တ︀ႅတ︀်ꩬ︀ႃလ︀ေႃꩫ︀ိက︀် ႑ 5 - Khamti Shanလ︀ွင︀်ႈꩡ︀ဝ်ႛယ︀ေꩬ︀ုတ︀ီက︀ျွႃးမ︀ႃးမ︀ႆ︀ႛ ꩭႂ်ႛၵ︀ႅတ︀် 1 ပ︀ီႈꩫ︀ွင︀်ႇၵ︀ဝ်ꩴ︀း ဢ︀ꩫ︀်ႈꩫ︀ႆ︀ႇၵ︀ဝ် မ︀ိူဝ်ႈလ︀ႂ်ႈတ︀ီပ︀ီꩫ︀်ႈမ︀ႃးꩫ︀ꩫ︀ႆ︀ႇယ︀ႃႇ ꩬ︀ူမ︀ႆ︀ႛဢ︀ꩫ︀်ႈဝႃႈဝႃႈꩵ︀ႈယ︀င︀်း။ 2 ꩫ︀င︀်က︀ၢင︀်ႈၵ︀ိုꩫ︀်းမ︀ႆ︀ႛ ၸ︀ူႛလ︀ၢက︀်ႉမ︀ႃးꩫ︀က︀ꩫ︀်ႈ မ︀ိူဝ်ႈꩭဝ်းမ︀ဝ်ထိူပ︀်မ︀ဝ်တ︀ႂ်းꩫ︀ႆ︀ႇ ꩡ︀ဝ်ႛယ︀ေꩬ︀ုတ︀ီက︀ျွႃးလ︀ူင︀်းမ︀ႃးꩫ︀မ︀်ꩫ︀ꩫ︀ႆ︀ႇ ꩬ︀ူꩡ︀ဝ်ႛက︀ေႃႇတ︀ွင︀်းꩫ︀ီႈꩫ︀ီႈ ဢ︀ူ။ 3 မ︀ိူဝ်ႈက︀ူꩫ︀်းꩫ︀ႆ︀ႇၵ︀ဝ် ꩵ︀ႈပ︀ီꩫ︀်ႈက︀ꩬ︀င︀်ꩫ︀ꩬ︀ီ ဢ︀ူမ︀ိူꩫ︀်းꩰက︀ꩫ︀်ႈꩫ︀ႆ︀ႇ က︀တ︀ိက︀်က︀တ︀ၢင︀်းၸ︀ေးလ︀ူင︀် တ︀ီထိုင︀်မ︀ႃးꩫ︀မ︀်။ ꩫ︀င︀်ၸ︀ူႛယ︀ိင︀်းဢ︀ꩫ︀်ႈတ︀ီၸ︀ေႈလ︀ုက︀်ႉꩫ︀ႆ︀ႇ က︀တ︀ိက︀်က︀တ︀ၢင︀်းတ︀ွင︀်ႇဢ︀ႂ်မ︀ႃးꩫ︀က︀ꩫ︀်ႈ မ︀ိူဝ်ႈၸ︀ႂ်က︀ေႃႇ မ︀ဝ်တ︀ႂ်းꩫ︀ႆ︀ႇ ၸ︀ေးလ︀ူင︀်တ︀ီထိုင︀်မ︀ႃးတ︀ေႇတ︀ေႇꩫ︀မ︀်။ င︀ႆ︀းꩫ︀ႆ︀ႇꩬ︀ီ ၸ︀ႂ်က︀ေႃႇလ︀ုက︀်ႉၸ︀ေးမ︀ႆ︀ႛꩵ︀ႈလ︀ွတ︀်ႉ။ 4 ꩫ︀ႆ︀ႇꩫ︀က︀ေႃႇ ပ︀ီႈꩫ︀ွင︀်ႇၵ︀ဝ်ꩴ︀း ꩬ︀ူယ︀ႃႇ ဢ︀ူက︀ꩫ︀်ႛꩫ︀ႂ်းဢ︀ꩫ︀်ႈꩫ︀မ︀်ႈꩬ︀ိင︀်မ︀ဝ်ꩡ︀ႂ်ႈꩫ︀ႆ︀ႇꩬ︀ီ ဝꩫ︀်းမ︀ိူဝ်ႈꩡ︀ဝ်ႛယ︀ေꩬ︀ုက︀ျွႃးလ︀ူင︀်းမ︀ႃးꩫ︀ႆ︀ႇ ꩫ︀င︀်မ︀ိူဝ်ႈပ︀ၢင︀်ႛၵ︀မ︀်ႈၸ︀ူႛလ︀ၢက︀်ႉမ︀ႃးꩫ︀က︀ꩫ︀်ႈ ꩬ︀ူꩵ︀ႈဝႃႈတ︀ိꩫ︀်။ 5 ꩬ︀ူတ︀င︀်းမ︀ိူင︀်း က︀ူꩫ︀်းဢ︀ꩫ︀်ႈဢ︀ူပ︀ႃႛဢ︀ꩫ︀်ႈလ︀ႅင︀်းꩫ︀မ︀်။ ꩭဝ်းယ︀ႃႇ က︀ူꩫ︀်းဢ︀ꩫ︀်ႈပ︀ႃႛဢ︀ꩫ︀်ႈꩫ︀မ︀်ႈꩬ︀ိင︀်ꩵ︀ႈꩡ︀ႂ်ႈ။ 6 င︀ႆ︀းꩫ︀ႆ︀ႇꩬ︀ီ ꩭဝ်းယ︀ႃႇꩫ︀င︀်ပ︀ိူꩫ︀်ႈꩫ︀ွꩫ︀်းꩫ︀က︀ꩫ︀်ႈ ꩵ︀တ︀ၢပ︀်ႉꩫ︀ွꩫ︀်း။ ꩬ︀တ︀ိယ︀င︀်းꩬ︀ီ ၵ︀ႅတ︀်က︀ꩫ︀်ႈတ︀ႃႉ။ 7 ပ︀ၢင︀်ႛၵ︀မ︀်ႈယ︀ႃႇ ယ︀ၢမ︀်းဢ︀ꩫ︀်ႈက︀ူꩫ︀်းꩫ︀ႆ︀ႇၵ︀ဝ်ꩫ︀ွꩫ︀်း၊ ယ︀ၢမ︀်းဢ︀ꩫ︀်ႈ ၵ︀ဝ်မ︀ူးမ︀ဝ်းꩫ︀မ︀်။ 8 ꩫ︀ႆ︀ႇꩫ︀က︀ေႃႇ ꩭဝ်းယ︀ႃႇက︀ူꩫ︀်းဢ︀ꩫ︀်ႈဢ︀ူပ︀ႃႛဢ︀ꩫ︀်ႈလ︀ႅင︀်းꩫ︀ႆ︀ႇꩬ︀ီ ထုက︀်ꩫ︀ီႈၵ︀ႅတ︀်က︀ꩫ︀်ႈꩫ︀မ︀်။ ꩫ︀င︀်ꩭဝ်းꩫ︀ုင︀်ႈꩬ︀ိူဝ်ႛလ︀ီက︀်ꩬ︀ီ က︀ုမ︀်ႇတ︀ူဝ်ႈꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈ ꩭၢက︀်ႉꩭွမ︀်ꩬ︀ီ တ︀ူဝ်ႈၸ︀ူႛꩡ︀ဝ်ႛမ︀ႆ︀ႛက︀ုမ︀်ႇတ︀ႃႉ။ ꩫ︀င︀်ꩭဝ်းꩬ︀ုပ︀်မ︀ူက︀်လ︀ီက︀်ꩬ︀ီ က︀ုမ︀်ႇꩭူဝ်ꩫ︀က︀ꩫ︀်ႈ ဢ︀ꩫ︀်ႈꩭဝ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛၵ︀ေꩬ︀ေဝႆ︀ႇꩫ︀ႆ︀ႇမ︀ႆ︀ႛ ဢ︀က︀မ︀်က︀ꩫ︀်ႈတ︀ႃႉ။ 9 ꩭဝ်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛꩭွင︀်ႇဝႆ︀ႇꩫ︀ႆ︀ႇ ꩭၢင︀်းၵ︀ၢမ︀်တ︀ၢမ︀်ဢ︀ပ︀ႅတ︀်ႉꩵ︀ႈꩡ︀ႂ်ႈ။ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်းမ︀ႆ︀ႛ ꩡ︀ႂ်ႇꩬ︀ီ ၵ︀ေꩬ︀ေꩭႂ်ႛꩫ︀ႆ︀ႇမ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛꩭၢပ︀်ႉဢ︀ဝ်ႈꩫ︀ႆ︀ႇꩫ︀မ︀်။ 10 ꩡ︀ဝ်ႛယ︀ေꩬ︀ုၵ︀ရ︀ီတ︀် ၵ︀ၢမ︀်တ︀ႆ︀ၢႈမ︀ႃးꩫ︀ႆ︀ႇယ︀ႃႇ မ︀ိူဝ်ႈမ︀ꩫ︀်းꩡ︀ဝ်ႛက︀ျွႃးမ︀ႃးꩫ︀ႆ︀ႇ ꩭဝ်းတ︀ႆ︀ၢႈက︀ႃꩫ︀က︀ေႃႇယ︀ႃ၊ ꩫ︀ိပ︀်ꩬ︀ီဢ︀ူꩫ︀က︀ေႃႇယ︀ႃ၊ ꩭႂ်ႛပ︀ူဝ်းတ︀င︀်းမ︀ꩫ︀်းꩡ︀ဝ်ႛꩫ︀ႆ︀ႛꩭူမ︀်ႈဢ︀ူꩫ︀ႆ︀ႇꩫ︀မ︀်။ 11 င︀ႆ︀းꩫ︀ႆ︀ႇꩬ︀ီ ꩫ︀င︀်င︀ႆ︀ႚꩬ︀ူ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ထႅမ︀်ꩭႅင︀်းက︀ꩫ︀်ႈ ꩡ︀ွႆ︀ႈက︀ꩫ︀်ႈꩬ︀ီဢ︀ူꩫ︀က︀ꩫ︀်ႈ က︀ၢပ︀်ꩬ︀ီꩭီတ︀်က︀ႃတ︀ႃႉ။ ၵ︀ၢမ︀်းꩬ︀င︀် 12 ပ︀ီႈꩫ︀ွင︀်ႇၵ︀ဝ်ꩴ︀း ꩭူဝ်က︀ေဢ︀ꩫ︀်ႈꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩬ︀ူမ︀ႆ︀ႛ ꩬ︀င︀်ꩬ︀ွꩫ︀်ꩬ︀ုင︀်းမ︀ႃးꩫ︀ႆ︀ႇၵ︀ဝ်မ︀ႆ︀ႛ ꩫ︀ၢပ︀်ႉယ︀မ︀်ႈက︀ꩫ︀်ႈတ︀ႃႉ။ 13 ၵ︀ဝ်ꩭီတ︀်ꩭူဝ်က︀ေꩡ︀ိူဝ်းꩫ︀ႆ︀ႇꩬ︀ီ ၵ︀ဝ်မ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်း ꩭၢက︀်ႉꩭွမ︀်ꩬ︀ီ ꩫ︀ၢပ︀်ႉယ︀မ︀်ႈက︀ꩫ︀်ႈတ︀ႃႉ။ ꩬ︀ူၸ︀ူႛꩡ︀ဝ်ႛက︀ေႃႇ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ဢ︀ူꩫ︀ီႈꩫ︀ီႈ က︀ꩫ︀်ႈတ︀ႃႉ။ 14 ၸ︀ူႛၵ︀ၢꩫ︀်ႇꩫ︀ႆ︀ႇၵ︀ဝ်မ︀ႆ︀ႛ ꩬ︀တ︀ိꩭႂ်ႛတ︀ႃႉ။ က︀ူꩫ︀်းဢ︀ꩫ︀်ႈက︀ူဝ်ႈꩭႆ︀ၢႇꩫ︀ႆ︀ႇၵ︀ဝ်မ︀ႆ︀ႛ ထႅမ︀်ꩭႅင︀်းꩭႂ်ႛတ︀ႃႉ။ ဢ︀ꩫ︀်ႈꩭႅင︀်းꩡ︀ႂ်ႈꩭႅင︀်းၵ︀ွꩫ︀်ဢ︀ေꩫ︀ႆ︀ႇၵ︀ဝ်မ︀ႆ︀ႛ ꩡ︀ွႆ︀ႈက︀ꩫ︀်ႈတ︀ႃႉ။ က︀ူꩫ︀်းက︀ူႈက︀ူဝ်ႇမ︀ႆ︀ႛ ꩡ︀ႂ်ႈယ︀ၢဝ်းက︀ꩫ︀်ႈတ︀ႃႉ။ 15 ၸ︀ႂ်မ︀ႆ︀ႛက︀ေႃႇ ပ︀ီတ︀ွပ︀်ꩬ︀ူꩫ︀်ႇက︀ꩫ︀်ႈ။ ꩫ︀ႂ်းꩡ︀ိူဝ်းꩬ︀ူၸ︀ူႛꩡ︀ဝ်ႛမ︀ႆ︀ႛꩫ︀က︀ေႃႇယ︀ႃ ပ︀ိူꩫ︀်ႈၸ︀ႂ်မ︀ႆ︀ႛꩫ︀က︀ေႃႇယ︀ႃ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩭီတ︀်လ︀ွင︀်ႈꩫ︀ီႈဢ︀ၵ︀ႅက︀်ႉဢ︀ၵ︀ျႃက︀ꩫ︀်ႈတ︀ႃႉ။ 16 မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩡ︀ူမ︀်းꩭုမ︀်က︀ꩫ︀်ႈတ︀ႃႉ။ 17 မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ယ︀ွꩫ︀်းꩬ︀ူးက︀ꩫ︀်ႈတ︀ႃႉ။ 18 ပ︀ီꩫ︀်ႈꩭိုဝ်ꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။ ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူဢ︀ꩫ︀်ႈယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩡ︀ဝ်ႛယ︀ေꩬ︀ုꩫ︀ႆ︀ႇၵ︀ဝ်မ︀ႆ︀ႛ ၵ︀ႂ်ႈꩭႂ်ႛက︀မ︀်ႈက︀ႅင︀်းꩫ︀ႆ︀ႇꩫ︀မ︀်။ 19 ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ီꩡ︀တ︀်။ 20 ၵ︀ၢမ︀်းဢ︀ꩫ︀်ႈ ဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩭူဝ်းၿျႃၻိက︀်ႉꩫ︀ႆ︀ႇၵ︀ဝ်မ︀ႆ︀ႛ ပ︀ီမ︀ဝ်ၵ︀ၢꩫ︀်း။ 21 တ︀ြႃးဢ︀ꩫ︀်ႈꩬ︀ူꩫ︀ႆ︀ႛꩥ︀ိꩫ︀်းꩫ︀ႆ︀ႇၵ︀ဝ် က︀ူႈဢ︀ꩫ︀်ႈမ︀ႆ︀ႛ ꩡ︀ႅပ︀်ႉꩫ︀ီႈꩫ︀ီႈ ꩬ︀ီ ဢ︀ꩫ︀်ႈꩫ︀ီႈမ︀ႆ︀ႛꩡ︀ွမ︀်းတ︀ႃႉ။ 22 လ︀ွင︀်ႈဢ︀ꩫ︀်ႈမ︀ဝ်ꩫ︀ီႈတ︀င︀်းမ︀ိူင︀်းမ︀ႆ︀ႛ င︀ိူင︀်ႇတ︀ႃႉ။ 23 ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩭဝ်းမ︀ႆ︀ႛ ဢ︀ဝ်ႈက︀တ︀်ယ︀ီꩫ︀်ႈꩭႂ်ႛꩫ︀ႆ︀ႇ ꩬ︀ူမ︀ႆ︀ႛ က︀ူႈꩡ︀ွင︀်ႈက︀ူႈလ︀ွင︀်ႈ ꩭႂ်ႛဢ︀ဝ်ႈမ︀ူတ︀်ꩡ︀ၢင︀်က︀ႃတ︀ႃႉ။ တ︀ူဝ်ထိုင︀်ဝꩫ︀်းဢ︀ꩫ︀်ႈ ꩡ︀ဝ်ႛယ︀ေꩬ︀ုၵ︀ရ︀ီတ︀် က︀ျွႃးမ︀ႃးꩫ︀ႆ︀ႇ ꩬ︀ူမ︀ႆ︀ႛ ꩭႂ်ႛပ︀ူဝ်းဢ︀ꩫ︀်ႈတ︀ီတ︀ၢင︀်ဢ︀ပ︀ႅတ︀်ႉမ︀ဝ်ယ︀င︀်းꩫ︀ႆ︀ႇ တ︀ူဝ်ႈꩬ︀ူ၊ ꩡ︀ႂ်ႈꩬ︀ူ၊ ၵ︀ွꩫ︀်ꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩭႂ်ႛမ︀ိုင︀်ႇပ︀ွင︀်ႈက︀ႃတ︀ႃႉ။ 24 ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩬ︀ူမ︀ႆ︀ႛꩭွင︀်ႇဝႆ︀ႇꩫ︀ႆ︀ႇ ꩬ︀ႅတ︀်ႉꩡ︀ႃယ︀င︀်းꩫ︀ႆ︀ႇꩬ︀ီ ꩫ︀င︀်ꩫ︀ႆ︀ႇꩫ︀က︀ꩫ︀်ႈꩭီတ︀်က︀ႃဢ︀ူ။ 25 ပ︀ီႈꩫ︀ွင︀်ႇၵ︀ဝ်ꩴ︀း ꩡ︀ႃႇတ︀ူႈက︀ေႃႇ ယ︀ွꩫ︀်းꩬ︀ူးက︀ꩫ︀်ႈမ︀ႃးတ︀ႃႉ။ 26 ၸ︀ူႛယ︀ုမ︀်ယ︀မ︀်ႈတ︀င︀်းမ︀ိူင︀်းမ︀ႆ︀ႛ ဢ︀ဝ်ႈမ︀ႅတ︀်ႉတ︀ႃၸ︀ြႃးပ︀ီꩫ︀်ႈꩡ︀ဝ်ႛ ꩭၢက︀်ႉꩰꩭွမ︀်ꩰ တ︀ၢꩫ︀်ႛတ︀ူဝ်က︀ꩫ︀်ႈတ︀ႃႉ။ 27 ဢ︀ႃꩫ︀ႃꩡ︀ဝ်ႛယ︀ေꩬ︀ုမ︀ႆ︀ႛပ︀ိုင︀်ႈဢ︀ိင︀်ႈꩬ︀ီ ꩬ︀ူမ︀ႆ︀ႛက︀ဝ်ႈ တ︀ိက︀်ꩬ︀ူꩫ︀်းꩭႂ်ႛဢ︀ူ။ လ︀ိက︀်ႉꩫ︀ႆ︀ႇက︀ူꩫ︀်းꩡ︀ိူဝ်းတ︀င︀်းမ︀ိူင︀်းမ︀ႆ︀ႛ ဢ︀ၢꩫ︀်ꩭႂ်ႛတ︀ႃႉ။ 28 ꩬ︀ူတ︀င︀်းမ︀ိူင︀်းမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်း ꩭႂ်ႛဢ︀ီꩫ︀ူႈꩭၢက︀်ႉꩭွမ︀်က︀ႃတ︀ႃႉ။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.