Цецн селвгүд 28 - Хальмг келнд орчулсн Әрүн Бичлһс

¹ Ардаснь эс көөлдв чигн хар саната күн зулад гүүнә, үннч күн болхла, арслң мет таг-яг.

² Орн-нутгт үүмән болхла – залачнр олн, зуг ухата, медрлтә залачла нутг батрх.

³ Һуульһнчнриг шахчах бас тиим һуульһнч күн – тәрсн тәрәг таслҗах ик хурта әдл.

⁴ Бурхна зака мартсн күн – хар саната әмт буульҗана, закаһар бәәсн күн теднлә ноолдна.

⁵ Хар саната әмтн чик үннә неквр медҗәхш, зуг Деед Эзиг хәәҗәснь терүг күццднь медх.

⁶ Хар мөртә баяч дорхнь цеврәр бәәдг угатя күн деер.

⁷ Тоолврта көвүн Бурхна закаһар бәәнә, седвәр уга күүнлә үүрлдгнь эцкән ичәнә.

⁸ Байҗхар седҗәх арсмч эврә мөңгән талдан күүнд өгйәһәр өгхләрн, өгснәсн үлүһәр сурна. Үнндән болхла, тер угатя өр-өвчин төлә цуглулҗана.

⁹ Бурхна закана үгмүдиг соңсхар седҗәдго күүнә зальврлһн чигн җигшүртә.

¹⁰ Чик седклтә күүг хорта хаалһдан мекләд орулҗахнь – бийиннь гөлмдән бәргдх, цеврәр бәәдг күүнд сән хөв күртх.

¹¹ Баяч бийән цецн күүнд тоолна, зуг угатя серлтә күн терүг һәргтәһинь меднә.

¹² Үннч әмтн байрлна – эргндк җирһнә; хар санатань йос һардад өөдлхлә, олн улс зовна.

¹³ Бийиннь килнц бултулхла – сән юм бичә күлә; килнцән медәд бурушахла – хәәрлтд күрхч.

¹⁴ Деед Эзнәс әәснь кезә чигн кишгтә, догшн седклтә күн гүрмлә харһна.

¹⁵ Угатя әмтнә муңхг һардач – күркрҗәх арслңгин, иигәрән-тиигәрән гүүҗәх аюһин бәәдлтә болдг.

¹⁶ Һардач йир муңхг болхла, цуглулдг алвнь икднә; зуг олз эс хәәсн күүнә наснь ут болх.

¹⁷ Цус асхад, ноолдхар седдг күн – үктлән тенҗ йовг, амрлт бичә үзтхә.

¹⁸ Хорта йовдл һарһдго күн үкшго, хаҗисн хаалһар йовдгнь генткн үкх.

¹⁹ Һазр эд-бод кесн күн цадхлң болх, киидән цаган үрәснь угарх.

²⁰ Нәәлвртә күн олн евәлтә, байҗхар адһҗах күн засгла харһлго бәәшго.

²¹ Чирә хәләсн зарһч сән биш: тиим күн зүсм өдмгәс көлтә килнц һарһх.

²² Ховдг күн байҗхар адһна, зуг терүгән дахлдн угархан медҗәхш.

²³ Зуһудад келсн үгд биш, тегәд керлдснд чамд ханлтан өргх.

²⁴ «Килнц биш», – гиһәд эцкәсн, экәсн булалдсн күн тонулчла негн болҗана.

²⁵ Олзд дурта күн цүүгә татна, Деед Эзнд иткдгнь сән керг күцәнә.

²⁶ Зуг бийдән нәәлснь – һәргтә, Цецн Ухана хаалһар йовснь әәмшгәс харсгдх.

²⁷ Бәәснәсн угатя күүнлә хувалцснь – дуту уга бәәнә, нүдән аняд, эс медсн болснь килнцән икдүлҗәнә.

²⁸ Хар саната әмтн өөдлхлә – теднәс олн бултна, тедниг күчән геехлә, чик седклтә әмтн өснә.