Соломона хамгин сән дун 7 - Хальмг келнд орчулсн Әрүн Бичлһс

¹ – Хәрү ир, хәрү ир, Шулама күүкн! Хәрү ир, хәрү ир. Хәләнәвидн чамаг! [Күүкн:] – Намаг ю хәәҗ хәләхмбт, Намаг Шулама күүкиг, Маханаимин би биилҗәнә гиһәдий? [Көвүн:]

² – О, хәәртә күүкн, чини буршмгта көл ямаран сәәхн! Чини мах бәрсн таша төөлг мет, Терүг алт цутхдг эрдмч кеснлә әдл.

³ Чини киисн – төгрг ааһ мет: Терүнәс амтта чаһр бичә чилтхә. Чини гесн – ова буудя. Терүг лилия цецгүд бүслҗәнә.

⁴ Чини көкн – хойр бичкн хурһд, Теднь гөрәснә икр хурһд мет.

⁵ Чини күзүн – занын яснас кесн башнь мет, Чини нүдн – алдр балһсн Хешбона үүднд бәәсн нуурин бәәдлтә. Чини хамр – Ливан һазра башнь мет. Тер Дамаск тал хурцар хәләҗәнә.

⁶ Чини толһа – Кармил уулын бәәдлтә, Чини толһан үсн – чисм улан өңгәр гилвкнә! Отхта үснд хан дурлва.

⁷ Дурн ямаран әмтәхнч: Олн таалмҗсас хамгин сәнч!

⁸ Чини цогц – пальм моднла әдл, Чини көкн – уста үзмин сала.

⁹ Би пальм деер һарсув, – гиҗ санв. – Терүнә темстә ацмудас бәрсүв… Чини көкн уста үзмин сала болтха, Чини әмсхл – альмна үнр болтха,

¹⁰ Чини урл – сән чаһр болтха… [Күүкн:] – …Мини улан урлас асхрад, Мини иньгин амнд тустан орҗана.

¹¹ Би иньгиннь күүкмб, Тер намаг авлхар седнә. [Күүкн:]

¹² – Иньг минь! Тег тал һарий, Хна урһҗах һазрт бидн хамдан сөөһән давулхмн.

¹³ Өр цәәҗәх кемлә Одхмн уста үзмин тәрәнд. Одад бура көкрҗәхинь хәләхмн. Тер экләд цецгәлҗәхинь хәләхмн, Тенд гранат цецгәлҗәхинь хәләхмн. Тенд би чамаг таалнав.

¹⁴ Мандрагорс урһмл каңкнҗана, Мана герин үүднд олн темсн бәәнә; Шин урһмлас зүсн-зүүл, урдк тәрәнәс чамд, иньгм, үлдәвүв.