Цецн селвгүд 21 - Хальмг келнд орчулсн Әрүн Бичлһс

¹ Хаана зүркн Деед Эзнә һарт урсхулин усн мет – сансн талан терүг эргүлх.

² Күн болһн эврәннь хаалһан чик гиҗ санна, болв Деед Эзн теднә зүрк сөрнә.

³ Бәрц бәрснәс, үннәр болн чикәр бәәсн Деед Эзнд таасгдна.

⁴ Деегүр хәләц болн караг зүркн хар саната әмтнд герллә әдл болҗ үзгднә, болв теднь килнц болҗана.

⁵ Килмҗ элвг бәәдлд күргх, үүмән-шууган түрү бәәдлд орулх.

⁶ Худл-мекәр хоршасн зөөртә күн – киидән сахняд, үклүр адһна.

⁷ Хар саната әмтнә хорнь тедниг алх: юңгад гихлә, тедн чик йовдл һарһхар седсн уга.

⁸ Мекч күүнә хаалһнь хаҗиһәд геедрәд йовна, үннч күүнә хаалһнь һо болна.

⁹ Керүлч гергнлә хамдан ик, у герт бәәхин ормд, герин оран өнцгт бәәсн деер.

¹⁰ Хар саната күн хорар буслна, хаҗудк әмтән әрвлхш.

¹¹ Ичрән геесн күүг шоодхла – дамшлт уга әмтнд ухан орх, цецн күүг сурһхла – медрл немгдх.

¹² Бурхн хар саната күүнә гериг хәләнә, тегәд теднә күчинь авна, зовлң өгнә.

¹³ Хәәкрәд дөң сурҗах цагт чикән бөглсн күн эврән негт оркрх, терүнд дөң болшго.

¹⁴ Нуувчар өгсн белг уур тәәлдг, дораһар өгсн авлһас һалзурсн күн тогтндг.

¹⁵ Үннч күн байрлтха гиһәд, хорта күн әәтхә гиһәд, чик йовдл кегднә.

¹⁶ Чик хаалһасн хаҗисн күн харңһу тамд тогтнх.

¹⁷ Бахан хантл нәәрлхдән дурта күн угарх, чаһрт дурта болн сәәнәр бәәхдән дуртань байҗшго.

¹⁸ Чик седклтә күүг сулдххин төлә, терүг хар саната күүнә ормд сольҗ авна. Үннч күүг сулдххин төлә, терүг худлч күүнәс сольҗ авна.

¹⁹ Айстан бурдг болн керүлч гергтә бәәсн дорхнь, эҗго һазрт һанцарн бәәсн деер.

²⁰ Цецн күүнә ик үнтә зөөрнь чилдго, һәргтә күн цугтаһинь һарһад чиләдг.

²¹ Чик болн нәәлвртә бәәдл хәәсн күн җирһлән чигн, үнниг чигн, тоомсран чигн олх.

²² Цецн күн баатрмудын балһс диилх, теднә итклин улынь күүлх.

²³ Келән татсн күн, бийән зовлңгас харх.

²⁴ Сөрсхр болн караг күн – ичрән геесн күн, тиим күн модьрун йовдлдан догшн.

²⁵ Хуурмг күүнә седвәрнь үкүд, юңгад гихлә, терүнә һарнь көдлхәр седҗәхш.

²⁶ Өдр ирвәс тер седвәрәсн зовна, болв үннч күн болхла хармнл уга эд-тавран түгәнә.

²⁷ Хар саната күүнә бәрцнь – Бурхна өмн һарһсн кишго йовдл, кемр тернь хорта седвәрәр кегдхлә – терүнәс даву кишго йовдл.

²⁸ Худл герч зарһ деер келхләрн үкх, үнн герч болсн күн диилх.

²⁹ Үннч биш күн ичр-һутр уга бәәдл һарһна, болв үнн седклтә күн эврә хаалһарн йовна.

³⁰ Цецн ухан, тоолвр, селвг – цугтан Деед Эзнә өмн юмн биш.

³¹ Ноолдана өдрт әмтн мөрдән белднә, болв диилвр Деед Эзнәс ирнә.