Цецн селвгүд 19 - Хальмг келнд орчулсн Әрүн Бичлһс

¹ Һәргтә болчкад, худлч күүнәс цеврәр бәәдг угатя күн деер.

² Медрл уга болхла, күүнд тус уга, шулун-шудрмг көл чигн хаҗиҗ ишкх.

³ Кемр күүг хаалһаснь һәргнь хаҗилһхлә, тер күн Деед Эзиг гемшәнә.

⁴ Зөөртә болхла, нәәҗнр икднә, түрү зүдү бәәдл, нәәҗнриг салһна.

⁵ Худл герч шоодврас гетлгдшго, худлд бәргдсн күн әмд үлдшго.

⁶ Кесгнь баячудт зуһудна, элвгәр белг өгдг күүнлә кен чигн үүрлнә.

⁷ Угатя күүнд ах-дүүнр чигн дурго, теднәс даву – нәәҗнрнь харһхар седхш: ам аңһатл тедн уга болна.

⁸ Бийдән сә хәәҗәх күн – уха көөлднә: цецн болхларн, бийдән сә кех.

⁹ Худл герч шоодврас гетлгдшго, худлд бәргдсн күн үкх.

¹⁰ Һәргтә күүнд байн бәәдл ирлцҗәхш, терүнәс даву – ялч нойниг һардшго.

¹¹ Цухлта йовдлас чик бәәдл зогсах, эндүг тәвҗ өгснд күүнә алдр нернь медгднә.

¹² Хаана цухл – арслң аңгин оркрлһнла әдл, хаана хәәрлт ноһан деерк чииглә әдл.

¹³ Муңхг көвүн – эцкин мууль, керүлч гергн оран оңһрха мет.

¹⁴ Гер болн зөөр – эцкин үлдәсн зөөр, ухата гергн – Деед Эзнә белг.

¹⁵ Хуурмгас нөөрмү һәрг ирнә, хоома бәәдләс күн харһнна.

¹⁶ Бурхна заавр хадһлсн күн әмән хадһлна, эврәннь бәәдлән эс хәләсн күн – үкнә.

¹⁷ Һуульһнчд өгсн юмн – Деед Эзнд өггдҗәнә, тегәд Деед Эзн терүнд дүүрңгәр хәрүлх.

¹⁸ Баахн деернь көвүһән сурһ, терүгән шоодад алчквзач.

¹⁹ Модьрун заңгта күн засглгдх, терүнд тәвҗ өгәд бәәхлә – му болх.

²⁰ Селвг соңс, сурһмҗ ав, тегәд цаг ирвәс ухата болхич.

²¹ Күүнә зүркн олн седвәртә, болв зуг Деед Эзнә шиидвр күцнә.

²² Күн иткләрн үнлгднә, угатя күн худлчас хәәртә.

²³ Күн Деед Эзнә әәмшгәр әмд – терүг күцәсн күн санамр унтна, терүг зовлң дәвршго.

²⁴ Хуурмг күн һаран ааһд орулна, зуг амндан күргтлән цуцрх.

²⁵ Ичрән геесиг засглхла, дамшлт уга әмтн серглң болх, ухата күүг шоодхла, чини келсн селвг медх.

²⁶ Эцкән, экән гертәсн көөсн көвүн – ичр уга, му нертә.

²⁷ Көвүн минь! Сурһмҗ эс соңсхла, ухата үг угаһар эндүрәд бәәхич.

²⁸ Мектә герч йосиг басна, хоран күргсндән хар саната күн байрлна.

²⁹ Ичрән геесн күн зарһас давшго, муңхг күүнә нурһн кезә чигн цокулгддг.