Цецн селвгүд 9 - Хальмг келнд орчулсн Әрүн Бичлһс

Цецн Ухан болн Һәргллһн

¹ Цецн Ухан, тосхач мет, бийдән гер бәрвә, өөһинь авсн долан бахн тәвбә,

² мах, амтта чаһр белдәд, ширә деер тәвбә.

³ Зарцнран илгәһәд, балһсна өндр һазрас, әмтн соңсдгар, зар һарһҗ чаңһар келүлнә:

⁴ – Дамшлт уга улс, нанас суртн! Тоолвр уга күүнд тер иигҗ келнә:

⁵ – Ирәд, мини хот идтн, мини урсхсн чаһр уутн!

⁶ Му бәрцән хайтн – җирһҗ бәәхит, медрлин хаалһар йовхит.

⁷ Ичр-һутр уга күүг чиклхлә, му келхнь ил, ичрән геесн күүг шоодхла, бийән һутахнь ил.

⁸ Ичр-һутр уга күүг бичә шоод, чамд дурго болх, ухата күүг шоодхла, тер чамд дурлх.

⁹ Цецн күүнд сурһмҗ өгхлә, тер улм цецн болх. Чик седклтә күүг дасххла, улм ухата болх.

¹⁰ Деед Эзнәс әәлһн – цецн бәәдлин эклц, Терүнә әрүниг медлһн – тернь ухана ул.

¹¹ Нанла, Цецн Уханла, чини өдрмүд утдх, наснчнь утдх.

¹² Кемр чи цецн болхла, цецн бәәдл чамдан туста, кемр догшн күн болхла – эврән зовлңган үзхич,

¹³ Һәргллһн гисн – догшн күүкд күн мет, кев-янз уга, харңһу күн –

¹⁴ тиимнь гериннь үүднд балһсна нүүрт эврә ширә деер суусн мет, сууна,

¹⁵ хаҗуһарн давҗ йовх әмтиг дуудхар, эврә хаалһарн йовҗ йовхиг дуудхар:

¹⁶ – Дамшлт уга улс, нанас суртн! Тоолвр уга күүнд тер иигҗ келнә:

¹⁷ – Хулхалсн усн әмтәхн, бултулсн өдмг сән!

¹⁸ Тер дуудсн күн тенд үксн әмтн бәәхинь медҗәхш, терүнә дуудсн күн үклин йоралд тусх.