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းဢ︀ꩫ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈꩬ︀ီ တ︀ီꩫ︀ႆ︀ႛဢ︀ꩬ︀ၢက︀်ႉထႃဝရ︀ꩫ︀ႆ︀ႇၵ︀ဝ်မ︀ႆ︀ႛ ပ︀ျႃးပ︀ႅင︀်ႈꩡ︀ွမ︀်ႈက︀ွတ︀်ꩫ︀ꩬ︀ီ က︀ဝ်ႈ ၸ︀ူႛဢ︀ꩫ︀်ႈၵ︀ႅꩫ︀်းဢ︀ပ︀ႅတ︀်ႉꩫ︀ႃမ︀ႆ︀ႛ ꩬ︀ေးၵ︀ၢမ︀်ꩭႂ်ႛမ︀ႃးယ︀ဝ်ႇ။

¹⁷ ꩡ︀ဝ်ႛထႃဝရ︀ၸ︀ြႃးꩬ︀ူလ︀ိဝ်ႈ ဢ︀ꩫ︀်ႈၸ︀ူႛပ︀ီꩫ︀်ႈꩡ︀ဝ်ႛꩭူဝ်ၵ︀မ︀်း ထႃဝရ︀၊ ဢ︀ꩫ︀်ႈမ︀ဝ်လ︀ွက︀်ႉမ︀ဝ်လ︀ႆ︀ၢႈꩡ︀ၢင︀်ႈ၊ ဢ︀ꩫ︀်ႈဢ︀ူက︀ꩫ︀်ႛꩫ︀ိူဝ်ဢ︀ꩫ︀ိက︀်ႉꩡ︀၊ ဢ︀ꩫ︀်ႈဢ︀ဝ်ႈတ︀ႃႈက︀ူꩫ︀်းꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇ မ︀ူꩫ︀်ႈၸ︀ုင︀်းမ︀ꩫ︀်းꩡ︀ဝ်ႛ ထႃဝရ︀ ꩭႂ်ႛက︀ီႈꩭိုင︀်းပ︀ိုင︀်းꩬ︀ႂ်တ︀ီၵ︀ႃႛက︀ႃတ︀ႃႉ။ ꩬ︀ႃထု။

¹⁸ လ︀ုက︀်ႉက︀ဝ်ႈတ︀ိမ︀ေႃတ︀ေꩴ︀း ၵ︀ၢမ︀်းဢ︀ꩫ︀်ႈမ︀ိူဝ်ႈင︀ႃႈက︀ꩫ︀်ႛꩫ︀ႃႛမ︀ႆ︀ႛ ပ︀ရ︀ေႃးၸ︀ႅတ︀်ႉၵ︀ဝ် မ︀ႂ်းမ︀ႆ︀ႛꩡ︀ိုဝ်ꩬ︀ီꩭူဝ်းဝႆ︀ႇꩫ︀ႆ︀ႇၵ︀ဝ်မ︀ႆ︀ႛ ပ︀ꩫ︀်ႛၵ︀ိူင︀်ꩰꩬ︀ီ ꩬ︀ြႃဢ︀ꩫ︀်ႈꩬ︀ွꩫ︀်ၸ︀ိတ︀်ꩫ︀ႆ︀ႇၵ︀ဝ်မ︀ႆ︀ႛꩡ︀တ︀်တ︀ႃႉ၊ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀မ︀်မ︀ႃတ︀ြႃး ꩬ︀ွꩫ︀်ꩭႂ်ႛထက︀်ꩰတ︀ႃႉ။

¹⁹ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈၵ︀ိူင︀်ꩰꩬ︀ီ ꩡ︀ႂ်ႈက︀ꩫ︀်ႛꩫ︀ႂ်းဢ︀ဝ်ႈꩡ︀ုꩫ︀်ႈꩡ︀ၢင︀်တ︀ႃႉ။ က︀ူꩫ︀်းက︀မ︀်ႈၸ︀ွင︀်းယ︀ႃႇ ꩡ︀ႂ်ႈက︀ꩫ︀်ႛꩫ︀ႂ်းၸ︀ူႛꩡ︀ဝ်ႛမ︀ႆ︀ႛ ꩬ︀ၢꩫ︀်တ︀ၢꩫ︀်းꩬ︀ီ ꩡ︀ႂ်ႈဢ︀ꩫ︀်ႈယ︀ုမ︀်ယ︀မ︀်ႈၸ︀ြႃးပ︀ီꩫ︀်ႈꩡ︀ဝ်ႛ လ︀ူႇက︀ႃမ︀ူတ︀်ယ︀ဝ်ႇ။

²⁰ ꩫ︀ႂ်းၵ︀ဝ်မ︀ႆ︀ႛ ꩭေမ︀ေꩫ︀ႄꩫ︀ၵ︀ႃ ဢ︀ႃလ︀ေꩡ︀ꩫ︀်တ︀ုၵ︀ဝ်လ︀ွေႛဢ︀ူ။ ꩭႂ်ႛပ︀ူဝ်းၵ︀ဝ်ꩬ︀ၢင︀်ဝွေꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ၸ︀ိတ︀်ꩬ︀ူပ︀်ၸ︀ိတ︀်ၵ︀ၢမ︀်းဢ︀ိက︀်ꩫ︀ႆ︀ႇ ၵ︀ဝ်မ︀ႆ︀ႛက︀ဝ်ႈ လ︀ုက︀်ႉꩫ︀ႂ်းꩡ︀ိူဝ်းမ︀ႆ︀ႛ ꩭူဝ်ႛဢ︀ွက︀်ၵ︀ွတ︀်ယ︀ဝ်ႇ။