Цецн селвгүд 13 - Хальмг келнд орчулсн Әрүн Бичлһс

¹ Көвүнә ухань эцкин сурһмҗас, деегүр күн шоодлһ соңсхш.

² Сән күн келсн үгдән ханна, хар саната күүнә седвәр күч үзүлһнд күргнә.

³ Үгән төвлсн күн – җирһлән хадһлх, үгән ухаллго келсн күн – бийән барх.

⁴ Хуурмг күн күләҗ-күләҗ күләсән авч чаддго, кинән күүнд цугнь элвг.

⁵ Чик седклтә күн худлд дурго, му седклтә күн бийән һутана, бийән ичәнә.

⁶ Сән керг һо хаалһд һарһна, му йовдл килнцтә әмтиг хаалһаснь хаҗилһнә.

⁷ Зәрм күн, юмн уга болвчн, бийән баяч кевтәһәр бәрнә. Зәрмнь, зөвәр байн болв чигн, түрү бәәдл һарһна.

⁸ Зөөр күүнә җирһл хадһлна, болв угатя күүг күн зовашго.

⁹ Цаһан саната күүнә герл байртаһар һарх, хар саната әмтнә герлнь унтрх.

¹⁰ Ик сананас цүүгән болна, болв селвг авсн күн цецн.

¹¹ Эндүһәр олсн зөөр генткн уга болх, болв терүг умшар олсн болхла, күн байҗх.

¹² Эс күцсн нәәлвр – зүркнә өвдкүр, кемр иткл күцхлә, җирһл дүүрнә.

¹³ Келсиг эс итксн күн – бийдән му кенә, заавриг итксн күн ачлгдна.

¹⁴ Цецн күүнә селвг – җирһлин булг, тернь үклин гөлмәс харна.

¹⁵ Серглң ухан хәәрлт өгнә, хорта йовдл үкл тал көтлнә.

¹⁶ Ухата күн кехәсн өмн ухална, һәргтә күн һәргән му йовдларн үзүлнә.

¹⁷ Һәргтә зәңгч үүлән үзх, итклтә зәңгч әмдрлд күргнә.

¹⁸ Сурһмҗ эс авсиг ичртә йовдл болн түрү бәәдл күләнә, хөрлт соңссн болхла, тиимнь ачта.

¹⁹ Седвәр күцхлә, седкл байрлна, һәргтә күүнд хар санаһан хайснас мунь уга.

²⁰ Цецн күүнлә үүрлхлә, эврән цецн болхич, һәргтә күүнлә үүрлхлә, эврән зовлңла харһхич.

²¹ Килнцтә күүг зовлң ээрнә, цаһан саната күүнд юмна сәнь өггднә.

²² Сән күн үрндән болн ачнртан зөөрән үлдәнә, хар саната күүнә зөөр аштнь үннч күүнә һарт орна.

²³ Түрү-яду улсин урһцнь элвг болсн бийнь, йоснд уга йовдл һарһдг әмтн терүгинь күчәр булаҗ авна.

²⁴ Шоодхасн әрвлснь, көвүһән әрвлшго, үрндән дуртань, уха орулхан мартшго.

²⁵ Цаһан саната күн цадтлан иднә, хар саната әмтнә геснь хоосн.