Цецн селвгүд 22 - Хальмг келнд орчулсн Әрүн Бичлһс

¹ Сән нерн ик зөөрәс деер, әмтнә күндллһн алтнас, цаһан мөңгнәс деер.

² Байнь чигн, угатянь чигн зергләд зогсх, юңгад гихлә, Деед Эзн хойраһинь үүдәлә.

³ Ухата күн кемр зовлң үзхләрн зулх, дамшлт уга әмтн һоодан йовад шалтанла харһх.

⁴ Деед Эзнәс әәҗ тесвртә бәәснд байн бәәдл, күндллһн болн җирһл ирдг.

⁵ Худлчин хаалһд шөвг болн гөлм харһдг, әмән хәәрлҗәхнь тиигәрән одшго.

⁶ Баһ наста көвүг чик хаалһднь орулхла, көгшрхләрн чигн терүнәс хаҗишго.

⁷ Байн күн угатяг һардна, өгцтә күн өгйәлсн күүнә ялч.

⁸ Буру бәәдл һарһҗах күн зовлңган үзх, терүнә уурин һалнь унтрх.

⁹ Бәәсн хотасн угатя күүнлә хувалцсн цаһан саната күн евәл авна.

¹⁰ Ичр уга күүг көөхлә, цүүгән уурх, зүтклдән болн керүл зогсх.

¹¹ Цевр седклтә, сән үгтә күн хаанд өөрхн болх.

¹² Деед Эзн үнниг харна, худлчин келсн үгиг Тер бурушана.

¹³ Хуурмг күн келнә: «Һаза арслң бәәнә! Гертәс һарм цацу би үкхв».

¹⁴ Күүнә гергнә келн – гүн урх, Деед Эзнә харасн күн терүнд унх.

¹⁵ Кемр баахн көвүн һәргтә болхла, һәргинь цокад һарһҗ болҗана.

¹⁶ Негнь олзин төлә угатя күүг даҗрад байҗна, наадкнь байнд бәәснәсн өгәд угарна.

Цецн әмтнә һучн цецн селвгүд

¹⁷ Чикән өг, цецнә келсн үг соңс, мини сурһмҗ ав:

¹⁸ Эн үгмүдиг зүркндән сәәнәр бәр, кезә чигн тедн чини келнд ортха,

¹⁹ Деед Эзнд чи иткл ол, тиигҗ би чамд эндр келҗәнәв.

²⁰ Би чамд таслсн һучн товчта үг бичв, терүнд чи селвг болн медрл олхич.

²¹ Чамаг үнн үгмүд дастха гиһәд, чамаг илгәсн ахлачнрт чик хәрү өгтхә гиһәд.

²² Угатя күүнә ядуһинь олзлад, бичә терүг хоосрул, түрү-зүдү күүг зарһд бичә һунда,

²³ юңгад гихлә, Деед Эзн терүнә һундлинь тәәлх, терүг меклсн күүнә әминь таслх.

²⁴ Догшн күүнлә бичә үүрл, уурта күүнлә бичә медлц,

²⁵ эс гихлә терүнә хаалһар йовхич, эврән бийдән гөлм татхич.

²⁶ Күүнә төлә даавр бичә адһҗ ав, күүнә ял даахар бичә сед.

²⁷ Кемр өгдг юмн уга болхла, чини дер-девскр чигн тедн булаҗ авх.

²⁸ Өвкнрин һарһсн хуучн меҗәг бичә көндә.

²⁹ Көдлмштән дигтә-тагта кү үзлчи? Теднчнь харчудт биш, болв хаанд көдлҗәнә.