Hipulu 8 - Kasua

Koteyewi Niwa Yesuwalapulu Hili Sepapowa Puwanokeye

¹ Solo kina mouwa wekeye. Pilisiti sena puwano wa:pa:se heneye napowa Yesukeye. Ikila sopoke Ewa pilisiti sena puwano apola: ela: niwamopela: kulukuluse timinise elakeye. Hepene falemi Piseiki Kote Sosolo E tiya:le ili tapowemi Piseiki Kini Sosolo sea sosolo emi, Yesuwa nini pilisiti sena puwanowa helakeye.

² Eye pilisiti sena tima:na:wa Kote ene hepene koane falemi tikeye. Koane amowa heneye Kote ene koakeye. Koane amowa senaye eta: timakeye. Eh. Alamakeye. Kote Ene timiyakeye.

³ Aputa: peleya: weyemi pilisiti sena puwanoyewi sopoke a:pele sanose satapola: Kotema kinapola:, nano nowana mokopo kinapola: epapuluse timinisekeye. Alanase, hepene peleya: falemi, nini pilisiti sena puwano Yesu ela:, Ewala Kotema nano mokopo mikeye.

⁴ Alake, Ewa peleya: weyemi telakiwa, pilisiti tima:na:wa eyawa matimapekeye. Koiyawemiye, pilisiti sena iwa sitalakemi ela: apula: iyawa mokopo miwa kalikalise Kotema kinisekeye. Amowa eleye seyakeye.

⁵ Peleya: weyemi ili pilisiti senapela: timinise, hepene falemi nano alusewa iyewi ta:pele tiyapola: timiyanakeye. Alusene epapuluse, Moseseyewi fala: koane Kotema wapilise koawa, tima:na:pela: Koteyewi ema selese, “Kewa tokomo Sainai tumu solo elewa tima:na:pela: hapa emiwa, fala: koane tima:na: Neyewi kema waiyakeye. Waiya epapuluse ta:pele tiyapola: tiya:pa:.” Au selapita:, Koteyewi waiya epapuluse Moseseyewi ta:pelese tikeye.

Hili Sepapowa Kelesoyewi Potapola: Elakeye

⁶ Alawamona Yesuyewi Ene pilisiti senapela: timinise, peleya: weyemi pilisiti senayewi timinisewa, Yesuyewi sitiyetiye timiyanakeye. Koteyewi Ene senama hili sepapowa senayewi ta: timita:, Yesu inapola: honosane sena ela: hili sepapowa penana:pekeye. Hili sepapowa penana:penase puwano sepapowa helete tiye hapakeye. Puwano Koteyewi napola: tese auma:na: seyawa koloteakeye. Alawamona, hili sepapowa Koteyewi napola: tese auma:na: seyawa hene heneye sosokeye.

⁷ Alanase puwano sepapo tili amowa ilima:na: telaleke, Koteyewi hili sepapowa matimapekeye. Eta: ilima tepita: solo hili se tiye mikeye.

⁸ Alawamona, puwano sepapowa tiwa hepe tepita: sena olokeyatelawa Koteyewi potapola: selese, “Newa Piseikipela: enenase kiyawa ta:ta:pa:. Sikape ikila nowemi Neyewi Isolaiya sena mayamawala, Yuta sena mayamawala, hili sepapo tiyaposakeye.

⁹ Sepapolo tiwa hili pa:ta elaposakeye. Apula: puwano ili tilila kouwa meima hoyewi selapita: tili epapuluse, sikape epapu selapola: matiyaposakeye. Puwano ilipe Isipi peleya: iya:pela: hamonite, Neyewi iwa siliye hapa ikila emiwa Neyewi sepapowa se tiye mikeye. Puwano sepapowa tiwa iyewi ta: tiyapola: eta: kulu hapama tese, Neyewi iwa fa:se mikeye.

¹⁰ Alanase, Neyewi puwano sepapowa tiwa iya:pela:, Isolaiya sena kesalema hili selapita: tiwa wekeye. Ne solo ele tuwapowa ili matanawemi tuwapa:na:keye. Ili himuwemi momatema:na:keye. Ili Kotewa Newa tema:na:keye. Neyewi iwa potapola: elapita: iyewi Ne sowa matanepela: seli sitalaposakeye. Aluse sitalapita:, Ne sena kesale amowa iwakeye.

¹¹ Sena nowamoke e sena manawana apula: e ma:ewala walose selese, ‘Piseiki Kotewa matanepa:,’ auwa eta: sema:na:makeye. Au sema:na: elawamona sena sopoke Newemi matanepesakeye. Sena sosolo sita:neyawala sena kolotea sita:neyawala, sena sopoke Newa matanepesakeye.

¹² Alake ili olokeyatela timinipita: Neyewi potapola: iwa hauwekilise iya:taposakeye. Iya:pela: ili olokeyatelawa Neyewi wa:ke mamatanepesakeye.”

¹³ Hili sepapowa tinase Koteyewi selese, “Puwano sepapo tiwa pusomiyanakeye.” Aluse Koteyewi selakeye. Pusomiyawa sao pusomiya epapulakeye. Puwano sepapo tiwa ikila kolotea tepela: sikape itapa tema:na: epapuluse sopoke itapa tepesakeye.