က︀ေႃရ︀ိꩫ︀်တ︀ု ႑ 12 - Khamti Shanꩬ︀ူးၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် 1 ပ︀ီႈꩫ︀ွင︀်ႇၵ︀ဝ်ꩴ︀း င︀ႆ︀ႚယ︀ႃႇ ꩬ︀ူမ︀ႆ︀ႛ လ︀ွင︀်ႈꩬ︀ူးၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် ၵ︀ႂ်ႈꩭႂ်ႛတ︀ွင︀်းဢ︀ူ။ 2 မ︀ိူဝ်ႈင︀ႃးမ︀ိူဝ်ႈꩬ︀ူ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩵ︀ႈပ︀ႆ︀ယ︀ုမ︀်ယ︀မ︀်ႈꩫ︀ႆ︀ႇ ꩬ︀ူမ︀ႆ︀ႛပ︀ိူꩫ︀်ႈလ︀ဝ်ꩫ︀ႆ︀ႇꩬ︀ီ လ︀ွင︀်ႈပ︀ၢႆ︀ႛဝႆ︀ႈꩭုꩫ︀်ꩭၢင︀်ႈ ဢ︀ꩫ︀်ႈဢ︀ꩬ︀ၢက︀်ႉမ︀ဝ်ယ︀င︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀ူꩡ︀ွမ︀်းက︀ႃꩬ︀ီ ပ︀ႅက︀်တ︀ၢင︀်းက︀ႃꩫ︀ႆ︀ႇမ︀ႆ︀ႛ ဢ︀ွက︀်ꩡ︀ႂ်ႈက︀ꩫ︀်ႈတ︀ႃႉ။ 3 င︀ႆ︀းꩫ︀ႆ︀ႇꩬ︀ီ ꩬ︀ူမ︀ႆ︀ႛၵ︀ႂ်ႈꩭႂ်ႛတ︀ွင︀်းꩫ︀ႆ︀ႇယ︀ႃႇ က︀ူဝ်ႇဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ုပ︀်ႉပ︀ိုင︀်ꩫ︀ႆ︀ႇယ︀ႃႇ ၸ︀ႂ်က︀ေႃႇ “ယ︀ေꩬ︀ုမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩭႂ်ႛပ︀ူင︀်ႈဢ︀ပ︀ႅတ︀်ႉက︀တ︀ႃႉ” ꩫ︀ꩬ︀ီꩵ︀ႈက︀ိꩫ︀်။ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ မ︀ဝ်ဢ︀ုပ︀်ႉပ︀ိုင︀်က︀ီးက︀ေႃႇ ၸ︀ႂ်က︀ေႃႇ “ယ︀ေꩬ︀ုယ︀ႃႇ ꩡ︀ဝ်ႛꩫ︀မ︀်” ꩫ︀ꩬ︀ီ ဝႃႈꩵ︀ႈပ︀ီꩫ︀်ႈ။ 4 ꩬ︀ူးၵ︀ွꩫ︀်က︀ူႈၸ︀ꩫ︀်းယ︀င︀်းၵ︀ႂ်ႈလ︀ႂ်ႈꩫ︀က︀ေႃႇ ꩭဝ်းမ︀ႆ︀ႛꩬ︀ူးဢ︀မ︀ႂ်းၵ︀ဝ်တ︀င︀်းလ︀ုင︀်ꩭႂ်ႛꩫ︀ႆ︀ႇယ︀ႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူလ︀ိဝ်ႈꩫ︀ႆ︀ၢႈꩫ︀မ︀်။ 5 ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛ က︀ီလ︀ႆ︀ၢၸ︀ꩫ︀်းယ︀င︀်းꩫ︀က︀ေႃႇ ꩡ︀ဝ်ႛꩭဝ်းꩬ︀ူလ︀ိဝ်ႈꩫ︀ႆ︀ၢႈꩫ︀မ︀်ယ︀င︀်းꩫ︀ႆ︀ႇ။ 6 က︀ူꩫ︀်းꩭဝ်းမ︀ႆ︀ႛ ꩫ︀မ︀်ႇက︀တ︀်ႉꩭၢင︀်းꩭီတ︀်ဢ︀မ︀ူး က︀ီလ︀ႆ︀ၢၸ︀ꩫ︀်းယ︀င︀်းၵ︀ႂ်ႈလ︀ႂ်ႈꩫ︀က︀ေႃႇ ꩡ︀ဝ်ႛဢ︀ꩫ︀်ႈꩭဝ်းတ︀င︀်းမ︀ိူင︀်းမ︀ႆ︀ႛ ꩫ︀မ︀်ႇက︀တ︀်ႉဢ︀မ︀ႂ်းၵ︀ဝ် ꩭၢင︀်းၸ︀ႂ်ꩭၢင︀်းမ︀ꩫ︀်းပ︀ူင︀်ႈꩭႂ်ႛꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩬ︀ူလ︀ိဝ်ႈꩫ︀ႆ︀ၢႈꩫ︀မ︀်။ 7 ꩭဝ်းက︀ူႈက︀ူဝ်ႇမ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူးꩭႂ်ႛဝႆ︀ႇꩫ︀ႆ︀ႇယ︀ႃႇ ꩡ︀ႃႇꩭီတ︀်ဢ︀က︀ိဝ်းမ︀ိူင︀်းꩫ︀မ︀်။ ꩬ︀ူးဢ︀မ︀ႂ်းယ︀ႃႇ ꩬ︀ၢက︀်ႉꩬ︀ေဢ︀ꩫ︀်ႈမ︀ꩫ︀်းꩡ︀ဝ်ႛ က︀ꩫ︀်ႛꩫ︀ႂ်းꩭဝ်းမ︀ႆ︀ႛ ၵ︀ိင︀်းဢ︀ူꩫ︀ႆ︀ႇꩫ︀မ︀်။ 8 ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛပ︀ႃးလ︀ိဝ်ႈꩫ︀ႆ︀ၢႈꩫ︀မ︀် က︀ူဝ်ႇလ︀ိူင︀်ႈမ︀ႆ︀ႛယ︀ႃႇ ၵ︀ၢဝ်ႈၵ︀ၢမ︀်းပ︀ိင︀်ꩥ︀ႃꩫ︀မ︀်ꩰꩭႂ်ႛꩬ︀ီ တ︀ၢင︀်က︀ူဝ်ႇမ︀ႆ︀ႛယ︀ႃႇ ၵ︀ၢဝ်ႈၵ︀ၢမ︀်းတ︀ၢင︀်းꩭူႇꩭꩫ︀်ꩫ︀မ︀်ꩰ ꩭႂ်ႛဝႆ︀ႇꩫ︀ႆ︀ႇ။ 9 ꩫ︀င︀်ꩫ︀ႆ︀ႇꩫ︀က︀ꩫ︀်ႈ မ︀ꩫ︀်းꩡ︀ဝ်ႛပ︀ႃးလ︀ိဝ်ႈꩫ︀ႆ︀ၢႈꩫ︀မ︀် က︀ူဝ်ႇလ︀ိူင︀်ႈမ︀ႆ︀ႛယ︀ႃႇ တ︀ၢင︀်းယ︀ုမ︀်ယ︀မ︀်ႈဢ︀ꩫ︀်ႈၵ︀ိူင︀်ꩭႂ်ႛꩬ︀ီ တ︀ၢင︀်က︀ူဝ်ႇမ︀ႆ︀ႛယ︀ႃႇ တ︀ꩫ︀်းၵ︀ူဝ်းဢ︀ꩫ︀်ႈဢ︀ဝ်ႈဢ︀ူꩫ︀ီႈ ꩭႂ်ႛꩫ︀ႆ︀ႇ။ 10 ၵ︀ိုꩫ︀်းꩫ︀က︀ဝ် က︀ူဝ်ႇလ︀ိူင︀်ႈမ︀ႆ︀ႛယ︀ႃႇ ꩬ︀ူးတ︀ꩫ︀်းၵ︀ူဝ်းဢ︀ꩫ︀်ႈꩭီတ︀်ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်း၊ တ︀ၢင︀်က︀ူဝ်ႇမ︀ႆ︀ႛယ︀ႃႇ ꩬ︀ူးဢ︀ꩫ︀်ႈꩭူဝ်းၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ၊ တ︀ၢင︀်က︀ူဝ်ႇမ︀ႆ︀ႛယ︀ႃႇ ꩬ︀ူးဢ︀ꩫ︀်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩫ︀ႆ︀ႇ ꩡ︀ႂ်ႈမ︀ဝ်ꩡ︀ႂ်ႈꩫ︀ꩬ︀ီ က︀ၢက︀်ႉဢ︀ဝ်ႈꩡ︀ၢင︀်ႈꩭႂ်ႛ၊ တ︀ၢင︀်က︀ူဝ်ႇမ︀ႆ︀ႛယ︀ႃႇ ꩬ︀ူးဢ︀ꩫ︀်ႈတ︀ၢꩫ︀်ႛၵ︀ၢမ︀်းလ︀ၢက︀်လ︀ႆ︀ၢးꩡ︀ၢင︀်ႈꩫ︀ႆ︀ႇꩭႂ်ႛꩬ︀ီ တ︀ၢင︀်က︀ူဝ်ႇမ︀ႆ︀ႛယ︀ႃႇ ꩬ︀ူးဢ︀ꩫ︀်ႈၵ︀ၢမ︀်းဢ︀မ︀ႂ်းမ︀ႆ︀ႛ ၸ︀ုꩫ︀်ႇတ︀ီႈပ︀ွင︀်ꩡ︀ၢင︀်ႈꩫ︀ႆ︀ႇ ꩭႂ်ႛꩫ︀မ︀်။ 11 ꩫ︀ႆ︀ႇꩫ︀က︀ေႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူလ︀ိဝ်ႈꩫ︀ႆ︀ၢႈꩫ︀မ︀် ꩬ︀ူးꩫ︀ႆ︀ႇၵ︀ဝ်တ︀င︀်းမ︀ိူင︀်းꩭႂ်ႛꩬ︀ီ က︀ူꩫ︀်းက︀ူႈက︀ူဝ်ႇမ︀ႆ︀ႛ ꩫ︀င︀်မ︀ꩫ︀်းꩡ︀ဝ်ႛဢ︀လ︀ၢင︀်းယ︀င︀်းꩫ︀က︀ꩫ︀်ႈ ပ︀ꩫ︀်ႈꩭႂ်ႛꩫ︀ႆ︀ႇ။ ꩬ︀ိက︀်ႉတ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇၵ︀ဝ် 12 တ︀ူဝ်ႈꩭဝ်းမ︀ႆ︀ႛ ꩬ︀ိက︀်ႉတ︀ူဝ်ႈဢ︀ၢꩫ︀်တ︀ၢꩫ︀်ယ︀င︀်းꩫ︀က︀ေႃႇ တ︀ူဝ်ႈꩭဝ်းယ︀ႃႇဢ︀ꩫ︀်ႈလ︀ိဝ်ႈꩫ︀မ︀်။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ တ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်က︀ေႃႇ ပ︀ီꩫ︀်ႈင︀ႆ︀းꩫ︀မ︀်။ 13 ꩫ︀င︀်ꩫ︀ႆ︀ႇꩫ︀က︀ꩫ︀်ႈ က︀ျူးပ︀တ︀ု၊ ဢ︀ꩫ︀်ႈက︀ျူးမ︀ဝ်ꩡ︀ႂ်ႈပ︀တ︀ု၊ ၵ︀ႃႛပ︀တ︀ု၊ က︀ူꩫ︀်းလ︀ွတ︀်ႉပ︀တ︀ု ꩭဝ်းတ︀င︀်းမ︀ိူင︀်း က︀ꩫ︀်ႛꩫ︀ႂ်းတ︀ူဝ်ႈလ︀ိဝ်ႈမ︀ႆ︀ႛ ဢ︀ဝ်ႈၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ၵ︀ွꩫ︀်လ︀ိဝ်ႈ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဝႆ︀ႇꩫ︀မ︀်။ 14 ꩫ︀ႆ︀ႇꩫ︀ႆ︀ၢႈက︀ေႃႇ တ︀ူဝ်ႈꩭဝ်းယ︀ႃႇ ꩬ︀ိက︀်ႉတ︀ူဝ်ႈဢ︀ꩫ︀်ႈလ︀ိူင︀်ႈꩫ︀ႆ︀ၢႈꩵ︀ႈꩡ︀ႂ်ႈယ︀င︀်းꩫ︀ႆ︀ႇ။ ဢ︀ၢꩫ︀်တ︀ၢꩫ︀်ꩫ︀မ︀်။ 15 ꩡ︀ႃႇလ︀ိူင︀်ႈ ꩬ︀င︀်ဝႃႈ တ︀ိꩫ︀်ႈယ︀ႃႇ “က︀ဝ်ႈယ︀ႃႇမ︀ိုဝ်းမ︀ဝ်ꩡ︀ႂ်ႈꩫ︀ႆ︀ႇꩬ︀ီ တ︀င︀်းတ︀ူဝ်ႈꩵ︀ႈꩡ︀ၢပ︀်ႉလ︀ႅင︀်” ꩫ︀ꩬ︀ီဝႃႈက︀ီး တ︀င︀်းတ︀ူဝ်ႈတ︀ီက︀ၢင︀်းက︀ႃက︀ျႃး။ 16 ၵ︀ိုꩫ︀်းꩫ︀က︀ဝ် ꩭူက︀ေႃႇ “က︀ဝ်ယ︀ႃႇတ︀ႃႈမ︀ဝ်ꩡ︀ႂ်ႈꩫ︀ႆ︀ႇꩬ︀ီ တ︀င︀်းတ︀ူဝ်ႈꩵ︀ႈꩡ︀ၢပ︀်ႉလ︀ႅင︀်” ꩫ︀က︀ီး တ︀င︀်းတ︀ူဝ်ႈတ︀ီက︀ၢင︀်းက︀ႃက︀ျႃး။ 17 ꩬ︀င︀်ဝႃႈ ꩭဝ်းတ︀င︀်းတ︀ူဝ်ႈ ပ︀ီꩫ︀်ႈတ︀ႃႈဢ︀ꩫ︀်ႈလ︀ိူင︀်ႈꩫ︀ႆ︀ၢႈက︀ီး ꩭဝ်းတ︀ီꩭလ︀ိုဝ်ꩫ︀ႆ︀ႛꩥ︀ိꩫ︀်းꩫ︀ႆ︀။ ၵ︀ိုꩫ︀်းꩫ︀က︀ဝ် ꩬ︀င︀်ဝႃႈပ︀ီꩫ︀်ႈꩭူဢ︀ꩫ︀်ႈလ︀ိူင︀်ႈꩫ︀ႆ︀ၢႈက︀ီး ꩭဝ်းတ︀ီꩭလ︀ိုဝ်ꩫ︀ူမ︀်ႈဢ︀ႆ︀ၢႈꩫ︀ႆ︀။ 18 ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩫ︀င︀်မ︀ꩫ︀်းꩡ︀ဝ်ႛထုက︀်ꩡ︀ႂ်ႈꩫ︀က︀ꩫ︀်ႈ တ︀ူဝ်ႈꩭဝ်းမ︀ႆ︀ႛ ꩬ︀ိက︀်ႉတ︀ူဝ်ႈဢ︀ꩫ︀်ႈမ︀ဝ်မ︀ိူꩫ︀်က︀ꩫ︀်ႈꩫ︀ႆ︀ႇၵ︀ဝ် ꩬ︀ႂ်ဝႆ︀ႇဢ︀ူ။ 19 င︀ႆ︀းမ︀ဝ်ꩡ︀ႂ်ႈꩬ︀ီ ꩭဝ်းတ︀င︀်းမ︀ိူင︀်းပ︀ီꩫ︀်ႈꩬ︀ိက︀်ႉတ︀ူဝ်ႈၸ︀ꩫ︀်းလ︀ိူင︀်ႈꩫ︀ႆ︀ၢႈက︀ီး တ︀ူဝ်ႈꩫ︀ꩫ︀ႆ︀ႇ တ︀ီꩭလ︀ိုဝ်ယ︀င︀်းꩫ︀ႆ︀။ 20 ꩫ︀ႆ︀ႇꩬ︀ေႇမ︀ဝ်က︀ႃး င︀ႆ︀ႚတ︀ူဝ်ႈꩭဝ်းယ︀ႃႇ ꩬ︀ိက︀်ႉတ︀ူဝ်ႈဢ︀ၢꩫ︀်တ︀ၢꩫ︀်ယ︀င︀်းꩬ︀ီ တ︀ူဝ်ႈယ︀ႃႇ ဢ︀ꩫ︀်ႈလ︀ိူင︀်ႈꩫ︀ႆ︀ၢႈꩫ︀မ︀်။ 21 င︀ႆ︀းꩫ︀ႆ︀ႇꩬ︀ီ တ︀ႃႈယ︀ႃႇမ︀ိုဝ်းမ︀ႆ︀ႛ “မ︀ႂ်းမ︀ႆ︀ႛက︀ဝ်ႈꩵ︀ႈꩭၢင︀်ႇ” ꩫ︀ꩬ︀ီမ︀ိူဝ်ႈလ︀ႂ်ႈက︀ေႃႇ ဝႃႈꩵ︀ႈꩫ︀ႆ︀ႛ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ က︀ုမ︀်ꩭူဝ်က︀ေႃႇ တ︀ိꩫ︀်ႈမ︀ႆ︀ႛ “မ︀ႂ်းမ︀ႆ︀ႛက︀ဝ်ႈꩵ︀ႈꩭၢင︀်ႇ” ꩫ︀ꩬ︀ီဝႃႈꩵ︀ႈꩫ︀ႆ︀ႛ။ 22 ꩬ︀ိက︀်ႉတ︀ူဝ်ႈဢ︀ꩫ︀်ႈꩭႅင︀်းဢ︀ေꩫ︀က︀ꩫ︀်ႈꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈတ︀ူဝ်ႈမ︀ႆ︀ႛ ဢ︀ေႈၵ︀ႅꩫ︀်းꩭၢင︀်ႇတ︀ေႇတ︀ေႇꩫ︀ႆ︀ႇၵ︀ဝ်ꩫ︀မ︀်။ 23 ꩬ︀ိက︀်ႉတ︀ွꩫ︀်ႈဢ︀ꩫ︀်ႈ မ︀ဝ်ပ︀ူဝ်းလ︀ႅင︀်ႇꩫ︀က︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭဝ်းဢ︀ေႈၵ︀ႅꩫ︀်းလ︀ႅင︀်ႇဢ︀ူ။ ဢ︀ꩫ︀်ႈꩫ︀ူႈမ︀ဝ်ꩬ︀ႅꩫ︀်ႛꩫ︀က︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းꩫ︀ူႈꩬ︀ႅꩫ︀်ႛꩫ︀ႆ︀ႇ ꩭဝ်းဢ︀ေႈၵ︀ႅꩫ︀်းꩭူမ︀်ႛꩭူဝ်ဢ︀ၵ︀ႅက︀်ႉဢ︀ူ။ 24 ꩬ︀ိက︀်ႉတ︀ွꩫ︀်ႈဢ︀ꩫ︀်ႈꩫ︀ူႈꩬ︀ႅꩫ︀်ႛꩫ︀ႆ︀ႇၵ︀ဝ်မ︀ႆ︀ႛယ︀ႃႇ ꩭဝ်းꩭီတ︀်င︀ႆ︀းꩵ︀ႈဝႃႈꩭီတ︀်။ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩬ︀ိက︀်ႉတ︀ွꩫ︀်ႈဢ︀ꩫ︀်ႈမ︀ဝ်ပ︀ူဝ်းလ︀ႅင︀်ႇꩫ︀က︀ꩫ︀်ႈꩫ︀ႆ︀ႇၵ︀ဝ်မ︀ႆ︀ ဢ︀ဝ်ႈလ︀ႅင︀်ႇꩭႂ်ႛꩬ︀ီ တ︀ူဝ်ႈꩭဝ်းမ︀ႆ︀ႛ ၵ︀ွꩫ︀်ႛꩡ︀ပ︀်ဝႆ︀ႇꩫ︀မ︀်။ 25 ပ︀ီꩫ︀်ႈင︀ႆ︀းꩫ︀ႆ︀ႇယ︀ႃႇ တ︀ူဝ်ႈꩭဝ်းမ︀ႆ︀ႛဢ︀ꩫ︀်ႈက︀ၢက︀်ႉက︀ꩫ︀်ႈꩫ︀ႆ︀ႇမ︀ဝ်ယ︀င︀်းꩬ︀ီ ꩬ︀ိက︀်ႉတ︀ူဝ်ႈဢ︀ꩫ︀်ႈမ︀ဝ်မ︀ိူꩫ︀်က︀ꩫ︀်ႈꩫ︀ႆ︀ႇၵ︀ဝ် တ︀င︀်းမ︀ိူင︀်းꩬ︀ိက︀်ႉလ︀ိူင︀်ႈမ︀ႆ︀ႛꩬ︀ိက︀်ႉလ︀ိူင︀်ႈ ꩭႂ်ႛပ︀ူဝ်းလ︀ႅင︀်ႇက︀ꩫ︀်ႈꩫ︀ႆ︀ႇꩫ︀မ︀်။ 26 င︀ႆ︀းꩫ︀ႆ︀ႇꩬ︀ီ တ︀ူဝ်ႈꩭဝ်းမ︀ႆ︀ႛ ꩬ︀ိက︀်ႉတ︀ွꩫ︀်ႈဢ︀ꩫ︀်ႈလ︀ိူင︀်ႈ ꩫ︀ႆ︀ႛꩡ︀ီပ︀်က︀ီး ꩬ︀ိက︀်ႉတ︀ွꩫ︀်ႈတ︀ၢင︀်ဢ︀ꩫ︀်ႈတ︀င︀်းမ︀ိူင︀်း ꩡ︀ီပ︀်လ︀ွေႛဢ︀ူ။ ꩬ︀ိက︀်ႉတ︀ွꩫ︀်ႈꩭဝ်းဢ︀ꩫ︀်ႈလ︀ိူင︀်ႈမ︀ႆ︀ႛ ပ︀ိူꩫ︀်ႈယ︀ူဝ်းယ︀ွင︀်ႛက︀ီး ꩬ︀ိက︀်ႉတ︀ွꩫ︀်ႈဢ︀ꩫ︀်ႈက︀ိူတ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်း ꩡ︀ူမ︀်းလ︀ွေႛဢ︀ူ။ 27 ꩬ︀ူတ︀င︀်းမ︀ိူင︀်းယ︀ႃႇ တ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်။ ꩬ︀ူက︀ူႈက︀ူဝ်ႇယ︀ႃႇ ꩬ︀ိက︀်ႉတ︀ွꩫ︀်ႈမ︀ꩫ︀်းꩡ︀ဝ်ႛ ဢ︀ေႈဢ︀ꩫ︀်ႈꩰꩫ︀မ︀်။ 28 ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ိူဝ်းꩡ︀ဝ်ႛမ︀ႆ︀ႛ တ︀ီႈၸ︀ႂ်တ︀ီႈမ︀ꩫ︀်းꩡ︀ွင︀်ဝႆ︀ႇဢ︀ူ။ ꩭူဝ်က︀ူဝ်လ︀ေႚလ︀ေႚမ︀ႆ︀ႛယ︀ႃႇ တ︀မ︀ၢꩫ︀်ꩡ︀ဝ်ႛꩫ︀ႆ︀ႇၵ︀ဝ်၊ ထတ︀်ꩫ︀ႆ︀ႇယ︀ႃႇ ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်၊ ထတ︀်ꩫ︀ႆ︀ႇယ︀ႃႇ ꩬ︀ြႃꩫ︀ႆ︀ႇၵ︀ဝ်၊ ယ︀ဝ်ႇက︀ီး ၸ︀ူႛပ︀ျႃးတ︀ꩫ︀်းၵ︀ူဝ်းꩫ︀ႆ︀ႇၵ︀ဝ်၊ ၸ︀ူႛဢ︀ꩫ︀်ႈဢ︀ဝ်ႈꩫ︀ီႈယ︀ေႃးက︀ႃပ︀ီꩫ︀်ႈꩫ︀ႆ︀ႇၵ︀ဝ်၊ ၸ︀ူႛဢ︀ꩫ︀်ႈꩡ︀ွႆ︀ႈပ︀ိူꩫ︀်ႈꩫ︀ႆ︀ႇၵ︀ဝ်၊ ၸ︀ူႛဢ︀ုပ︀်ႉပ︀ိုင︀်ꩫ︀ႆ︀ႇၵ︀ဝ်၊ ၸ︀ူႛတ︀ၢꩫ︀်ႛၵ︀ၢမ︀်းလ︀ၢက︀်လ︀ႆ︀ၢးက︀ူႈၸ︀ꩫ︀်းꩰꩫ︀ႆ︀ႇၵ︀ဝ် ꩡ︀ွင︀်ဝႆ︀ႇဢ︀ူ။ 29 က︀ူꩫ︀်းတ︀င︀်းမ︀ိူင︀်းယ︀ႃႇ တ︀မ︀ၢꩫ︀်ꩡ︀ဝ်ႛꩵ︀ႈꩡ︀ႂ်ႈ။ ပ︀ရ︀ေႃးၸ︀ႅတ︀်ႉက︀ေႃႇꩵ︀ႈꩡ︀ႂ်ႈ။ ꩬ︀ြႃက︀ေႃႇꩵ︀ႈꩡ︀ႂ်ႈ။ က︀ူꩫ︀်းတ︀င︀်းမ︀ိူင︀်းꩭီတ︀် ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းက︀ေႃႇꩵ︀ႈပ︀ီꩫ︀်ႈ။ 30 ဢ︀ဝ်ႈꩫ︀ီႈယ︀ေႃးက︀ႃက︀ေႃႇꩵ︀ႈပ︀ီꩫ︀်ႈ။ ၵ︀ၢမ︀်းလ︀ၢက︀်လ︀ႆ︀ၢးက︀ေႃႇ တ︀ၢꩫ︀်ႛꩵ︀ႈပ︀ီꩫ︀်ႈ။ ၸ︀ုꩫ︀်ႇတ︀ီႈပ︀ွင︀်ၵ︀ၢမ︀်းဢ︀မ︀ႂ်းက︀ေႃႇꩵ︀ႈပ︀ီꩫ︀်ႈ။ 31 င︀ႆ︀းꩫ︀ႆ︀ႇꩬ︀ီ ꩬ︀ူးဢ︀ꩫ︀်ႈလ︀ႅင︀်ႇꩬ︀ႃမ︀ႆ︀ႛꩬ︀ိုင︀် ꩭႅꩫ︀်ႛက︀ꩫ︀်ႈတ︀ႃႉ။ ဢ︀မ︀ႂ်းယ︀ႃႇ င︀ႆ︀းꩫ︀မ︀်။ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.