Цецн селвгүд 16 - Хальмг келнд орчулсн Әрүн Бичлһс

¹ Күүнә зүркнд санан орна, болв күцәхнь Деед Эзнәс һарна.

² Күн болһн эврәннь хаалһан чик гиҗ санна, болв Деед Эзн теднә седклинь сөрнә.

³ Деед Эзнд эврә кергән даалһ, тегәд чини сансн күцх.

⁴ Цуг тоотыг Деед Эзн эврәннь зураһар үүдәлә, хар санатань зовлңта өдрин төлә.

⁵ Деерлкдг зүрктә күн Деед Эзнд җигшүртә, засглһнас тер төрүц мөлтрҗ һарч чадшго.

⁶ Иткл болн үнн буру юмиг хәрүлнә, Деед Эзнәс әәнә гиснь, тернь зовлңгиг уга келһн.

⁷ Кемр Деед Эзнд күүнә хаалһ таасгдхла, терүнә хортнриг чигн терүнлә Тер эвцүлх.

⁸ Йоснла ирлцән уга байн оруһас, үнн болхла – чимкнь чигн деер.

⁹ Күн болһн эврә хаалһан шүүҗ авна, болв ишкдлин батыг Деед Эзн шүүҗ өгнә.

¹⁰ Бурхна өгсн үгмүд хаана келнд, болв тер шиидвртән эндүрхш.

¹¹ Чиңнүр төв болхла – тернь Деед Эзнәс ирҗәнә, хулдлһна гиир Терүнә үлмәд бәәнә.

¹² Хар саната йовдл хаадудт җигшүртә, теднә ширә үннәр батлгдх.

¹³ Хаадудт чикәр келсн күн таасгдна, үннәр келсн күн теднд хәәртә.

¹⁴ Хаана ур үклд чигн күргх, болв цецн күн терүг чигн урдаснь хөрх.

¹⁵ Хаана герлтә хәләцд Тер җирһл өгнә, Терүнә ик күндллһн – асхрад орсн хаврин хурла әдл.

¹⁶ Алт хоршасн дорхнь, медрл хоршасн деер, цевр цаһан мөңг икдүлхәр, ухаһан икдүлсн деер.

¹⁷ Чик саната күүнә хаалһ хорта бәәдләс хөрнә, хаалһасн эс төөрсн күн – җирһлән харсна.

¹⁸ Ик сана зүүхлә – зовлң һардг, деегүр бәәдләс бүдрдг.

¹⁹ Караг күүнә хулха-була зөөр хувалцсн дорхнь, угатя әмтнлә басгдад бәәсн ке.

²⁰ Тоолврта күн сән җирһлин көрңгтә болна. Деед Эзнд нәәлсн күн кишгтә болна.

²¹ Зүркәрн цецн күн серлтәд тоолгддг, төв келн иткл немх.

²² Кемр тоолвр бәәхлә – җирһлин булг, һәргтә күүнә засгллһнь – бийиннь һәргллһн болҗана.

²³ Цецн күүнә ухань үгинь зааҗ өгәд, терүнә келнд иткл немх.

²⁴ Җөөлн үг зөөгин балын гер мет: седклд әмтәхн, цогц-махмудт әмдрлт.

²⁵ Зәрм хаалһ һо чигн болҗ медгднә, болв аштнь үклд күргнә.

²⁶ Харһнад ирхләрн көдлмшч күн бийдән амр өгшго.

²⁷ Му күн хар санхларн – олмһа, терүнә келн һал шатҗаснла әдл.

²⁸ Аврлт уга күн цүүгә татна, ховч күн иньгүдиг салһна.

²⁹ Хорта йовдл һарһдг күн хаҗудк күүнә седкл авлна, тегәд му хаалһ тал терүг түлкнә.

³⁰ Нүдән бүрилһсн күн му йовдл һарһхар седнә: зәрмнь урлан коочилһәд һәргтә юм һарһна.

³¹ Толһан цәәсн үсн – гилвкҗәх титм, үнн хаалһин чилгч.

³² Ур уга болсн – баатр күчнәс деер. Бийән бәрдг күн – балһсна дииләчәс өөдән.

³³ Әмтн җирв татна, болв ямаран чигн шиидвр Деедс Эзнәс ирнә.