Цецн селвгүд 14 - Хальмг келнд орчулсн Әрүн Бичлһс

¹ Күүкд күүнә цецнәр гер босхгдна, һәргтә күүкд күн эврән герән нурана.

² Деед Эзнәс әәсн күн һоодан йовна, Терүнд дурго болснь хаҗиһәд йовна.

³ Деегүр күүнә бурлһн – бийднь маля, цецн күүнә келн – бийднь харул.

⁴ Мал угад – буудя хадһлдг орм хоосн. Күчтә малта болхла, тәрәнь элвг.

⁵ Нәәлвртә герч меклдмн биш, хар саната герч худлар буслна.

⁶ Ичрән геесн күн цецн бәәдл хәәнә – олҗ чадхш, тоолврта күүнд медрл амрар ирнә.

⁷ Һәргтә күүнәс холд йов, терүнәс ухата үг һаршго.

⁸ Тоолврта күүнә цецн ухань – бийиннь хаалһан медлһн, һәргтә күүнә тоолвр татунь – теднә эндүрлһн.

⁹ Һәргтә әмтн эврәннь килнцән төртән авхш, болв Деед Эзн үнн седклтә әмтиг әдслнә.

¹⁰ Зуг зүркн эврә һундлан меднә, терүнә байриг талын улс хуваҗ чадшго.

¹¹ Хар саната күүнә гер нурад хамхрна, үнн седклтә күүнә гер дотр элвг-делвг.

¹² Зәрм хаалһ һо чигн болҗ медгднә, болв аштнь үклд күргнә.

¹³ Зәрмдән байрлҗаһад зүркн һундрхна, байрин ардас гейүрәд одна.

¹⁴ Хар саната күн хәәсән олҗ авх, сән күн болхла, авц-бәрцәрн ачлгдх.

¹⁵ Генн күн үг болһнд иткдг, тоолврта күн ишкдл болһнан шинҗлдг.

¹⁶ Цецн күн хар сананас әәнә, зулна, зуг һәргтә күн дәврәч, юмнас әәхш.

¹⁷ Шулун уурлдг күн һәргтә йовдл һарһна, хорта күүнд әмтн дурго болна.

¹⁸ Дамшлт уга күүнә бәәдл муңхг, серглң күүнә ачлврнь медрл болҗана.

¹⁹ Хорта күн сән әмтнә өмн сөгдх, хар санатань үннч күүнә үүднд сөгдх.

²⁰ Угатя күүнәс нам хоша бәәх күн зулна, болв байн күүнд кесгнь дурлна.

²¹ Зуг хом-хоша бәәх күүнд дурго болҗахнь килнц авчана, болв угатя күүнд килмҗән өгснь – кишгтә.

²² Хорта йовдл һарһхар седҗәх күн – хаалһасн хаҗих. Болв сән йовдл һарһҗах күн – итклтә болн үннч.

²³ Күнд көдлмшәс кезә чигн немлт ирнә, бурлһнас зуг түрү үзгднә.

²⁴ Цецн әмтнә титмнь – теднә зөөр, һәргтә әмтнә кеерүл – теднә му заң.

²⁵ Итклтә герч җирһл харна, хорта күн худлар дүүрң.

²⁶ Деед Эзнәс әәлһн – итклтә харслт, чамд болн чини үрдүдт хорһдх бәәрн.

²⁷ Деед Эзнәс әәлһн – җирһлин булг, Тер үклин бәрәнәс харсна.

²⁸ Орн-нутгтнь олн улс бәәхлә – хан алдр, кемр олн-әмтн баһрхла – нойна күчн унна.

²⁹ Шулун уурлдго күн ухата, болв шулун уурлдгнь му заңган үзүлнә.

³⁰ Зүркн тогтун болхла – цогц-махмуд эрүл-менд, болв үлү үзлһн – ясна үмкәрлһн.

³¹ Угатя әмтиг шахснь – Деед Эзиг муурулҗана, һуульһнч әмтнд килмҗән өгснь – Деед Эзиг туурулх.

³² Чик санан уга әмтнә хорнь бий деернь буух, болв үннч күүг цеврәр бәәснь харсх.

³³ Цецн ухан цаһан седклтә күүнә зүркнд бәәнә, һәргтә әмтнә зүркнд тернь олдшго.

³⁴ Олн-әмтн үнн бәәдләрн алдр, болв килнц тедниг идҗәнә.

³⁵ Хан Цецн Ухата ялчиг таасна, ичртә йовдл һарһдг күүнд догшар уурлна.