Цецн селвгүд 1 - Хальмг келнд орчулсн Әрүн Бичлһс

¹ Давидин көвүнә – Израилин хан Соломона цецн селвгүд.

Цецн селвгүдин чинрин тускар

² Эн цецн селвгүд мергн уха, сурһмҗ медҗ авхар седсн күүнд келсн үгин учр-утхинь медхд туста болх.

³ Тедн цаһан седклин диг-дара авхд, эндү һарһшгод, чикәр бәәхд, үнн седклтә болхд дөңнх.

⁴ Дамшлт уга әмтнд уха немәд авхд, баһ настад медрлтә болн цецн болхд эн цецн селвгүд бас дөң болх.

⁵ Цецн күн чигн тедниг соңсхларн, медрлән икдүлх. Ухатань чигн цецн селвгүд олҗ авх.

⁶ Теҗгәр келсиг, үлгүрмүд болн цецн күүнә келснәс ахр үгмүд, теднә тәәлвртә туульс медхд эн цецн селвгүд дөң болх.

Баһчудт өгчәх ухата селвг

⁷ Деед Эзнәс әәнә гиснь тернь медрлин эклц болҗана! Цецн Уханд болн сурһмҗд дурго болсн күн һәргтә.

⁸ Көвүн, эцкиннь заавр соңс, экиннь ном бичә һол:

⁹ энчн чини толһад зогх берк сәәхн титм, күзүнд зүүгдх кеерүл.

¹⁰ Көвүн минь, кемр чамаг килнцтә күн мекәр дуудҗ авхар седхлә, бичә од.

¹¹ Тедн келх: «Маднла йовий, гетлһ кехмн, алхмн, буру уга әмт гетхмн!

¹² Тедниг бидн үклин һазрла әдләр әмдәр зальгхмн, үксн күүг үкәр авдгар кехмн.

¹³ Олн зүсн зөөр хулхалҗ авхвидн, авсн юмарн эврәннь герән дүүргхвидн;

¹⁴ маднла хамдан җивр хайхич, маднд туссн хүв, чамд чигн тусх!»

¹⁵ Көвүн минь, теднә хаалһар бичә хамдан йов, теднә хаалһд һархасн сагл,

¹⁶ яһад гихлә, тедн му йовдл һарһхар седҗәнә, кү алхар адһҗана.

¹⁷ Эрвлзәд нисҗәх шовудын өмн гөлмс татад тус уга;

¹⁸ тедү мет тедн бийиннь үклин төлә гетлһ кеҗәнә, зуг җирһлән бархин төлә бултҗана.

¹⁹ Алач күүнә чилгчнь тиим: бийнь толһа уга үлдх.

Цецн Ухана үг

²⁰ Цецн Ухан, һаза чаңһар дуудҗах күүкд күн мет соңсгдна, олна талвңд терүнә дунь өөдлнә.

²¹ Цецн Ухан шууга татҗ әмтн дунд үгән күргнә, олна нүүрт тер келнә:

²² Кедү цагтан дамшлт уга күн эгл бәәдлдән көшҗ бәргдхмби, ичрән гееснь – терүгәрн бийән саатулхмби? Һәргтәнь – медрлд дурго болхмби?

²³ Мини шоодсиг эргәд соңстн – эврәннь седклиг таднд медүлсүв, эврәннь үгән таднд күргсүв.

²⁴ Би дуудв – тадн буру хәләвт; һаран өгхлә, тадн эс үзсн болвт.

²⁵ Тадн мини селвг бурушавт, тадн мини шоодлһ авсн угат.

²⁶ Тиигхлә, таднд зовлң учрхла – дөөглсүв, тадниг аюлд бәргдхлә, би наад бәрсүв!

²⁷ Догшн салькн көдлдг метәр, тиигҗ әәмшг таднд ирх. Һалв салькнла әдләр зовлң ирх; тадн мухлаллһнд болн күнд ацанд даргдхит.

²⁸ Тер цагт һәргтә әмтн намаг дуудхла, би хәрү өгшгов, тер цагт намаг хәәхлә, олҗ чадшго.

²⁹ Юңгад гихлә, медрлд дурго болсндан, юңгад гихлә, Деед Эзнә әәмшг бурушасндан,

³⁰ юңгад гихлә, мини селвг эс авсндан, юңгад гихлә, мини шоодлһнд дөөглсндән.

³¹ Тиигәд һарһсн гемән тедн эврән эдлх, тиигәд му ухандан бууртлан цадх.

³² Дамшлт уга күүг заңгнь үрәх, һәргтә күүг санамр бәәдл үрәх.

³³ Болв намаг соңссн әмтн амулң бәәх. Тедн юн чигн зовлңгас әәш уга.