Цецн селвгүд 30 - Хальмг келнд орчулсн Әрүн Бичлһс

Агурана таслсн товчта үгмүд

¹ Иакин көвүн Агурана бахмҗта үгмүд. Эн залу Итиэлд, Итиэлд болн Ухалд иигҗ келсмн:

² – Цуг әмтнәс би хамгин муңхгньв, нанд күүнә тоолвр уга.

³ Би цецн ухана медрл авч чадсн угав, Бурхна тускар юм медхшв.

⁴ Теңгр деер кен күрәд буув? Кен салькиг альхндан атхв? Кен усиг хувцндан орав? Һазрин меҗә кен тогтав? Терүнә нернь кемб? Тер көвүн үрнә нерн кемб? Чи йирдән меддг болхич?

⁵ Бурхна үгмүд цевр: Терүнд өөрдсн күн болһна халхцнь Тер болҗана.

⁶ Терүнә келсн үг болһнд бичә юм нем, эс гихлә, чамаг илдкхлә – худлч болхич.

⁷ Хойрхн юмна тускар Таниг, Деед Эзн, сурҗанав, намаг әмд деерм бичә уга ги:

⁸ Хоосн болн худл үг нанас холҗул, нанд угарх юм чигн, байҗх юм чигн бичә өг, мини хүв өдмгиг кемҗәләд өг:

⁹ дегд цадхларн цөкрәд: «Эн кемб – Деед Эзний?» – гиҗ би келдгоһар, эс гихлә угархларн мини Бурхна нер һутаһад хулха кедгоһар.

¹⁰ Эзнә нүүрт зарциннь тускар бичә му кел, эс гихлә чамд терүнә седвәр тусх, чи гемшәгдхич.

Таслсн товчта үгмүдин бас нег хураңһу

¹¹ Эцкән, экән харадг әмтн бас бәәнә;

¹² бийән сәәнд тоолдг әмтн бәәнә, зуг үнндән эврәннь килнцин кирәс тедн цеврлгдҗ чадшго;

¹³ караг, деегүр хәләцтә әмтн бәәнә,

¹⁴ угатя әмтн хоорнд даҗрад, өнчн-өвүһин әминь таслхар седдгнь бәәнә; теднә шүднь – үлд мет, теднә өргнь – хасвчин балг мет.

¹⁵ Шигдәч хойр күүктә: мел «ас, ас!» – гицхәдг. Һурвн юмн төрүц ханшго, бас дөрвдгчнь: «Болх!» – гиҗ келшго:

¹⁶ үклин һазр, үр-сад һарһдго гесн, усар ивтрҗ хандго һазр, «Болх!» – гиҗ төрүц келдго түүмрин һал.

¹⁷ Кемр эцкән наад бәрдг болхла, экән тевчдго болхла – терүнә нүдиг керә тиньгр һазрт чоңкх, хар шовун терүг тасчад идх.

¹⁸ Һурвн юмн намаг өврәнә, дөрвдгчинь чигн би медҗ чадсн угав:

¹⁹ Һәрдин хаалһ теңгрт, моһан хаалһ уулын хадт, кермин хаалһ теңгс дунд, залу күүнә хаалһ гиҗгтә күүкн тал һардг.

²⁰ Аля күүкд күүнә хаалһ иим: идәд, урлан арчад келх: «Би му юм һарһсн угав».

²¹ Һурвн юмнас һазр чичрнә, болв дөрвдгчинь чигн дааҗ чадҗахш:

²² хан болсн мухлаг, цадтлан иддг һәргиг,

²³ мордсн ичр уга гергиг, нойна хатна орм эзлсн мухла күүкд күүг.

²⁴ Һазр деер дөрвн бичклдәс бәәнә, болв тедн ухатаһас ухата:

²⁵ зунын дуусн хотан хурадг әрә торсн бәәдлтә бийнь – әмтә шорһлҗс;

²⁶ хад дунд бәәрән бәрдг күчн тату уулын хулһнс;

²⁷ царцахаст хан уга, болв тедн нег зергләһәр йовна;

²⁸ көлдән тордг гүрвлдә хаана хашад чигн орна.

²⁹ Һурвланнь цогц сәәхн урһцта, дөрвдгчнь болхла – бат ишкдлтә:

³⁰ аңгуд дунд баатр арслң, тер кениг чигн өмнәһәрн һарһшго;

³¹ эр така-дахулгч, эр яман болн цергин көтләч хан болҗана.

³² Кемр эргүһәр бийән давулҗ буульсн болхла, кемр хар саната юм һарһхар седҗәхлә, альхарн аман ха.

³³ Эс гиҗ үс бүлхлә – тосн һардг, тегәд хамрар цокхла – цусн һардг, тиигҗ ууртан хордхла – өшән ирдг.