Соломона хамгин сән дун 8 - Хальмг келнд орчулсн Әрүн Бичлһс

¹ – Ай, чи мини ах болад, Мини экин көк көксн болхлаг! Чамла һаза харһад, Чамаг би үмсх биләв. Намаг күн гемшәшго билә.

² Би чамаг дахулад, Бийим өсксн экиннь герт орулх биләв. Чамаг би амтта чаһрар тоох биләв, Чамаг би гранатын шүүсәр тоох биләв.

³ Терүнә зүн һарнь – мини толһа дор бәәтхә. Терүнә барун һарнь – минь ода намаг тевртхә!

⁴ Ерусалимин күүкд, тадниг Йир сурҗанав: Дуриг бичә серүлтн, Дурн эврән эс сертл, Дуудад бичә бәәтн! [Ерусалимин күүкд:]

Зурһадгч дун

⁵ – Көдә һазрас аашхнь кемб? Иньгән һараснь бәрҗ йовна. [Күүкн:] – Чамаг би альмна модн дор серүлв, Чамаг экчнь тенд һарһла, Тенд чамаг тер һарһла.

⁶ Намаг зүркндән тамһ мет бәр, Намаг һартан тамһта билцг мет бәр. Дурн үкл мет бат. Дурнд авлгдхла үкллә әдл күчр; Терүнә сумн – һал мет, Дурн шатҗах һал мет.

⁷ Дуриг буслҗах усн чигн унтрашго, Дуриг урсхул чигн авшго. Дурна төлә бәәсн зөөрән өгхәр седсиг Делкә терүг һәәлх билә. [Күүкнә ахнр:]

⁸ – Мана дү басл бичкн: Терүнд көкн чигн уга. Тегәд худнр болхар седхлә Бидн тиигәд яахмб?

⁹ Кемр тер бат эрс болсн болхла, Терүг цаһан мөңгәр кеерүлх биләвидн. Кемр тер үүдн болсн болхла, Терүг хошун модар ширх биләвидн. [Күүкн:]

¹⁰ – Би бат эрсв, Мини хойр көкн башнь мет. Тегәд би терүнд Насн күцсн болҗ медгднәв! [Күүкн:]

¹¹ – Баал-Гамон гидг һазрт Соломона уста үзмин тәрән бәәлә. Терүг тәрәчнрт нәәмәдлҗ өгдмн, Тегәд күн болһн миңһәд мөңг Өгх йоста болдмн.

¹² Уста үзмин тәрән нанд бәәнә. Миңһнь – Танд, Соломон, хошаһад зунь – тәрәчнрт! [Көвүн:]

¹³ – Тәрәнд бәәдг күүкн, Чини ду мини үүрмүд соңсҗана, Чамаг соңсх зөв нанд бас өгич! [Күүкн:]

¹⁴ – Баахн буһ-марл кевтә, Бичкн гөрәснә хурһн кевтә Каңкнсн үнртә уулмуд дотраһар, Дурта иньгм, гүүһәд йов!