Цецн селвгүд 31 - Хальмг келнд орчулсн Әрүн Бичлһс

Лемуил хаана таслсн товчта үгмүд

¹ Лемуил хаана хадһлсн экин сурһсн сурһмҗнь эн:

² Көвүн минь, чамд ю келхмб? Геснәсн һарһсн көвүн минь, юн болҗана? Мини Бурхнд зальврад авсн көвүн минь, юн болҗана?

³ Күчн-чидлән гергчүдт бичә үрә, хаадудыг хоосрулдг теднд бийиннь хаалһан бичә медүл.

⁴ Хаадуд биш, Лемуил, чаһр уухнь хаадуд биш. Тедү мет сәәчүд уух әрк бийдән хәәшго;

⁵ дегд әркдхләрн – закас мартцхах, хүв тату улсин зөвинь харсшго.

⁶ Үрәд үкҗәх күүнд әрк өгтн, седкләрн һашудҗах күүнд чаһр өгтн:

⁷ уухларн – бийиннь түрү бәәдл мартх, зовлңгин тускар ухалшго.

⁸ Бийән харсҗ чадшго күүнә ормд кел, чидл уга күүнә зөв харс.

⁹ Чик йовдл харсад кел, угатя болн хөв уга күүнә зөв харс.

Әрүн седклтә гергиг буульлһн

¹⁰ Әрүн седклтә герг яһҗ олҗ авхмб? Терчнь хамгин ке чолунас үнтә,

¹¹ залуһин зүркн терүг иткҗәнә, тиим гергнлә тер түршго,

¹² насн туршарт тиим гергн залудан туста болх, хорта юм һарһшго.

¹³ Терүнә һарнь көдлмш хәәх: ноос көндәв чигн, олс бәрв чигн.

¹⁴ Тиим гергн хулд кедг керм мет – хот-хоолан холас хәәнә.

¹⁵ Өрк-бүлдән хотинь белдхәр, зарцнртан даалһвр өгхәр нарн һартл тер сернә.

¹⁶ Тәрәнә һазр шүүһәд хулдҗ авна, үзмин мод тәрнә. Көлсәрн мөңг олна.

¹⁷ Цогц-махмуднь күдр-бадр, һарнь чидлтә.

¹⁸ Керг сәәнәр күцхлә, сөөд чигн терүнә герлнь унтрхш.

¹⁹ Һарарн утц ээрнә, хурһарн иигән тәвхш.

²⁰ Һуульһнч күүнд альхнасн өгнә, кишгән гееснднь дөң болна.

²¹ Терүнә өрк-бүлнь цаснас әәшго – тедн цугтан хойр давхр үнтә улан эдәр оралһата.

²² Бийдән чигн тер хувц уйна, олсн эдәр болн үнтә шеемг эдәр уйсн хувцта.

²³ Олна нүүрт терүнә залуг меднә, эврәннь һазра улсин медәтнр дунд тер сууна.

²⁴ Тиим күүкд күн хулдхар хувцна эд кенә, кувцнрт бүс уйна.

²⁵ Тер күчтә, күндтә күн, ирҗәх өдрт байрлна,

²⁶ тер гергнә келнднь цецн үгмүд, тер сән сурһмҗ өгнә,

²⁷ гер дотрк төр яһҗ хаһлгдҗахиг хәләнә, киидән өдмг идҗәхмн уга.

²⁸ Үрдүднь терүг байртаһар буульна, залунь таасад магтна:

²⁹ «Әрүн седклтә болх дүңгә олн гергчүд билә, зуг чи цугтаһаснь деерч!»

³⁰ Ке бәәдл меклнә, сәәхн бәәдл юмб? Зуг Деед Эзнәс әәсн гергнд магтал өрггднә.

³¹ Терүг кесн күцәмҗәрнь үнлтн, олна нүүрт терүнә кергинь буультн!