ယ︀ေႃးꩭၢꩫ︀် ႑ 5 - Khamti Shan

လ︀ွင︀်ႈဢ︀ꩫ︀်ႈꩭဝ်း မ︀ိူင︀်းက︀ၢင︀်ႈမ︀ႆ︀ႛပ︀ေႇဢ︀ွင︀်

¹ က︀ူဝ်ႇဢ︀ꩫ︀်ႈ ꩡ︀ဝ်ႛယ︀ေꩬ︀ုယ︀ႃႇ ꩡ︀ဝ်ႛၵ︀ရ︀ီတ︀်ꩫ︀မ︀်ꩫ︀ꩬ︀ီ ယ︀ုမ︀်ယ︀မ︀်ႈꩫ︀ႆ︀ႇယ︀ႃႇ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ က︀ူဝ်ႇဢ︀ꩫ︀်ႈပ︀ူဝ်မ︀ႆ︀ႛꩭၢက︀်ႉꩫ︀ႆ︀ႇယ︀ႃႇ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ꩭၢက︀်ႉဢ︀ူ။

² ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭဝ်းꩭၢက︀်ႉꩬ︀ီ ၵ︀ၢမ︀်းမ︀ꩫ︀်းꩡ︀ဝ်ႛထွမ︀်ꩡ︀ွမ︀်းက︀ီး လ︀ုက︀်ႉမ︀ꩫ︀်းꩡ︀ဝ်ႛၵ︀ဝ်မ︀ႆ︀ႛက︀ေႃႇ ꩭၢက︀်ႉဢ︀ူꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။

³ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭၢက︀်ႉꩫ︀ꩫ︀ႆ︀ႇယ︀ႃႇ ဢ︀ꩫ︀်ႈꩡ︀ွမ︀်းက︀ႅင︀်းꩬ︀ိꩫ︀်မ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်ꩫ︀မ︀်။ ꩬ︀ိꩫ︀်မ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်က︀ေႃႇ ꩡ︀ွမ︀်းက︀ႅင︀်းꩵ︀ႈယ︀ပ︀်။

⁴ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူဝ်ႇဢ︀ꩫ︀်ႈပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇယ︀ႃႇ မ︀ိူင︀်းက︀ၢင︀်ႈမ︀ႆ︀ႛ ပ︀ေႇဢ︀ွင︀်ဢ︀ူ။ ꩭဝ်းမ︀ိူင︀်းက︀ၢင︀်ႈမ︀ႆ︀ႛ ပ︀ေႇဢ︀ွင︀်ꩫ︀ႆ︀ႇယ︀ႃႇ လ︀ႆ︀ၢးပ︀ိူဝ်ႈꩭဝ်းယ︀ုမ︀်ယ︀မ︀်ႈꩬ︀ီꩫ︀မ︀်။

⁵ က︀ူဝ်ႇဢ︀ꩫ︀်ႈ ꩡ︀ဝ်ႛယ︀ေꩬ︀ုမ︀ႆ︀ႛ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀ꩬ︀ီ ယ︀ုမ︀်ယ︀မ︀်ႈꩫ︀ႆ︀ၢႈꩫ︀မ︀် မ︀ိူင︀်းက︀ၢင︀်ႈမ︀ႆ︀ႛပ︀ေႇဢ︀ွင︀်ꩫ︀ႆ︀ႇ။ လ︀ိူဝ်တ︀ီꩫ︀ႆ︀ႇ ၸ︀ႂ်က︀ေႃႇꩵ︀ႈပ︀ေႇဢ︀ွင︀်။

ꩬ︀ၢက︀်ႉꩬ︀ေလ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်

⁶ ꩡ︀ဝ်ႛယ︀ေꩬ︀ုၵ︀ရ︀ီတ︀်ယ︀ႃႇ ꩡ︀ဝ်ႛဢ︀ꩫ︀်ႈꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩬ︀ီလ︀ိူင︀်ႈ က︀ꩫ︀်ႛꩫ︀ိူဝ်ꩬ︀ဝ်ဝႃးမ︀ိုဝ်းမ︀ႆ︀ႛ ၵ︀ၢမ︀်လ︀ူဝ်ꩫ︀ိူတ︀်ႉꩬ︀ီလ︀ိူင︀်ႈ ပ︀ီꩫ︀်ႈၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀ꩫ︀ႆ︀ႇ ပ︀ုတ︀်ပ︀ျႃးမ︀ႃးꩫ︀ႆ︀ႇꩫ︀မ︀်။ ဢ︀ဝ်ႈꩫ︀မ︀်ႇꩫ︀ႆ︀ၢႈꩵ︀ႈꩡ︀ႂ်ႈ၊ ဢ︀ဝ်ႈꩫ︀မ︀်ႇတ︀မ︀ိူင︀်း ဢ︀ဝ်ႈꩫ︀ိူတ︀်ႉတ︀မ︀ိူင︀်းꩫ︀မ︀် က︀ျွႃးမ︀ႃးꩫ︀ႆ︀ႇ။ လ︀ွင︀်ႈမ︀ꩫ︀်းꩡ︀ဝ်ႛမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈပ︀ီꩫ︀်ႈꩬ︀မ︀်မ︀ႃတ︀ြႃးꩫ︀ႆ︀ႇက︀ေႃႇ ꩭီတ︀်ꩬ︀ၢက︀်ႉꩬ︀ေꩭႂ်ႛဢ︀ူ။

^7-8 င︀ႆ︀းꩫ︀ႆ︀ႇꩬ︀ီ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ၊ ꩫ︀မ︀်ႇင︀ႆ︀း ꩫ︀ိူတ︀်ႉꩫ︀ꩬ︀ီ ꩬ︀ၢက︀်ႉꩬ︀ေꩡ︀ဝ်ႛယ︀ေꩬ︀ုၵ︀ရ︀ီတ︀်တ︀င︀်းꩬ︀ၢမ︀်ပ︀ႃးꩫ︀ႆ︀ႇ ꩭဝ်းမ︀ႆ︀ႛလ︀ွင︀်ႈဢ︀ꩫ︀်ႈလ︀ိူင︀်ႈမ︀ႆ︀ႛꩫ︀ႆ︀ၢႈꩫ︀မ︀်ဝႃႈꩫ︀ႆ︀ႇ။

⁹ ꩬ︀ၢက︀်ႉꩬ︀ေက︀ူꩫ︀်းမ︀ႆ︀ႛ ꩭဝ်းယ︀ုမ︀်က︀ꩫ︀်ႈꩫ︀ႆ︀ႇꩬ︀ီ ꩬ︀ၢက︀်ႉꩬ︀ေၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈၵ︀ိူင︀်ꩬ︀ႃမ︀ႆ︀ႛ ꩭဝ်းဢ︀ေႈၵ︀ႅꩫ︀်းယ︀ုမ︀်ꩫ︀ႆ︀ႛဢ︀ူ။ ꩬ︀ၢက︀်ႉꩬ︀ေဢ︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛꩭီတ︀်ꩫ︀ႆ︀ႇယ︀ႃႇ လ︀ွင︀်ႈလ︀ုက︀်ႉမ︀ꩫ︀်းꩡ︀ဝ်ႛꩫ︀မ︀်။

¹⁰ က︀ူဝ်ႇဢ︀ꩫ︀်ႈ လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈꩫ︀ႆ︀ႇယ︀ႃႇ ꩬ︀ၢက︀်ႉꩬ︀ေꩫ︀ႆ︀ႇꩡ︀ႂ်ႈဢ︀ူꩫ︀ꩫ︀ႆ︀ႇ ꩫ︀ႂ်းꩡ︀ႂ်ႈမ︀ꩫ︀်းမ︀ႆ︀ႛ တ︀ွင︀်းဢ︀ူ။ က︀ူဝ်ႇဢ︀ꩫ︀်ႈမ︀ဝ်ယ︀ုမ︀်ယ︀မ︀်ႈꩫ︀ႆ︀ႇယ︀ႃႇ က︀ွပ︀်ႉပ︀ိူဝ်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭီတ︀်ꩬ︀ၢက︀်ႉꩬ︀ေလ︀ွင︀်ႈလ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ မ︀ဝ်ယ︀ုမ︀်ꩫ︀ႆ︀ႇꩬ︀ီ က︀ူဝ်ႇဢ︀မ︀ႂ်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀တ︀်ႉၸ︀ူႛၸ︀ႅတ︀်ႉꩫ︀မ︀်။

¹¹ ꩬ︀ၢက︀်ႉꩬ︀ေဢ︀မ︀ႂ်းယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀ူꩫ︀်းꩭဝ်းမ︀ႆ︀ႛ ဢ︀ꩬ︀ၢက︀်ႉထႃဝရ︀ꩭႂ်ႛꩬ︀ီ ဢ︀ꩬ︀ၢက︀်ႉဢ︀မ︀ႂ်းယ︀ႃႇ လ︀ုက︀်ႉ လ︀ုက︀်ႉꩡ︀ၢႆ︀းမ︀ꩫ︀်းꩡ︀ဝ်ႛမ︀ႆ︀ႛꩫ︀မ︀် ꩭဝ်းꩫ︀ႆ︀ႛꩫ︀ႆ︀ႇ။

¹² က︀ူဝ်ႇဢ︀ꩫ︀်ႈလ︀ုက︀်ႉꩡ︀ႆ︀ၢးၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩭၢပ︀်ႉꩫ︀ႆ︀ႇ ဢ︀ꩬ︀ၢက︀်ႉဢ︀မ︀ႂ်းꩫ︀ႆ︀ႛဢ︀ူ။ က︀ူဝ်ႇဢ︀ꩫ︀်ႈလ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ မ︀ဝ်ꩭၢပ︀်ႉꩫ︀ႆ︀ႇယ︀ႃႇ ဢ︀ꩬ︀ၢက︀်ႉဢ︀မ︀ႂ်းꩵ︀ႈꩫ︀ႆ︀ႛ။

¹³ ꩬ︀ူမ︀ႆ︀ႛက︀ဝ်ႈ လ︀ွင︀်ႈꩫ︀ႆ︀ႇၵ︀ဝ်တ︀ႅမ︀်ႛꩭႂ်ႛမ︀ႃးꩫ︀ႆ︀ႇယ︀ႃႇ ꩬ︀ူဢ︀ꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇၵ︀ဝ် ဢ︀ꩬ︀ၢက︀်ႉထႃဝရ︀ꩫ︀ႆ︀ႛယ︀ဝ်ႇꩫ︀ꩫ︀ႆ︀ႇ ꩭႂ်ႛတ︀ွင︀်းက︀ွတ︀်ꩫ︀ꩫ︀မ︀်။

လ︀ွင︀်ႈယ︀ွꩫ︀်းꩬ︀ူးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛထွမ︀်

¹⁴ ꩭဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ က︀ꩬ︀င︀်ယ︀ွꩫ︀်းꩫ︀က︀ေႃႇ ဢ︀လ︀ၢင︀်းမ︀ꩫ︀်းꩡ︀ဝ်ႛမ︀ႆ︀ႛ ꩡ︀ွမ︀်းꩬ︀ီယ︀ွꩫ︀်းက︀ီး မ︀ꩫ︀်းꩡ︀ဝ်ႛထွမ︀်ꩭႂ်ႛဢ︀ူꩫ︀ꩫ︀ႆ︀ႇ ꩭဝ်းတ︀မ︀်းꩡ︀ႂ်ႈဢ︀ူ။

¹⁵ ဢ︀ꩫ︀်ႈက︀ႃႈꩫ︀င︀်ꩭဝ်းယ︀ွꩫ︀်းꩫ︀ႆ︀ႇၵ︀ဝ် မ︀ꩫ︀်းꩡ︀ဝ်ႛထွမ︀်ꩭႂ်ႛဢ︀ူꩫ︀ꩫ︀ႆ︀ႇ ꩭဝ်းတ︀ွင︀်းက︀ီး ဢ︀ꩫ︀်ႈꩭဝ်းယ︀ွꩫ︀်းꩫ︀ႆ︀ႇၵ︀ဝ်က︀ေႃႇ မ︀ꩫ︀်ꩡ︀ဝ်ႛꩭႂ်ႛဢ︀ူꩫ︀ꩫ︀ႆ︀ႇ ꩭဝ်းတ︀မ︀်းꩡ︀ႂ်ႈဢ︀ူ။

¹⁶ ꩬ︀င︀်ဝႃႈ ၸ︀ူႛယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈ ꩭီတ︀်ဢ︀ပ︀ႅတ︀်ႉꩫ︀ႆ︀ႇမ︀ႆ︀ႛ ꩬ︀ူတ︀ွင︀်းꩬ︀ီ ဢ︀ပ︀ႅတ︀်ႉဢ︀မ︀ႂ်းယ︀ႃႇ ဢ︀ꩫ︀်ႈမ︀ꩫ︀်းမ︀ႆ︀ႛ တ︀ီဢ︀ွꩫ︀်ႈက︀ႃတ︀ၢင︀်းတ︀ၢႆ︀ႈမ︀ဝ်ꩡ︀ႂ်ႈꩫ︀မ︀်ꩫ︀က︀ီး ꩬ︀ူꩡ︀ႃႇမ︀ꩫ︀်းဝႃႈယ︀ွꩫ︀်းꩬ︀ူးဢ︀ူ။ င︀ႆ︀းက︀ီး က︀ူဝ်ႇဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩬ︀ၢက︀်ႉꩭႂ်ႛဢ︀ူ။ ꩫ︀ႆ︀ႇꩫ︀က︀ေႃႇ ဢ︀ပ︀ႅတ︀်ႉဢ︀ꩫ︀်ႈၵ︀ွꩫ︀်ဢ︀ꩬ︀ၢက︀်ႉက︀ူꩫ︀်းမ︀ႆ︀ႛ ဢ︀ဝ်ႈလ︀ူႇꩬ︀ုမ︀်းꩫ︀ꩫ︀ႆ︀ႇ ၸ︀ꩫ︀်းလ︀ိူင︀်ႈယ︀င︀်းဢ︀ူ။ က︀ဝ်ႈꩬ︀ူမ︀ႆ︀ႛ ꩭႂ်ႛယ︀ွꩫ︀်းꩬ︀ူးꩫ︀ႆ︀ႇယ︀ႃႇ ꩡ︀ႃႇက︀ူဝ်ႇဢ︀ꩫ︀်ႈၸ︀ိတ︀်ဢ︀ပ︀ႅတ︀်ႉၸ︀ꩫ︀်းဢ︀မ︀ႂ်း ꩵ︀ႈꩡ︀ႂ်ႈ။

¹⁷ ဢ︀ꩫ︀်ႈက︀ႃႈꩡ︀ိုဝ်ႈꩭီတ︀်ၸ︀ိတ︀်ꩫ︀ႆ︀ႇ ဢ︀ပ︀ႅတ︀်ႉꩫ︀မ︀်။ ꩫ︀ႆ︀ႇꩫ︀က︀ေႃႇ ဢ︀ပ︀ႅတ︀်ႉဢ︀ꩫ︀်ႈၵ︀ွꩫ︀်ဢ︀ꩬ︀ၢက︀်ႉက︀ူꩫ︀်းမ︀ႆ︀ႛ ဢ︀ဝ်ႈလ︀ူႇꩬ︀ုမ︀်းꩫ︀ꩫ︀ႆ︀ႇၸ︀ꩫ︀်းလ︀ိူင︀်ႈယ︀င︀်းဢ︀ူ။

က︀ူဝ်ႇဢ︀ꩫ︀်ႈပ︀ီꩫ︀်ႈ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ုꩫ︀်ꩬ︀ူင︀်ꩵ︀ႈပ︀ေႇ

¹⁸ က︀ူဝ်ႇဢ︀ꩫ︀်ႈပ︀ီꩫ︀်ႈ ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ် က︀ၢပ︀်ꩬ︀ီꩵ︀ႈꩭီတ︀်ꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛ က︀ုမ︀်ႇꩭႂ်ႛꩫ︀ႆ︀ႇꩬ︀ီ ၵ︀ုꩫ︀်ꩬ︀ူင︀်ယ︀ႃႇ ၵ︀ဝ်မ︀ႆ︀ႛꩭီတ︀်ၸ︀ေးꩵ︀ႈꩫ︀ႆ︀ႛ။

¹⁹ ꩭဝ်းယ︀ႃႇ ပ︀ီꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛꩬ︀ီ က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်ယ︀ႃႇဢ︀ူက︀ꩫ︀်ႛတ︀ႂ်ႛတ︀ꩫ︀်းၵ︀ူဝ်း ၵ︀ုꩫ︀်ꩬ︀ူင︀်ꩫ︀မ︀် ꩫ︀ꩫ︀ႆ︀ႇꩭဝ်းတ︀ွင︀်းဢ︀ူ။

²⁰ ꩡ︀ဝ်ႛယ︀ေꩬ︀ုၵ︀ရ︀ီတ︀် ၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ိူင︀်းက︀ၢင︀်ႈမ︀ႆ︀ႛက︀ျွႃးမ︀ႃးꩬ︀ီ ꩭဝ်းမ︀ႆ︀ႛ ၸ︀ြႃးဢ︀ꩫ︀်ႈꩡ︀ႅတ︀်ႉဢ︀ꩫ︀်ႈမ︀ၢꩫ︀် ပ︀ျႃးꩭႂ်ႛမ︀ႃးယ︀ဝ်ႇꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ ꩭဝ်းဢ︀ူꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ င︀ႆ︀ႚ ပ︀ီꩫ︀်ႈက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩡ︀ႅတ︀်ႉယ︀ဝ်ႇ။ ၸ︀ြႃးဢ︀ꩫ︀်ႈꩡ︀ႅတ︀်ႉဢ︀မ︀ႂ်းယ︀ႃႇ ဢ︀ꩬ︀ၢက︀်ႉထႃဝရ︀ꩫ︀မ︀်။

²¹ လ︀ုက︀်ႉက︀ဝ်ႈၵ︀ဝ်ꩴ︀း ၸ︀ြႃးဢ︀ꩫ︀်ႈမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ င︀ိူင︀်ႇတ︀ႃႉ။