Цецн селвгүд 26 - Хальмг келнд орчулсн Әрүн Бичлһс

¹ Зунын дунд орсн цасн мет, хадлһна цагт орсн хур мет, һәргтә күүнд туурмҗ хальдшго.

² Шовун нисәд давх, харада нисәд йовх, тедү мет киидән тәвсн харал хаҗуһар давх.

³ Ташмг – мөрнд, хазар – элҗгнд, тегәд һәргин нурһн бураһар шавдгдх.

⁴ Һәргтә күүнлә әдл болшгон төләд, терүнд һәргтәһәр хәрү бичә өг.

⁵ Һәргтә күн бийән цецнд тоолдгоһар, келснднь терүнд бас һәргтәһәр хәрү өг.

⁶ Эврәннь кергән һәргтә күүнд даалһснь бийән барх, дәкәд зовлңд даргдх.

⁷ Доһлң күүнә көлнь коочиснлә әдләр, тедү мет һәргин амнд үлгүр тус уга.

⁸ Һәргтә күүг туурулснь – сумиг саадгт бооснла әдл болдг.

⁹ Согту күн хатханчгта мод бәрсн, һәргтә күн үлгүрлҗ келхәр седсн әдл болдг.

¹⁰ Һәргтә күүг, эс гихлә кениг болвчн нәәмәдлҗ авснь – цугтаһинь даранднь саадгар хаһад шавтаҗах күүнлә әдл.

¹¹ Ноха эврәннь һульһсн һазрт хәрү ирдг мет, тиигҗ һәргтә күн бас һәргтә йовдлан давтна.

¹² Бийән цецнд тоолҗах күүг үзлт? Муңхг күүнә туснь нам ик болдг.

¹³ «Хаалһ деер арслң бәәнә! Аң уульнцар гүүҗ йовна!» – гиҗ хуурмг күн келнә.

¹⁴ Түңгдәсн унҗҗах үүдн мет, тиигҗ хуурмг күн кевтртән көндрнә.

¹⁵ Хуурмг күн һаран ааһд орулна, зуг амндан күргтлән цуцрх.

¹⁶ Хуурмг күн бийән ухата үг келҗәх долан күүнәс деер цецнд тоолна.

¹⁷ Күүнә зүткәнд йирдән орхла, нохан чикнәс татснла әдл.

^18-19 Өөрхн күүһән меклснь, дәкәд «Би наадлв!» – гиҗ келснь шачах сум хаяд, үкл илгәһәд, адрҗах күүнлә әдл.

²⁰ Түлән чилхлә – һал унтрдг, ховч уга болхла – цүүгән чилдг.

²¹ Цогас халун һардг, түләнәс һал һардг. Тиигәд ховчин үгәс – өшәрклһс һардг.

²² Ховчин келн әмтәхн хотла әдл, күүнә дотр – гүүнднь орна.

²³ Хорта седвәрән бултулад келҗәх сән үг – шавр савиг ширдсн мөңгн ширлә әдл.

²⁴ Хар саната күүнә келн зуһу, седклдән му йовдл тер бәрҗәнә.

²⁵ Дунь җөөлн болв чигн бичә итк, терүнә зүркнд йир олн хорта зура бәәнә.

²⁶ Тер дурго бәәдлән мекәр бултулҗана, болв хар саната күүнә хорнь цуг әмтнд медгдх.

²⁷ Күүнд харшлад малтсн нүкндән эврән ундг, тер күүнд харшлад түлксн чолун дор эврән ордг.

²⁸ Худлч му келҗәх күүндән дурго, зуһуч келәрн терүг зовлңгд орулх.