Цецн селвгүд 2 - Хальмг келнд орчулсн Әрүн Бичлһс

Цецн Уха хәәлһн

¹ Көвүн минь, кемр мини үг авхла, келсн зааврим седклдән бәрхлә,

² Цецн Уханд оньган өгәд соңсхла, зүркәрн үннд иткхлә;

³ кемр медрләрн һардвр кехлә, үнн бәәдлд дуудвр кехлә;

⁴ тиим юмиг цаһан мөңгнлә әдләр авхар седхлә, булата зөөрән хәәҗәх мет, хәәхич –

⁵ тиигхләрн Деед Эзнә әәмшг медҗ авхич, Бурхна медрл олҗ авхич.

⁶ Юңгад гихлә, Деед Эзн цецн уха өгнә, Терүнә келснь – медрл болн тоолвр;

⁷ Деед Эзн үннч күүнә диилвр белдҗ, цеврәр бәәх улст халхцинь белдҗ.

⁸ Тер чикәр бәәлһнә хаалһинь харна, итклтә әмтнә хаалһинь харна.

⁹ Тиигәд чи чик йовдл, үнн болн үнн бәәхәр седлһнә һо бәәдлинь кевтнь медхич.

¹⁰ Яһад гихлә, чини зүркнд цецн ухан орх, медрл чини седкл девтәх.

¹¹ Чамаг мергн бәәдл хәәрлх, чамаг тоолврта бәәдл харх,

¹² чамаг хар саната йовдлас аврх, худл үгтә күүнәс аврх,

¹³ һо хаалһасн хаҗисн әмтнәс, харңһу таңгар йовсн күүнәс аврх.

¹⁴ Тедн хорта йовдл һарһсндан байрлна, хар санаһарн болн цалдң йовдларн бахан хаңһана.

¹⁵ Тедн эврә җирһлдән төөрч йовна, йовсн мөрәрн зүүләд эргнә.

Аля гергчүдәс яһҗ зулхин тускар

¹⁶ Тиим кевәр чи әмтәхн келтә күүнә гергнәс бийән хархич.

¹⁷ Баһ цагтан мордсн залуһан хайсн терүнәс болн эврә Бурхна андһар мартснас бийән хархич.

¹⁸ Тер юңгад гихлә, эн күүкд күүнә гер – үклин бәрән, хаалһнь үклин һазр тал һарна.

¹⁹ Тер гергнә герт орсн күн хәрү һаршго, җирһлин хаалһд дәкҗ оршго юмн.

²⁰ Тер учрар цаһан саната улсин хаалһар йов, үннч әмтнә хаалһ темц.

²¹ Юңгад гихлә, чик саната әмтн һазр деер бәәх, цеврәр бәәх әмтн тенд бүүрлх.

²² Ичр уга әмтиг болхла, һазр таасшго, иткл уга әмтнә уңгинь таслх.