Цецн селвгүд 17 - Хальмг келнд орчулсн Әрүн Бичлһс

¹ Нәәрләд бәәдг болн цүүгәтә герт бәәсн дорхнь, эвин бәәдлд өдмгин хатсн көрс идсн деер.

² Ухата зарц нойна һута көвүнәс йосинь авх, тегәд терүнә ах-дүүнрлә тер үлдсн зөөринь хувалцх.

³ Цаһан мөңгиг болн алтыг һалар цеврлнә, әмтнә зүркиг Деед Эзн сөрнә.

⁴ Хар саната күн худл келсиг соңсна, худлч хорта күүнә келсиг оньһна.

⁵ Угатя күүг дорацулҗ бәәснь – Бурхиг муурулҗана. Тавлҗ байрлҗахнь – засглһдлго бәәшго.

⁶ Көгшдин титм үрдиннь үрд – ачнр, зеенр, көвүдин туурмҗ – теднә эцкнр.

⁷ Сурһмҗ уга күүнд алдр үг ирлцхш, терүнәс даву күндтә күүнд худл үгмүд ирлцхш.

⁸ Өгчәх күүнд авлһ илвтә чолун болҗ медгднә: альдаран эргүлв чигн – олзта болх.

⁹ Дурлҗах күн һундлан мартна, өшәркдг күн нәәҗән геенә.

¹⁰ Һәргтә күүг цоксн зун нудрмас, келсиг меддгәр бурушасн үг серлтә күүг чаңһар өвдкәдг.

¹¹ Хар санатань зуг әмт хутххар адһна, Бурхна аврлт уга элч терүнд илгәгдх.

¹² Муңхг күүнлә һәргнь буслҗах цагт харһсн дорхнь, кичгән геесн эм аюта харһсн деер!

¹³ Сә кеснд, му кедг күүнә өрк-бүләс хорта йовдл хооран һаршго!

¹⁴ Цүүгәнә эклцнь – уста боодг таслгдснла әдл, өшәрклһн икдәд уга деер тогтн.

¹⁵ Хорта йовдл һарһсн күүнд зөв өгәд, буру угаһинь засглхла – тернь чигн, эннь чигн Деед Эзнд җигшүртә.

¹⁶ Һәргтә күн ю хәәҗ мөңгәрн бардмнҗахмб? Ухан уга болхла, цецн уха яһҗ хулдҗ авхмб?

¹⁷ Иньгин дурн цаг һатлҗ үлднә, ах-дү әмтн зовлң хоорндан хувалцхар төрсмн.

¹⁸ Тоолвр угань адһҗ дөңнхәр һаран өгнә, талдан күүнә төриг бийдән авна.

¹⁹ Цүүгәнд дурта күн – хорта йовдлд дурта, деерлкдг күн көлврхән хәәҗәнә.

²⁰ Худлч күүнд амулң бәәдл үзгдшго, хорта келн засгла харһулдг.

²¹ Муңхг үр һарһсн эк-эцк – бийдән зовлң һарһсмн: һарһсн көвүнәннь му заңд байрлҗ болшго.

²² Зүркнд буусн байр – хамгин сән эм, даҗргдсн седкл – цогц-махмуд барна.

²³ Седкл уга күн дораһар авлһ авна. Терүгәрн зарһд харшлна.

²⁴ Медрлтә күүнә хәләц цецн уханд тусна, һәргтә күүнә хәләц күсл уга.

²⁵ Муңхг көвүн – эцкин һундл болн экин һашудлһн.

²⁶ Буру уга күүнәс неклһн, эс гихлә цаһан санатаг илднь келснд шоодлһн – му йовдл.

²⁷ Дамшлтта күн үгдән саг, серлтәнь бийән бәрҗ чаддг күн.

²⁸ Һәргтә күн тагчг бәәхләрн – ухатад тоолгдад чигн одх, амнь хаалһатань – ухата болҗ медгдх.